ئېلانخۇمارلار (فېليەتون)

Intil · ۋاقتى: 2010-8-8 20:13:07

ئەبەي ئىسمائىل
ھېلىم بودەكنىڭ پۇت – قولى ئاغرىپ، گۈس – گۈس دەسسەپ ماڭمىغىنىغا خېلى يىل بولۇپ قالدى. ئورنىدىن تۇرسا تىزى، ئولتۇرسا يوتىسى ئاغرىيتتى. بارمىغان دوختۇرخانا، كۆرۈنمىگەن دوختۇر قالمىدى. بىر دوختۇر ‹‹سىزدە رىماتىزمنىڭ ئالامىتى بار ئىكەن. ماۋۇ دورىنى يەپ بېقىڭ، ئەمما ئۈنۈمى ئۇزاقتىراق كۆرۈلىدۇ، مۇقىم ئۈچ – تۆت باسقۇچ(ھەر باسقۇچى بىر ئاي) يېمىسىڭىز بولمايدۇ›› دېسە، يەنە بىر دوختۇر ‹‹سىزدە كالتسىي كەمدەك قىلىدۇ، سېمىزلىكىڭىز سۆڭەككە بېسىم پەيدا قىپتۇ، ئورۇقلىمىسىڭىز بولمىغۇدەك. كالتسىي تولۇقلاش بىلەن بىللە، ئورۇقلاشنىمۇ چىڭ تۇتۇڭ. ئادەتتە ھەرىكەت ئارقىلىق ئورۇقلاشنىڭ ئۈنۈمى ياخشى، ئەكس تەسىرى يوق، بەدەنگە پايدىلىق. ئەمما – زە، سىزنىڭ پۇت – قولىڭىز ئاغرىيدىكەن، كۈچەپرەك ھەرىكەت قىلمىسىڭىز ئورۇقلىيالمايسىز. بەك كۈچىۋەتسىڭىز سېمىز بولغاچقا، ئۆپكە، يۈرىكىڭىز كۆتۈرەلمەيدۇ. ئۆپكە، يۈرەكتىن چاتاق چىقتى، دېگەنلىك، ھەي... بولدىلا، ئەڭ ياخشىسى دورا ئارقىلىق ئورۇقلىسىڭىز بولغۇدەك. شۇنىمۇ سەمىڭىزگە سېلىپ قوياي، يېقىندىن بۇيان يېمەكلىك، دورا نازارەتچىلىكى ئورۇنلىرىنىڭ خىزمىتى بەك ئالدىراش بولۇپ كەتتى، ساختا، ناچار دورىلارنى ۋاقتىدا تەكشۈرۈپ تۇرۇشقا يېتىشەلمەيۋاتىدۇ. شۇڭا، نەچچە يىل ئىزدىنىش، ئەتراپلىق تەتقىق قىلىش ئارقىلىق ئورۇقلاش دورىسى ياسىغانىدىم. شۇنى...›› دېدى. يەنە بىر دوختۇر ‹‹بۇ دورىنى ئامېرىكىدىن كىرگۈزگەن. بىر نەچچە قۇتىلا قالدى. قاندىكى ياغنى سىيرىيدۇ، نەچچە كۈندىلا ئورۇقلايسىز. ئورۇقلىسىڭىز بېسىم يېنىكلەپ، پۇتىڭىز ئاغرىمايدىغان، تالمايدىغان بولىدۇ. دورىنى يەۋېرىپ ئورۇقلاپ كەتسىڭىزمۇ، دورىنى توختىتىپ قويماڭ، يەۋەرسىڭىز بىر مەزگىلدىن كېيىن بەدىنىڭىز ھازىرقىدىن سەل ئورۇقراق ھالەتكە قايتىدۇ. بۇ دورىنىڭ ئورۇقلارنى سەمرىتىدىغان، سېمىزلەرنى ئورۇقلىتىدىغان رولى بار›› دېدى. ئۇلارنىڭ بۇ گەپلىرى تېلېۋىزوردىكى ئېلانلارغا ئوخشايتتى. شۇڭا ھېلىم بودەك بىر مۇنچە