| arkiya | 2011-02-16 18:50 |
|
ياخشى تېما ! بۇ تېما ئارقىلىق ئۆزىمىزنىڭ ئوقۇغان ياخشى كىتاپلىرىنى بىر - بىرىمىزگە تەۋسىيە قىلساق بولغۇدەك... مەنمۇ ئوقۇغان كىتاپلىرىمنى ئاپتورى ھەم تەسىر قىلغان بىر - ئىككى جۈملە ئۈزۈندىلىرى بىلەن قالدۇرۇپ قوياي: 1. لېيىغان بۇلاق (يەتتە قىسىم) __ جالالىدىن بەھرام ئۈزۈندە :بىر تامچە سۇدىنمۇ قۇياشنىڭ ئەكسىنى كۆرگىلى بولىدۇ. ئىشىق-سەۋدانىڭ ئۆزى ئاللاھ تەرىپىدىن بىزلەرگە ئەۋەتىلگەن ئىلاھىي تۇيغۇ...شۇنداق ئىكەن ئاللاھ ھەرقاچان بىز بىلەن بىللە! دۇنيادا ئەڭ تەس نەرسە پاك بولۇش، ھەممىمىزدىلا نۇقسان بار... ئۇنداق بولمىغاندا، بۇ دۇنيا جەننەت، بىزلەر پەرىشتە بولۇپ كېتەر ئىدۇق ... 2.تۇنجى مۇھەببەت ___ نۇرمۇھەممەت ياسىن ئۆركىشى ئۈزۈندە: ئادەملەرنى چۈشىنىشنىڭ ئەڭ ياخشى ئۇسۇلى تەنھالىق ئىچىدە تەپەككۇر قىلىش، ئەمما ئادەملەرگە قانچە يېقىنلىشىمەن دېگەنسېرى ئۇلارنى چۈشىنىش شۇنچە قىيىنغا توختايدۇ. ھەممە نەرسە چۈشكە ئوخشايدۇ، بىر قارىسا ھەسرەتلىك، بىر قارىسا شېرىن، لېكىن ھەممىسى تېزلا غايىپ بولىدۇ. چۈنكى، ئۇنىڭ ھەممىسى ۋاقىتنىڭ ئالقىنىدا سىزىلغان بىر پارچە رەسىم خالاس! بىر ئادەمنىڭ مۇھەببىتى ھەرگىزمۇ دوستلۇققا ئورۇن بوشىتىپ بېرەلمەيدۇ. قارىماققا ئۇ دوستلۇق دەپ ئاتالغان بىلەن يەنىلا مۇھەببەت پېتى قېلىۋېرىدۇ. 3.تەڭرىنىڭ ھۆكمى ___ ئاپتورى ئرسىمدە قالماپتۇ ئۈزۈندە: تۇرمۇش - ئۇ ئەقىل كۆزى بىلەن كۆرۈش مۇمكىن بولمىغان سېھىرلىك يول . مۇبادا سەن ئۇنىڭدا مېڭىشنى بىلسەڭ، ئۇ سېنى تىلىكىڭگە ۋە بەخت مەنزىلىڭگە يەتكۈزىشى، بىر قەدىمىڭ خاتا كەتسىلا سېنى پۇشايمان ۋە نادامەت چۆلىگە تاشلىشى مۇمكىن. سەن ھايات ياشاۋاتقان ئىكەنسەن، بۇ ئىككىسىنىڭ بىرى ساڭا تالىق بولماسلىقى مۇمكىن ئەمەس. ئادەم كۈچ ۋە ئاجىزلىقنىڭ يۇغۇرۇلمىسى. شۇڭا ئۇ بەزىدە ئۆزىنىڭ كۈچلۈكلىكى بىلەن ئادەم، بەزىدە ئاجىزلىقى بىلەن ... ئەقىل تۇلپارىنىڭ تىزگىنىنى ھېسىيات ۋەسۋەسىسىنىڭ قولىغا تۇتقۇزغان ئادەم، ھايات تەقدىرى ئەڭ ئېچىنىشلىق ئادەم. 