مۇھەممەتجان راشىدىن

~

دېھقان دوستۇم،سەنمۇ ياڭاق چاقالىدىڭمۇ؟

خۇشاللىقتا كۆككە دوپپا ئاتالىدىڭمۇ؟  
بۇلتۇرقىدەك باش-بۇرنىدىن بۇغدايلىرىڭنىڭ، 
ئەڭ ئالدىدا ساڭغا ئاشلىق ساتالىدىڭمۇ؟

~

پاختىزاردىن قاچان كەلدىڭ،كەلمىدىڭمۇ يا؟

پۇل-جاناننى بۇلتۇرقىدەك تاپالىدىڭمۇ؟

سىڭلىم،سېنى نەدە دېسەم،پارنىكتا،دەيدۇ، 
ئىشلەپ يۈرۈپ،ئوسما-خېنە ياقالىدىڭمۇ؟

~

 
تۇرمۇش دېگەن بىزلەر مەڭگۈ قېتىلغان ھارۋا،  
سەنمۇ بۇ يىل قىينالماستىن تارتالىدىڭمۇ؟  
چوڭ يوللارغا يېيىپ قويغان قوناقلىرىڭغا

يامغۇر ياغسا،شۇئان يوپۇق ياپالىدىڭمۇ؟

~ ~ ~

چۈشۈپ كەتمەي قويمىچىلار قۇرغان توزاققا،

 ياستۇقىڭنى ئېگىز قويۇپ ياتالىدىڭمۇ؟  
يانچۇقىڭدىن كېلىپ تۇرار يانفۇن ئاۋازى،

قوللىرىڭغا ئالتۇن سائەت تاقالىدىڭمۇ؟

~ ~ ~

سەن باي بولساڭ،مەنمۇ باي دەپ يۈردۈم ئۆزەمنى،  
ئايىغىڭغا خۇرۇم شىبلىت ساپالىدىڭمۇ؟

باللىرىڭنىڭ بوينىدىكى ئېغىرلاپ كەتكەن

 بوخچىلارنىڭ سەۋەبىنى تاپالىدىڭمۇ؟

~ ~ ~ 
قايسى ئىشلار ئوڭغا تارتتى،قايسى ئىش سولغا؟

كادىرلارغا دادىل ئېغىز ئاچالىدىڭمۇ؟ 
گۆش باھاسى ئۆرلەپ كەتسە،ئەسقاتتى تۇخۇم،

سەنمۇ خەقتەك بەش-ئون توخۇ باقالىدىڭمۇ؟

~ ~ ~ 
ئاينىدىمۇ ئالمىلىرىڭ،«قاق ئۆرۈك»لىرىڭ،  
ھەر شېخىدىن تۆت-بەش جىڭدىن قاقالىدىڭمۇ؟ 
تۇرپانيۈزلۈك ئاغىنىلەر،ناخشا-قوشاققا

قاڭالتىرلىق ئۆيلىرىڭنى قاتالىدىڭمۇ؟

~

توختىدىمۇ ھەشەمەتلىك تويلار،نەزىرلەر،

~ ~شۇنداق قازانلاردىن قاچالىدىڭمۇ؟

ھىممەتلىرى ھېيت-بايرامدەك خۇشاللىق بەرگەن

ئىسلاھاتنىڭ دولقۇنىدا ئاقالىدىڭمۇ؟

~

مۇھەممەتجان راشىدىن شېئىرلىرىدىن تاللانما.