ياپۇنىيە NHK تاراتقۇسى

11 تېما	0 دوست	643 جۇغلانما

بۇلبۇل

Rank: 2

ئۇچۇر

لىفىت

1^#

يوللىغان ۋاقتى 2013-4-2 16:18:05 |ئايرىم كۆرۈش |تەتۈر تىزىش

ياپۇنىيە NHK تاراتقۇسى

پالتاخۇن

   يىپەك يولىنىڭ تارىخىي ئىزنالىرىنى ئۇنىڭدىن كۆرەلەيسىز، ئادەم ئاياق بېسىشقا جۈرئەت قىلالمايدىغان خىلۋەت ماكانلاردىكى تولىمۇ ئىپتىدائىي ھالەتتە ياشايدىغان كىشىلەرنىڭ ساتمىلىرى ۋە يۈرەك سۆزلىرىدىن ئۇنىڭغا تايىنىپ خەۋەردار بولالايسىز،يىراق ئافرىقىدا  تېخى نەچچە مېنۇت ئىلگىرىلا يۈز بەرگەن قاتناش ۋەقەلىرىنى ئۇ بىزگە يەتكۈزۈپ بولىدۇ. ئەڭ تېز خەۋەر نۇسخىلىرى ، ھۆججەتلىك فىلىم ئۈلگىلىرىنى ، رادىيو، تېلېۋىزور،سۈنئىي ھەمراھ، سىفىرلاشتۇرۇش تېخنىكىسى، تور ئەۋزەللىكىنىڭ مۈكەممەل جىپىسلىشىشىنى يەنە ئۇنىڭدىن كۆرەلەيسىز. ئۇ بولسىمۇ،نۇرغۇن ئاخبارات ۋاستىلىرى قاتارىدا ئالاھىدە پارلاپ تۇرىدىغان  NHK.
ياپۇنىيە NHK تاراتقۇسى ئامېرىكا سىملىق تېلېۋىزىيە ئاخبارات تورى(CNN  )، ئەنگلىيە رادىيو شىركىتى (BBC ) قاتارلىق دۇنياۋېي تاراتقۇلار بىلەن ھۆسن ۋە بەس( تەسىر ) تالىشالايدىغان  نوپۇزلۇق، شۆھرەتلىك تاراتقۇلارنىڭ بىرىدۇر.
  NHK  (ئىنگلىزچە Japan Broadcasting Corporation ) ياپۇنىيە تاراتقۇ ( ئاخبارات ۋاستىلىرى ) ئۇيۇشمىسىنىڭ قىسقارتىلما نامى بولۇپ، ياپۇنىيەدىكى ئەڭ چوڭ رادىيو –تېلېۋىزىيە ئورگىنىدۇر. ئۇ يەنە ياپۇنىيەدىكى مۇنتىزىم ئاممىۋېي رادىيو-تېلېۋىزىيە ئستانسىسى سۈپىتىدە، ياپۇنىيەدىكى ،شۇنداقلا ئاسىيادىكى تەسىرى، نوپۇزى ئەڭ زور تاراتقۇ ھېسابلىنىدۇ.ئۇ ياپونىيە ئۇنېۋىرسال تېلېۋىزىيەسى ۋە مائارىپ تېلېۋىزىيەسىنى ئاساسىي گەۋدە قىلسىمۇ ، لېكىن ، يەنە سۈنئىي ھەمراھ 1-رادىيوسى، سۈنئىي ھەمراھ 2-رادىيوسى، يۇقىرى ئېنىقلىقتىكى سۈنئىي ھەمراھ  تېلېۋىزىيەسى قاتارلىق ئاپاراتلىرى بىلەن دۇنيادا تېخىمۇ تەسىركار ئورۇن تۇتىدۇ. ئەل ئارىسىدا ياپونىيە تاراتقۇ ئۇيۇشمىسى دېگەن نامى ئاز قوللىلىنىپ، ئاممىباب تىلدا ياپونىيە تېلېۋېزىيە ئىستانسىسى، ياپونىيە رادىيو ئىستانسىسى دېگەن ناملاردا كۆپرەك ئاتىلىدۇ.
