سېغىنىشنىڭ ئاسمىنىدا پەرۋازىڭ،نىگار
سالام لەۋزى
قۇيغىنا، ساقى، ئوتۇڭنى، ئېرىسۇن بۇ دەم كۆڭۈل،
لەۋ يېرىپ تۇرغان مەھەلدە سەنمۇ ھەم بىردەم تۆكۈل!
ئاقسىغان ئۈلپەت كۆڭۈلنى ھەر مەھەل تىنتىپ ئۆتەر،
رىشتىدە تاپقىن تىكىشنى، پەيلى مۇز سەپتىن سۆكۈل.
غەم بىلەن ئوتقاش كۆڭۈللەر، توي بىلەن ئەسلى سۈزۈك،
يا تۈزۈك ئاشقىن داۋاندىن،ۋەسلى چەت يولدىن سۈرۈل.
دىلرەبا پەيزى قاياندا، سەبدىشىڭ قايسى سىياق؟
دىل چېتىپ تۇرغان ئارادا زەپ قىزىق قۇردا پۈتۈل.
بەكمۇ زىل رىشتە كۈيىدە بارىمىز مەشرەپ سىياق،
شەلپىرىن ئاچقاندا ئاسمان ھەر يېقىن دىلغا پۈكۈل.
يىپ ئېشىپ تۇرغان پىكىرلەر چاتقۇسى نەۋرۇز سالام!
يا چاۋاك بولغىن سەنەمدەك، دەردكە تاش مۇشت بوپ تۈرۈل!
شام ئىدىم يانغان پىلىلداپ دوست ئارا رىشتە چېتىپ،
ئەمدى سەن، تۇيغۇن،ئىشىتكەن مەززىسىز تەمدىن ئۈزۈل!
2012-يىلى 5-ئۆكتەبىر، پىچان.
ئەرزى ۋىسال
ئالمىشىپ تۇردى قەدەھلەر ساقىنىڭ لەۋزىدە كىم؟
ئۈلپىتى كەلسە يۈرەكنىڭ پەيتى ئوت كۆيگەيمۇ جىم؟
ياڭرىتىپ تۇرسا جاكانى دىلدىكى دىلبەر داۋام،
چاڭقىغان لەۋلەر لېۋىگە يەملىنىپ تۇرمامدۇ ھىم.
قاچقىنىم خوپتۇر بوغۇلغان ئۈن ئارا چۈشكەندە شەك،
ساقلىغان پەيتى ئازابتا نۇرنى جۇغلايدۇ رەسىم.
ئەھدىلەر ئېيتقان قەرەلنىڭ ۋەسلىدە ھىجران سۈرى،
ئەھلى دەرد يولداش ۋاپاغا، دەپ ئېنىق تەييار كېسىم.
ھېكمىتى نەۋرۇز ئېشىدەك سۆيگۈنىڭ پەرزىدە ئوت،
ساقىيا، ئاتەشلىرىڭدىن ئەم تېپىپ تۇرغاي زەخىم.
چىللىسام خۇرشىدنى كۆككە ئۇزىغان تۈنلەر ئارا،
تامسىدى ئىستەك يۈزىگە مىڭ سەھەرلىك بىر تېمىم.
جىلۋىلىك ھەر بىر قەدەھتە بار چوقۇم ئەرزى ۋىسال،
ھەر دەقىق تۇيغۇن ئوتىسىز بىناۋادۇر دىلبىرىم.
2012-يىلى 11-نويابىر، تۇرپان.
ئىلتىماس
باغ ئارا رەيھان ھىدىدەك ئۇچتى ئەنبەر ئىلتىماس،
سەپسىكەن دەپ نۇرنى يۈزدىن دىلبىرىم قايرىپ لىباس.
بەك ئۇزاپ كەتكەن نەزەردىن قالدى مەھكۇم شۈبھىسى،
ياكى تەقدىر يازمىشىدىن دەردلا قالغانمۇ مىراس؟
بىر ئەزىز كۈيدە سېغىندىم ئوت ئۈپۈك ئىمزاسىنى،
بولمىدى قەلبىم پايانى دەشتى ھىجراندىن خالاس...
بەرمىگەن ئىمكان لېۋىگە لەۋ چېتىپ ئۆتمەككە بىر،
ئول نىگار نەلەردە، كىمگە جىلۋىگەر بوستانغا خاس؟
بۇ ئىشىقنىڭ قەدرى پۈتمەس زەھرى قىيناقلاردا، ۋاھ!
نە خۇلۇق دىلبەر دىلىغا،پەزلىگە بولغان بىماس؟
بار ئەزىز سۈبھى لېۋىدە بىتامام ئۈلپەتكە پەيت،
دەپ تەسەللىي شەربىتىنى ئوتلىماق جانغا ئاساس.
