ئىنسان بىز
ھەقنى تاشلاپ ناھەقكە بىلەك تۈرمەيلى ئىنسان بىز،
ۋىجدان سېتىپ كەيىپ ھەم ھوزۇر سۈرمەيلى ئىنسان بىز.
مىڭ يىلدىمۇ ئۇنتۇلماس كىشگە قىلغان ياخشىلىق،
ياخشىلىققا ياندىن پىچاق كۆتۈرمەيلى ئىنسان بىز.
يول تاپار ئەجداد ئىزىدىن قايمۇقسا يولدىن ئېزىپ،
ئەۋلات ئۈچۈن قالغان ئىزنى سۈپۈرمەيلى ئىنسان بىز.
تەبىئەتنىڭ گۈزەللىكى گۈل-گۈلشەن رەيھان ئارا،
مۇنبەت يەرگە ئازغان تىكەن ئۆستۈرمەيلى ئىنسان بىز.
ئىلىمدۇر ئۆچمەس چىراغ ئۇ بىلەن نۇرلىنار ئالەم،
مەرىپەتنىڭ مەشئىلىنى ئۆچۈرمەيلى ئىنسان بىز.
دۇنيا ئۆتەڭ كىشى كارۋان كەلسە ھەم كىتەر بىر كۈن،
ئۆلۈم كەلسە باشقىغا ئويۇن كۆرمەيلى ئىنسان بىز.
ئەگەر يالغان ئەۋىج ئالسا يېقىن كەلمەس بەرىكەت،
رىسقىمىزدىن بەرىكەتنى كۆچۈرمەيلى ئىنسان بىز.
ئىتقادتۇر روھ تۈۋرىكى ئۇ تۇغار ۋىجدان غورۇر،
جان كەتسىمۇ ئىتقادنى يۈتتۈرمەيلى ئىنسان بىز.
ئىزدىنىش تەپەككۇردا يىشىلەر ئالەم سىرى،
چۆكۈپ غەپلەتكە تەپەككۇرسىز يۈرمەيلى ئىنسان بىز.
2010-يىل 16-ئىيون
ئا.ئالىم <ئويتاغ>
