خوتۇن!
( مۇخەممەس )
ـــ بىر دوستۇمنىڭ تىلىدىن
ئۆمەر
‹‹ ئەرنى ئەر قىلغان خوتۇندۇر، ئەرنى يەر قىلغان خوتۇن ››،
ئاتىلاردىن ئۇشبۇ ھېكمەت شۇڭىمۇ قالغان خوتۇن،
كۆزلىرى گوياكى تىلسىم، سۆزلىرى يالغان خوتۇن،
ئامىتىمنىڭ بارىدا ئۇ، بەك بەلەن – ئوبدان خوتۇن،
ئامىتىم قاچقاندا ئەمما، خېتىنى ئالغان خوتۇن!
ئاھ! گۈدەكلىكتە كۆڭۈلنىڭ كەينىگە كىرىپتىمەن،
توسسا تۇغقان، دوست-بۇرادەر دەككىسىن بېرىپتىمەن،
ئۆز خىيالىمدا سېنىڭ بىرلە ياشاپ قېرىپتىمەن،
سۆيگۈ گۈلشەنىگە تىنماي گۈل-چېچەك تېرىپتىمە،
ۋا دەرىخا، گۈل-چىمەننى ئەيلىدىڭ خازان خوتۇن.
توي قىلىپ تويدۇم، كېكەردىم نەچچە ئاي بولماي تۇرۇپ،
كۆپ قېتىم قىلدىم تەرەددۇت خاتىمە بەرمەك بولۇپ،
تۈلكىدىن ئالغان ساۋاقكەنسەن ماڭا قاپقان قۇرۇپ،
ئىشىنىپ كۈلكە-يىغاڭغا كەتتى كۆڭلۈممۇ ‹‹ يورۇپ››،
نە يورۇپ، زۇلمەتتە قالدىم، سىرلىرى پىنھان خوتۇن.
كۈللى ئالەمدە يەنە سەندەك ھازازۇل بارمىدۇ؟
ساڭا ئەر بولغان كىشىنىڭ ھالى شۇنچە خارمىدۇ؟
يەپ قۇلاق-مېڭەمنى بولدۇڭ، ئۆيمۇ شۇنچە تارمىدۇ؟
نەكى ئۆي، تۈرمە مىسالى، كوچىدا خار-زارمىدۇ؟
ئەشۇ كۈنلەر ئۆي ماڭا بولغانتى بىر زىندان خوتۇن!
دەپتۇ شىرىن پەرھادىگە: ‹‹ مەن ئۈچۈن تاغىنى يېرىڭ،
سۇنى باشلاپ ئەل-ئاۋامغا ئەجرىڭىزدىن نەپ بېرىڭ!››،
سەنمۇ شەرت قويدۇڭ ماڭا ھەم: ‹‹ مەن ئۈچۈن كۆپ پۇل تېپىڭ،
پۇل تېپىڭ، كۆپ پۇل تېپىڭ، پۇل ئۈچۈن ئۆلۈڭ، قېرىڭ! ››
پۇل تۈپەيلى ئەگرى يولغا باشلىدىڭ شەيتان خوتۇن.
پۇل تېپىش كوچاسىدا مىڭ تىرىلىپ، مىڭ بىر ئۆلۈپ،
پۇلغۇ تاپتىم بىر مەھەل - ھەي، بەخت يەنە باقماس كۈلۈپ،
ياندا لىق پۇل، كۈندە غەۋغا، يۈرىمەن قاپاق تۈرۈپ،
ئەرزىمەس تۇيۇلدى پۇلمۇ ئۇشبۇ ھالەتنى كۆرۈپ،
سورۇدۇم تاپقانلىرىمنى سەن سەۋەپ ھەريان خوتۇن.
ھە، بۈگۈن بولدۇم قەرزدار، يۈرىمەن قېچىپ، مۈكۈپ،
سەن شۇئان كەچتىڭ مېنىڭدىن ھەممىدىن بەكرەك ھۈكۈپ،
دوست-دۈشمەنگە سىرنى ئاشكار ئەيلىدىڭ دەرتلەر تۆكۈپ،
ئۇنى ئاز دەپ سوتقا تارتتىڭ ئارقىدىن تىللاپ-سۆكۈپ،
ھەر تەرەپتىن مېنى قىستاپ ئەيلىدىڭ سەرسان خوتۇن.
بارمىدىم، سوتتىن چاقىرتتى، شۇ سەۋەپ ئالدىڭ ھايان،
ۋە لېكىن، ۋىجدان سوتىدا نېمە دەرسەنكىن ‹‹ جانان! ››
توقۇغان تۆھمەتلىرىڭ چاققاي ئۆزۈڭنى بوپ چايان،
ئېھتىمال چاقماس چايان ئۆز نەسلىنى، بۇمۇ ئايان،
نەپرىتىم نەشتەر بولۇپ قىلغاي سېنى ۋەيران خوتۇن.
ئايرىدىڭ ئۆي ۋە بېساتىمدىن ماڭا ھىچگەپ ئەمەس،
پەرزەنتلىرىمدىن ئايرىلىش كەلدىغۇ ئەجەپمۇ تەس!
نەپرىتىم ئۆركەش ياساپ، سەبرى قاچام توشتى پەۋەس،
خەپ!... يەنە پەرزەنت ئۈچۈن كەچتىم قېنىڭدىن بولدى، بەس!
ئادىمىيلىكتىن ساۋاتسىز، زىدىپەس نادان خوتۇن!
ھەقتىئەلا بارچە ئىنسانغا ئانا قىلغان ئايال،
مېھرىبانلىق، چىن گۈزەللىك ئەلچىسى بولغان ئايال،
كۈللى ئىقلىمغا مۇھەببەت ئەترىنى چاچقان ئايال،
ھەسرىتا، مەن ئۇچرىغان ئالۋاستى يا شەيتان ئايال!
ئاھ خۇدا، بەرسۇن پاناھ سەندىن ماڭا ھەرئان خوتۇن!!!...
ئۈرۈمچى --- قەشقەر
مەنبە: ئۆزۈم
