تاگور نەسىرلىرىدىن پارچىلار (2)
يوللانغان ۋاقتى : 2009-04-29 14:45:13 كۆرۈلۈش سانى : 78
[align=center]قۇرت ھەسەل ھەرىسى ئەمەس،
بىراق چېچەك كۆيدى قۇرتقا.
بىر خاتالىق بولدى - دە، بىر يۈك،
گۈلنىڭ كۆڭۈل بەرگىنى ئاڭا.
تېررورلۇقنىڭ زەپەر سوۋغىسى —
كۇكۇم - تالقان خارابە خىشلار.
قورچىقىغا ئاشۇ خىشلاردىن،
ئۆي سالىدۇ سەبىي بالىلار.
كىمىكى خالىس ھەم دۇرۇس،
نەپسى يوق زالىم ئەگەر.
ئەڭ ئېغىر دەردۇ بالاغا،
مۇپتىلادۇر بارچە يەر.
ھاياتلىقنىڭ ھوقۇقى ئۈچۈن،
ئەجىر تۆلەپ پۈكۈلگەندە بەل.
شۇ چاغدىلا تولۇق ئەركىنلىك،
قولىمىزغا كېلىدۇ تۈگەل.
كۆڭۈلشىمەي بەرگەن شۇ سوۋغاڭ،
بىردەمدىلا ئۇتتى كۆڭلۈمنى.
كۈز كېچىسى ئاققان يۇلتۇزدەك،
تۇتاشتۇردى يۈرەككە ئوتنى.
ئۇرۇق كۆڭلىدىكى پىنھان ئېتىقاد،
ھايات ھىممىتىدىن بېشارەت ماڭا.
كۆرسىتەلمىسىمۇ دەرھاللا ئىسپات،
ھامان بىر كۈن ئىسپات قىلىدۇ ساڭا.
باھار قىشنىڭ دەرۋازىسىدا،
كىرەلمەستىن بولدى دەرگۇمان.
ئەنبەھ گۈلى قىلدى قاراملىق،
مەزگىل بۇرۇن ئىدى بەردى جان.
ئۆزگىرىشچان كۆپۈكتۇر دۇنيا،
لەيلەپ يۈرگەن، تىنچ دېڭىزدا.
توۋلار پۈتمەس كۆز ياش ناخشىسى،
جۇدالىقنىڭ دەردىدە قىرغاق.
بىر - بىرىگە كېتەر قوشۇلۇپ،
سادالىرى ناخشىنىڭ بىراق.
كۆۋەجەپ قاينىغان دەريا سۇلىرى،
چارچاپ دېڭىز ئارا تاپقاندەك ئارام.
مېھمەنتمۇ راھەتنىڭ چوڭقۇرلۇقىدا،
ھېس قىلار بۇرچىنىڭ بولغىنىن تامام.
ئىككىلىنىپ يولدا تۇرىمەن يالغۇز،
گىلاس چېچەك تۆكۈپ بولغانغا قەدەر.
ۋە لېكىن ئامرىقىم كاككۇكگۈللىرى،
مېنى كەچۈرگىنىڭدىن بېرىدۇ خەۋەر.
ئانار شېخىدىكى ئۇياتچان توپچە،
قىزىرىپ رومالغا يۆگەلدى بۈەۈن.
ئۇ چوقۇم شادلىقتىن ئايلىنار گۈلگە،
تاڭلا يىراقلارغا كەتكىنىم ئۈچۈن.
بولىدۇ ئايپالتا،
كەبى قارا كۈچ.
ھەيۋىسى ئاستىدا،
سۇنىدۇ ئاچقۇچ.
تۇغۇلۇشلار خاتىمە بېرىپ،
قاپقاراڭغۇ سىرلىق كېچىگە.
كىرىپ كېتەر كۈندۈز دەيدىغان،
تېخىمۇ زور سىرنىڭ ئىچىگە.
قەغەز قولۋىقىم پەقەت ۋاقىتنىڭ —
دولقۇنىدا ئويناشنى تىلەر.
مەنزىلى يوق يېتىپ بارارغا،
مەقسىتىنى ئۇنىڭ كىم بىلەر.
سەرسانلىقتىن ئېيتقان غەزىلىم،
ئۇچۇپ كەتتى قەلبىمنى دەسسەپ.
مۇھەببەتلىك ئاۋازلىرىڭدىن،
يۈرىدۇ ئۇ ئۇۋىلار ئىزدەپ.
خەۋپ - خەتەر، شۈبھىلەر، يوقلۇق دېڭىزى،
ئادەمنى ئارال قىلىپ ئورايدۇ قات - قات.
ئادەمنى بىر يوچۇن كەلگۈچە دادىل،
قاراشقا ھەيدەيدۇ دائىم ئېتىقاد.
مۇھەببەتتە ئاز - ماز كەچۈرۈش،
بولسا دېمەك جازامۇ ھەم بار.
قورقۇنچلۇق سۈكۈتى لېكىن،
گۈزەللىككە يەتكۈزەر ئازار.
ئۆمرۈڭ ئۆتتى تەنھا ۋە جىمجىت،
ئىنئاملاردىن كۈتمىدىڭ مەدەت.