  ئۇنىڭ ئەسلى كېلىپ چىقىشى ‹‹ توكيۇ رادىيو ئىستانسىسى ››دىن باشلانغان بولۇپ، 1931-يىلىدىن تارتىپ،قىسقا دولقۇنلۇق چاستوتا تارقاتقان. 1935-يىلىدىن تارتىپ، ‹‹ ياپۇنىيە رادىيو ئىستانسىسى ›› نامىدا دۆلەت ئىچى-سىرتىغا  رادىيو  پىروگراممىلىرىنى تارقىتىشقا باشلىغان. NHK نىڭ باش شىتابى توكيۇدا، ياپۇنىيەگىلا  54 رادىيو-تېلېۋىزىيە ئىستانىسىسى ، دۇنيادىكى 47  دۆلەتكە 34 باش شىتاب ۋە تارماق شىتاپلىرى تارالغان.دۇنيادىكى 79 تېلېۋىزىيە ئىستانىسىسى ۋە ئاخپارات ۋاستىلىرى بىلەن زىچ ھەمكارلىق مۇناسىۋىتى ئورناتقان بولۇپ، 20 خىلدىن ئارتۇق تىلدا پىروگرامما تارقىتىدۇ.كۈندىلىك پىروگرامما تارقىتىش مىقدارى 37 سائەتتىن ئاشىدۇ.نۆۋەتتە، ئۇنىڭ كەسىپ ۋە مۇلازىمەت دائىرىسى رادىيو-تېلېۋىزىيە كەسپىدىن ھالقىپ، سىمسىز رادىيو-تېلېۋىزىيە تورىغا قەدەر قاپلاپ، دۆلەت سىرتىدىكى كۆرۈرمەن-ئاڭلارمەنلەرنى تېلېۋىزور، سىمسىز رادىيو-تېلېۋىزىيە تورى، ھەتتا ، ھەقلىق كۆڭۈل ئېچىش تېلېۋىزىيە پىروگراممىلىرىغا قەدەر تەمىنلىيەلەيدىغان ھالەتكە يەتتى، دائىرىسى ئاخبارات، مەدەنىيەت، مائارىپ، كۆڭۈل ئېچىش قاتارلىق كۆپ خىل مەزمۇنلارغا  كېڭەيدى.ئۇ ئاممىۋېي تاراتقۇ سۈپىتىدە ئەڭ ئىلغار، زامانىۋېي  باشقۇرۇش ئۇسۇلى بىلەن دۇنيادىكى سانسىز ئابۇنتلىرىنى ئەڭ يۇقىرى سەۋىيەدىكى ، تۈرلۈك سەرخىل پىروگراممىلار بىلەن داۋاملىق تەمىنلەپ،ئۇلارنىڭ قەلبىدىكى ئەڭ ئىشەنچلىك تاراتقۇغا ئايلاندى.
