ئاپتونوم رايون ئۈنۈملۈك تەدبىر قوللىنىپ، ر ...

ئاپتونوم رايون ئۈنۈملۈك تەدبىر قوللىنىپ، رايون ئىچى تولۇقسىز ئوتتۇرا ۋە ئىچكىرىدىكى

شىنجاڭ تولۇق ئوتتۇرا سىنىپلىرىنىڭ ئوقۇتۇشىنى چىڭ تۇتىدۇ

ئاپتونوم رايون 11 - يانۋار 2012 - يىللىق رايون ئىچى تولۇقسىز ئوتتۇرا ۋە ئىچكىرىدىكى شىنجاڭ تولۇق ئوتتۇرا سىنىپلىرى خىزمەت يىغىنى ئېچىپ، 2011 - يىللىق خىزمەتلەرنى خۇلاسىلىدى ۋە بۇ يىللىق خىزمەتلەرنى ئورۇنلاشتۇردى.

    ئۇقۇشىمىزچە، 2001- يىلى ئىچكىرى ئۆلكىلەردە شىنجاڭ تولۇق ئوتتۇرا سىنىپى تەسىس قىلىنغاندىن بۇيان، ئوقۇغۇچى قوبۇل قىلىش كۆلىمى ھەر يىلقى 1000دىن 2011 - يىلىدىكى 7090غا، شىنجاڭ تولۇق ئوتتۇرا سىنىپى تەسىس قىلغان شەھەر 40قا، مەكتەپ 76گە يەتكەن. 2004 - يىلىدىن بۇيان سەككىز قاراردا 18 مىڭ ئوقۇغۇچى تولۇق ئوتتۇرا مەكتەپنى پۈتكۈزگەن، ئۇلارنىڭ %95ى ئىچكىرىدىكى ھەر قايسى ئالىي مەكتەپلەردە ئوقۇغان. 2004- يىلى رايون ئىچى تولۇقسىز ئوتتۇرا سىنىپى تەسىس قىلىنغاندىن بۇيان، سەككىز قاراردا 35 مىڭدىن كۆپرەك ئوقۇغۇچى قوبۇل قىلىنغان، رايون ئىچى تولۇقسىز ئوتتۇرا سىنىپى تەسىس قىلغان شەھەر 11گە، مەكتەپ 22گە يەتكەن. 2007 - يىلىدىن 2011 - يىلىغىچە 19 مىڭغا يېقىن رايون ئىچى تولۇقسىز ئوتتۇرا سىنىپى ئوقۇغۇچىسى ئوقۇش پۈتكۈزۈپ، كۆپ قىسمى ئىچكىرىدىكى شىنجاڭ تولۇق ئوتتۇرا سىنىپىغا ئۆتكەن.

    بۇ يىل ئاپتونوم رايونىمىز داۋاملىق ئۈنۈملۈك تەدبىر قوللىنىپ، ئىچكىرىدىكى شىنجاڭ تولۇق ئوتتۇرا سىنىپىنىڭ خىزمەتلىرىنى ئىلگىرى سۈرۈپ، رايون ئىچى تولۇقسىز ئوتتۇرا سىنىپىنىڭ ئىختىساسلىق خادىم تەربىيەلەش خىزمىتىنى ئىلمىي تەرەققىي قىلدۇرىدۇ، ئەخلاق تەربىيەسى ۋە ئىدىيەۋى سىياسىي تەربىيە خىزمىتىنى كۈچەيتىدۇ؛ رايون ئىچى تولۇقسىز ئوتتۇرا سىنىپى، رايون ئىچى تولۇق ئوتتۇرا سىنىپلىرىنىڭ ئوقۇش - ئوقۇتۇش سەۋىيەسىنى ئۆستۈرىدۇ؛ ئىچىكىرىدىكى شىنجاڭ تولۇق ئوتتۇرا سىنىپلىرىنى پۈتكۈزگەن ئالىي مەكتەپ ئوقۇغۇچىلىرىنىڭ ئىشقا ئورۇنلىشىشىغا يېتەكچىلىك قىلىش خىزمىتىنى كۈچەيتىپ، كۆپ خىل يول بىلەن ئىشقا ئورۇنلىشىشنى ئىلگىرى سۈرىدۇ.