پەخرىيە ئەشرەب قىزى
(غەزەل)
بىرلا ئاللاھ قۇدرىتىدە پەخرىيە ئەشرەب قىزى،
يىلتىزى قۇت نۇسرىتىدە پەخرىيە ئەشرەب قىزى.
ئول «تۇمارس»، «ئايخاقان»دا پاكىزە، ئەۋزەل ئۇدۇم،
سۈت- «ئوغۇز»نىڭ خىسلىتىدە پەخرىيە ئەشرەب قىزى.
ئىچمىشى كەۋسەرى-ئىرپان، دىن، ئىلىمدۇر ئىككى يان،
ئەقلى ئىمان خىلۋىتىدە پەخرىيە ئەشرەپ قىزى.
كىم سېنى مەزلۇم دېگەي جەھلىڭدە پەيمان ئۇرغىسا،
ئەقلى ئارتۇق نىسبىتىدە پەخرىيە ئەشرەب قىزى.
ئىپتىخار غەمخورىدا، ھەيرانى-ھەس شۇ ھويلىدا...
رەشكىسىزنىڭ ھۆرمىتىدە پەخرىيە ئەشرەب قىزى.
قىسمىتى تۈگمەن تېشىدەك باسسىمۇ ئىقبالىنى،
ئەجرى ئالتۇن فۇرقىتىدە پەخرىيە ئەشرەب قىزى.
كۈلمىشىڭ ئەتە ۋەيا ئۆگۈن مۇقەررەر خەيرىيەت،
بەيگى تۇلپار سۆلىتىدە پەخرىيە ئەشرەب قىزى.
مەنبە: كىن ئىلھامى
