بىزدە شۇنداق ناخشا بار، دوستۇم
(ناخشا تېكىستى)
نىيازئەلى ئادىل(تۈن لىرىكىسى)
ئەسىرلەردىن يادلىنىپ كەلگەن،
ئاتام ئېيتىپ تۈگىتەلمىگەن.
بىزدە شۇنداق ناخشا بار بىلسەڭ،
مىسرالىرى ئەلنى كۈيلىگەن.
ئېيتىپ كەلگەن خەلقىم، يۇرتۇم،
بىزدە شۇنداق ناخشا بار، دوستۇم.
بوۋام ئېيتقان ھېكمەت سۆزى ئۇ،
تارىخلارنىڭ ئۆچمەس ئىزى ئۇ.
نى كۈيلەرگە ئۇل سېلىپ بەرگەن،
ناخشىلارنىڭ ئۇستاز پىرى ئۇ.
جۆر بولىدۇ دۇتتار، تەمبۇرۇم،
بىزدە شۇنداق ناخشا بار، دوستۇم.
ئاڭلىنىدۇ ئاشىق ئاۋازى،
مىسلى گويا بۇلبۇل ناۋاسى.
ئۆركەشلىگەن دەريالىرىدەك،
ئىلىلىقنىڭ خەلق ئاھاڭى.
باغلىرىدا سايرار بۇلبۇلۇم،
بىزدە شۇنداق ناخشا بار، دوستۇم.
2011-يىلى 10-مارت پەيشەنبە
مۇڭغۇلكۈرە شوتا يېزىسى
