قايتۇرۇپ بەرمىسىمۇ بولىدىغان ئوخشايدۇ، دەپتىمەن

ئەپەندىمنىڭ ئەخلاقسىز ئاغىنىسى بولۇپ، پۇرسەت تاپسىلا خەقلەرنىڭ پۇل - پۇچەكلىرىنى سوراپ - سورىماي ئېلىۋالىدىكەن، ئەمما سورىمىغۇچە قايتۇرۇپ بەرمەيدىكەن. بىر كۈنى ھېلىقى ئاغىنىسى ئەپەندىمنى كۆرۈپلا:
- ئاداش، پۇل بولسا ئون سوم بېرىپ تۇرغان بولساڭلار، ئەتىلا بېرىۋېتىمەن، - دەپتۇ.
ئەپەندىم بولىدۇ، دەپ 10 سوم بېرىپتۇ. بىراق، ئون نەچچە كۈن ئۆتۈپ كېتىپتۇ، بەرمەپتۇ. مۇنداق ئىش بىرقانچە قېتىم يۈز بەرگەن بولىسمۇ، ئەپەندىم پۇللىرىنى زادىلا قايتۇرۇپ ئالالماپتۇ. بۇ ئىشلارغا ئاچچىقى كېلىپ يۈرگەن ئەپەندىم بىر كۈنى تۇيۇقسىزلا ھېلىقى ئاغىنىسىنى ئۇچرىتىپ قاپتۇ ۋە ئۇنىڭدىن:
- ئاداش، جىددىي پۇل كېرەك بولۇپ قالغان، پۇل بوسا 100 سوم بېرىپ تۇرغان بولساڭلار، - دەپتۇ.
ھېلىقى ئاغىنىسى ئامال يوق 100 سوم پۇلنى ئەپەندىمگە بېرىپ:
- تېزرەك قايتۇرۇۋېتەرسىلەر، - دەپتۇ ئەپەندىمگە تاپىلاپ.
ئەپەندىم بولىدۇ دەپ قويۇپ، ئىككى ئايغىچە قايتۇرماپتۇ. بۇنىڭغا تىتىلداپ ئاچچىقى كەلگەن ئاغىنىسى بىر كۈنى يولدا كېتىپ بارغان ئەپەندىمنىڭ ئالدىنى توسۇپ:
- ئەپەندىم، پۇلنى ئىككى - ئۈچ كۈن ئىچىدىلا قايتۇرۇۋېتىمەن، دەۋاتقانتىڭلار، ئىككى ئاي ئۆتۈپ كەتتى، لېۋىڭلارغا سۈرتۈپمۇ قويماسىلەرغۇ!؟ - دەپتۇ
- شۇنداقمىتى، - دەپتۇ ئەپەندىم ئاغىنىسىنىڭ سۆزىنى چۈشەنمىگەندەك قىلىپ، - خاپا بولماڭلار ئاداش، مەن تېخى سوراپ ئېلىۋالغان پۇللارنى قايتۇرمىسىمۇ بولىدىغان ئوخشايدۇ، دەپتىمەن.
ئاغىنىسى ئىزا تارتقىنىدىن نېمە دېيىشىنى بىلەلمەي قاپتۇ.