ئەسكەرتىش : مەزكۇر شېئرىي چاقچاق جەمئىي 20 كۇبلىت قىلىپ جەملەندى ، مۇشۇ تېما ئاستىغا يېزىلغان ، ئەتىراپلىق سەمىمىي تۈستىكى شېئىرىي چاقچاقلار ئەسلى ئاپتۇرى بىلەن بىرگە بېرىلدى .
بىر قىسىم كىشىلىرىمىزگە شېئىرىي چاقچاق
رادىل ئابلاغا
ئارمان قۇۋۋەت تالقىنى پايدا قىلغاچ يۈرەككە
سەھەر - كەچتە ماختايدۇ سىزنى بوۋام رادىلكا .
گۇرۇھ بوپتۇ ئاڭلىساق << ئارمان >> يەنە زورىيىپ
سالمىسىڭىز بولمامدۇ ماگىزىنغا تاماكا ؟
نۇرتاي ھاجىمغا
ئاۋام دىلدىن شاد بولدى سىز مەكتەپنى سالغاندا
يېتىملەرنىڭ قەلبىدە ياندى ئۆچمەس بىر قۇياش .
كەڭرى ئىكەن كۆكسىڭىز خۇددى چەكسىز دەريادەك
ئۇدۇم بولسۇن بىزلەرگە سىزدەك سېخى ، مەرد ياشاش .
ئالىم ئەھەتكە
ئۇيغۇر سوفىت شىركىتى سىزنى ئەلگە تونۇتتى
يول ئالدىڭىز شۇندىلا ئەلنىڭ قەلب تۆرىگە .
توختاپ قالماڭ بىر ئىزدا ، زەپەر قۇچۇپ ھەرزامان
ھەتتا مىكروسوفتنى چۆرۈۋېتىپ كەينىگە .
ئابدۇللا ئابدىرېھىم ئاكىغا
( ئۇستاز )
<<ئۇزاق يولنى>> باستىڭىز، گاھ قەلەندەر شاھ بولۇپ،
<<رەنجىمە>> دەپ قويۇپلا چەللىدە ئات چاپتۇرۇپ.
شىركەتنىمۇ باشقۇرۇڭ، ناخشىڭىزنى تاشلىماڭ،
ناخشىڭىزنى ئەل - ئاۋام ئاڭلىماقتا ياقتۇرۇپ.
مەمتىمىن ھوشۇرغا
<< ئالتۇن چىشلىق ئىت >> بىزگە تونۇش خۇددى سىز كەبى
كۆرۈنمەيلا كەتتىڭىز دىلنى زار قىپ بۇ دەمدە .
تەرجىمىگە كۈچەپلا ، يازمىدىڭىز ھېكايە
سودا ئوتى ياندىمۇ چىقىش ئۈچۈن چەتئەلگە ؟
غۇجىمۇھەممەد مۇھەممەدكە
خوتەن دەشتى چۆلىدە شىر ، بۆرىگە ئايلىنىپ
شېئىر يېزىپ قان بىلەن ، جۇۋان ئىزدەپ يۈرەمسىز ؟
گۇگۇم باسقان بۇ دەمدە ياندى << ئەرنىڭ ئىپپىتى >>
يار چېچىدىن دار ياساپ ، ئۆلىمەن دەپ يۈرەمسىز ؟
ئادىل تۇنىيازغا
<< مەن كەلدىم >> دەپ ياڭرىغان ناخشىڭىزنى ئاڭلىدۇق
ئامانمۇ سىز ، ساقمىدۇ ئائىلىڭىز ئادىلكا ؟
خورما يېغى ئىپكەپسىز سەئۇدىدىن قايتقاندا
بېرەرسىزمۇ بىز بارساق بىرەر باك ياغ بىكارغا ؟
مۇھەممەدجان راشىدىنغا
شېئىرىڭىز بەك بەلەن ، ئېقىن سۇغا ئوخشايدۇ
<< ھايات دېگەن مانا شۇ >> قەلبلەردە ياڭرايدۇ .
يېزىڭ يەنە توختىماي ، ئىگىلسىمۇ قەددىڭىز
ئەلنىڭ ئوغلى ھەر ۋاقىت ئەل قەلبىدە ياشنايدۇ .
چىمەنگۈل ئاۋۇتقا
<< بارسا كەلمەس يول >> بىلەن كەتمىگەنسىز يىراققا
تاشلاپ قويۇپ يالغۇزلا بىزنى بۇندا پىراققا .
ئەدەبىيات بېغىدا پورەكلىگەن بىر گۈلسىز
ئۆتۈڭ ، ھەدە ناۋادا سەپەر بولسا بۇياققا .
ئۆمەر مۇھەممەتئىمىن كرورانغا :
( ئەنۋەر ھىدايەت ) شېئىر يېزىپ كىچىچە، ئىشقا بېرىپ ئەتتىگەن ،
ناشتا قىلماي چۈشكىچە، دائىم ئەسەر كۈرەمسىز .