ئۇ ئۆز شۆھرىتى ۋە تەسىرىگە لايىق ھالدا ئۇزۇن، جاپالىق ۋە شانلىق تارىخنى باشتىن كەچۈرگەن. 1924-يىلى قۇرۇلغان توكيو رادىيو ئىدارىسى، 1925-يىلى قۇرۇلغان ئوساكا تېلېۋىزىيە ئىستانسىسى NHK ئۈچۈن تەجرىبە ئاساسى ھازىرلاپ بەرگەن.1926-يىلى ياپونىيە تاراتقۇ ئۇيۇشمىسى ( رادىيو-تېلېۋىزىيە ئۇيۇشمىسى ) مول تەجرىبە - سىناقلارغا ئىگە توكيو رادىيو ئىدارىسى ، ئوساكا تېلېۋىزىيە ئىستانسىسىنى ئۆتكۈزىۋېلىپ، بىرلەشتۈرگەن ۋە ئۇلارنىڭ ئىشلىرىغا ۋارىسلىق قىلغان.دەسلەپتە ‹‹ سامۇرايخاننىڭ سالامەتلىكى ››، ‹‹ خەۋەرلەر ››، ‹‹ ھاۋارايدىن مەلۇمات ›› پىروگراممىلىرىنى ئاساس قىلىپ ئاڭلىتىش بەرگەن.دەسلەپتە قىسقا دولقۇندا  بىرىنچى يۈرۈش رادىيو قانىلىدا ئاڭلىتىش بەرگەن، 1930-يىلى رادىيو-تېلېۋىزىيە تېخنىكا تەتقىقات جەمئىيىتى قورۇلغاندىن كېيىن، ئىككىنىچى يۈرۈش رادىيو قانىلىمۇ تەسىس قىلىنىپ،ئاڭلىتىش  دائىرىسىنى كېڭەيتگەن.1935-يىلى خەلقئاراغا ( دەسلەپتە ئىنگلىز تىلىدا ) ئاڭلىتىش بېرىشكە باشلىغان.1941-يىلى تىنچ ئوكيان ئۇرۇشى خەۋەرلىرىدىن باشقا بارلىق سەھىپىلەر توختىتىۋېتىلگەن.2-دۇنيا ئۇرۇشى مەزگىلىدە ياپونىيە خەلقىنى روھلاندۇرىدىغان، قۇترىتېش خاراكتېرلىك خەۋەرلەرنى ئاڭلاتقان بۇ تاراتقۇدا 1945-يىلى 15-ئاۋغۇست ‹‹ سامۇراي خاننىڭ تەسلىمنامىسى ›› ئاڭلىتىلغان .1945-يىلى 4-سىنتەبىر بىرلەشمە ئارمىيەنىڭ ئالىي پەرمانىغا بىنائەن چەت ئەللەرگە قارىتىلغان ئاڭلىتىشى مەجبۇرى توختىتىلغان، ياپون تىلىدىكى ئاڭلىتىشلارغىمۇ ئېغىر چەكلىمىلەر قويۇلۇپ (ئۇزۇن ئۆمۈر كۆرۈش مەزمۇنىدىكى پىروگراممىلارغىلا يول قويۇلغان )، بىرلەشمە ئارمىيەنىڭ كونتىروللىقىغا ئۆتۈپ قالغان.1946-يىل 4-مارتتىكى كەڭ-كۆلەملىك ئىش تاشلاشتىن كېيىن  NHK دۆلەتنىڭ باشقۇرىشىغا ئۆتكۈزىۋېلىنغان .1950-يىلى رادىيو قانۇنى ئېلان قىلىنىپ، ئىجتىمائىي تەشكىلاتلار قانۇنىي ۋەكىللىكىدىكى بۇرۇنقى ئەنئەنىسى يولغا قويۇلغان، ياپونىيە تاراتقۇ ( رادىيو-تېلېۋىزىيە ) ئۇيۇشمىسى قايتىدىن ئەسلىگە كەلتۈرۈلگەن.1952-يىلى ‹‹ شەنبىلىك كونسېرت ›› پىروگراممىسى تەسىس قىلىنىپ، پىروگرامما مەزمۇنى تېخىمۇ كېڭەيگەن.1953-يىلى 1-فىۋرال NHK ئۇنۋېرسال چاستوتىسى رەسمىي يولغا قۇيۇلغان.12-ئايدا خەلقئارالىق ئاڭلتىشى قايتىدىن باشلانغان.1959-يىلى مەخسۇس مائارىپ چاستوتىسى كۆپەيتىلگەن.1963-يىلى دىكابىردا سىتېرو ئاۋازلىق ئاڭلىتىشنى باشلىغان. 