ئابدۇشۈكۈر راشىدىن
(نەرسىي شىئېر)
قەلبىم قەسرىدە نۇرلۇق بىر سىماھ،  ئۇ بولسىمۇ مۇئەللىم -  –ئېلاھ.
بەكمۇ ئۇزۇن ئۇزۇندىن بۇيان، كۆڭلۈمدە بىر سىماھ ئورنى بىپايان، ھەر كۈي مىسرا-تېنىقلىرىمدا ، بىر خىسلەتنى قىلىپ نامايان، بىر ھېكمەتنى قىلىدۇ بايان.
 شۇندىن بۇيان قەلبىم كۆكىدە، مۇئەللىم ئىسمىڭنى قىلغاندا زىكرى، يىلىنجاپ يانىدۇ قوياشتەك بىر ئوت، كۈۋەجەپ ئاقىدۇ بىر ئەزىم دەريا، يېقىشلىق سۆيىدۇ بىر ئىللىق شامال، ۋىلىقلاپ كۈلىدۇ  كۆكتە يۇلتۇزلار ، بۈ قانداق كۈي  ئېيتقىنا ئانا؟  ئېيتقىنا سۆيۈملىك كۈلگۈنچەك دۇنيا؟
سۈبھىدەمدىن رەڭدار لەگلەكتەك، قانات قېقىپ چىققان قايسى قۇش؟ قاچان ساڭا تىل چىقتى تاغلار، قاچان ساڭا تىل چىقتى جىرا، قاچان ساڭا تىل چىقتى باغلار،قاچان نېسىپ بولدىكىن ساڭا،  بۇنداق ئېسىل ناخشىنى ئوقۇش؟ شۇ ناخشىنىڭ ھەر بىر كۈيىدە، ئۇستاز ئۈچۈن ھەدىيە توقۇش! بۈ قانداق كۈي  ئېيتقىنا ئانا؟  ئېيتقىنا سۆيۈملىك كۈلگۈنچەك دۇنيا؟
مۇئەللىم ، تەرىپىڭنى قىلغانچە قانچە،  ئۇلغايماقتا مۇھەببەت شۇنچە، گۈل رەڭگىدە نازلىنىپ دۇنيا، كۆرۈنمەكتە بېلى مۈكچەيگەن، ئاپئاق چاچلىق چاللارمۇ بەرنا. ئايلانماقتا كۆز ئالدىمىزدا، ئالمىچىلىك ئالەمگە دۇنيا. بۈ قانداق كۈي  ئېيتقىنا ئانا؟  ئېيتقىنا سۆيۈملىك كۈلگۈنچەك دۇنيا؟
مۇئەللىم، زىكرى قىلسام نامىڭنى قانچە، سۆيۈنىدۇ يۈرىكىم شۇنچە. چۈنكى سەن بار قوياشلىق ئالەم، چۈنكى سەن بار ئادەمدەك ئادەم. چۈنكى سەن بار ئالەمدەك ئالەم.چۈنكى سەن بار بېخىللار ھاتەم.  بۈ قانداق كۈي  ئېيتقىنا ئانا؟  ئېيتقىنا سۆيۈملىك كۈلگۈنچەك دۇنيا؟
مۇئەللىم، سۈبھىدىكى ئوتلۇق قوياشقا ، ئوخشاپ كېتەر سېنىڭ يۈرىكىڭ، ئوخشاپ كېتەر قوياش نۇرىغا، بىزدىن كۈتكەن ئۈمىد-تېلىكىڭ. بۈ قانداق كۈي  ئېيتقىنا ئانا؟ ئېيتقىنا سۆيۈملىك كۈلگۈنچەك دۇنيا؟

ئەسكەرتىش:ئاپتۇرنىڭ ھاۋالىسى بىلەن بۇ تېما يوللاندى.