بولسىدى دەپ بىر نېسىۋە مىڭ باغاشنىڭ لەۋزىدىن،
ئۆرتىدىم گۈر – گۈر يېنىپ مەن ئۇلغىيىپ تۇيغۇن قىياس!
2012-يىلى 4-ئۆكتەبىر، تۇرپان.
قەستى غەمدىن چەتتىسەن
يول سوراپ بارسا ئېچىرقاش، دىلبىرىم، خىلۋەتتىسەن،
لالىزار كۈلگەن سەھەردەك بەرقى نۇر سۈلكەتتىسەن.
دىل يېرىپ پۈتكەن سالامغا چۈشكىنى كۆچمەس كۆيۈك،
ئەۋجى ئوت تاپقاندا ئوتنى لەۋ كۆيۈك، ئىشرەتتىسەن.
جۇش ئۇرۇپ ئاققاندا ئەگىز تەپتى مۇز ھىجران ئېرىپ،
تەقلىدىڭ نەۋرۇز مېھىرنى، قەدرى جان خىسلەتتىسەن.
بىر قەدىم چۆچەككە ئوخشاش سۆھبىتىڭ ئىمكانى بار،
لاپ قىلىپ بىر ئۇچسا كىرپىك ئىككى ئالەم دەردتىسەن.
كۆك قۇچۇپ ئۈزگەن ھىلالدەك تاۋلىنار ھۆسنۈڭ سېنىڭ،
نازى جان ھۆرلەر سېپىدە بەرقارار پۇرسەتتىسەن.
ئىشق ئارا تەرىپ يېزىلسا سەن ھامان ئەسلى جاۋاب،
شاھ مۇھەببەت دەستۇرىغا تۇغ كۆتۈرگەن خەتتىسەن.
دىل سوراپ بارغان باغاشنى ماگمىغا باستىڭغۇ، يار،
ئاسمىنىڭ، تۇيغۇن، ياشاردى، قەستى غەمدىن چەتتىسەن...
2012-يىلى 12-نويابىر، تۇرپان.
ئېچىلغاندا پۇرسەتنىڭ گۈلى
تىلىمدا پەسلىمەس نەرە، سوغۇلماس ھەسرىتىم ئەمما،
دىلىمدا ئۆكسىمەس سەبرە، قۇرۇلماس شەۋكىتىم ئەمما.
تەۋەللۇت ھۆكمىگە قادىر باھاردەك ئىستىكىم زاھىر،
نىگارنىڭ دەھشىتى ھازىر، ئۇتۇلماس بەيئىتىم ئەمما.
نەزەردىن چۈشسە گەر چاقماق بېسىلغاي دىلدىكى چاڭقاق،
سالامنىڭ ۋەدىسى ياپراق، قىزىلگۈل رىغبىتىم ئەمما.
سۆيۈكنىڭ قەدرىدە سەن بار، ھىجىرنىڭ قەستىدە مەن بار،
لېۋىمنىڭ زەخمىگە ئوت يار، قۇيۇلماس شەربىتىم ئەمما.
ئېچىرقاش تاۋلىسا ياشنى، ئېقىتتىم جىلۋىگەر قاشنى،
رەشكلەر چۆرۈسە تاشنى ئەسەبلەر نۇسرىتىم ئەمما.
يۈرەكنى بەزلىگەن خەندە تۈزۈكلۈك قويمىدى تەندە،
شەرىھكە چىللىماس بەندە، شاھانە خىلۋىتىم ئەمما.
نىگارنىڭ لەۋزىدە مۆھلەت ياسايدۇ زەپ لەزىز سۆھبەت،
ئۇزارغان ئەستىكى ئۈلپەت بالاغەت سائىتىم ئەمما.
تىلىمدا پەسلىمەس ئۇچقۇن، ئازابنىڭ ئەۋجىگە ئۇيغۇن،
ھېسابسىز سەبرىدە، تۇيغۇن، چېچەكلەر پۇرسىتىم ئەمما...
2012-يىلى 15-نويابىر، تۇرپان.
| Shiriyet Gulistani.gif)
[ئۇلانما كۆچۈرۈش]
ip كۈرۈش
ئىز قوغلاش
يوللىغان ۋاقتى 2012-12-1 10:44:43
تىما چوققىلاش
چوققىلاش
ئىنكاسنى تاقاش
شاۋقۇن چىقىرىش
变色卡
دېۋان تالىشىش
显身卡
يوللىغان ۋاقتى 2012-12-1 11:59:45
يوللىغان ۋاقتى 2012-12-1 16:21:58
يوللىغان ۋاقتى 2012-12-2 01:27:45