فېليەتون
شەيتان ئىنسانلارنىڭ ئۆزلىرى ئۆتكۈزگەن گۇناھلىرىنىڭ ھەممىسىنى ئۆزىگە دوڭگەپ قويىدىغانلىقىنى ئاڭلاپ، ئىنسانلارنىڭ ئارسىغا بېرىپ ، خۇپىيانە تەكشۈرۈپ، ئېنىقلاپ كۆرمەكچى بۇپتۇ ۋە مەلۇم بىر شەھەرگە كەپتۇ. ئىنسانلارنىڭ ھەر خىل –ھەر ياڭزا ئىش-ھەركەتلىرى شەيتاننى بەكمۇ قىزىقتۇرۇپتۇ. شەيتان كېتىۋېتىپ شۇنداق قارىسا، 12ياشلار چاممىسىدىكى بىر بالىنىڭ:
-ئاكا، مەن ئۆيۈمگە قايتالمىدىم، ئاچ قالدىم، ماڭا ئازراق يول خىراجىتى بەرگەن بولسىڭىز، ئۆيۈمگە كېتىۋالغان بولسام دىگەن گېپىنى ئاڭلاپ قاپتۇ.
يۇغان بىر ئەر:
-نېمە دەپ سىرتقا چىققان ؟ مۇشۇ تۇرقۇڭ بىلەن سىرتقا چىققۇچە ئاتا- ئاناڭغا ياردەملىشىپ ، ئۇلارنىڭ خىزمىتىنى قىلىپ رەھمىتىنى ئالساڭ بولمامدۇ؟
بالا:
-ئۇقماي چىقىپ قاپتىمەن ئاكا. بىر ئۈبدان ئوينى تاشلاپ چىقىپتىمەن، نۇرغۇن جاپالارنى تارتتىم. بۇنى ئۇقسام ھەرگىز بۇنداق قىلمايتىم. مېنى شەيتان ئازدۇرۇپتۇ. ئۆتۈنۈپ قالاي ئاكا! ماڭا ياردەم قىلسىڭىز.
ھېلىقى ئەر :
-بۇنىڭدىن كېيىن ھەرگىز بۇنداق ئاتا-ئاناڭنى قاقشىتىدىغان ئىشلارنى قىلمىغىن، دەپ ئازراق پۇل بىرىپ كېتىپ قاپتۇ.
شەيتان كىچىك بالىنىڭ قىلغان ئىشنى ئۆزىگە دوڭگەپ قويغانلىقىنى ئاڭلاپ ، بىر ئاز ئاچچىقلانغان بولسىمۇ، بالىنىڭ كىچىكلىكگە قاراپ بولدى قىلىپ باشقا تەرەپلەرگە مېڭىپتۇ. بىر ئاز ماڭغاندىن كېيىن نېرىدا بىر ئايالنىڭ :
-سەن مېنىڭ خېتىمنى بەر ، سەن بىلەن بۈگۈنلا ئاجىرشىمەن.
ئەر:
-خوتۈن ، سەن مېنى مۇشۇ بىر قېتىم كەچۈرۋەتكىن، بۇلامدۇ؟
خوتۇن:
-سەن ھايۋان بولمىساڭ ، ئاڭسىز ھالدا بۇنداق ئىش قىلغىلى . سەن ئالىي مەكتەپ پۈتتۈرگەن بىر زىيالى. سېنىڭ قىلغانلىرىڭ چىكىدىن ئېشىپ كەتتى. سەن ئويدە بار پۇلنىڭ ھەممىسىنى قىمار ئويناپ ئۇتتۇرۋەتتىڭ. بۇنى قۇيۇپ تۇرايلى . تېخى سىرتتا باشقا بىر كۆرۈمسىز نايناق بىلەن ئاشنا ئويناپ يۈرۈپسەن. سەن قايسى يۇزۇڭ بىلەن ماڭا ، ئىككى بالىغا يۈز كېلەلەيسەن.
ئەر:
-ئۆتۈنۈپ قالاي خوتۈن، مېنى شەيتان ئازدۇرۇپتۇ. مۇشۇ قېتىم كەچۈرۋەتكىن، بۇنىڭدىن كېيىن ھەرگىز بۇنداق ئىشلارنى قىلمايمەن، دەپ يېلىنىپتۇ. ئايال ئېرىنىڭ يېلىنغىنىغا قارىماي ئېرنى سۆرەپ مېڭىپتۇ.
