| qukan | 2011-04-27 23:47 |
قىسقا كەلگەن ياز (ھېكايە) چۇقان سەمىمىي ئەسكەرتىش: مەزكۇر تېما پەقەت ئانا تۇپراق مۇنبىرىگىلا خاس. باشقا مۇنبەرلەرگە كۆچۈرۈپ يوللىنىشقا قەتئىي بولمايدۇ. مۇقەددىمە ئورنىدا؛ ھۆرمەتلىك تورداشلار، ئۆزەمگە ئايان، مەزكۇر تېما ئۇيغۇر تىلىدىكى 32 ھەرپتىن تەركىپ تاپقان سۆزلىك دۆۋىسى. مەن كەچمىشىمنى ھېكايە قىلىپ يېزىپ باقتىم. ئەلۋەتتە، ھېكايىدىكى ۋەقەلىك راست بولسىمۇ مۇناسىۋەتلىك پېرسۇناژلار ۋە ئورۇن-جايلارنىڭ نامى ئالماشتۇرۇۋېتىلگەن. شۇ سەۋەپتىن ھېكايە ئاپتۇرىغا ئۆز ئىسمىمنى قوللانماي بۇرۇندىن قوللىنىپ كېلىۋاتقان تەخەللۇسىمدىن باشقىچە تەخەللۇس قوللاندىم. ھەرگىزمۇ كۈتۈلمىگەن ئاۋارىچىلىقلارنىڭ يۈز بېرىشىنى ئۈمۈد قىلمايمەن. مەن ئىلگىرى ئانچە مۇنچە شېئىر، ماقالىلەرنى يېزىپ، بىر قانچە مەتبۇئاتلاردا ئېلان قىلغان بولساممۇ ھېكايە يېزىشىم تۈنجى قېتىم. شۇنداق بولغان ئىكەن ھېكايەمنىڭ مۇنبىرىڭلارنىڭ مۇنبەر ئاپتۇرلىرىغا قويغان تەلىپىدىن خېلى يېراق بولىشى تۇرغانلا گەپ. ھېكايەم تورداشلاردا مۇھەببەت، نىكاھ،، ئائىلە، دوستلۇق قاتارلىق جەھەتلەردە قايتىدىن پىكىر يۈرگۈزۈشكە تۈرتكە بولالىسا مەن بۇنى ئەبجەش ھىكايەمنىڭ ئۇتۇقى دەپ قارايمەن. مەن بۇ ھېكايىنى پەقەت قورسىقىمنى بوشىتىۋىلىش مەقسىدىلا يازغان، توغرا چۈشۈنىشىڭلارنى ئالدىن تۆۋەنلىك بىلەن ئۆتۈنىمەن. تورداشلاردىن يەنە تۆۋەنلىك بىلەن ئۆتىنىدىغىنىم شۇكى؛ ھېكايەمگە قارىتا ئىنكاس يازماقچى بولغان تورداشلارنىڭ ئىلمىي بولىشىنى بەكمۇ ئارزۇ قىلىمەن.  رىشتىمىز ئۈزۈلمەي باغلاندى مەھكەم، ئون يىللار ئازابلىق ئۆتسىمۇ شۇنداق. ئەسلەيمەن يۈرەكتىن سېغىنىپ يارنى، ئاھ ، تەڭرىم! ئېيتقىنا تەغدىرىم قانداق. 