تەرجىمىھال

ئەسقەر ياسىننىڭ تەرجىمھالى:

1969-يىلى 3-ئاينىڭ 1-كۈنى تۇغۇلغان. 1987-يىلى بۈگۈر ناھىيىلىك 1-ئوتتۇرا مەكتەپنى پۈتتۈرۈپ شىنجاڭ ئۇنىۋېرسىتىتىنىڭ جۇڭگو تىل-ئەدەبىيات فاكولتىتىنىڭ ئۇيغۇر ئەدەبىياتى كەسپىگە قوبۇل قىلىنغان. 1992-يىلى ئوقۇش پۈتتۈرگەندىن كېيىن بايىنغولىن موڭغۇل ئاپتونوم ئوبلاستلىق پارتكوم تەشۋىقات بۆلۈمىگە خىزمەتكە ئورۇنلاشقان. 1996-يىلىدىن باشلاپ بايىنغولىن ئوبلاستلىق ئەدەبىيات-سەنئەتچىلەر بىرلەشمىسى «كروران» ژۇرنىلىغا يۆتكىلىپ چىقىپ تا ھازىرغىچە شۇ يەردە خىزمەت قىلماقتا. ئۇنىڭ ھەر قايسى مەتبۇئاتلاردا 500 پارچىدىن ئارتۇق ھەر خىل ژانىردىكى ئەسەرلىرى ئېلان قىلىندى. «قۇملۇق، چۈش ۋە رىئاللىق» ناملىق ئەدەبىي ئاخباراتلار توپلىمى شىنجاڭ خەلق نەشرياتى تەرىپىدىن نەشر قىلىندى. ئىككى قېتىم «خانتەڭرى ئەدەبىيات مۇكاپاتى»غا نائىل بولدى. «پۇشايمان خاتىرىسى» ناملىق ئەدەبىي خاتىرىسى «جۇڭگو مىللەتلىرى» ژۇرنىلى تەرىپىدىن مۇنەۋۋەر ئەسەر بولۇپ مۇكاپاتلاندى. ئۇ ئۆزىنىڭ «نەي چالغان ئادەم»، «چەكسىز كوچا» ناملىق شېئىرلار توپلىمىنى نەشرياتقا تاپشۇردى. ئۇ ھازىر «كروران» ژۇرنىلىنىڭ مۇئاۋىن باش مۇھەررىرى، بايىنغولىن ئوبلاستلىق يازغۇچىلار جەمئىيىتىنىڭ مۇئاۋىن رەئىسى، بايىنغولىن ئوبلاستلىق ياشلار بىرلەشمىسىنىڭ مۇئاۋىن رەئىسى، ئاپتونوم رايونلۇق ئەدەبىي ئاخبارات ئىلمىي جەمئىيىتىنىڭ مۇئاۋىن باش كاتىپى قاتارلىق ۋەزىپىلەرنى ئۆتىمەكتە.