ئەسسەلامۇ ئەلەيكۇم قېرىنداشلار!
ئىگىمىز ئاللاھنىڭ ئۇرۇنلاشتۇرۇشى بىلەن يەنە بىر رامىزان ئېينى ئۆتكۈزدۇك ۋە بۇ ئاي بىزگە سەۋرچانلىقنى ئۆگەتتى، ئاچ - توق ياشايدىغان پېقىر - مىسكىنلەرنىڭ ئەھۋالىنى ئەسلەتتى. ئاللاھنىڭ مۇۋۋەق قىلىشى بىلەن نۇرغۇنلىرىمىز روزا تۇتۇش، تەراۋىھ ۋە نەپلە نامازلارنى ئوقۇغاندىن سىرت رامىزاننىڭ تېشىدا قىلالمايدىغان كۆپلىگەن ياخشى ئىشلارنى قىلىۋالدۇق (دەپ پەرەز قىلىمەن!).
ئەمدى رامىزاندا ئادەتلەنگەن بۇ ياخشى خىسلەتلەرنى رامىزاندىن كېيىنلا ئۇنتۇپ كەتمەسلىكىمىز، ئەكسىچە پۈتۈن يىل بويىچە، ھەتتا ئۆمرىمىزنىڭ ئاخىرىغىچە داۋاملاشتۇرۇشقا تىرىشىشىمىز لازىم. چۈنكى بۇ ئۆگەنگەن ۋە ئادەتلەنگەنلىرىمىز رامىزانلىق ئىشلار بولماستىن، مۇسۇلماننىڭ ھاياتىدا داۋاملىق بولۇشقا تىگىشلىك ئىشلاردۇر. جانابى ئاللاھ بىزگە قۇرئان كەرىم نازىل بولغان بۇ مۇبارەك ئاينى تائەت - ئىبادەت بىلەن ئۆتكۈزۈشىمىز ۋە ئۇنتۇپ كېتىلىۋاتقان، ئىسىمىزدىن چىقىپ كېتىۋاتقان بەندىچىلىك ۋەزىپىلىرىمىزنى ئىسىمىزگە ئېلىۋېلىشىمىز ئۈچۈن پۇرسەت يارىتىپ بەرگەن ئىكەن، بۇ پۇرسەتنى غەنىمەت بىلىشىمىز، ئۇنى ۋاقىتلىق دەپ چۈشىنىۋالماستىن، ھاياتىمىزدا ئۆزلەشتۈرۈشكە تىرىشىمىز لازىم...
بۇ جۈملىدىن پەيغەمبەر ئەلەيھىسسالامنىڭ :
«كىمكى رامزان روزىسىنى تۇتۇپ بولۇپ ئارقىسىدىن شەۋۋال ئېيىدا ئالتە كۈن روزا تۇتسا زاماندىن زامانغا روزا تۇتقانغا ئوخشاش بولىدۇ».
(مۇسلىم رىۋايەت قىلغان) دېگەن ھەدىسىدىكى تەۋسىيەگە قۇلاپ سېلىپ ئۆتكەن ئاينى روزا بىلەن ئۆتكۈزۈپ ھەم ئاللاھنىڭ ئەمرىنى بەجا كەلتۈرگەن، ھەم ئۆزىمىزدە ياخشى خىسلەتلەرنى مۇجەسسەملەشتۈرگىنىمىزدەك، بۇ ئايدا 6 كۈن روزا تۇتۇش ئارقىلىق پۈتۈن يىلىمىزنى روزا بىلەن ئۆتكۈزگەنلىكنىڭ ساۋابىنى ئېلىشقا تىرىشايلى...
روزا تۇتۇشتا ئارقىمۇ ئارقىدىن تۇتساقمۇ بولىدۇ. ياكى بولمىسا پەيغەمبەر ئەلەيھىسسالامنىڭ يول كۆرسىتىش بويىچە مېڭىپ ھەر ھەپتىنىڭ دۈشەنبە ۋە پەيشەنبە كۈنلىرى تۇتساقمۇ بولىدۇ...
ئاللاھ قۇبۇل قىلسۇن!
جانابى ئاللاھ بىزگە رامىزاندا قولغا كەلتۈرگەن پەزىلەتلەرنى پۈتۈن ئۆمرىمىزدە قولدىن بەرمەيدىغان ئاڭ، شۇئۇر ئاتا قىلسۇن! مۇسۇلمانغا لايىق ياشاشنى نېسىپ قىلسۇن! بىزنى زالىملار بىلەن سىنىمىسۇن، قىز - ئاياللىرىمىز بىلەن ئىمتىھان قىلمىسۇن! ئۆزىنى داۋاملىق ئەسلەش، داۋاملىق بەندىچىلىك قىلىش، بەرگەن نېمەتلىرىگە ئەڭ ياخشى رەۋىشتە بەندىچىلىك قىلىش ئارقىلىق تەشەككۈر بىلدۈرۈشنى بىزگە مۇيەسسەر قىلسۇن! ئامىين!
http://www.uighurislam.net/read.php?tid-1641.html[ بۇ يازمىنىsad~da 2011-09-02 16:58قايتا تەھرىرلىدى ]
