سىزنى ساقلايمەن ( ھېكايە )

يۇلغۇن1

سىزنى ساقلايمەن

(ھېكايە )

     خېلىدىن بۇيان قىزنىڭ ئارقىسىغا چۈشكەن يىگىت ، تۇيدۇرماي يانداپ ئۆتۈپ ، مەھەللە دوقمۇشىدىكى بىر تۈپ قاغا جىگدە تۈۋىگە كېلىشى ھامان ، شادىمان ۋىچىرلىشىۋاتقان قۇچقاچلار ئۇچۇپ كېتىشىتى. جىگدە تۈۋىدە قىزنى ساقلاپ تۇرغان يىگىت  قىز ئۇدۇلىغا كەلگەندە يەردىن ئۈنۈپ چىققاندەكلا ئۇنىڭ ئالدىدا پەيدا بولدى.

-ۋاي ئانامەي ، ساراڭمۇسىز ئادەمنى قورقۇتۇپ. بۇ يەردە نېمىش قىلىۋاتىسىز؟.

- سىزنى ساقلاۋاتىمەن.

-مەندە نېمىشڭىز بارتتى؟

-دەيدىغان گېپىم بارتتى.

-مەن باشقىلارنىڭ گېپىنى ئاڭلىمايمەن. بولۇپمۇ مۇشۇنداق پىنھان جايدا.

-نەگە بارىسىز؟

-ئۆيگە .

-توختاڭ ، گېپىمنى  دەۋالاي...

-ئالدىمنى توسماڭ.

- گېپىمنى تىڭشىمىسىڭىز كەتكىلى قويمايمەن.

-  ئادەمنى بىزار  قىلىدىغان قېرى مۈشۈكتەك  نېمە كۆزۈمگە كىرىۋالىسىز ؟.

قىزغا قارىغانسىرى يىگىتنىڭ يۈرەك سوقۇشلىرى قالايمىقانلىشىپ ، كۆزلىرىدىن غەلىتە نۇر چاقناپ ، چىرايى ئۆزگۈرىپ ، بۇرۇن تۆشۈكچىلىرى كېڭىيىپ، نەپەسلىنىشى بارغانچە جىددىلىشىپ كېتىۋاتاتتى.

- راست دەۋاتىمەن ، مەن سىزنى بەكمۇ ياخشى كۆرىمەن.

-قانچە ئۇزاق بولدى؟.

-بۈگۈن 366 كۈن ،  8 سائەت .

-ۋاي بىچارە ، قانداق ياخشى كۆرۈپ قالدىڭىز؟.

-ئۆزۈممۇ بىلمەيمەن، تۇيۇقسىزلا شۇنداق بولۇپ قالدىم.

-نېمىشقا بۇرۇنراق دېمەيسىز؟.

-دىيىشتىن خىجىل بولدۇم.

-سىز غەلىتە ئىكەنسىز.

-مەندە سىزگە بولغان چەكسىز سۆيگۈ بار.

- قالايمىقان خىياللاردا بولماڭ جۇمۇ؟

-ھە...ياق ... ما...

-كېكەچلەيسىزغۇ؟

-نەدىكىنى.

-نىمىشلارنى خىيال قىلىۋاتقانلىقىڭىزنى بىلىۋالدىممۇ؟

-...

- تىلىڭىز تۇتۇلۇپ قالغاندەك گەپقىلماي ئېغىر تىنىسىڭىزغۇ؟

-...

-قاچانغىچە مۇشۇنداق داڭ قېتىپتۇرىسىز گەپ قىلماي ؟

-نېمە دەيمەن.

-نېمە دېگۈڭىز كەلسە دەۋەرمەمسىز .شۇنىمۇ مەندىن سورامتىكى.

-ئاغزىمدىن چىقىرالماۋاتىمەن.

- نېمىلەرنى دەيدىغانلىقىڭزنى بەكمۇ ئاڭلىغۇم بار.

-سىز .. بىلەن ... ياق ... مەن...سىزنى ...

- نېمە بولدى سىزگە ؟ تىل چاينىماي كۆڭلۈڭىزدىكىنى دەۋەرمەمسىز.

- توي ...قىلغۇم ... سىزنى....بەك...ياخشى ...

-نېمە؟.

-بار...

-ساراڭمۇ سىزدەك گېپىنىڭ باش ئاخىرىنى دېيەلمەيدىغان يىگىت بىلەن توي قىلمايدۇ.

- ئۇنداق بولسا ئەمدى مەن قانداق قىلسام بولىدۇ؟.

- قانداق قىلىشىڭىز بىلەن مېنىڭ نېمە كارىم.

-مەن بىلەن توي قىلمايدىغان ئادەم نېمىشقا مېنى كولدۇرلىتىپ يۈرۈيسىز.

- قان بېسىمىڭىز ئۆرلەپ كەتتىمۇ نېمە.

-نورمال.

-كېچىكتىڭىز.

-باشتىن باشلىساققۇ بولا.

-نېمىنى؟

-ئىككىمىزنىڭ ئىشىنى.

-نېمىشقا؟.

-چۈنكى مەن سىزنى بەك ، بەكمۇ ياخشى كۆرىمەن.

-مەن  سىزنى پەقەتلا ياخشى كۆرمەيمەن.

