بىر سودىگەر خىزمەتچى خادىم ياللىماقچى بوپتۇ ۋە دۇكىنىنىڭ دېرىزىسىگە مۇنداق بىر ئېلان چاپلاپتۇ :
« خادىم قوبۇل قىلىش ئېلانى ماڭا ئۆزىنى كونتىرول قىلالايدىغان ياردەمچى كېرەك ، ھەپتىلىك ئىش ھەققى تۆت دوللار ،ئەگەر مۇۋاپىق كەلگۈچىلەر بولسا ھەپتىسىگە ئالتە دوللار بېرىلىدۇ » .
« ئۆزىنى كونتىرول قىلالايدىغان بولۇش » دېگەن بۇ سۆز ئەتراپتىكى كىشىلەرنىڭ مۇنزىرە تېمىسىغا ئايلىنىپتۇ ، بۇنى تازا دانا بولمىغان تەلەپ دەپ قارىشىپتۇ .شۇنىڭ بىلەن بىرگە يەنە بىر قىسىم ياشلار ۋە ئاتا – ئانىلارنىڭ دىققىتىنى تارتىپتۇ ، ئۇزاق ئۆتمەي بىر توپ ياشلار خىزمەت ئىزدەپ كەپتۇ .
ھەر بىر خىزمەت ئىزدىگۈچى مۇنداق بىر ئالاھىدە « ئىمتىھان » نى باشتىن كەچۈرۈپتۇ .
- سەن گېزىت ئوقۇيالامسەن بالام ؟
- ئوقۇيالايمەن ئەپەندىم ؛
- ئۇنداقتا مۇنۇ گېزىتتىكى ماقالىنى ماڭا ئوقۇپ بېرەمسەن ؟ دەپتۇ سودىگەر بىر پارچە گېزىتنى ياش بالىنىڭ ئالدىغا قويۇپ .
- بولىدۇ ئەپەندىم ؛
- سەن توختىماي ھەممىنى بىراقلا ئوقىۋېتەلەمسەن ؟
- بولىدۇ ئەپەندىم .
- ئۇنداقتا ناھايىتى ياخشى ، سودىگەر ياش بالىنى شەخسىي ئىشخانىسىغا باشلاپ كىرىپ ئۇنىڭغا بىر پارچە گېزىتنى بېرىپتۇ ، بالا گېزىتنى ئەمدىلا ئوقۇشنى باشلىشىغا سودىگەر بىر – بىرىدىن ئوماق ئالتە كىچىك كۈچۈكنى ئىشخانىغا قويىۋېتىپتۇ ، كۈچۈكلەر ئويناپ – تاقلاپ بالىنىڭ ئەتراپىدا پەرۋانە بولۇپتۇ ، بالا گېزىت ئوقۇشتىن توختاپ كۈچۈكلەرگە مەستلىكى كەلگىنىچە ئۇلارغا قاراپ قاپتۇ ۋە ئۆزىنىڭ ۋەزىپىسىنى ئۇنتۇپتۇ . ئاخىرىدا خاتا ئوقۇپ سېلىپ بۇ خىزمەتتىن مەھرۇم قاپتۇ .
شۇنداق قىلىپ سودىگەر 70 ياشنى سىناپتۇ ، ئەڭ ئاخىرى بىر ئوغۇل بالا ئېزىقتۇرۇشلارغا بەرداشلىق بېرىپ گېزىتنى ئوقۇپ تۈگىتىپتۇ ، سودىگەر بۇنىڭدىن ناھايىتى خۇشال بوپتۇ ۋە بالىدىن سوراپتۇ :
سەن گېزىت ئوقىۋاتقاندا ئەتراپىڭدا ئوماق كۈچۈكلەرنى بايقىمىدىڭمۇ ؟
- بايقىدىم ئەپەندىم ؛
- ئەمىسە نېمىشقا ئۇلارغا قاراپ باقمايسەن ؟
- چۈنكى مەن سىزگە گېزىتنى توختىماي ئوقۇپ بولۇشقا ۋەدە بەرگەن ئەپەندىم .
- سەن ھەر دائىم مۇشۇنداق ۋەدەڭگە ئەمەل قىلامسەن ؟
- شۇنداق ، مەن ئامالنىڭ بارىچە ۋەدەمدە تۇرىمەن .
سودىگەر خۇشاللىق بىلەن ئۇنى قوبۇل قىپتۇ ۋە مۇنداق دەپتۇ : « بالام ، ماڭا كېرىكى دەل ساڭا ئوخشاش ئادەم ئىدى ، ئەتە سائەت يەتتىدىن باشلاپ ئىشقا چۈشكىن ، ھەپتىلىك ئىش ھەققىڭ ئالتە دوللار بولسۇن ، ئىشىنىمەنكى سېنىڭ كەلگۈسىڭ چوقۇم پارلاق بولىدۇ !»ئېيتقاندەك بۇ بالا كېيىن ئابرويلۇق چوڭ سودىگەر بولۇپ يېتىشىپ چىقىپتۇ .
ئۆزىنى كونتىرول قىلىش –مۇۋەپپىقىيەت قازىنىشنىڭ مۇھىم ئامىللىرىنىڭ بىرى ، نۇرغۇن كىشىلەر تۇرمۇشتا كىچىككىنە ئېزىقتۇرۇشلارغا بەرداشلىق بېرەلمەي مۇھىم ئىشلاردىن زېھنىنى چېچىۋېتىدۇ ، نەتىجىدە ئۇلۇغ ئىشلارغا تەسىر يەتكۈزىدۇ . مانا بۇ مۇۋەپپىقىيەت قازانغۇچىلار ۋە مەغلۇپ بولغۇچىلار ئوتتۇرىسىدىكى پەرق . ياشلار ! ئۆزۈڭلارنى كونتىرول قىلىشنى ئۆگىنىۋېلىڭلار ، شۇندىلا ئادىمىي قىممەتكە ئىگە بولالايسىلەر ۋە جاپا – مۇشەققەتنى باش ئەگدۈرەلەيدىغان ئىرادىگە ئىگە بولالايسىلەر .
ئۆزىنى كونتىرول قىلىش ئىرادىنى يارىتىدۇ ، ئىرادە پۇرسەت ۋە مۇۋەپپىقىيەت يارىتىدۇ .
گۈلجەننەت جاپپار تەرجىمىسى
