تۇپراقنىڭ نالىسى
(شېئىر)
(ئاممىۋى ھاجەتخانىلاردىكى بىرقىسىم تېلىفۇن نۇمۇرلارنى كۆرۈپ ئويلىغانلىرىم)
چىن تۆمۈر جىم ياتماي مېنىڭ باغرىمدا،
دات باسقان قىلىچىن بىلەۋاتىدۇ.
ئەرلەرنىڭ ئالدىدا ئېڭىشكەن ئەرلەر،
<<ئەرلىك روھ ئۆلسە>>دەپ تىلەۋاتىدۇ.
خاس ھاجىپ ھىلىھەم كىتاب يازماقتا،
قېنىنى رەڭ قىلىپ،يۈرەكنى قەلەم.
مۇھەببەت خارلاندى،ياشلار بىپەرۋا،
ئاھ ئۇرۇپ يىغلايدۇ غېرىپقا سەنەم.
نۇزۇكمۇ دادلايدۇ زېمىنغا قاراپ،
تامچىلاپ تۆكۈلگەن ھاياسىز قاننى.
بۇ ھايات سىنايدۇ غۇرۇرنى شۇنداق،
ئادەمگە پۇل تاشلاپ،قۇشلارغا داننى.
قەشقەرى زارلىنىپ ساقال يۇلماقتا،
شۇ سەۋەب ئەرلەرنىڭ تولىسى كوسا.
يولۋاسنى قاماللاپ ئاتقان يىگىتلەر،
ھىجىيىپ تۇرماقتا مايمۇنلار ئۇرسا.
گۈزەللەر يۈرۈيدۇ<<گۈزەل>>پېتىلا،
يىگىتلەر ئىچىدە<<يىگىت>>بولمىغاچ.
(چەكلەنگەن مېۋىنى يېگەنمۇ؟ئادەم،
جەننەتتە يېگۈدەك يىمىش قالمىغاچ.)
كۆزلەردىن تۆكۈلەر دەردلەر سىمىلداپ،
رېئاللىق يۈزمۇ يۈز قويىدۇ سۇئال.
لەنىتى تەنلەرنى قوينىغا ئالسا،
بىگۇناھ تۇپراققا بولمامدۇ ئۇۋال؟!!
ئاپتۇر:تاش