2006- يىلى ئاۋغۇست ئېيىنىڭ مەلۇم بىر كۈنى. نەچچە يىلدىن بېرى كېسەل تارتىپ، بۇ قېتىممۇ يەنە دوختۇرخانىدا سەللىمازا ساقىيىپ چىققان ئايالىمنى ئارام ئالدۇرۇش ۋە تېخىمۇ ياخشى بوپ كېتىشى ئۈچۈن يۇرتىمىزدىن ئانچە يېراق بولمىغان ئارشاڭغا چوڭلار بىلەن يولغا سېلىپ قويۇپ نەچچە كۈندىن بېرى ئۆيدە بالىلارغا قاراپ ئولتۇرغان ئىدىم. بۈگۈن ھاۋا باشقىچىلا شۇنچە دېمىق، بالىلار سېرتقا ئوينىغىلى چىقىپ كەتكەن ئىدى. ئۆيدە تېلىۋېزۇر كۆرۈشكىمۇ خوشياقماي كاڭدا تورۇسقا قاراپ تەگسىز خىياللارغا غەرق بولغان ئىدىم. تۇيۇقسىز ئۆي تېلىفۇنۇم جىرىڭلاپ خىياللىرىمنى بۆلدى. تېلىفۇننى ئىلىشقا ئېرىنىپ خىياللىرىمنى داۋام ئەتتىم. بىر ئازدىن كېيىن تېلىفۇن يەنە سايرىدى. بۇ قېتىم خاپىغان ھالدا، سەل تۇرۇۋېلىپ ئېرىنچەكلىك بېلەن تورۇپكىنى قولۇمغا ئېلىشقا تەمشەلگىنىمدە تېلىفۇن ئۈزۈلدى. تېلىفۇن ئېكرانىغا قارىسام Ⅹ شەھەرنىڭ ناتونۇش مۇقىم تېلىفۇن نومۇرى. تەئەججۇپ ئىلكىدە قارشى تەرەپكە تېلىفۇن قايتۇردۇم. - ئەسسەلامۇئەلەيكۇم. - ۋەئەلەيكۇم ئەسسەلام. قارشى تەرەپنىڭ ، -<<ۋەئەلەيكۇم ئەسسەلام>>، دېگەن جاۋابىنى ئاڭلاپ ھەر ئىككەيلەننىڭ زۇۋانى تۇتۇلدى. يۈرىكىم دەھشەت سوقماقتا. تېلىفۇننى ھېلى بېرى تارتىۋالىدىغاندەك بارماقلىرىم تېلىفۇن تورۇپكىسىنى بارغانسىرى چىڭ قاماللىماقتا. قانچىلىك ۋاقت ئۆتتىكىن تاڭ، خېلى ۋاقتتىن كېيىن قارشى تەرەپ سۈكۈتنى بۇزدى. - شاكىر ياخشى تۇردىڭىزمۇ؟ - ھە، ھە ياخشى تۇردۇم، رەيھان ئۆزىڭىزچۇ؟ - ھە مەنما؟ مەنمۇ ياخشى، ئاللاغا شۈكرى، موشۇنچىلىك تۇردۇم. شۇ قېتىمقى تېلىفۇن سۆھبىتىدىن بىلدىمكى؛ رەيھان ئەينى چاغدا دادىسىنىڭ، -<<دەسلەپتە بىز خاتالاشتۇق، كېيىن سەن تاغدەك ئىشەنگەن <ئەپەندىم>مۇ يالتايدى، ئەمدى بۇ قېتىم كەلگەن لايىققا ماقۇل بولمىساڭ باققىنىمغا رازى ئەمەس>>؛ ئاپىسىنىڭمۇ، -<<قىز بالا دېگەن ھامان بىرىگە ياتلىق بولىدىغان ئىش، مەنمۇ داداڭنى كۆرمەي تۇرۇپ توي قىلغان، بۇ قېتىم گىپىمىزگە كېرمىسەڭ بەرگەن سۈتۈمگە رازى بولمايمەن، يەنە ئەخمىقانە ئىش قىلىپ يۇرسەڭ ئۆزۈمنى ئۆلتۈرۈۋالىمەن>> دېگەن بىسىمى ئالدىدا ئاخىرى تەقدىرىگە تەن بېرىپ، ناتونۇش يېگىت بىلەن ئامالسىز توي قىپتۇ. ھالا بۈگۈنكى