تېلېۋىزور ساتىمەن ( ساتىرا )

ئاپتورى  : جىلليۈزى

(شېئىر قۇرۇلمىسى ئۈچۈن مەزمۇننى ئۆزگەرتمەي قىسمەن بوغۇملار قىسقارتىلدى)

ئېلانلارنىڭ ئۇگىسى- تېلېۋىزور ساتىمەن ،
يالغان گەپنىڭ ئۇستىسى- تېلېۋىزورنى ساتىمەن،
زوق ئېلىشلار خام خىيال ئېلانلارنىڭ دەستىدىن ،
پۇل تېپىشنىڭ چوتچىسى- تېلېۋىزور ساتىمەن.

زوق ئالاي دەپ بىر چاغدا خەجلىگەنتىم نەچچە يۈز ،
زوق بەرمەستىن ئەكسىنچە بەردى يالغان قۇرۇق سۆز،
قۇرۇق گەپلا مەيلىتى ئەسلى ئىكەن قارا يۈز ،
ھاياسىزلىق قۇتىسى- تېلېۋىزور ساتىمەن.

كۆرۈش قىيىن چوڭ - كىچىك، ئاتا - بالا جەم بولۇپ ،
چىقار يالىڭاچ خېنىملار ئېكرانىغا لىق تولۇپ ،
ئوينىتىدۇ قاش- قاپاق بۇزۇق كەبى تولغۇنۇپ ،
نايناقلارنىڭ سەھنىسى- تېلېۋىزور ساتىمەن.

ئارقىسىدىن ماختايدۇ بىر كاپسۇلنى داملىتىپ ،
قىلىۋېتەر ئىچسىڭىز ئارغىماقتەك چاپچىتىپ ،
سىزگە قاراپ بۇقىمۇ ، قالار ھەتتا داڭ قېتىپ ،
ھايۋاناتلار باغچىسى- تېلېۋىزور ساتىمەن.

دوختۇرخانا بەك توشاق- تېلېۋىزور ئىچىدە ،
دەم ئالماستىن سىز ئۈچۈن خىزمەت قىلار كېچىدە ،
بوئەي ، خۇاكاڭ ، لۇجۇلار ئېلان ئالدىن سېپىدە ،
كېسەللەرنىڭ شىپاسى- تېلېۋىزور ساتىمەن.

بوئەي چىقار موماينى ئايلاندۇرۇپ سەتەڭگە ،
قايتۇرىمىز قىزلىققا كىرسىڭىزمۇ سەكسەنگە ،
ھۈنىرىمىز «موزدوز»لۇق ماسلىشىپ جەمئىيەتكە ،
ئەخلاقسىزلىق جارچىسى- تېلېۋىزور ساتىمەن.

خۇاكاڭلىقلار شۇئارى:«بار ھەممىنىڭ ئامالى !»،
ئاغۋاتقىمۇ ئامال بار بۇ ئىلىم - پەن زامانى ،
بىزگە پەقەت پۇل كېرەك ئۇنۇتقان بىز ھايانى ،
ھاياسىزلىق بەلگىسى- تېلېۋىزور ساتىمەن.

كاڭجىيۈەن ۋە داجوڭنىڭ بار تۈمەن خىل دورىسى ،
ئۇلار بولغاچ بىمارنىڭ يىراق ئىمىش قايغۇسى ،
ئەلنى گوللاپ پۇل تېپىش ئەسلى ئۇلار ئارزۇسى ،
ساختىپەزلىك ئۇستىسى- تېلېۋىزور ساتىمەن.

يانا تېخى دېمىگەن نۇرغۇن ياڭزا كېسەل بار ،
سوقۇر ئۈچەي ، ئاشقازان گىمرويغىمۇ ئامال بار ،
بىزلا بولساق سىز ئۈچۈن سالامەتلىك مەڭگۈ يار ،
كېسەللەرنىڭ ئەلچىسى- تېلېۋىزور ساتىمەن .

