پەرھات تۇرسۇن

ئاپتۇرى : رەخىم ياسىن قاينامى

مەن ئوقۇيمەن
سۇنىڭ دەپتىرىنى ۋاراقلاپ
ئېقىپ تۇرغان يارقىن قۇرلاردىن

سۇغا كەچ بولماس
سۇ شاراپتا مەست بولماس
سۇ توختاپ قالسىمۇ
كەينىگە يانماس...

پەرھات تۇرسۇن
قەلىمىنى كۆتۈرۈپ چىقىپ
ياشلار مەيدانىغا تىكلىدى
بىز ئولاشتۇق،ئۇلار ئولاشتى
كۈن پاتتى بىز پاتمىدۇق
ئاي چىقتى بىز چىقمىدۇق...

قەلەم
بىر ئۇچى ئەلەم

بىز كېتىشىمىز مۇمكىن
مەست بوپقالمىساقلا
ئەمما
بىزنى مەست قىلغۇدەك شاراپ تېخى يوق
بىزنى ئېپ قالالىغۇدەك جالاپ تېخى يوق...

مەن ئوقۇيمەن
ئوتنىڭ دەپتىرىنى ۋاراقلاپ
كۆيۈۋاتقان سۈڭەكلەردىن

ئۆلۈم ئىستەك ئەمەس
جەريان بېكىتى
پەرھات تۇرسۇن
كىرىپ كەتتى ئۆيىگە
بىر ئۆلۈكنى سۆرىگەن پېتى...

بىز ئوقۇيمىز پەرھات تۇرسۇننى
ھاياتلىق دەپتىرىنىڭ ئاپئاق بېتىنى ۋاراقلىغانچە...
قەلەمكەش پەرھات
شېھىتلىكتە چېپىپ يۈرگەن ئات...