رەقىبلىرىڭ قورقۇپ ياشىدى،
سەن ياراتقاچ ئۇلۇغۋار قىممەت.
سۈبھى نۇرى سانسىز - ساناقسىز،
زېمىن ھەر كۈن تۇرمايدۇ ئوخشاش.
تۇغۇلىدۇ لېكىن يېڭىدىن،
ئۇلار ئۈچۈن پەقەت بىرقۇياش.
ئىلاھىي دۇنيا ئۆلۈم تۈپەيلى،
يېڭىلىنىپ تۇرىدۇ ھامان.
تىتانلارنىڭ ئالىمى ئۇلار —
ھايات بەرگەچ ھەر تاڭدا ۋەيران.
مايقوڭغۇزى ئىزدەپ يۈرگەندە،
چاڭ - توزاننىڭ سىرىنى بىر - بىر.
پەقەت بىلمەس ئاسمان قوينىدا،
بارلىقىنى سانسىز يۇلتۇزنىڭ.
دەل - دەرەخلەر بۈگۈنگە مەنسۇپ،
گۈل قەدىمگە، بىرا ئۇ گۈللەر —
بېرەر بىزگە ئەسلەشكە مۈشكۈل،
بەكمۇ كونا ئۇرۇقتىن خەۋەر.
ھەر باھاردا ئېچىلۇر ئەترە،
يۈرەكلەرگە خۇشاللىق سېلىپ.
ئەبەدىيلىك باھار ئەترىسى —
قوينىدىكى سالامنى ئېلىپ.
ئىشلىسەم
تەڭرى ماڭا كۆرسەتتى ھۈرمەت،
كۈيلىسەم
بېغىشلىدى سۆيگۈ - مۇھەببەت.
تۈنۈگۈنكى مۇھەببىتىمدىن،
قالدى كونا ئۇۋىلار پىنھان.
ئاۋارىدۇر بۈگۈنكى سۆيگۈم،
تاپالماستىن ئۆزىگە ماكان.
ئازابىمنىڭ ئاتەش يالقۇنى،
ھالقىپ ئلۆتتى ئەلەم تېغىدىن.
روھىم ئۈچۈن يورۇتماقتا ئۇ،
نۇرلۇق چىغىر يوللار يېڭىدىن.
گۈل - گىياھلار كىچىك بولسىمۇ،
ئۆمرى ئۇزۇن تاغلاردىن ھەتتا.
سان - ساناقسىز ئۆلۈم قوينىدىن،
قايتا قۇچاق ئاچقاچ ھاياتقا.
ئىمكانىم ئىچىدىن يوقالدىڭ، زەڭگەر —
ئاسمانغا قالدۇرۇپ تۇتۇق بىر مەنا.
ۋە بەردىڭ بىر ئوبراز كۆرمەسكە كۆزلەر،
قارا سايە ئارا سوققان شامالغا.
سۆيدى باھار پىغانى ئۆرلەپ،
سۇلغۇن شاخنىڭ لېۋىگە مودام.
جىمجىت تەنھا ياپراق ئۈستىدە،
بۇ سۆيگۈنىڭ دىلى بىئارام.
ئۈنسىز كۆيۈپ قالدى قۇياشقا،
گۈلزارلىقتا ئۇياتچان شاخلار.
پىچىرلاشتى ياپراق ئۆزئارا.
تېپىۋالغاچ بۇ سىرنى گۈللەر.
قانىتىمدىن ھېچقانداق بىر ئىز،
قالدۇرمىدىم بوشلۇق قوينىدا.
لېكىن بالدۇر باشلىدىم پەرۋاز،
سۆيۈنىدۇ يۈرەك ئورنىدا.
يالتىرايدۇ مايقوڭغۇزلىرى،
يېشىل ياپراق ئارا جىمىرلاپ.
ئاسماندىكى سانسىز يۇلتۇزنىڭ،
تەئەججۈپتىن دىلىنى باغلاپ.
قارىماققا ئېگىز چوققىلار،
تۇمانلاردىن مەغلۇپ بولىدۇ.
بىراق مۇنداق چاغدا ئۇ تاغلار،
بۇرۇنقىدەك مەزمۇت تۇرىدۇ.
قىزىل ئەترە دېدى قۇياشقا:
>ئۇنتۇمايمەن سېنى مەڭگۈگە.<
بىراق شۇ دەم سولۇپ گۈل بەرگى،
پايخان بولۇپ تۆكۈلدى يەرگە.
ئېگىز ئاسمان بويىغا بۇدەم،
يەتمىگەچكە زېمىننىڭ قولى،
ئۈمىدسىزلىك بەلگىسى بولۇپ،
تۇرار جىمجىت تاغلار چوققىسى.
گۈللىرىڭنىڭ يېنىدا تىكەن،
سانجىلسىمۇ دائىم قولۇمغا.
ئاھ گۈزەللىك ئۇشبۇ ئۆمرۈمدە،
مىننەتدارمەن سەندىن يەنىلا.
ئازلار غالىب،
كېلىدۇ كۆپتىن.
بۇنى دۇنيا،
بىلىدۇ تۈپتىن.[/align] |
|