ھەرە ئۇۋىسىدا باھار

مەنبە: بىلقۇت تورى ۋاقتى: 2007-10-17 19:54:02 كۆرۈلىشى: $$访问$$

ھەرە ئۇۋىسىدا باھار
كۈز كۈنلىرىنىڭ بىر ئەتىگەنلىكى، بىر نەچچە چۈمۈلە يەردە ئاپتاپقا قاقلىنىۋاتقانىكەن.
بۇ چاغدا، بىر بوغۇن ھەرە ئۇچۇپ كەپتۇ. ئۇ چۈمۈلىلەرنى كۆرۈپ ھەيران بولۇپ سوراپتۇ:
- سىلەر بۇ يەردە نېمە قىلىۋاتىسىلەر؟
- كىچىك چۈمۈلىلەردىن بىرى:
- ئاپتاپسىنىۋاتىمىز! ھاۋا بەك سوغۇق! - دەپ جاۋاب بېرىپتۇ.
- سىلەر نېمىشقا ئۇۋاڭلارغا كىرىپ كەتمەيسىلەر؟ ئۇۋا ئىسسىققۇ! - دەپتۇ بوغۇن ھەرە.
- ئۇۋىمىزنىڭ ئىچى چىلىق - چىلىق ھۆل، تولىمۇ سوغۇق! بولمىسا بىز بۇ يەردە ئاپتاپسىنىپ نېمە قىلاتتۇق؟ - دەپتۇ يەنە بىر چۈمۈلە.
- ئەجەبا، سىلەرنىڭ ئۇۋاڭلاردا ئۇۋىنى ئىسسىتقىلى بولىدىغان نەرسە يوقمۇ؟ - دەپ سوراپتۇ بوغۇن ھەرە.
بىر كىچىك چۈمۈلە:
- نېمە؟ سىلەرنىڭ ئۇۋاڭلاردا ئوچاق بارمىدى؟ - دەپ سوراپتۇ.
باشقا چۈمۈلىلەر بۇنى ئاڭلاپ، قاقاقلاپ كۈلۈشۈپ كېتىپتۇ!ئۇلار تەرەپ - تەرەپتىن:
- بوغۇن ھەرە، قارىغاندا سىلەرنىڭ ئۇۋاڭلاردا نۇرغۇن ئوچاق بار ئوخشىمامدۇ؟ - دەپ سوراپتۇ.
- گەرچە ئۇۋىمىزدا ئوچاق بولمىسىمۇ، لېكىن ئۇۋىمىزنى مەخسۇس ئىسسىق ساقلايدىغان بوغۇن ھەرىلەر بار! - دەپتۇ بوغۇن ھەرە:
- چۈمۈلىلەرگە بۇ يېڭىلىق تۇيۇلۇپ، قىزىقسىنىپ سوراپتۇ:
- ئۇ بوغۇن ھەرىلەر ئۇۋاڭلارنى قانداق ئىسسىتىدۇ؟
- بۇنىڭ چارىسى ناھايىتى ئاددىي، - دەپتۇ بوغۇن ھەرە، - ئۇۋىمىز مۇزلاپ كەتكەندە، بىر قىسىم بوغۇن ھەرىلەر دەرھال قورساقلىرىنى توختىماي ئىچىگە تارتىپ كۆپتۈرۈپ تۇرىدۇ. بۇنىڭ بىلەن ئۇلارنىڭ قورسىقىدىكى ھەرىكەتلەنگەن مۇسكۇللار نۇرغۇن ئىسسىقلىق تارقىتىدۇ - دە، ناھايىتى تېزلا ئىسسىشقا باشلايدۇ.
چۈمۈلىلەر بۇنى ئاڭلاپ ھەيران بولغان ھالدا:
- ھوي، قارىغاندا بوغۇن ھەرىنىڭ ئۇۋىسىدا تىرىك ئوچاق بارىكەندە! - دېيىشىپتۇ.
بىر چۈمۈلە شوخلۇق قىلىپ:
- مېنىڭچە بۇ دۇنيادىكى ئەڭ ئېسىل ئوچاقكەن. كۆمۈر قالىمىسا، مەش ئىشلەتمىسە، گاز بىلەن زەھەرلىنىشتىنمۇ قورقمايدۇ - دە! - دەپتۇ.
- شۇڭا بىزنىڭ ئۇۋىمىز خۇددى باھاردەك، ئىسسىقمۇ ئەمەس، سوغۇقمۇ ئەمەس - دەپتۇ بوغۇن ھەرە.
بىر چۈمۈلە سەل ئويلىنىپ يەنە سوراپتۇ:
- بۇ مۇمكىن ئەمەس، ھاۋا سوغۇق بولغاندىغۇ ئۇۋاڭلارنى ئىسسىتالايدىكەنسىلەر، ياز كۈنى قانداق قىلىسىلەر؟
- ئۇنىڭغىمۇ ئامالىمىز بار، - دەپتۇ بوغۇن ھەرە، - يازدىمۇ ئوخشاشلا ئۇۋىمىز ئىسسىقمۇ ئەمەس، سوغۇقمۇ ئەمەس قىلالايمىز.
- سىلەرنىڭ قانداق ئامالىڭلار بار، - دەپ سوراپتۇ چۈمۈلىلەر.
- ياز بولغاندا، بىر قىسىم بوغۇن ھەرىلەر دائىم دەريالاردىن سۇ توشۇپ كېلىدۇ، - دەپتۇ بوغۇن ھەرە.
- سۇ توشۇپ نېمە قىلىسىلەر؟ ئىچەمسىلەر؟ - دەپ سوراپتۇ چۈمۈلىلەردىن بىرى.
- ئىچمەيمىز. ھەمراھلىرىم سۇنى توشۇپ كېلىپ، ئۇۋىنىڭ ئىچىگە چاچىدۇ، - دەپتۇ بوغۇن ھەرە.
چۈمۈلىلەر يەنە سوراپتۇ:
- ئۇۋا ئىچىگە سۇ چاچقاننىڭ نېمە پايدىسى بار؟
- ئەلۋەتتە پايدىسى بار، سۇ پارغا ئايلانغاندىن كېيىن ئۇۋىدىكى ئىسسىق ھاۋانى ئېلىپ چىقىپ كېتىدۇ. شۇنىڭ بىلەن ئۇۋىمىز ناھايىتى تېزلا سالقىنلاشقا باشلايدۇ، - دەپتۇ بوغۇن ھەرە.
بۇ نۆۋەت چۈمۈلىلەرنىڭ ھەممىسى ئىشىنىپتۇ. ئۇلار زوقلانغان ھالدا:
- بوغۇن ھەرىلەرنىڭ ئۇۋىسى ھەقىقەتەنمۇ قالتىسكەن! چوقۇم ھاۋا تەڭشىگۈچ ئورۇنلاشتۇرغاندەك راھەت بولسا كېرەك! - دېيىشىپتۇ.
بوغۇن ھەرە مەغرۇرلانغان ھالدا:
- بۇ بىزنىڭ ئەمگىكىمىز ئارقىلىق كەلگەن باھار - دە! دەپتۇ.

باھا يېزىش

بېسىپ چىقىرىش

مۇناسىۋەتلىك ئۇچۇر

ئەڭ كۆپ كۆرۇلگەن تېملار

ئەڭ يېڭى رەسىملەر