- ھېچقىسى يوق ، ۋاقىت ئۆتكەنسىرى  ياخشى كۆرۈپ قالىسىز. ھازىرچە قولۇم قىسقا ، كېيىنچە نەگە سوزسام يېتىدىغان بولۇپ كېتىدۇ ، خۇدايىم بۇيرىسا.

-ياخشى كۆرمەيدىغان ئادەم بىلەن بىرگە ياشاشنىڭ نەقەدەر ئازابلىق ئىكەنلىكىنى بىلەمسىز . كۆڭۈل خالىمىغان ئادەم بىلەن بىللە ئۆتۈشنىڭ قىلچىلىكمۇ ئەھمىيىتى يوق.

-چوقۇم سىزگە بەخت ھەم لەززەت ھېس قىلدۇرىمەن.

-توۋا دەڭ.

-چوقۇم دېگىنىمنى قىلىمەن.

-لەۋزىڭىزدە تۇرالمىسىڭىزچۇ؟

-مەندىن باراۋەرلىك ھەم ئەركىنلىك تالاشمىسىڭىزلا.

-مەن سىزنى ياخشى كۆرمەيمەن.

-مەن سىزنى چىن دىلىمدىن كۆرىمەن.سىز سۆيۈشكە ئەرزىيسىز.

-تولا كۆڭلۈمنى ئېلىشتۇرمىڭە ئۆچلۈكىمنى ئاشۇرۇپ.

-چىرايىڭىزدىنلا  بارلىق ئىشلاردا ئېرىڭىزنى خۇش قىلىشنى مەسئۇلىيىتىم ھەم مەجبۇرىيىتىم دەپ چۈشىنىدىغانلىقىڭىز چىقىپلا تۇرىدۇ.

- قالتىسكەنسىز ، بىلىۋالدىڭىز.لېكىن ئۇ سىز ئەمەس.

-ئۆزئارا ئىشىنىش ، چۈشىنىش ۋە قەدىرلىشىش مېنى سىزگە ئېرىشتۈرىدۇ.

-ئۇخلاپ چۈشىڭىز.

-ئالدىراقسانلىق قىلماڭ.

-تاشنى تاياققا قانداقمۇ تاڭغىلى بولسۇن.

-سەۋەپ قىلساڭ سىۋەتتە سۇ توختايدۇ دەپ بىكار ئېيتمىغان كونىلار.

-ئۇنداق بولسا نېمە بوپتۇ؟.

-ئىككىمىز تۈنجى قېتىم كۆرۈشكەندە سىزگە نېمە دېگەنتىم؟.

-ئەسسالامۇ ئەلەيكۈم!

- خوشلاشقانداچۇ؟

-خۇداغا تاپشۇردۇم.

- ئارقىڭىزدىن توۋلاپ تۇرۇپ نېمەدېگەن.

-ئالدىرىمىساڭ غورىدىن ھالۋا پىشىدۇ.

-ھەببەللى!

-نېمىگە بۇنچىۋالا خۇش بولۇپ كېتىسىز؟.

-سىزمۇ مېنى ياخشى كۆرىدىكەنسىز، باياتىندىن بېرى مېنى سىناپسىز.

-ھوي! ئۆتەپ بېرىڭە نېرى.

-سىزگە مەڭگۈ كۆيىنىمەن ، ھالىڭىزغا يېتىمەن...

-سىز ماڭا بىر ئۆمۈر ياخشى ئىشقىلىپ بېرەلەمسىز؟.

-سىزنىڭ ماڭا بولغان سەمىمىيىتىڭىزگە قارايمەن.

-سىزگە پاك قەلبىم بىلەن كۆيىنىمەن.

-سىزگە ھەقىقى بەخت ئاتا قىلىمەن.

يىگىت بىلەن قىز بىر-بىرىگە قاراشقىنىچە ئۇزاققىچە تۇرۇشتى. ئۇلارنىڭ دېيىشىدىغان گەپلىرى تۈگىگەندەك قىلاتتى . ئەمما كۆزلىرى ئۈنسىز سۆزلىشەتتى. چىرايلىرىدا بىرخىل جىددىلىك ، تەشنالىق... ئاخىرى  چوغدەك تىنىقلار بىر-بىرىگە قوشۇلۇپ كەتتى...

ئۇلاربىر-بىرىگە كۆزى قىيمىغان ھالدا ئايرىلىشتى. قىز ئارقىسىغا قاراپ-قارا قويۇپ قەدەملىرىنى يۆتكەيتى. يىگىتنىڭ ئۇنىڭ ئارقىسىدىن كۆزلىرىنى ئۈزمەي قاراپ تۇراتتى.

-ئەتەسىزنى ئاشۇ يەردە ساقلايمەن !- قىزنىڭ قوڭغىراقتەك ئاۋازى يىگىتنىڭ يۈرىكىگە ئېقىپ كىردى. يىگىت كۆزى قىيمىغان ھالدا قاغا جىگدە تۈۋىدىن ئايرىلدى. بىر جۇپ قۇچقاچ كېلىپ جىگدىنىڭ شاخلىرىغا قونۇپ ، بىر-بىرىگە قاراپ تاتلىق قىلىق ۋىچىرلاشقا باشلىدى.