|
بويتاقلار مارشى
ئېلتىكىن
بويتاقمەن ئالەمچە ھەسرىتىم باردۇر.
بويتاقلىق ئۈستىدىن ئىسيانىم باردۇر.
شۇ سەۋەپ دەردىمنى قىلاي مەن بايان.
بايانىم ھەقىقى بويتاققا ياردۇر...
* * * *
يىگىرمە تۆت سائەت يۈرىمەن تەنھا
لەۋلىرىم قۇرۇشتىن كەتكەن گەز باغلاپ
چۈشۈمدە قولۇمنى سوزۇيمەن ئالغا
دۇنياغا كەلمىگەن يارنى قۇچاقلاپ
* * * *
ئويغانسام باغرىمدا مىجىلغان ياستۇق
خىيالىم جىسمىمغا قىلىدۇ زەردە
ئاھ مېنى قوينىغا ئالغان يوتقىنىم
يىرىمى ئۈستۈمدە يېرىمى يەردە
* * * *
ئوڭۇمدا.چۈشۈمدە.ھەر جايھەر يەردە
تەنھالىق ئىلكىدە يۈرگىنىم يۈرگەن
كۈنلەرنىڭ كۆپىدە يەنە شۇ ئەھۋال
لەۋلىرىم نائىلاج شامالنى سۆيگەن
* *
ئويلايمەن قاي ئۇلۇغ مىھرىبان ئانا
تۇغاركىن مەن كۈتكەن گۈزەل جاناننى
ئايىما ئەي خۇدا مېنىڭدىن زىنھار
كۆيۈمچان بىر گۈزەل ھەم كەڭ جاھاننى...
مەنبە:پارلاق مۇنبىرى ، ئېلتىكىن قەلىمىدىن . |
