ئەستا ! ئاتام قېرىغانسىرى،
بولۇپ كىتىگلىك تولىمۇ ئەنسىز.
نەزىرىدە بۈگۈنكى ياشلار ،
بىر-بىرىدىن يولسىز،
يۈگەنسىز.
دەيدۇ ھامان :
ئاتا بالىسى،
ئاتىسىغا ئوخشىسا ھىساپ.
(بالا دىگەن قوچاقمىكىنا!
خالىغانچە قويغىلى ياساپ)
نەسىھىتى كەتتى كۆپىيىپ،
ھىچ ئىشى يوق چېپىلمايدىغان.
پۈتكىدەكمىش ۋەسىيەتنامە،
ئۆزگەرتىشكە قىلچە يېرىنى
ئەۋلىيامۇ پېتىنمايدىغان.
****************************************
زاماننىڭ ئۆزىگە مەنسۇپ چېكى بار،
ھەر بىر ئەۋلاتنىڭمۇ ئۆمرى ساناقلىق.
ئادەم ۋەسىيەتنى ئۇلۇغ بىلسىمۇ،
ھەممىسىگە ئەمەل قىلىشى چاغلىق.
يىللارنىڭ يىللاردىن پەرقى بولىدۇ،
ئەزەلدىن ئەبىدى قانۇنىيەت-بۇ.
ئۆلچىمى بىر بولسا ئاتا-بالىنىڭ،
بولماستى بۈگۈنكى ئىنسانىيەتمۇ!
مەن ئۆتمەكچى بولسام جاھاندىن شۇنداق
ئۆلچەملىك ئاتا بالىسى بولۇپ.
ئۆزەمگە ئوخشىماي ياشىشىم كىرەك،
گوياكى بىراۋنىڭ سايىسى بولۇپ.
**************************************************************
بالا ئاتىسىغا قۇيۇپ قويغاندەك
ئوخشىسۇن -دىسە كىم كۈلۈپ كىتىمەن.
ئاتام شۇنداق ۋەسىيەت پۈتكىدەك بولسا ،
دەپ قوياي
مەن ئۇنى يىرتىۋىتىمەن.
(تېيىپجان ئىلىيوف شىئىرلىرىدىن )