1964-يىلى ئاڭلىتىش مەركىزى بىناسى قەد كۆتۈرۈپ ئەسلىھە نۇقتىسىدىن يېڭى بىر دەۋرگە قەدەم قويغان.تېخنىكا ، ئەسلىھە، سۈپەت جەھەتتىن ئاجايىپ تېز تەرەققىي قىلىۋاتقان بۇ ئىستانسىسا 1964-يىلى ياپونىيەدە ئۆتكۈزۈلگەن ئولىمپىك تەنھەرىكەت يىغىنىنىڭ ئېچىلىش مۇراسىمى ۋە سەككىز مۇسابىقە تۈرىنى تېلېۋىزوردا (رەڭلىك شەكىلدە ) تارقىتىپ دۇنيادا زىلزىلە قوزغىۋەتكەن. بۇ دۇنيادىكى تۇنجى ‹‹ تېلېۋېزوردا تارقىتىلغان ئولىمپىك مۇسابىقىسى ›› سۈپىتىدە رادىيو-تېلېۋىزىيە تارىخىدىن ئىپتىخارلىق ئورۇن ئالغان .1965-يىلى سىتېرو ئاۋازلىق، رەڭلىك تېلېۋىزىيە چاستوتىلىرى تارقىتىشنى ئومۇمىيۈزلۈك ئەمەلگە ئاشۇرغان.1969-يىلىدىن باشلاپ، ئىككى خىل تىلدا تېلېۋىزىيە تىياتىرلىرى ۋە كونسېرىتلارنى تارقىتىشنى باشلىۋەتكەن.1973-يىلى NHK مەخسۇس تارقىتىش زالى پۈتۈپ ، بىۋاستە، نەق مەيدان تارقىتىشنىڭ مۇقەددىمىسى ئېچىلغان.1974-يىلىدىكى نېفىت كىرزىسىنىڭ تەسىرىدە بەزىبىر پىروگراممىلىرى ۋاقتىنچە توختاپ قالغان بولسىمۇ، ئۇزاققا قالماي ئۆزىنى رۇسلاپ، يەنىلا دۇنيادىكى ئەڭ ئىلغار تارقىتىش سەۋىيەسىنى نامايەن قىلغان.1977-يىلى  رەڭلىك شەكىلدە تارقىتىلىدىغان مائارىپ تېلېۋىزىيەسى پۈتۈن ياپونىيەنى قاپلىغان.1982-يىلى خەلقئارا ئۆلچەمدىكى  كۆپ تىللىق، كۆپ نۇسخىلىق تارقىتىشنى مۇنتىزىم رۇياپقا چىقارغان.1984-يىلى ئۇنۋېرسال چاستوتىسىنىڭ تارقىتىلىش ۋاقتىنى تېخىمۇ ئۇزارتقاندىن باشقا، سۈنئىي ھەمراھ ئاڭلىتىشىنى سىناق قىلىشنى باشلىۋەتكەن.1987-يىلى سۈنئىي ھەمراھ بىرىنچى قانىلىدا سائەت 0 گىچە تارقىتىشنى ۋۇجۇتقا چىقارغان.1994-يىلى يۇقىرى ئېنىقلىقتىكى، كۆپ يوللۇق  سۈنئىي ھەمراھ قانىلى دۇنيادا ئالدىنقى قاتاردىكى سەۋىيەگە يەتكەن. 