ئانا قەسىدىسى
editor
ئانىنىڭ كۆزىدە شۇنداق بىر دۇنيا بار ،ئۇ دۇنيادا بالىنىڭ پەسىللىرى دائىم گۈل ئېچىپ، خۇش ھىد چېچىپ تۇرىدۇ ؛ زىنھار جۇت – جۇدۇن ، بوران – چاپقۇن بولمايدۇ ؛ مېھىر – مۇھەببەتتە بالقىغان چېچەكلەردىن شېرىن – شەربەت مېۋىلەر پىشىپ تۇرىدۇ ؛قاغجىراق دىللارغا ھاياتبەخش كەۋسەرلەر شىرىلداپ ئېقىپ تۇرىدۇ ؛ھېكمەتلەرگە تويۇنغان چۆچەكلەر زېمىن بالىلىرىغا ھايات سىرلىرىنى سۆزلەپ تۇرىدۇ !
ئانىنىڭ ئالقانلىرىدا شۇنداق بىر دۇنيا بار ، ئۇ دۇنيادا ئانىنىڭ پەرزەنت ئۈچۈن باشتىن كەچۈرگەن جاپا –مۇشەققەتلىرىنىڭ ئابىدىسى قەد كېرىپ تۇرىدۇ ؛ ئائىلىنىڭ بەخت –سائادىتى ، مېھىر – مۇھەببەتنىڭ خۇش ھىدلىق بوستانلىرىنىڭ پەرۋىشى ئۈچۈن دۇچ كەلگەن ئىسسىق – سوغۇقلارنىڭ ئىزلىرى خۇددى شەبنەمدە ئەكس ئەتكەن قۇياش نۇرىدەك يالىلداپ تۇرىدۇ ؛ پەرزەنت تۇنجى بولۇپ تېتىغان ئوغۇز سۈتىنىڭ ، بىر بوردا ناننىڭ تەمى تۇرمۇشنىڭ بارلىق تەملىرىنى مۇجەسسەملەپ تۇرىدۇ ! ئانىنىڭ شۇ ئالقانلىرى ئىنساننىڭ ھاياتلىق بىناسىغا بىر تال بىر تالدىن خىش تىزىپ ئەسلا ھارمايدۇ ، تالمايدۇ . ئانىنىڭ بەللىرى نان ئۈچۈن قوقاسقا يادەك ئېگىلگەندە ، ئاشۇ ئالقانلار ئۆمۈرلۈك مېھنەتلەرنى تاۋلاشنىڭ چىن مەناسىنى نامايەن قىلىدۇ . ئاشۇ ئالقانلاردا چىدام ، غەيرەت ، خەيرى – ئېھسان ، ساخاۋەتنىڭ ئىلاھىي قىسسىلىرى پۈتۈلىدۇ ! ئەشۇ قىسسىلەر ھارارىتىدە ئىنسان ھاياتىنىڭ گۈزەل كەلگۈسى ئۆز مەنىسىنى تاپىدۇ !
ئانىنىڭ قۇچاقلىرىدا شۇنداق بىر دۇنيا بار ، ئۇ دۇنيادا ئىنسان مېھىر – مۇھەببىتىنىڭ مېۋىسى ئۆز تەمىنى تاپىدۇ ؛ ئۇ دۇنيادا ئانىنىڭ كەلگۈسى بولغان پەرزەنت مۆجىزىگە ھامىلدار ئەللەيلەشلەرنىڭ سېھىر بەخش لەززەتلىرىدە يېتىلىدۇ ! ئۇ دۇنياغا پۈتۈن كائىناتنىڭ بار – يوقى مۇجەسسەملەنگەن ! ئۇ دۇنيادا ئانىنىڭ پەرزەنت ۋىلىقلاپ كۈلگەن چاغدىكى كۈلكىسى – دۇنيانىڭ كۈلكىسى ، پەرزەنت نېمىگىدۇر قەغىش قىلىپ يىغلىغان چاغدا تۆككەن ياشلىرى – دۇنيانىڭ يىغىسى بەدىلىگە تۆكۈلگەن ياشلار ! ئەمما ، ئانا يىغىدىن مۇستەسنا . ئۇ دۇنيادا ئۇ تۆلىگەن بەدەل قانچە كۆپ بولسا ، ئۇنىڭ شادلىقى شۇنچە كۆپ ، باشتىن كەچۈرگەن كۈلپەتلەر قانچە كۆپ بولسا ، ئەقىدىسى شۇنچە كۈچلۈك ! پەرزەنت ئۇنىڭغا بىر بوردا نان بەرسە ، ئۇ پەرزەنتكە بارلىقىنى ئاتا قىلىدۇ ؛ ئۇنىڭ ئاددىي – ساددىلىقى ئۇنىڭ ئۇلۇغلۇقىنى سۈرەتلەپ بېرىدۇ !
ئانا ئەل – ۋەتەننىڭ قورقۇمسىز ئوغۇل – قىزلىرىنى پەرۋىش قىلىدۇ ، باھادىرلارنى يېتىشتۈرۈپ چىقىدۇ . دېمەك ، ئانا بۈيۈكلۈكنىڭ تەختىدە مەڭگۈ !
ياشىغانلار، ياشنىغانلار دۇنيادا،
قانماي ئانا قۇچىقىغا ، ئۆتىدۇ.
قەلبلەردە يىلتىز تارتقان ئارمانلار،
ئانىلارنىڭ مېھنىتىدە پۈتىدۇ.