ياخشى نومۇر ئىچىگە مىڭنى قاتتى ئېلاندىن ،
ئېلانلارنى ھەر كۆرسەم تۈتۈن چىقار مېڭەمدىن ،
ئىستانسىمۇ ئېلاننى ئاشۇردىغۇ پىلاندىن ،
لاۋزا ئېلان سەيناسى- تېلېۋىزور ساتىمەن .

بوئەي ، خۇاكاڭ ، لۇجۇ ، كاڭجىيۈەن ۋە داجوڭ غۇلجىدىكى دوختۇرخانا ۋە دورىخانىلار
مەنبە : تېلىۋىزۇر كۆرۈپ تۇغۇلغان خىياللىرىم


2011- يىل 7- ئاينىڭ 30 - كۈنى ( شەنبە )
ئەسلى مەنبە :http://www.makanim.cn/read.php?tid=11229

تېلېۋىزور

(ساتىرا)

ئابدۇللا روزىمۇھەممەد


ئۆيىمىزنىڭ تۆرىدىن ئورۇن ئالدىڭ تېلېۋىزور،
سېتىۋالغاچ «مەركەزنىڭ ساداسىنى ئاڭلاي» دەپ؛
«ئايلىنىدۇ قاياققا دەۋىر چاقى توختىماي،
بۇ يەرشارى كەنتىدە نە ئىش بولدى، بىلەي ...»دەپ.

ئويلىغانتىم مەن يەنە، كىنو پەسلى كەتكەچكە،
كۆرەي ئۆيدە ئولتۇرۇپ تۈرلۈك سەر خىل نومۇرنى؛
تىنىچلانسۇن بۇ كۆڭۈل ئېلىپ روھى ئۇزۇقلار،
ئارام تاپسۇن ۋۇجۇدۇم، سۈرەي ساغلام ھۇزۇرنى...

بەربات بولدى بىردەمدە، ئەپسۇس، شېرىن چۈشلىرىم،
سەن سۆزلىگەن ئالامەت سالغاچ مېنى تەشۋىشكە.
قالمىدىمۇ دۇنياداساغلام-تېمەن، ساق ئادەم،
ياكى شۇنداق قورقۇتۇپ كەلتۈرەمسەن ئەيۋەشكە.

«داۋالايمىز تۇغماسنى، قوچقار تۇغار ساغلىق» دەپ،
گەپ باشلىساڭ، توختايسەن كېلىپ«مەزى بېزى...» دە.
«شاگىرت بولغاچ بۈركۈتكە ئېشەك ئۈچتى ئاسماندا»،
دەپ جۆيلۈيسەن تارتىنماي شەيتان كەبى بەزىدە.

چاقىرىسەن توختىماي «... ئورنىمىزغا بىر كېلىڭ،
ئۆلەر ئادەم ھايالسىز پاشا چاقسا ئەگەردە...
تەكلىپ قىلدۇق سىز ئۈچۈن داڭلىق دوختۇر-ھەكىمنى،
تېز ئالدىنى ئالمىساق ھاياتىڭىز خەتەردە.

چىرايىڭىز بەك سولغۇن، چاتاق بارغۇ جىگەردە!
قان بېسىمى يۇقىرى، بۆرەككە تاش چۈشۈپتۈ؛
ئاجىزلاپتۇ تېنىڭىز، ئىچىڭ ‹ئابى زەمزەم›...نى،
زەمبۇرۇغ بار ئۈچەيدە، ئۆپكە سۇلۇق ئىششىپتۇ.

چىچىڭىز بەك شالاڭكەن، بۇ خەتەردىن بېشارەت،
ئۈنلۈك تىنسا ئىش چاتاق، جان ئالىدۇ خورەكمۇ؛
‹شىپالىق چىش پاستىسى› ھەل قىلىدۇ ھەممىنى،
‹كۈمىلاچ› بار، يېسىلا تىرىلىدۇ ئۆلۈكمۇ!

