تاشپاقا بىلەن ئۆردەك

تاشپاقا بىلەن ئۆردەك دوست بوپتۇ.
  ئۇلار بىر كۈنى يېگىلى ئوزۇق ئىزدەپ كېتىۋاتقاندا، كىشىلەر يەپ تاشلىۋەتكەن ئىككى دانە ئالما شۈپۈكى تاشپاقىنىڭ كۆزىگە چېلىقىپتۇ.
  - يېگىلى نەرسە تېپىلدى! - يىگىلى نەرسە تېپىلدى! - خۇشاللىقىنى باسالماي ئالما شۆپۈكلىرىنى يەردىن ئېلىپ، ئۆردەككە كۆرسىتىپتۇ تاشپاقا.
  ئۆردەك ئۇنى قولىغا ئېلىپ، كۆڭلىگە بىر يامانلىقنى كەلتۈرۈپتۇ - دە، شۆپۈكنى تاشپاقىغا قايتۇرۇپ بېرىپ:
  - ئاغىنە، بۇ شۆپۈكلەرنى بىردىن يېسەك ياكى سەن تويمايسەن، ياكى مەن. ئۇنىڭدىن كۆرە، ئىككىمىز مۇسابىقىلەشسەك، قايسىمىز ئۇتۇپ چىقساق، ئۇلارنى شۇ يېسە قانداق؟ - دەپتۇ.
  - قانداق مۇسابىقىلىشىمىز؟
  - ھەر ئىككىمىز بۇ شۆپۈكلەرنى بىردىن چىشلەپ دەريادىن ئۆتەيلى، قايسىمىز قىرغاققا بالدۇر چىقساق، ئۇنى شۇ يېسۇن، - دەپتۇ ئۆردەك تاشپاقىغا.
  تاشپاقا بىر ئاز تۇرۇپ قاپتۇ - دە، ئۆردەكنىڭ كۆڭلىنى ئىزدەپ، مۇسابىقە قىلىشقا قوشۇلۇپتۇ.
  ئىككىيلەن دەريا بويىغا كەپتۇ. ئۇلار بىردىن ئالما شۆپۈكىنى چىشلەپ، سۇغا كىرىپتۇ - دە، يانمۇيان تۇرۇپ، مۇسابىقىنى باشلىۋېتىپتۇ.
  ئۆردەك كەڭ، چوڭقۇر دەريادا بەھۇزۇر ئۈزۈپ، ھەش - پەش دېگۈچە تاشپاقىنىڭ ئالدىغا ئۆتۈپ كېتىپتۇ. تاشپاقا ئۆزىنىڭ كەينىدە قالغانلىقىنى كۆرۈپ، پۈتۈن كۈچى بىلەن ئۆردەككە يېتىشىۋېلىش ئۈچۈن تىرىشىپتۇ.
  ئۆردەك قارشى قىرغاققا يېقىنلىشاي دەپ قاپتۇ. ئۇ تاشپاقىنىڭ قانچىلىك كەينىدە قالغانلىقىنى كۆرۈش ئۈچۈن كەينىگە قاراپتۇ - دە، تاشپاقىنىڭ دەريانىڭ ئوتتۇرىسىغىمۇ كەلمىگەنلىكىنى كۆرۈپ: مېنىڭ سۈرئىتىم نېمىدېگەن تېز، مېنىڭ قاناتلىرىم نېمىدېگەن ياخشى!؟ - دېگەندەك قىلىپ، كۆرەڭلەپ ئۆزىنى ئۇنتۇغان ھالدا >غاق!< قىلىپتىكەن، شۆپۈك ئاغزىدىن چۈشۈپ ئېقىپ كېتىپتۇ. ئۆردەك شۆپۈكنىڭ كەينىدىن قوغلاپ، ئۇنى تۇتقۇچە تاشپاقا قىرغاققا چىقىپ بوپتۇ.
  كۆرەڭ ئۆردەك مۇسابىقىدە يېڭىلىپ، ئالما شۆپۈكلىرىنى تاشپاقىغا بېرىشكە مەجبۇر بوپتۇ.