قولنى سۇنساڭ مېۋە ئۈچۈن شاخلارغا،
ئانا قىزىل يۈرىكىنى تۇتقۇزار.
چاڭقىساڭ گەر ، ئۇزۇن ھايات سەپىرى،
مېھىر بىلەن تەشنالىقنى قاندۇرار.
كۆز ياش ئەمەس كىرپىكتىكى شەبنەملەر،
مۇھەببەتنىڭ ئابىھايات سۈيى ئۇ؛
ئۈزۈلمىگەن زامانلاردىن زامانغا،
پەرزەنت ئۈچۈن ئېيتقان ھايات كۈيى ئۇ!
يادەك ئېگىپ بەللىرىنى قوقاسقا،
ئاق نان كەبى مېھنەتلەرنى تاۋلايدۇ.
تۇز بېرىدۇ بەرگىنىدەك ئاپئاق سۈت،
تۇرمۇشنىڭ كۆپ تەملىرىنى تەڭشەيدۇ.
يالغان ئەمەس ئانا ئېيتقان چۆچەكلەر،
رىۋايەتتە ھېكمەتلەرنى سۆزلەيدۇ.
ھېچ گەپ ئەمەس سەن يولۇققان خەتەرلەر،
ئانا ھامان جاپايىڭنى كۆزلەيدۇ.
تۆلىگىنى ئۇنىڭ ئۈچۈن ھار ئەمەس،
ماڭغان يولى پەرزەنت ئۈچۈن تار ئەمەس.
باغاشلايدۇ چىدام بىلەن مۈشكۈلنى،
بىلسەڭ ئانا ھەرنە بولسا خار ئەمەس !
ئانا باغرى مۆجىزىگە ھامىلدار،
بىخلىتىدۇ ئۈمىدىنى ئەتىنىڭ.
باسقىنىدەك بوغۇنلارنى باغرىغا،
تەۋرىتىدۇ بۆشۈكىنى دۇنيانىڭ.
ئانا بىلەن مۇھەببەتلىك دۇنيا بۇ،
قۇچاقلىرى چىمەنلەرگە ئەندىزغۇ؟!
ئانىلارسىز قىياس قىلماق تەس شەرەپ،
بەرىكىتى بولماس تەرنىڭ ھەرگىزمۇ .
ھەر نە بولساڭ نېنىڭ يېرىم ئانىسىز،
داستىخاندا ئېشىڭ يېرىم ئانىسىز،
قاپاق يېرىم ، سۇغا چىقساڭ بۇلاققا ،
تۇتماس تولۇق تىككەن جىرىم ئانىسىز .
ئانا بىلەن مۇرۇۋۋەتلىك ئاتىمۇ،
ئانا بىلەن ئەزىزلىنەر بالىمۇ ؛
ئانا بىلەن شۇنچە قوۋناق ئائىلە،
شىپا تاپار دىلىڭدىكى يارىمۇ .
ئانا بىلەن كۆكىرىدۇ باغلارمۇ ،
تۆكۈلگەچكە مېھنەت بىلەن تەرلىرى .
ئۆكۈنۈش يوق ئەڭ ئاداققى نەپەستە ،
تۆلەنگەچكە بەدەل بەرگەن قەرزلىرى .
دالالاردا كۆيگەن يۇلغۇن چېچىكى ،
ئانىلارنىڭ ئوتقاش چېھرى ئەمەسمۇ ؟
جەبرىلەردە گۈزەللىكنى ياراتقان ،
مۇھەببەتنىڭ قۇياش سېھرى ئەمەسمۇ ؟
ئانا تەققاس يەنە ئەزىز يۇرتقىمۇ،
بەستى تاغدۇر، قۇچاقلىرى مېۋىزار .
ۋايىم يېمە چېچەك تۇتقان ئارزۇدىن،
ئەتراپىڭدا تۇرسا ئانا - پەرۋىشكار .
ئانىلارنى ھاپاشلىساڭ بىر ئۆمۈر،
ساڭا قىلغان ئەجرى تامام تۆلەنمەس .
بىرنى بەرسەڭ ئوننى بېرەر قايتۇرۇپ،
ئانا كۆڭلى قول سۇنۇشقا كۆنەلمەس .
ئانا يازار قىسسىسىنى ھاياتنىڭ ،
ئانا ئېيتار ناخشىسىنى ئارماننىڭ؛
ئانا تۇغار ئەلنىڭ ئوغۇل – قىزىنى،
ئانا بىلەن يولى ئوچۇق ئىنساننىڭ .
بۇ دۇنيادا ھوزۇر ئىزدەش نە كېرەك ،
شايى ، ئەتلەس ياپقان گۈزەل باغلاردىن ؟
تۇرسا ئانا باغرى تەمسىل جەننەتكە ،
تارار ئامەت ئۇندا تۈگەل چاغلاردىن !
قاراپ باققىن ئانا كۆزى نە دەيدۇ !
سوراپ باققىن :ئاپئاق چاچتا نە ھېكمەت ؟
پىغانلاردىن پۈتكەندە ئاق تەبەسسۇم ،
سورا يەنە ئىپتىخاردا ، نە خىسلەت ؟
ئانا بىلەن ئىسىمداش ئۆز ۋەتىنىڭ ،
شۇڭا ئانا ئۇلۇغلۇقنىڭ تەختىدە .
ھۆرمىتىڭمۇ، ئىززىتىڭمۇ ئۇ بىلەن،
تامچە سۈتتە بەختىڭ سېنىڭ ئەسلىدە ! |