كۈندە خالىمىسىمۇ بىر بالىنىڭ ئاپىسى بولۇپ بوپتۇ. ئۇنىڭ تېلىفۇندىكى گەپ- سۆزلىرى تىترەپ چىقاتتى. - شاكىر ئەھۋال شۇ، بىراق مەن تا بۈگۈنگە قەدەر بىر كۈنمۇ سىزنى ياد ئەتمەي قالمىغىنىم يوق. مېنى كەچۈرۈڭ، ئەينى چاغدا ئاتا-ئانام ۋەدىسىدىن يېنىۋالغان چاغدىلا سىزنىڭ قېشىڭىزغا بارسام بولاتتى، بېراق ئۇنداق قىلالمىدىم. بېلىمەن، سىز مىنى مەڭگۈ كەچۈرمەيسىز. - ياق رەيھان. مەن بىر ئەركەك تۇرۇپ ئەينى چاغدا ئىشلارنى مۇۋاپىق بىر تەرەپ قىلالمىدىم، ھەممە سەۋەنلىك مەندە. ئۆزىڭىزنى ئەيبلەۋەرمەڭ. - توغرا، ھەممە سەۋەنلىك سىزدە. ئەينى چاغدا بىز سەيلىگاھقا ئوينىغىلى چىققاندا جۈرئەتلىك بولغان بولسىڭىز بەلكىم بۇ قىسمەتلەرمۇ بولماس ئىدى! ئۇ شۇنداق دەپلا سوزۇپ كۈلۈشكە باشلىدى، بىراق ئۇنىڭ كۈلكىسىدىن بىر خىل قايغۇ، مۇڭ، ھەسرەت تۆكۈلۈپ تۇراتتى. - رەيھان ئۇ كۈندىكى جۈرئەتسىزلىكىمنى مەڭگۈ سۆيگۈ گۈلىمىزنى بىرلىكتە ئىچىلدۇرالمىغانلىقىمىزنىڭ سەۋەبى دەپ قارىمايمەن.. ئۇنداق قىلىش مېنىڭ تۇرمۇش قارىشىم ۋە ئەخلاق مېزانىمغا زېت... - شاكىر مېنىڭ يانفۇن نومۇرۇمنى خاتېرىۋىلىڭ؛ ...138، سىزنىڭ ئائىلىڭىزنىڭ تېلىفۇن نومۇرىنى خېلى بۇرۇندىنلا بېلەتتىم، ئەگەر خالىسىڭىز يانفۇن نومۇرىڭىزنى خاتېرىلىۋالسام. رەيھاننىڭ ئايالىم بىلەن تۇغقاندارچىلىق مۇناسىۋىتى بولغاچقا ئۇلار بۇرۇندىنلا ئالاقىلىپ كىلىۋېتىپتىكەندۇق. - بولىدۇ، خالىسىڭىزلا. ...137. - رەيھان سىز بۇ شەھەردە نېمە قىلىپ يۇرىيسىز؟ مەن سىزنى xxناھىيىسىدە ئىشلەۋاتىدۇ دەپ ئاڭلىغان ئىدىم. - شاكىر مەنمۇ دەل موشۇ ئىش تۈپەيلى سىزگە تېلىفۇن قىلغان. سالامەتلىكىم خېلىدىن بېرى ياخشى ئەمەس. قانچىلىك ئۆمرۈم قالغىنىنىمۇ بىلمەيمەن. بىر نەچچە ئايدىن بېرى موشۇ شەھەردە داۋالىنىۋاتىمەن. - ... - ... ئايان بولدىكى ئۇنىڭ 10 يىلدىن بېرى بىرگە ئۆي تۇتۇپ كەلگەن يولدىشىغا تا بۈگۈنگىچە كۆڭلى چۈشمەپتۇ. پەقەت ئاتا-ئانىسىنىڭ ئىرادىسى بويىچىلا بۇ مەنىسىز تۇرمۇشقا ، -ماقۇل، دەپ ياشاۋېتىپتۇدەك. گەرچە يولدىشى ئۇنى ساقسىز دەپ ئۆينىڭ ئاش-تاماق، كېر-قاتلىرىنى ئاساسەن ئۆز ئۈستىگە ئالسىمۇ ئۆز ئاتا-ئانىسىنىڭ قوشۇلىشى بىلەن نەچچە يىلدىن بېرى، - پەقەت بىر ئوغلۇمدىن باشقا ھېچنەرسە تەلەپ قىلمايمەن، ئاجرىشىپ كېتەيلى، دېگەن تەلىپىدىن ۋاز كەچمەپتۇدەك. ئاخىرىدا ئۇ مۇۋاپىق كۆرسەم يانفۇن بىلەن پات-پات ئالاقىلىشىپ تۇرۇشىمىزنى، مۇمكىن بولسا مېنى بىر قېتىم قېنىپ كۆرۈۋېلىشتەك ئاددىي ئارزۇيىنى قاندۇرۇشىمنى بەكلا ئۆتىندى. ئۇ گەرچە ئېنىق ئېيتمىغان بولسىمۇ سۆزلىرىدىن بۇ ئۆمرىدە مەن بىلەن بىر قېتىم بىرگە بولۇشقا پۇرسەت بولسا گۇناھكار بولۇشقىمۇ رازى ئىكەنلىكىنى نەچچە رەت پۇرىتىپ ئۆتكەن ئىدى. - ... - ... سۆھبىتىمىز قانچىلىك داۋاملاشتىكىن بىلمەيمەن، ئەمما شۇ ئايدا پوچتا تېلىگراف شېركىتىگە ئۆي تېلىفۇنى ئورناتقاندىن بۇيانقى ئەڭ يۇقىرى ھەق تاپشۇرغىنىم ھېلىھەم ئېسىمدە. رەيھان بىلەن مۇناسىۋېتىمىز ئۈزۈلگەن 10 يىلدىن بېرى مانا بۈگۈن قانغۇدەك مۇڭدىشىپتىمەن. قانداق قىلىشىم كېرەك؟ باشقا بېرىنىڭ نېكاھىدىكى بىر ئايال بىلەن ئالاقىلىشىپ يۇرسەم كەسپىي ئەخلاقىمغا، شەرىئەتكە يۈز كېلەلەمدىمەن؟ باشقىلار بىلىپ قالسا قانداق تونۇيدۇ؟ ئۇنىڭ ئارزۇلىرىنى ئورۇندىشىم كېرەكمۇ؟ تەپەككۇرىم چېچىلدى، نېرۋىلىرىم قاتتىق زېڭىلداپ ئاغرىيتتى. دەرھال ئايالىمدىن خۇپىيانە كېيىم ئىشكاۋىنىڭ ئاستىغا تىقىپ قويغان ھارىقىم ئىسىمگە كەلدى-دە بىر بوتۇلكا ئاق ھاراقنى ئىلىپ چىقىپ، چىنىگە قۇيۇپ بىراقلا كۆتىرىۋەتتىم. بېشىمنىڭ ئاغرىقى سەل قويغاندەك بولدى. زادى قانداق قىلىشىم كېرەك؟ توغرا، ئادىمىگەرچىلىك نوقتىدىن ئالغاندىمۇ ئۇنى يوقلاپ قويۇشۇم ئەقەللىي ئىشقۇ. ئەتىسى ئۇنى يوقلاپ بېرىش قارارىغا كەلدىم ئەمما ئايالىمغا يۈز كېلەلمەيدىغان ئىشنى قىلىپ قويۇشتىن ساقلىنىش ئۈچۈن 2 بالامنىمۇ بىرگە ئىلىۋېلىشنى مۇۋاپىق كۆردۈم. مەنبە: ئاچچىق كەچمىش داۋامى ئاستىدىكى ئىنكاس قەۋەتلىرگە يوللىنىدۇ ..... | |