يول يۈرۈپ، ئۆچىرەت ساقلاپ دوختۇرنىڭ گېپىنى ئاڭلىغاندىن كۆرە ئېلاننىلا ئاڭلاشنى ياقتۇرۇپ قالدى. شۇڭا ئۇ تېلېۋىزورنىڭ ئالدىدىن كېتەلمەي، ئاخىر ئېلانغا خۇمار بولۇپ قالدى. ھېلىم بودەكنىڭ بالىلىرىمۇ ۋاپادار ئىدى، ئېلاندا ئاڭلىغان دورىلارنى دادىسىغا ئەكىلىپ بېرەتتى ھەم دورىنىڭ ئۈنۈمى توغرىسىدا ئېلاندا ئاڭلىغىنىنى دەپ بېرىشنى ئۇنتۇمايتتى. جان تاتلىق – دە، بالىلىرى ئەكىلىپ بەرگەن دورىنى يېمىسە بولامدۇ؟ ھەممىسى دادىسىنىڭ ئورنىدىن تېزرەك تۇرۇشىنى ئۈمىد قىلىدىغان تۇرسا. بالىلارنىڭ كۆڭلى ئۈچۈن بولسىمۇ چوقۇم يېيىش كېرەك! بىرسى ئاچچىق، بىرسى تاتلىق، بىرسى چۈچۈمەل، بىرسى سېسىق... مەيلى، بىرى بىرىنى تولۇقلار، بىرسى پايدا قىلمىسا، يەنە بىرسى پايدا قىلىپ قالار...
شۇنداق قىلىپ، ھېلىم بودەكنىڭ ياستۇقىنىڭ يېنى ئېلانلاردا دېيىلگەن دورا قاپلىرى بىلەن تولدى. لېكىن ئۇنىڭ پۇتىنىڭ ئاغرىشى توختىمىدى. شۇنداقتىمۇ، ئۇ يەنىلا تېلېۋىزورنىڭ ئالدىدىن كېتەلمىدى. بالىلىرىنىڭ كۆڭلىنى يەردە قويمىدى. پۇت – قول ئاغرىقىغا پايدا قىلىدىغان دورا ئېلانلىرى بەزىدە يېڭىلىنىپ تۇراتتى. ‹‹ئادەم ئوتتۇرا ياشتىن ئاشقاندا سۆڭەك شالاڭشىشقا باشلايدۇ، سۆڭەك شالاڭلاشسا كالتسىي تولۇقلاش كېرەك... سۆڭىكىڭىز چىڭىسا، دىسكو ئوينىيالايسىز... پەلەمپەيدىن گۈس – گۈس دەسسەپ چىقالايسىز...›› تېلېۋىزوردا بېرىلگەن بۇ يېڭى ئېلان ئۆمرىدە سەل ئېگىزرەك تامدىمۇ قورقۇپ مېڭىپ باقمىغان ئېلانخۇمار ھېلىم بودەكنىڭ كۆڭلىدە دارۋازلىق ئىستىكى قوزغىدى....

مەنبە http://www.xjtsnews.com/normal/c ... 6/content_90611.htm

Sezgurboy · ۋاقتى: 2010-8-9 12:08:04

مۇشۇ ئېلانچىلاردىن قېلىن ئادەم يوقمىكىن دەيمەن. قېرىسى ساقىلىنى سىيلاپ تۇرۇپ كاسىلدىسا، ياشلىرى قىلىق چىقىرىپ نازلىسا، ئەركەكلەر خوتۇن كىشىنىڭ ئوسمىسىدىن تامبىلىغىچە ماختىسا ( تاس قالىدۇ ئۆزەم ئىشلىتىپ سىناپ باققان دېگىلى;P)

ھېسابات		ساقلاش	پارول قايتۇرىۋېلىش
پارول			تىزىملىتىش

مىكروبلوگ[ يېڭى | 24 سائەت | 7 كۈن | 30 كۈن ]

ئېلانخۇمارلار (فېليەتون)