ئايدىڭ كەچتە سانسىز يۇلتۇزلار،
كۆز قىسىدۇ شوخلۇق قىلىشىپ.
كۆل بويىدا بىر جۇپ قىز يىگىت،
ئولتۇرىدۇ سىرداش بۇلۇشىپ.

بىر بىرىگە يانداش ئولتۇرۇپ،
تۆكىشىدۇ كۈڭۈل سىرىنى.
كۆزلىرىدىن چېچىپ ئوت يالقۇن،
كۆيدۇرىدۇ بىرى بىرىنى.

كۆك ئاسماندا تۇلۇن ئاي ئاستا،
كىرىپ كەتتى بۇلۇت كەينىگە.
ئوتلۇق لەۋلەر ئۇچرىشىپ شۇدەم،
ئوت ياماشتى قىزنىڭ چېھرىگە.

چەكسىز گۈزەل بىلىندى ھايات،
مۇھەببەتتە تاپقاشقا كامال.
پەلەك تارتتى يېڭىچە ئارمان،
كەلگۈسىگە باغلانغان ۋىسال.

بەخت تىلەپ ئاسماندىكى ئاي،
گۈۋاھ بولدى شىرىن سۆيگۈگە.
ئايرىلماڭلار دىدى يۇلتۇزلار،
ئاشىق مەشۇق بۇلۇپ ئۆلگۈچە.

ياڭراپ تۇرسۇن ئەبەتكە شۇنداق،
سۆيگۈ كۈيى چېكىپ تارىنى.
بەرگىن خۇدا ساداقەت-ۋاپا،
سۆيۈپ ئۆتسۇن بىرلا يارىنى.