شەيتان ئەرنىڭ گوناھىنى ئۆزىگە دوڭگەپ قويغانلىقىنى ئاڭلاپ ، قاتتىق ئاچچىقى كەلگەن بولسىمۇ يەنىلا ئۆزنى تۇتۇۋېلىپ، ئىنسانلار يەنە قانداق يامان ئىشلارنى ماڭا دوڭگەپ قۇيىدۇ قېنى، كۆرۈپ باقاي دەپ يەنە سەپىرنى داۋاملاشتۈرۈپتۇ. شەيتان ئارىدىن خېلى يول يۇرگەندىن كېيىن يېشى 45-50لەردىن ھالقىغان ئىككى كىشىنىڭ ھەدەپ زۇكۈنلىشىۋاتقانلىقىنى ئاڭلاپ گېپىگە قۇلاق ساپتۇ. ئىگىزرەك كەلگەن كىشى:
-قارىكا، مېنى كەچۈرسىلە ، ئامال بار سىلىنى رازى قىلىمەن. ئۆتكەندە سىلىگە يالغان گەپ قىلىپ سېلىنى ئالداپتىمەن.
پاكارراق كەلگەن كىشى:
-سىلىگە ئىشەنگىلى بولامدۇ؟ ساقال نەدىن چىقتى؟ سودىدىمۇ مۇشۇنداق يالغان گەپ قىلغان بارمۇ؟ مۇشۇنداق قىلسىلا سىلىگە بۇنىڭدىن كېيىن قانداق ئىشىنىمەن؟
ئىگىزرەك كەلگەن كىشى:
-بۇنىڭدىن كېيىن ھەرگىز بۇنداق قىلمايمەن. مېنى بۇ قېتىم شەيتان ئازدۇرۇپتۇ. ئىككىنچى بۇنداق ساختىپەزلىك قىلىپ ، سىلنى ئالدىمايمەن. بۇ قېتىم مېنى كەچۈرۋەتسىلە.
شەيتان بگوناھ ھالدا قارلىنىپ ئىنسانلار ئارىسىدا لەنەتكە ئۇچرغانلىقىغا چىداپ تۇرالماي ، قاتتىق ئاچىچىقلاپ سۆزلەپ كېتىپتۇ.
- ھەي ئىنسانلار، مەن سىلەرگە نېمە قىلدىم؟ سىلەرنى ئاتا-ئاناڭلارغا ۋاپاسىزلىق قىلىڭلار دىدىممۇ؟ سىلەرنى قىمار ئوينىغىلى باشلاپ ئاپاردىممۇ؟ بۇزۇقچىلىق قىلىڭلار، بىر –بىرىڭلارنى ئالداڭلار، بىر-بىرىڭلارغا خىيانەت قىلىڭلار دەپ ئۆگەتتىممۇ؟ ئۆزەڭلار ھاياتلىق يولۇڭلارنى توغرا باسالماي، خاتا يولغا كىرىپ قالغاندا ، نېمە دەپ بارچە گوناھنى ماڭا يۈكلەپ قويىسلەر ، مۇشۇنداق دىيشتىن نۇمۇس قىلمامسىلەر؟ نىمىشقا بۇ ھەقتە ئويلانمايسىلەر؟سىلەر ئۆزەڭلارنى ئەقىللىق چاغلايتىڭلارغۇ. ئۇتۇق قازانغاندا ئۆزەڭلارنى ئاتتۇرۇپ مېنىڭ پىلانىم بولغاچقا مۇشۇنداق بولدى دەپ، كۆرەڭلەپ ئۆزەڭلارنى قۇيىدىغان يەر تاپالماي قالاتتىڭلار. نېمىشقا ئەنە شۇ ماختاشقا، تۆھپىگە مېنى شىرىك قىلمايسىلەر؟ سىلەر ھەقىقەتەن ئىككى يۈزلىمىچى ئىكەنسىلەر. بۇنىڭدىن كېيىن كاللاڭلارنى ئىشلىتىپ ، ھالال ياشاپ، توغرا يولدا مېڭىڭلار، جەمىيەتتىكى بۇزۇقچىلىقلاردىن ئۆزەڭلارنى تارتىڭلار. مېنى گوناھىڭلارغا شىرىك قىلىۋالماڭلار دەپ كايىغانچە ماكانىغا قايتىپ كېتىپتۇ.
