تەرجىمىنىڭ تەبىرى ۋە تۈرلىرى

كۆرۈش شەكلى · ۋاقتى: 2011-1-20 08:16:37

تەرجىمىنىڭ تەبىرى ۋە تۈرلىرى

1. تەرجىمىنىڭ تەبىرى

تەرجىمە بىر خىل تىلدا ئىپادىلەنگەن مەنە ۋە مەزمۇننى ئىككىنچى بىر خىل تىلدا قايتىدىن ئىپادىلەپ بېرىش پائالىيىتى بولۇپ، بىر-بىرىگە ئوخشىمايدىغان تىللاردا سۆزلىشىدىغان شەخس، جامائە، مىللەتلەرنى مۇناسىۋەتلەشتۈرۈشكە تىل جەھەتتىن خىزمەت قىلىدىغان ۋاستە.

2. تەرجىمىنىڭ تۈرلىرى

(1)چېتىلىدىغان تىل جەھەتتىن ئالغاندا، تەرجىمىنى ئۆز تىلىدىن باشقا بىر تىلغا قىلىنىدىغان تەرجىمە ۋە باشقا تىلدىن ئۆز تىلىغا قىلىنىدىغان تەرجىمە دەپ ئايرىلىدۇ. مۇتلەق كۆپچىلىك تەرجىمانلارنىڭ تەجرىبىلىرىدىن قارىغاندا، ئۆز ئانا تىلىدىن باشقا بىر تىلغا تەرجىمە قىلىش ھەر ھالدا قىيىن، باشقا تىلدىن ئۆز ئانا تىلىغا تەرجىمە قىلىش ئومۇمەن ئاسانراق. لېكىن شۇنداق غەلىتە ئەھۋالمۇ مەۋجۇتكى، ئەسلىدە ئانا تىلى بىلەن تىلى چىققان، ئەمما مەكتەپ تەربىيىسىنى باشقا بىر مىللەت تىلىدا ئالغان ئادەملەرنىڭ باشقا تىلدىن ئۆز ئانا تىلىغا ئىشلىگەن تەرجىمىلىرى ھەر ھالدا پەردازلىرى چالا بۇيۇمغا ئوخشاپ قالىدۇ. ئەلۋەتتە، ھەر ئىككى تىلنى بىر-بىرىگە توغرا تەرجىمە قىلالايدىغان سەۋىيىگە ئېرىشىش ھەر بىر تەرجىمان ئۈچۈن كامالەت تېپىش نىشانىغا ئايلىنىشى كېرەك.

(2) ئىشلەش ئۇسۇلى جەھەتتىن ئالغاندا، تەرجىمىنى ئېغىز تەرجىمىسى ۋە قەلەم تەرجىمىسى دېگەن ئىككى خىلغا ئايرىش مۇمكىن. بۇ ئىككى خىل تەرجىمە ئۇسۇلىنىڭ ئورتاقلىق تەرىپىمۇ، خاسلىق تەرىپىمۇ بار؛ ئېغىز تەرجىمىسىدە بولسۇن، قەلەم تەرجىمىسىدە بولسۇن، تەرجىمە توغرا، راۋان بولۇشى لازىم. بۇ ئورتاقلىقتىن باشقا، ئېغىز تەرجىمىسىدە تەرجىمان مېڭىسى ئۆتكۈر، چۈشىنىشى تېز، ھېپىزى(ئېسىدە تۇتۇۋېلىش ئىقتىدارى) كۈچلۈك بولۇشى لازىم. قەلەم تەرجىمىسىدە تەرجىمان ئالدىرىماي-ئاسىقماي، قايتا-قايتا ئويلىنىپ، تەتقىق قىلىپ، تەرجىمىنى كامالەتكە يەتكۈزۈش ئىمكانىيىتىگە ئىگە.

(3)ماتېرىيال تۈرى جەھەتتىن ئالغاندا، سىياسىي-نەزەرىيىۋى ئەسەرلەر تەرجىمىسى، ئەدەبىي ئەسەرلەر تەرجىمىسى، پەن-تېخنىكا ئەسەرلىرى تەرجىمىسى، خەت-چەك، ھۆججەت-ئالاقە تەرجىمىسى دېگەن تۈرلەرگە ئايرىش مۇمكىن.

(4) تەرجىمىنىڭ ئېھتىياجىغا ئاساسەن، تەرجىمىنى يەنە ئادەتتىكىچە تەرجىمە ۋە پەۋقۇلئاددە تەرجىمە دېگەنلەرگىمۇ ئايرىش مۇمكىن. ئادەتتىكىچە تەرجىمە دېگىنىمىزدە ئورگىنالنى(ئەسلى ئەسەر، ئەسلى نۇسخىنى)كەم-كۇتىسىز ئەينەن تولۇق تەرجىمە قىلىشنى كۆزدە تۇتىمىز؛ پەۋقۇلئاددە تەرجىمە دېگىنىمىزدە ئالاھىدە مەقسەتنى، ئالاھىدە ۋەزىپىنى ۋە ياكى ئالاھىدە زۆرۈرىيەتنى كۆزدە تۇتۇپ، ئورگىنالنى كۆكلەپ(ئاتلاپ، تاشلاپ، ئۈزۈپ ئېلىپ) ۋە ياكى يۇغۇرۇپ-قىسقارتىپ تەرجىمە قىلىشنى كۆزدە تۇتىمىز.

تىل ۋە تەرجىمە توغرىسىدىكى تېخىمۇ كۆپ ماقالىلار
تىل تەرجىمە بلوگىدا بۇ يازمىنى ئاخىرىدا نامسىز تەھرىرلىگەن. ۋاقتى 2011-1-20 11:28

yaruq · ۋاقتى: 2011-1-20 18:41:15

يازمىنىڭ مەنبەسىنى ئەسكەرتمەپسىزغۇ! بۇ ئاتاقلىق تەرجىمان توختى باقى ئارتىشىنىڭ ‹قانداق تەرجىمە قىلىش كېرەك؟› دېگەن كىتابىنىڭ بۇسۇغۇسىدىكى مەزمۇن. لېكىن ئەجرىڭىزگە تەشەككۇر!

arghu · ۋاقتى: 2011-1-20 21:41:41

ھەقىقەتەن بۇنىڭ مەنبىيىنى ئەسكەرتمەپتىمەن، بۇنى مەن ئارتىشى ۋە باشقا تەرجىمانلارنىڭ مۇناسىۋەتلىك كىتابلىرى ھەمدە خەنزۇچە-ئۇيغۇرچە تەرجىمە دەرسلىكىدىن پايدىلىنىپ تەييارلىدىم. بۇ يازمىنى ئاخىرىدا arghu تەھرىرلىگەن. ۋاقتى 2011-1-20 21:44

ھېسابات		ساقلاش	پارول قايتۇرىۋېلىش
پارول			تىزىملىتىش

مىكروبلوگ[ يېڭى | 24 سائەت | 7 كۈن | 30 كۈن ]

تەرجىمىنىڭ تەبىرى ۋە تۈرلىرى