تۈنۈگۈن، بۈگۈن ۋە ئەتە

- قارىغىنا، ئاۋۇ قىز تۈنۈگۈن مېنىڭ كۆكسۈمگە باش قويغانىدى، - دېدىم مەن دوستۇمغا، - ئۇ بۈگۈن ئاۋۇ يىگىتنىڭ كۆكسىگە باش قويۇپتۇ.
- ئەتە مېنىڭ كۆكسۈمگە باش قويىدۇ، - دېدى دوستۇم.
- تۈنۈگۈن مېنىڭ يېنىمدا ئولتۇرغانىدى، بۈگۈن ئۇنىڭ يېنىدا ئولتۇرىدۇ، - دېدىم.
- ئەتە مېنىڭ يېنىمدا ئولتۇرىدۇ، - دېدى دوستۇم.
- قارىغىنا، ئەنە ئۇ يىگىتنىڭ رومكىسىدىكى شارابنى ئىچىۋاتىدۇ، تۈنۈگۈن شارابنى مەن بىلەن ئىچكەنىدى.
- ئەتە مەن بىلەن ئىچىدۇ، - دېدى دوستۇم.
- قارىغىنا، - دېدىم مەن، - ئۇ يىگىتكە مۇھەببەت بىلەن شۇنچە خۇمالىق بېقىۋاتىدۇ، تۈنۈگۈن ماڭا شۇنداق باققانىدى.
- ھە، ئەتە ماڭىمۇ شۇنداق باقىدۇ، - دېدى دوستۇم.
- قارىغىنا، ئۇ يىگىتنىڭ قۇلىقىغا يېقىن كېلىپ سۆيگۈ ناخشىسىنى ئېيتىۋاتىدۇ، تۈنۈگۈن مېنىڭ قۇلاقلىرىمغا پىچىرلىغانىدى، - دېدىم مەن.
- ئەتە مۇھەببەت قوشاقلىرىنى ماڭا ئېيتىدۇ، - دېدى دوستۇم.
- قارا، قارا، ئۇ يىگىتنى قۇچاقلاۋاتىدۇ، - دېدىم مەن، - تۈنۈگۈن مېنى قۇچاقلىغانىدى.
- ئەتە مېنى قۇچاقلايدۇ، - دېدى دوستۇم.
- ئۇ نېمىدېگەن غەلىتە ئايال  - ھە! _ دېدىم مەن.
- ئۇ ھاياتقا ئوخشاش، ئۇنى ھەر قانداق ئادەم ئۆزىنىڭ قىلالايدۇ، - دېدى دوستۇم، - ئۇ ئەزرائىلغا ئوخشايدۇ، ھەممە ئادەمنى بويسۇندۇرالايدۇ؛ ئۇ باقىي ئالەمگە ئوخشايدۇ، بارلىق جاننى ئۆز باغرىغا سىغدۇرالايدۇ.