ئۈچ غەزەل
ئابدۇللا تۇردى(تارىم)
1
دىلنى مەيسىز مەست قىلار ساقىي-گۈزەل كۈي-نەغمىدۇر،
شاھ شېئىر-چالغۇ، ئاھاڭ-تۇيغۇ، ئاڭا تار-سەترىدۇر.
بولسا سۆيمەك، بار سۆيۈلمەك، سۆيگۈگە سىرداش رەشك،
نۇر-زىيا سۆيسە زېمىننى، كۆك-بۇلۇت كۈندەشتىدۇر.
قوشگىزەك شادلىق-ئازاب، ھايات-مامات، بەخت-پاجىئە،
چارى باغ ئىچرە مەلىكە ھەم خۇشال، ھەم غەمدىدۇر.
2
قەترىلەرنىڭ بىرلىكى كۆللەرنى پەيدا ئەيلىگەي،
دىل يېقىنلار بىرلىكى جۈپلەرنى پەيدا ئەيلىگەي.
زەررىسى سۆزنىڭ-ھەرپ، سۆز سەترىگە ھەم سەترىدۇر،
سەترىلەرنىڭ بىرلىكى كۈيلەرنى پەيدا ئەيلىگەي.
ئېيتىدۇ: قىلساڭ سەۋەب سۆۋەتتىمۇ توختايدۇ سۇ،
تەرۇ-مېھنەت بىرلىكى گۈللەرنى پەيدا ئەيلىگەي.
يەر-زېمىننى تىترىتەر گۈلدۈر كەبىي سۈرلۈك سادا،
ئوت يۈرەكلەر بىرلىكى سۈرلەرنى پەيدا ئەيلىگەي.
تۆكىدۇ بىر تال ئۆمۈر ياپراغىدىن بىر كۈن، كۆڭۈل،
دەم-دەقىقلەر بىرلىكى كۈنلەرنى پەيدا ئەيلىگەي.
1992-يىل 31-ئاۋغۇست.
3
ئاشىققا يار كۆزى ئوتلۇق قۇياشتۇر، زەر-زىياسى بار،
چىمەن ئىچرە ئېچىلغان گۈل-بويى، جىلۋە-جۇلاسى بار.
قالار ئۈنسىز بىرى كەتسە، كۆڭۈلدە زەپىران تۇيغۇ،
يۈرەكىدىن تىلەر ئاقيول، ئاڭا دىلنىڭ رىزاسى بار.
قۇياش بىر يانۇ، ئاي بىر يان، گۈلى-بۇلبۇللىرى ھەريان،
سۈيى بار يەردە ئوت يوقتۇر، تەبىئەتنىڭ خاتاسى بار.
ياشاشقا ئىنتىلەر يىلتىز زېمىننىڭ باغرىدا مەڭگۈ،
يوچۇق ئىزلەيدۇ شەيتان ھەم، كۆڭۈلدە مۇددىئاسى بار.
سالار دەھشەت زېمىنگە گاھ، يېرىپ تۈن باغرىنى چاقماق،
قۇلاق ياق كۆكسىگە تۈننىڭ، نە تەشۋىش، نە ساداسى بار!؟
1992-يىل 31-ئاۋغۇست.