1995-يىلىدىكى يەر تەۋرەشنىڭ تەسىرىدە بەزىبىر پىروگراممىلىرى ۋاقتىنچە توختىغان بولسىمۇ، يەنىلا كوزىر پىروگراممىلارنىڭ بىۋاستە، پاكىتلىق تارقىتىش ھالىتىنى  ساقلاپ قېلىپ، دۇنياغا تاراتقۇنىڭ قۇدرىتىنى يەنە بىر قېتىم كۆرسىتىپ قويغان.1997-يىلى ئۇنۋېرسال قانالنىڭ ،2000-يىلى مائارىپ قانىلىنىڭ تارقىتىش ۋاقتىنى 24 سائەتكە يەتكۈزگەن.ۋەزىيەت ۋە ئېھتىياجنى بايقاش ۋە يېتەكلەشكە ماھىر بۇ ئىستانسىسا 2003-يىلىدىكى ئىراق ئۇرۇشىدا ئالاھىدە خەۋەرلەر سەھىپىسى تەسىس قىلىپ، نەق مەيدانلىق، چىنلىق، تېخنىكا ۋە مەزمۇن سەۋىيەسى جەھەتلەردىن دۇنيانى تاڭ قالدۇرغان.تاراتقۇ ساھەسىدىكى ئەڭ ئىلغار سەۋىيەنىڭ نامايەندىسى بولۇپ، يېڭىلىق يارىتىش داۋامىدا ئىلگىرلەۋاتقان بۇ ئىستانسىسا خەلقئارا قانىلىدا ،2008-يىلىدىن تارتىپ ئومۇمىيۈزلۈك ئىككى خىل تىل ۋە ئىككى خىل يېزىق ( ئېكران يۈزى يېزىقى ) تا تارقىتىشنى مۇنتىزىملاشتۇرغان. 2011-يىلىدىكى 24-ئىيول تەقلىدىي تېلېۋىزىيە سىگنالى تارقىتىشنى توختاتقان.رەسمىي ھالدا دۇنيادىكى ئەڭ ئىلغار سەۋىيەدىكى  سىملىق تېلېۋىزىيە تورى دەۋرىنى كەڭ-كۆلەملىك باشلىغان.
دەرۋەقە، NHK تارىخىدا ئاجايىپ شانلىق ۋە جاپالىق كەچمىشلەر مەۋجۇت. لېكىن ، ئۇ 2- دۇنيا ئۇرۇشىدىكى قانلىق يىللاردا بولسۇن، 2011-يىلىدىكى يەرتەۋرەش ئاپىتى بولسۇن، پارس قولتۇقى ئۇرۇشىدەك دۇنياۋېي ۋەقەلەر ۋە ياكى ئاددىي ئىنساننىڭ كۈندىلىك ئېھتىياجى بولسۇن، ئۆزىنىڭ ھەقىقىي بىر تاراتقۇغا خاس رولىنى مۇستەقىل نامايەن قىلىپ كەلدى.
NHK  نىڭ مۇنتىزىم تەشكىلىي قۇرۇلمىسى ئەنە شۇ رولنى ئادا قىلىشتىكى ھالقىلىق ئامىللارنىڭ بىرىدۇر. ئۇنىڭ قانال-چاستوتىلىرى مۇكەممەل بولۇپ،ئىلكىدە دۆلەت ئىچىدە ئۇنۋېرسال قانال ۋە مائارىپ قانىلىدىن تەركىبلەنگەن سىفىرلىق تېلېۋىزىيە قانىلى،مۇستەقىل ئىككى بۆلەكلىك سۈنئىي ھەمراھ تېلېۋىزىيە قانىلى،1-،2-يۈرۈش ئامپلىتۇدىسى مودۇللانغان رادىئو قانىلى ،چاستوتىسى مودۇلياتسىيىلەنگەن رادىئو قانىلى بولغاندىن سىرىت ، خەلقئاراغا تارقىتىلىدىغان تېلېۋىزىيە قانىلى ( 24 سائەت ئنىگلىز تىلىدا ھەقسىز تارقىتىلىدىغان ۋە 24 سائەت ياپون تىلىدا ھەقلىق تارقىتىلىدىغان ئىككى قانالنى ئۆز ئىچىگە ئالىدۇ ) ۋە 18 خىل تىلدا قىسقا دولقۇندا ھەمدە  توردا ئاڭلىتىش بېرىدىغان ياپونىيە خەلقئارا رادىيو ئىستانسىسى قاتارلىقلار بار .
