نەۋرۇز
(غەزەل)
زىمىستان قىش-سوغوقلارنى سۈرۈپ كەلدىڭ بۈگۈن نەۋرۇز،
سەھەردە پارلىغان كۈندەك كۈلۈپ كەلدىڭ بۈگۈن نەۋرۇز.
ئېرىپ قارلار،ئەگىز ئاقتى ئېرىق-ئۆستەڭدە شىلدىرلاپ،
قېلىن مۇزلارنى دادلىتىپ،شۈمۈپ كەلدىڭ بۈگۈن نەۋرۇز.
ئېتىزغا چىقتى دېھقانلار،يۈرەكتەك پارلىدى كەتمەن،
ئاۋامنىڭ شادلىقى ئىچرە چۈمۈپ كەلدىڭ بۈگۈن نەۋرۇز.
ناۋا قىلدى يىگىت-قىزلار،كۆڭۈل ئىزدەپ چىمەنزاردا،
گۈزەللىكنى گۈزەل قىزدەك سۆيۈپ كەلدىڭ بۈگۈن نەۋرۇز.
دەرەخ كۆكەردى،ئوت ئۈندى،زېمىن كەيدى يېشىل توننى،
تەبىئەت ئىشقىدا چوغدەك كۆيۈپ كەلدىڭ بۈگۈن نەۋرۇز.
ساما سالدى قىران ياشلار يېشىل مەخمەل پاياندازدا،
مانا شۇنداق ناۋا-مەشرەپ تۈزۈپ كەلدىڭ بۈگۈن نەۋرۇز.
مۇھەممەد يازدى بىر نەزمە يېڭىچە بىر خۇشاللىقتا،
گۈزەللىككە گۈزەل نامە پۈتۈپ كەلدىڭ بۈگۈن نەۋرۇز.
2010-يىلى ئۈرۈمچى.