4.ھايات قايناملىرىدا ___ مەخمۇتجان ئىسلام ئۈزۈندە: ئادەم ئۈچۈن ياشاش بىلەن ئۆلۈش ئوتتۇرسىدا قېلىشتىنمۇ ئارتۇق ئازاپ بولمىسا كېرەك. ئالتۇن سېرىق بولسىمۇ ئادەمنىڭ كۆڭلىنى قارا قىلىپ قويالايدۇ. ئائىلە دېگەن نېمە ؟ ئۇ جەننەت ھەم دوزاخ؛ ئائىلە چىن مۇھەببەت ئاساسىدا قۇرۇلسا، ئۇ جەننەت؛ ناۋادا زورلۇق بىلەن قۇرۇلسا، ئۇ دوزاخ؛ 5.لالە ___ تۇرسۇنمۇھەممەت ئىمىن ئۈزۈندە: بۇ خۇدالىق ئالەم، ھەممە ئادەمنىڭ تەقدىر تاازىسىنىڭ تەڭشىكى خۇدانىڭ قولىدا. پۇل ئادەملەرنى ئاچكۆز قىلىۋېتىدۇ، خەسىسلىك بولسا، ئادەملەرنى پەسكەش قىلىۋېتىدۇ. نادان تۈلكىنىڭ قۇۋلۇقى ئۇنىڭ ھۇشيار، سەزگۈر كاللىسىنىڭ بولغانلىقىدا. 6.ئاخىرقى مەكتۇپ ___ ئەركىن سابىر ئۈزۈندە: تۇرمۇش ئادەمنىڭ ھەممە نېمىسىنى خورىتىدۇ. كىتاب ئوقۇش بىر ئادەم ئۈچۈن ئەڭ ئەھمىيەتلىك ئىش، كىتاب ئادەمنىڭ تۇرمۇش مەزمۇنىنى موللاشتۇرىدۇ. مەدەنىيەت زور ئىنقىلابى __ ئۇ بىر دەھشەتلىك قارا بوران. بۇ بوران 1966- يىلى 5- ئايدا گۈركىرەپ چىقىشقا باشلىغان. ئۇ ئادەملەرنى ئۇچۇردى، يىقىتتى، ئۆزلىرىگە توپا- توزانلارنى تىقتى، كىشىلەرنىڭ ئېگىنىنى يىرتتى، قورساقلىرىنى ئاچ قويدى، يىلىكلىرىنى سىرقىراتتى. ھەممىدىن يامىنى مەدەنىيەت سېپىنى مالىمان قىلىۋەتتى. 7.ھايات شاماللىرى ___ سەمەت دۇگايلى ئۈزۈندە: باشقىلارغا ئېچىنغۇچىلارنىڭ ئۆزى ئېچىنىشلىق تەقدىرگە قالىدۇ. ئەڭ گۈزەل پىكىر ئەڭ مۇشەققەتلىك ئەمەلىيەتنى بېشىدىن كەچۈرگەن كىشىدىلا پەيدا بولىدۇ. مۇشەققەت بازغىنى ئۇ پىكىرلەرنى ھەر تەرىزدە سوقىدۇ، يانجىيدۇ، تۈزلەيدۇ. ھاياتلىق ئالىمىدە ئادەم بەزىدە ئۆزىگىمۇ دوست بولالمايدىغان ۋاقىتلار كۆپ بولۇپ تۇرىدۇ، تولا چاغلاردا ئادەم ئۆزىگە ئۆزى دۈشمەنلىك قىلىپ ئۆتىدۇ ... بۈگۈنچە مۇشۇنچىلىك يوللاپ تۇراي ... تورداشلارنىڭمۇ بۇ تېمىغا ئاكتىپ ئاۋاز قاتناشتۇرۇشىنى ئۈمىد قىلىمەن ! مۇبارەك ، دېگەندەك بۇ تېمىدا ئاداش بولايلى ...  |
|