  ئادەتتە NHK ئاخبارات ئورگىنى بولۇپلا قالماي، يەنە كۈچلۈك ئىقتىساد، سەنئەت، مەدەنىيەت گەۋدىسى بولۇپ، NHK پاي چەكلىك شىركىتى، NHK مائارىپ پاي چەكلىك شىركىتى، NHK يەرشارى سىفىرلىق تېخنىكا پاي چەكلىك شىركىتى،    NHK ئۇنۋېرسال غايە پاي چەكلىك شىركىتى ، NHK پىلان –ئىستېگىراتىيە پاي چەكلىك شىركىتى ،    NHK ئوركېستىر ئۆمىكى، NHK توكيو بالىلار خور ئۆمىكى، NHK ئوقۇلى ( مەكتىپى )،  NHK  ساقلىقنى ساقلاش مەدەنىيەت گوروھى قاتارلىق مۇناسىۋەتلىك تارماقلىرى ئۇنىڭ ئىقتىسادى قۇدرىتىنى مۇستەھكەملەپ ۋە ئاشۇرۇپ تۇرغاندىن  باشقا، مەدەنىيەت، سەنئەت، مائارىپ جەھەتلەردە  تېخىمۇ زور ئىستىقبال ۋە ھاياتىي كۈچكە ئىگە قىلىپ تۇرىدۇ.
مانا مۇشۇنداق قۇدىرەتلىك تاراتقۇنىڭ بۈگۈنكىدەك ھالەتكە كېلىشىدە شۈبھىسىزكى ، باشقۇرۇش سېستىمىسى مۇھىم رول ئوينىغان. ئەسلىدە مەمۇرىي سېستىمىدا 26 بۆلۈم بولۇپ، 2006-يىلى 20 بۆلۈمگە قىسقارتىلغان. ئەڭ ھوقۇقلۇق ئورگىنى نوپۇزلۇق مەمۇرلاردىن تەشكىللەنگەن باشقۇرۇش ھەيئىتى، نازارەتچى ۋە ئۇيۇشما رەئىسىدۇر.
  باشقۇرۇش ھەيئىتى NHK نىڭ ئەڭ مۇھىم قارار – بەلگىلىمىلىرىنى چىقىرىدىغان ، ئىستېراتېگىيە بەلگىلەيدىغان ، مەمۇرلارنى بېكىتىدىغان ئورگىنى بولۇپ، ، ئادەتتە NHK نىڭ ۋەكىلى سۈپىتىدە مەۋجۇت بولۇپ تۇرىدۇ ۋە نازارەتچىلىك ھوقۇقىنى يۈرگۈزىدۇ.ئۇيۇشما رەئىسى ئەنە شۇ باشقۇرۇش ھەيئىتى سايلاپ چىققان ئەڭ ھوقۇقدار ئەمەلدار ھېسابلىنىدۇ. ئۇنىڭ ۋە باشقۇرۇش ھەيئىتىنىڭ ۋەزىپە ئۆتۈش مۇددىتى 3 يىل.1926-يىلىدىن باشلاپ باشقۇرۇش ھەيئىتى ۋە ئۇيۇشما رەئىسى NHK نى باشقۇرۇپ كەلمەكتە.ھازىرقى رەئىس شىيۇەن باڭفۇ.
