سىز كۆرگىلى كەلگەن شۇ چاغدا
ئابدۇرەھىم ياسىن قاينامى
ئېقىپ كېلەر تاغ-دالىلاردىن
شورلۇق يېشىم سۈرەنلەر سېلىپ
سايىلەردە يالقۇن ۋە لاۋا
ئوت ئىچىدە تولغىنار دالا
سىز كۆرگىلى كەلگەن شۇ چاغدا
قىشنىڭ تاتلىق غەملىرى قالغان
ئۆچكەن ئوتلار كۈللىرىدە ئىز
قالدى ئۆيلەر ئانا روزىغار
مۇڭ چىرمىغان كەپىلەردە بىز...
تاڭلار يورۇق خىيالىمدا سىز
ئوخشىمايدۇ ئويلارغا تويلار
مەن قايتىمەن ئۆيگە پەرىشان
ھىدىم ئېلىپ مەرەيدۇ قويلار
سىز كۆرگىلى كەلگەن شۇ چاغدا
تەرلەپ پىشىپ ئىشلەيمەن باغدا
سۈڭىكىمنى چانايدۇ كەتمەن
دىدارىمىز قالغۇسى داغدا
سىز كۆرگىلى كەلگەن شۇ چاغدا...
روھ يۇلقۇنار بالاغىتىدە
ئەتراپىمدا ساماۋى تام بار
سۈڭەكلىرىم چىرىپ كەتسىمۇ
يۈرىكىمدە ئۆچمىگەن شام بار
سىز كۆرگىلى كەلگەن شۇ چاغدا
مېنى ئىزلەڭ قەبرىلەر ئارا
زۇمچەك-زۇمچەك يۈرەك ئىچىدە
پىلدىرلايدۇ ئۆچمىگەن يارا
ئېرىقلاردا شىلدىرلاپ ئاققان
مېنىڭ قېنىم قىزىل ۋە قارا
تەنلىرىمنى سوراپ تۇپراقتىن
مەن ئىشلەيمەن ئېتىزدا،باغدا
ئۇچۇپ كېتەر بىر تال يۇپۇرماق
سىز كۆرگىلى بارغان شۇ چاغدا...