< ئىسسىق > دەيدۇ كورلىنى ،چىقىۋېلىپ تاغلارغا ،
< قىرىق ياشلىق ئەر بىز > دەپ مەيدە كېرىپ يۈرەمسىز .
خەت يازدىڭىز ئوچۇقلا ھوشۇر قارى ئاكىغا
مەقسەت نېمە زادىلا بىلەلمىدۇق بىز بۇنى .
ئادەم ھايۋان ئەمەسقۇ ، يەنە ئاڭغا ئىگە ھەم
ئارتۇق كۆرسەك بولامدۇ بىر ئادەمدىن ئېشەكنى ؟!!!
پەرھات تۇرسۇنغا
<< ئۆلۈۋېلىش سەنئىتى >> يەر تەۋرەتتى دىياردا
سەنئەت ھامان ئۆلۈمنى ئايرىپ چىقار بىر كۈنى .
دوكتۇر بوپسىز ئاڭلىساق ، قالپاق ئەمدى چوڭ بوپتۇ ،
ئوبزور يازسا جىم تۇرماڭ ، ھەيدەپ سۈرۈپ ھەممىنى .
ئەخمەتجان تۇرۇپ بەگتۈرۈككە
غەزەللەردىن سۇ ئىچتى چاك يىرىلغان قەلبىمىز
بوز ئېتىڭىز چاپچىيدۇ تۈن نىسبىدە ، زۇلمەتتە .
تۈرۈكلەرنىڭ بېگى سىز ، بەردەم ئېلىڭ قەدەمنى
مەلھەم بولۇڭ دىللارغا يۈرىۋەرمەي ھەسرەتتە .
مۇتەللىپ مەنسۇر ئوۋچى
ئەزىزانە قەشقەردە گۇگۇم ماراپ تۇرغاندا
چاتقاللاردا مۆكۈنۈپ توشقان ئوۋلاپ يۈرەمسىز ؟
ئۆرۈم چاچلار ئايلانسا جادۇگەرنىڭ قولىغا
خۇددى بەردەم پەرھاتتەك تاغنى تالقان قىلامسىز ؟
( 2 )
ئادىل مىجىتكە
<< مەن ساقچى >>نى ۋايىغا يەتكۈزدىڭىز بىلىمىز
ئەمما يەنە سەھنىدە لىپتىك تاقاپ يۈردىڭىز .
قايتسىڭىز گەر شۇ پىتى ئۆيىڭىزگە ئادىلكا
نېمە دەپمۇ چاقىرار شۇ ئەسنادا قىزىڭىز .
ئابدۇكېرەم ئابلىزغا
ئىتوت ئويناپ سەھنىدە ، ئەل - ئاۋامنى كۈلدۈرۈپ
<< چولپان >> دېگەن بۇ نامنى قان تەر بىلەن ئالدىڭىز .
نېمە دەيمىز بىز يەنە كۈپكۈندۈزدە كوچىدا
بىر ئېشەكنى دادا دەپ ماتەم تۇتۇپ يۈرسىڭىز ؟!
ئايشىگۈل مۇھەممەدكە
<< ئاق بېلىق >> نى ئېيتتىڭىز ئاق دەريادا ئۈزگەندەك
چىشلەپ قالدۇق لەۋلەرنى دىللار شۇتاپ لال بولۇپ .
شادلىناتتۇق سىزدىن بىز يۈرسىڭىز گەر مۇبادا
قىسقا چاچنىڭ ئورنىغا ئۆرۈم - ئۆرۈم چاچ قويۇپ.
<<مەن دولان >> نى ئېيتتىڭىز كۆيۈپ خۇددى گۈلخاندەك ،
<< ئۇيغۇرنىسا >> قەلبتە مۇڭ تۆكىدۇ ھېلىمۇ .
مىللىي روھقا تويۇنغان ئىجادىڭىز ھەر زامان
مۇزىكىدەك چىڭ بولسۇن ناخشىڭىزنىڭ بېلىمۇ .
مەمەتجان روزى سايىتقا :
( ئەنۋەر ھىدايەت )
كىلىشتۇرۇپ دورايسىز ئارتىسلارنى سەھنىدە ،
ئۈگەنگەنمۇ بۇ ئىشنى كىچىك چاغدا-يەسلىدە .
دوراش بىلەن ئىش پۈتمەس،سىزمۇ كۈيلەڭ دېھقاننى ،
بىلىپ قېلىڭ مەمەتجان سىزمۇ شائىر نەسلىدە!
مۆمىنجان ئابلىكىمگە
<< چۈشۈمدە سەن >> قالغانتى مۇقاملاردىن يىراقتا
<< سېغىنىمەن >> تونۇتتى سىزنى رەسمىي ئاۋامغا .
پۇتلاشتىڭىز خىلى ۋاق ئۆزگە يولدا ئېزىقىپ
ئالدىڭىزدا تاغ تولا ، سەل قارىماڭ داۋانغا .
ئەسكەرتىش : مەزكۇر تېمىنى ئەلكۈيىدىن باشقا ھەرقانداق توربېكەتكە چىقىرىشقا بولمايدۇ . |