ھەيئەت ۋە رەئىسنىڭ باشقۇرىشىدا نازارەتچىلىك ئىشخانىسى، تەكشۈرۈش ئىشخانىسى، ماسلاشتۇرۇش ئىشخانىسى، كاتىب ئىشخانىسى، ئۇنۋېرسال پىلان ئىشخانىسى، رادىيو باش ئىدارىسى، كۆرۈرمەنلەر مۇلازىمەت ئىدارىسى،كادىرلار ئىشخانىسى، تېخنىكا ئىدارىسى، بۇغالتېرلىق ئىدارىسى، خوجىلىق ئىدارىسى، تەتقىقات ئورنى ، ھەرقايسى تېلېۋىزىيە ئىستانسىلىرى ،بۇلارنىڭ ئىچىدىكى رادىيو باش ئىدارىسى قارمىقىدا يەنە  ئۈچ ياساش-كىرىشتۈرۈش مەركىزى، سۈنئىي ھەمراھ كىرىشتۈرۈش مەركىزى، ئاڭلىتىش ئىدارىسى،رادىيو تېخنىكا ئىدارىسى، خەلقئارا تېلېۋىزىيە ئىستانسىسى، خەلقئارا شۆبە ئىدارە قاتارلىقلار، كۆرۈرمەنلەر مۇلازىمەت ئىدارىسى تەۋەلىكىدە مۇلازىمەت ئىدارىسى، تىجارەت ئىدارىسى، تەشۋىقات ئىدارىسى قاتارلىق ئورۇنلار قاتارلىق تارماقلار تەسىس قىلىنغان بولۇپ، ھەممىسى ئۆزىگە خاس فونكسىيەلىك رولىنى نىسبىي مۇستەقىل ھالدا جارىي قىلدۇرىدۇ.
ھەممىمىزگە مەلۇم، ئەنگىليە رادىيو شىركىتى پۈتۈنلەي مۇستەقىل گەۋدە بولۇپ، ئاممىۋېيلىق ۋە شەخسىي خاراكتېرى كۈچلۈك. NHK مۇ ئىجتىمائىي تەشكىلات قانۇنىي ۋەكىللىكىدىكى ئۇيۇشما بولۇپ، پارتىيە ۋە ھۆكۈمەتكە ئاساسەن بېقىنمايدۇ. لېكىن ، ئەنگىلىيە رادىيو شىركىتىدىن سەل پەرقلىق ھالدا، دۆلەت ۋە ھۆكۈمەت بىلەن مۇناسىۋىتى يوقمۇ ئەمەس.دۆلەتتىكى ئەڭ چوڭ تاراتقۇ بولۇش سۈپىتىدە ، زۆرۈر تېپىلغاندا ، دۆلەت مەبلەغ ئاجىرىتىدۇ. خام چوت ۋە ئۇيۇشما رەئىسى پارلامېنت تەرىپىدىن تەستىقلىنىدۇ. لېكىن ، بۇ NHK نىڭ ئاممىۋېي خاراكتېرىنى ئۆزگەرتەلىگەن ئەمەس.
NHK  نىڭ ئاساسلىق كىرىمى ئابۇنتلارنىڭ كۆرۈش-ئاڭلاش ھەققىدىن ۋە ئېلاندىن كىرىدۇ.  تارماق شىركەتلىرىدىنمۇ نۇرغۇن پايدا تاپىدۇ. شۇڭا، بارلىق كۈچى بىلەن ئابونتلار ئەڭ ئېھتىياجلىق پىروگراممىلارنى تەسىس قىلىپ ۋە سۈپىتىنى ئۆزلۈكسىز ئۆستۈرۈپ كەلگەن ۋە كەلمەكتە.خەۋەر ۋە كۆڭۈل ئېچىش پىروگراممىلىرىدىن باشقا ، ئېھتىياج، ئىلگىرلەش ، ئابونتلارغا يېقىنلىشىش ۋە يېتەكلەش جەھەتلەردىن تەسىس قىلغان ‹‹ كەلگۈسى ياش-ئۆسمۈرلىرىمىز ››، ‹‹ سەنئەتكارنىڭ 102-ئىشخانىسى ››، ‹‹ مېنىڭ مەخپىيىتىم ››، ‹‹ نىڭ مۆجىزىلىك سەپىرى  ›› ...قاتارلىق پىروگراممىلارنى كۆرىدىغان بولساق، ئىنتايىن جەلىبكار، قىممەتلىك، ھاياتىي كۈچكە نەقەدەر باي ئىكەنلىكىنى ھېس قىلالايمىز. بۇنداق سەھىپىلەر ناھايىتى كۆپ ۋە داۋاملىق تەسىس قىلىنىپ بارىدۇ ، ئەلۋەتتە.