تىك تۇرالماس ئادەملار ئەگەر سۆڭەك بوشىسا،
كېسەل باردۇر تېرىدە ئانچە-مۇنچە قىچىشسا؛
بۇ كاپسۇلنى يىسىڭىز، ھەل بۇلىدۇ ئىشىڭىز،
ئىچىپ بىرىڭ داۋاملىق قورساق مۇجۇپ ئېچىشسا.

چۈشۈرىدۇ بۇ‹مەلھەم› داغ، سەپكۈننى، تۈكلەرنى...
سىناپ كۆرۈڭ خاتىرجەم پىنھان جايدا بولسىمۇ؛
ياۋائوت-چۆپ، گىياھنىڭ جەۋھىرىنى ئىلغاشتا،
شۇنچە ئالىم نەچچەيىل جاپا تارتتى ئەجەپمۇ...

ئالەمدىكى خۇشاللىق پەقەت سىزگە مەنسۇپتۇر،
بۇ دورىنى يېسىڭىزئايلىنىسىز بۇقىغا؛
بوز يىگىتلەر كۆزىنى ئۇزەلمەيدۇ مەڭگۈگە،
چاپلىما بار شىپالىق ياندۇرىدۇ‹ قىزلىق› قا...

دەپ ئاشۇنداق جارسېلىپ، تاپتىڭ نۇرغۇن «كىسەل» نى،
ئارقىدىنلا دورىسى تەييار يەنە سېنىڭدە؛
كۆردۈڭ بۇرنۇڭ ئۇچىنى«پۇل!»بولغاچقا مەقسىتىڭ،
يوقاپ ساڭا ئىشەنىچمۇ، گۇمان-شەك كۆپ ھەممىدە.

داڭلىمىغان باغىرداق، كۇسار، مايكاڭ... قالمىدى،
ھە دېگەندە بۇرايسەن گەپنى ئىشتان ئىچىگە!
ئولتۇرالماس خاتىرجەم بىر ئائىلە ئادىمى،
توپا چاچقاچ دائىما سەن ھايانىڭ كۆزىگە.

ياخشى نومۇر بولسىلا ھەر مىنۇتتا نەچچە رەت،
ئارلىشىدۇ تېتىقسىز، قېلىن-بىزەڭ ئېلانلار.
بۇ قىلمىشى گۇياكى رادىيوسى چەتئەلنىڭ،
خام كېكىردى ئېلانغا نۇرغۇن گېزىت-ژۇرناللار.

دېمەك، ھەرخىل يول بىلەن تاڭدىڭ«ئۆتمەس ماتا»نى،
ئالدى نۇرغۇن ئادەملەر زورلاپ ساتار تاناڭنى.
قالمىدى ھېچنەرسە سەن بازارغا سالمىغان،
قويۇپ بەرسەك يانمايسەن ئالداشتىن ئۆز ئانىڭنى!

ھېچبىر شۈكۈر قىلمىدىڭ ياكى ئىزا تارتمىدىڭ،
ماختاش-داڭلاش كېتەمدۇ راستنى شۇنداق توختىماي؟
ئاۋام رايى قەيەردە، سادىغاڭ كېتەي سېنىڭدىن،
ئاچ كۆزۈڭنى تېلېۋىزور، سەن غەپلەتتە ئۇخلىماي!

«يەتسۇن تېزدىن ئاۋامغا ئەمىر، پارمان، سىياسەت..»
شۇ مەقسەتتە كىرگۈزدى مەركەز  سېنى ئۆي-ئۆيگە.
پۇلنى ئويلاپ، ئۇنتۇدۇڭ ۋەزىپەڭنى، رولۇڭنى،
ئەل-ئاۋامنى بەزدۇردۇڭ، پىلتە بولدۇڭ دەيدەيگە.

مەنزىل: جۇڭگو مىللەتلىرى