شىنخۇا ئاگېنتلىقى، ۋاشىنگتون، تېلېگراممىسى. خەلقئارا پۇل فوندى تەشكىلاتىنىڭ لىدىرى كىرىستىنا لاگارد 15 – سېنتەبىر: دۇنيا ئىقتىسادى خەتەرلىك يېڭى باسقۇچقا قەدەم قويدى، ھەممەيلەن بىر نىيەتتە ھەمكارلىشىپ، دۇنيا ئىقتىسادىنى ئەسلىگە كەلتۈرۈش ئىشەنچىسىنى تۇرغۇزۇشى كېرەك، دېدى.
لاگارد شۇ كۈنى ۋاشىنگتوندىكى ئاقىللار ئامبىرى ۋۇدروۋ ۋىلسون مەركىزىدە نۇتۇق سۆزلىگەندە: ‹‹ھازىر ئېغىر ئىقتىسادىي تەشۋىش مەزگىلىدە تۇرۇۋاتىمىز. ئەگەر بىر نىيەتتە ھەمكارلاشمىساق، بۇ دۇنيا جىددىي ئېھتىياج بولۇۋاتقان ئىشەنچنى ئەسلىگە كەلتۈرەلمەيمىز››، دېدى.
لاگارد مۇنداق دېدى: دۇنيا ئىقتىسادىنىڭ كاساتلىشىش خەۋپى ئاشماقتا، ئەمما، يەنىلا ئۈمىد بار. پۈتۈن دۇنيا كۈچلۈك سىياسىي ئىستەككە موھتاج، پۇرسەتنى چىڭ تۇتۇپ، ھەمكارلىقنى كۈچەيتىپ، ھەرىكەت قوللانغاندا، دۇنيا ئىقتىسادىنى جانلاندۇرغىلى بولىدۇ.
بۇ قېتىمقى نۇتۇق لاگارد يېقىندا ئۆتكۈزۈلىدىغان خەلقئارا پۇل فوندى تەشكىلاتى ۋە دۇنيا بانكىسىنىڭ يىللىق يىغىنىدىن بۇرۇن قىلغان مۇھىم نۇتۇقلىرىنىڭ بىرى. ئىككى چوڭ خەلقئارالىق تەشكىلاتنىڭ 2011 – يىللىق يىغىنى 23 – سېنتەبىردىن 25 – سېنتەبىرگىچە ۋاشىنگتوندا ئۆتكۈزۈلىدۇ.