NHK نى تاراتقۇ ساھەسىدىكى ئەڭ قابىل باشقۇرغۇچىلار، يېڭىلىق يارىتىش روھىغا باي تەدبىر بەلگىلىگۈچىلەر، مەسئۇلىيەتچان، قۇربان بېرىش روھىغا ئىگە ،ئۆتكۈر مۇخبىر-مۇھەررىرلەر،دۇنياۋېي سەۋىيەدىكى رېژىسسورلار، مەشھۇر ئىقتىسادشۇناس،سىياسەتۋاز، ئىجتىمائىي ۋە مەدەنىيەت ئەربابلىرى،  ئەڭ ئۇستا تېخنىكلار، چېچەن، ناتىق رىياسەتچىلەر...نىڭ كانى دېيىشكە بولىدۇ. شۇڭا، بۇ ئىللىق ماكاندا ئىشلىگەن ھەر بىر خادىم  NHK روھىنى نامايەن قىلىپ ئىپتىخار ئىچىدە ياشايدۇ. ياراتقان ئۈنۈم-تۆھپىسىگە  لايىق نۇرغۇن پۇل-ئىقتىسادنىڭ ۋە نوپۇزنىڭ ئىگىسى. دۇنيا تاراتقۇ ساھەسىدىكى ئەڭ يېڭى باشقۇرۇش ئۇسۇلى ۋە تېخنىكىنى NHK نىڭ ۋۇجۇدىدىن كۆرەلەيسىز. ئادەم تېلېۋىزۇردىنمۇ كۆرۈشكە پېتىنالمايدىغان قانلىق جەڭگاھلاردىن تارتىپ، تىلسىماتقا تولغان خارابىلەرگىچە، مېنىستىرلارنىڭ كۈندىلىك خاتىرىسىدىن ، تىلەمچىلەرنىڭ خۇرجۇنىغىچە ئاشۇ چېچەن مۇخبىرلارنىڭ ئىزىنى ئۇچرىتالايسىز. دۇنيادا يۈز بېرىۋاتقان ئىشلارنى چاقماق تېزلىكىدە كۆز-قۇلىقىمىزنىڭ ئالدىغىلا ئەكىلىپ قويىۋاتقان ئاشۇ تاراتقۇلارنىڭ ئالدىنقى سېپىدە كېتىۋاتقان NHK نىڭ مەڭگۈلۈك شۇئارى : ‹‹ ھەرقانداق ماكان ، ھەر قانداق زاماندا ، NHK سىزنىڭ يېنىڭىزدا ››. بۇ شۇئارنى ئۆز ئەمەلىيىتىدە داۋاملىق كۆرسىتىپ كېلىۋاتقان بۇ تاراتقۇ ئىزچىل ئۆز ئۆزىگە خوجا بولۇش، ئۆزىگە قاتتىق تەلەپ قۇيۇش، ھەرقانداق پارتىيە-گوروھ ۋە ھۆكۈمەتنىڭ خاھىشىغا بويسۇنماسلىق پىرىنسىپىغا ئەمەل قىلىپ، ئەڭ ئۈنۈملىك، ئىلغار باشقۇرۇش ئۇسۇلىنى قوللىنىپ، ئاڭلارمەن-كۆرۈرمەنلەرنى ھەقىقىي سفىرلىق مۇلازىمەت بىلەن تەمىنلەپ، ئۇلارنىڭ ئەڭ سەمىمىي دوستى بولۇپ كېلىۋاتىدۇ.

ھەمبەھر0 ساقلاش0

ئىنكاس

		ساقلاش	پارول قايتۇرىۋېلىش
ئىم(پارول)			تىزىملىتىش