بىر كۈنى
مۇھەممەتجان راشىدىن
بالاڭ ئازسا،ئاھ ئۇرما ،يول تاپىدۇ بىر كۈنى ،
ئامان بولسا ، ئۇلارمۇ پۇل تاپىدۇ بىر كۈنى .
خاتا باسقان قەدەملەر قالدۇرغاندا قاتاردىن ،
ئۆزى ماڭغان چاتقالغا ئوت ياقىدۇ بىر كۈنى.
گەدەنكەشلىك ھېچكىمدىن ئۇدۇم ئەمەس ئۇلارغا ،
ئۆزى كېلىپ ئالدىڭغا گەپ ئاچىدۇ بىر كۈنى .
ئات بولغۇچە ئاساۋتاي ھەر يان چاپسا چاپمامدۇ ،
ئۇلارغىمۇ بۇ دۇنيا يۇك ئارتىدۇ بىر كۈنى .
"ئاق "نى چەككەن ئاغزىدا ئوقۇپ ئەپسۇس- پۇشايمان ،
قاراپ ئۇلار كەينىگە ئۇھ تارتىدۇ بىر كۈنى .
كوچىلارغا تۈن بويى بۈگۈن پاتماي يۈرگەنلەر ،
چىللىسىمۇ كوچىلار جىم ياتىدۇ بىر كۈنى .
تەييار توقاچ قولۇڭدىن يەۋەرمەيدۇ ئۇلارمۇ،
ئۆزلىرىمۇ ئۇن تارتىپ، نان ياقىدۇ بىر كۈنى .
بۇ ئالەمدە ھەر ئىشنىڭ سائېتى بار ،ۋاقتى بار ،
خۇددى سەندەك ئۆي تۇتۇپ ،ئۆي قاقىدۇ بىر كۈنى .
كۆندىرىدۇ بۇ جاھان تالاي ئىشقا ئۇلارنى ،
شۇلار چاپقان ئۆستەڭدە سۇ ئاقىدۇ بىر كۈنى .
بىز ئوينىغان نۇرۇزنى بىزدەك ئويناپ شۇلارمۇ ،
ئىزىمىزدا ئىگەرلەپ ئات چاپىدۇ بىر كۈنى ،
پىشانەڭگە ئاسماندىن ئىللىق قۇياش نۇر چاچسا ،
يۈرىكىڭگە بالاڭمۇ نۇر چاچىدۇ بىر كۈنى.
سەنمۇ ئاتا -ئاناڭنى ئۆتكەن بولساڭ ئەزىزلەپ ،
ئوغۇل- قىزىڭ ساڭىمۇ تون ياپىدۇ بىر كۈنى .
شۇ ئىشلارنى كۆرەلمەي ئۆلۈپ كەتسەڭ ئامال يوق،
ھايات بولساڭ مەيدەڭگە گۈل تاقايدۇ بىر كۈنى .
يامان دېسەڭ بالاڭنى ،كىم بىرىدۇ ياخشىنى ،
ھازىر يامان بولسىمۇ ئەسقاتىدۇ بىر كۈنى .
بىركۈنى
ئەنۋەر ئابرۇرېھىم
قارا تۇپراق ئىنساننى يالمايدىكەن بىركۈنى،
ئىشەنگەن شۇ تاغلارمۇ ئالدايدىكەن بىركۈنى.
ئادەم دېگەن ئەۋلىيا ئەمەس ئىكەن ئەسلىدە،
لاۋۇلدىغان ئوتلارمۇ يانمايدىكەن بىركۈنى.
ھەسەتخورلار ئاچ قالغان بۆرىلەرنىڭ ئاغزىغا
بىلىندۈرمەي دوستىنى تاشلايدىكەن بىركۈنى.
ئەدەپ-ئەخلاق بېغىنى چەيلىگەنلەر ئاخىرى
دوزاخ تامان،ھاڭ تامان چامدايدىكەن بىركۈنى.
قۇرۇق گەپتە قوپۇرغان سېپىللارغا خەۋپ يار،
رەڭۋازلارنى ئەل -ۋەتەن شاللايدىكەن بىركۈنى.
ئات چاپتۇرۇپ باراڭدا،<بىر مەن>دېسەڭ جاھاندا،
قىممىتىڭمۇ،يۈزۈڭمۇ قالمايدىكەن بىركۈنى.
