سەيدۇللا سەيپۇللايوۋ 1918- يىلى 1- ئاينىڭ 4 - كۈنى تۇرپان چاتقال يېزىسى ( تۇرپان قىرىمچى ) دە كەمبەغەل دېھقان ئائىلىسىدە دۇنياغا كەلگەن. ئۇ 1944- يىلى 10- ئايدا شىنجاڭ ئۈچ ۋىلايەت ئىنقىلابىغا قاتناشقان، 1950- يىلى 3- ئايدا ۋاڭ جېن، ۋاڭ ئىنماۋنىڭ تونۇشتۇرۇشى بىلەن قەشقەردە جۇڭگو كوممۇنىستىك پارتىيىسىگە كىرگەن. دەم ئېلىشقا چىقىشتىن ئىلگىرى ئاپتونوم رايونلۇق خەلق قۇرۇلتىيى دائىمىي كومىتېتىنىڭ مۇئاۋىن مۇدىرى، پارتىيە گۇرۇپپىسىنىڭ مۇئاۋىن شۇجىسى ئىدى.
    سەيدۇللا سەيپۇللايوۋ 1945- يىلى 3- ئايدىن 1946- يىلى 6- ئايغىچە ئۈچ ۋىلايەت ئىنقىلابى ۋاقىتلىق ھۆكۈمىتى مائارىپ نازارىتى كادىرلار بۆلۈمىنىڭ باشلىقى، قوشۇمچە غۇلجا شەھەرلىك مائارىپ ئىدارىسىنىڭ باشلىقى بولۇپ ئىشلىدى. 1945- يىلى 10- ئايدىن 1948- يىلى 8- ئايغىچە ئۈچ ۋىلايەت ئىنقىلابىي ياشلار تەشكىلاتى مەركىزى كومىتېتىنىڭ مۇئاۋىن رەئىسى ۋە رەئىس ۋەزىپىسىنى ئاتقۇردى.
    ئازادلىقتىن كېيىن، ئۇ 1949- يىلى 11- ئايدىن 1950- يىلى 5- ئايغىچە جەنۇبىي شىنجاڭ تەشۋىقات ئەترىتىنىڭ دۈيجاڭى، جەنۇبىي شىنجاڭ ھەربىي - مەمۇرىي كومىتېتىنىڭ ئەزاسى، قوشۇمچە ئاممىۋى خىزمەت بۆلۈمىنىڭ مۇئاۋىن باشلىقى بولۇپ ئىشلىدى.
    ئۇ 1950- يىلى 12- ئايدا گوموۋو باشچىلىقىدىكى جۇڭگو ۋەكىللەر ئۆمىكىنىڭ تەركىبىدە ۋارشاۋاغا بېرىپ ئىككىنچى قېتىملىق دۇنيا تىنچلىقىنى قوغداش يىغىنىغا قاتناشتى.
   1951- يىلى 1- ئايدا قەشقەر رايونلۇق پارتكوم جەنۇبىي شىنجاڭ پارتكومىغا ئۆزگەرتىلگەندە يەنە جەنۇبىي شىنجاڭ پارتكومىنىڭ ئەزالىقىغا تەيىنلەندى. 1951- يىلى 7- ئايدىن 1953- يىلى 9- ئايغىچە قەشقەر ۋىلايىتىنىڭ ۋالىسى، قوشۇمچە قەشقەر ۋىلايەتلىك ئوتتۇرا خەلق  سوت مەھكىمىسىنىڭ باشلىقى بولدى. 1952- يىلى 12- ئايدىن 1955- يىلى 9- ئايغىچە شىنجاڭ شۆبە بيۇروسىنىڭ ئەزاسى بولدى.
   1953- يىلى 8- ئايدىن 1955- يىلى 8- ئايغىچە مەركىزىي كومىتېت شىنجاڭ شۆبە بيۇروسى ئىنتىزام تەكشۈرۈش كومىتېتىنىڭ شۇجىسى بولدى.
  1956- يىلى 7- ئاينىڭ 9- كۈنىدىن 24- كۈنىگىچە ئۆتكۈزۈلىدىغان شىنجاڭ ئۇيغۇر ئاپتونوم رايونلۇق بىرىنچى قېتىملىق پارتىيە قۇرۇلتىيىدا ئۇ ئاپتونوم رايونلۇق پارتكومنىڭ ئەزالىقىغا سايلاندى.
   1956- يىلى 7- ئاينىڭ 26- كۈنى ئۆتكۈزۈلگەن ج ك پ شىنجاڭ ئۇيغۇر ئاپتونوم رايونلۇق بىرىنچى نۆۋەتلىك كومىتېتىنىڭ بىرىنچى سانلىق ئومۇمىي يېغىنىدا ئۇ ئاپتونوم رايونلۇق پارتكومنىڭ دائىمىي ئەزالىقىغا ۋە ئاپتونوم رايونلۇق پارتكومنىڭ شۇجىلىقىغا سايلاندى.
    ئۇ 1960- يىلى 2- ئايدىن 1966- يىلى 5- ئايغىچە قۇمۇل ۋالىي مەھكىمىسىنىڭ مۇئاۋىن ۋالىسى بولدى.
   1979- يىلى 8- ئايدىن 1980- يىلى 12- ئايغىچە ئاپتونوم رايونلۇق 4- نۆۋەتلىك سىياسىي كېڭىشىنىڭ مۇئاۋىن رەئىسى بولدى.
   1980- يىلى 12- ئايدىن 1987- يىلى 10 ئايغىچە ئاپتونوم رايونلۇق 5- نۆۋەتلىك خەلق قۇرۇلتىيى دائىمىي كومىتېتىنىڭ مۇئاۋىن مۇدىرى، پارتگۇرۇپپىسىنىڭ مۇئاۋىن شۇجىسى بولدى.
 ئۇ يەنە مەملىكەتلىك 1- نۆۋەتلىك ۋە 6- نۆۋەتلىك خەلق قۇرۇلتىيىنىڭ ۋەكىلى ۋە مەملىكەتلىك 5- نۆۋەتلىك سىياسىي كېڭىشىنىڭ ئەزاسى بولدى.
     سەيدۇللا سەيپۇللايوۋ 1990- يىلى 12- ئايدا دەم ئېلىشقا چىقتى.