|
ئىلگىرى، چوڭ ئورمانلىقنىڭ بۇ تەرىپىدە ئۇماق بىر قىزچاق بار ئىكەن. ئۇ قىزىل ياغلىق چىگىپ يۈرۈشنى بەك ياخشى كۆرىدىكەن. شۇڭا ھەممەيلەن ئۇنى قىزىل بۆك دەپ ئاتىشىدىكەن.
بىر كۈنى، قىزىل بۆك ئەتىگەندىلا ئۆيدىن چىقىپتۇ. ئۇ ئورماننىڭ نېرى تەرىپىدە تۇرىدىغان مومىسىنىڭ ئۆيىگە مېھمانغا بارماقچىكەن، ئۇ يولبويى ئوينىغاچ مېڭىپ، بىردەمدىلا چوڭ ئورمانلىققا كېلىپ قاپتۇ.
تۇيۇقسىزلا، قىزىل بۆكنىڭ ئالدىدا يوغان بىر بۆرە پەيدا بوپتۇ.
- قىزچاق، نەگە كېتىپ بارىسەن؟
- مومامنىڭكىگە كېتىۋاتىمەن، ئۇ ئورماننىڭ نېرى تەرىپىدە تۇرىدۇ.
بۆرە بۇنى ئاڭلاپلا كەينىگە بۇرۇلۇپ يۈگۈرۈپ كېتىپتۇ. ئۇ قىزىل بۆكتىن ئىلگىرى موماينىڭ ئۆيىگە بېرىۋالماقچى بوپتۇ.
ئۇ چاپە چاپ، بىردەمدىلا موماينىڭ كىچىك ياغاچ ئۆيىگە يېتىپ بېرىپتۇ. ئۇ ئىشىكتىن ئېتىلىپ كىرىپ موماي ۋارقىراپ بولغىچە، ئۇنى بىرلا يالماپ يۈتۈۋېتىپتۇ. ئاندىن موماينىڭ كېچىلىك كىيىمىنى كىيىپ، موماينىڭ كارىۋىتىدا يېتىپتۇ.
دەل شۇ ۋاقىتتا قىزىل بۆك يېتىپ كەپتۇ. ئۇ مومىسىنى كۆرۈپ ئختىيارسىز چۆچۈپ كېتىپتۇ.
- ۋاي موما، كۆزۈڭ نېمانچە يوغىناپ كەتتى؟
- قەدىرلىكىم، سېنى تېخىمۇ ئېنىق كۆرۈش ئۈچۈن.
- موما، موما، قۇلىقىڭ نېمانچە يوغىناپ كەتتى؟
- قەدىرلىكىم، سېنىڭ سۆزۈڭنى تېخىمۇ ئېنىق ئاڭلاش ئۈچۈن.
- موما، موما، چىشىڭ نېمانچە ئۇزىراپ كەتتى؟
- قەدىرلىكىم، سېنى تېخىمۇ ھوزۇرلىنىپ يېيىش ئۈچۈن.
شۇ سۆز بىلەن تەڭلا، بۆرە كارىۋاتتىن سەكرەپ تۇرۇپ، قىزىل بۆكنى كاپلا قىلىپ تۇتۇپ، ئاغزىنى يوغان ئېچىپتۇ.
قىزىل بۆك قورقۇپ تىترەپ كېتىپتۇ، كۆزلىرى ئىسسىق ياشقا تولۇپتۇ. لېكىن ئۇ مۇلايىملىق بىلەن بۆرىگە:
- مەن سېنىڭ بۆرە ئىكەنلىكىڭنى بىلىمەن، ئادەم يېيىش سېنىڭ تەبىئىتىڭ، شۇڭا سېنى ئەپۇ قىلىمەن،- دەپتۇ - دە، بۆرىنىڭ يوغان ئاغزىغا سۆيۈپ قويۇپتۇ، كىم بىلسۇن، بۆرە بىردىنلا چىرايلىق شاھزادىگە ئايلىنىپ، قىزىل بۆككە مىننەتدارلىق بىلدۈرۈپتۇ:
- رەھمەت سىزگە قىزچاق، سىزنىڭ ئاق كۆڭۈللۈكىڭىز مېنى پېرىخۇننىڭ ئەپسۇنىدىن قۇتۇلدۇردى،- دەپتۇ.
شۇنداق دەۋاتقاندا، مومايمۇ سىرلىق ھالدا پەيدا بوپتۇ. ئۇنىڭ ھەممە ئەزايى ساپساق، بىرمۇ يېرى زەخىملەنمەپتۇ. شۇنداق قىلىپ، موماي بىلەن قىزىل بۆك يەنە بىللە ياشاپتۇ. |
