ئاياللار ھەققىدە ھېكمەتلەر [ خەلق ئېغىز ئەدەبىياتى ] ئەلكۈيى مۇنبىرى

ئايال _ ئانا .

ئانا ھاياتنىڭ گۈلى ،
بالا ئۇنىڭ بۇلبۇلى .

ئانا مېھرىبان ،
ئاتا غەمگۈزار .

ئانا سۈتى بىلەن كىرگەن ئەقىل ،
كالا سۈتى بىلەن كىرمەس.

ئانا ئون بالىنى تويدۇرىدۇ ،
ئون بالا بىر ئانىنى تويدۇرالمايدۇ .

ئانا ئايىغى بىلەن بۆشۈك تەۋرىتەر ،
قولى بىلەن روزغار تەۋرىتەر .

ئايال يەردىن چىققان ئەمەس ،
ئەر ئۇنىڭ ئاتىسى .
ئەر ئاسماندىن چۈشكەن ئەمەس ،
ئايال ئۇنىڭ ئانىسى .

ئاناڭنى بېشىڭدا كۆتۈر ،
بالاڭنى قولۇڭدا كۆتۈر .

ئانىسى ئويلاپ يۈرۈيدۇ ،
بالىسى ئويناپ يورۇيدۇ .

ئانىسى بار بالا ،
چىرايلىق لالە.

ئانام بىلەن ئاتام بار ،
ئالتۇندىن قانىتىم بار .

ئات ئاتىدىن ،
ئادەم ئانىدىن .

ئاتا قول بولسا ،
ئانا يۈرەك .

ئاتىدا قالغان كۈل يېتىم ،
ئانىدا قالغان گۈل يېتىم .

ئانىلىق بالىنىڭ ئاغزى ئوينار ،
ئانىسىز بالىنىڭ كۆزى ئوينار .

ئاتا دېغى قايدۇرار ،
ئانا دېغى كۆيدۈرەر.

ئاتا__ ئەقىل ،
ئانا__ ئىدراك.

ئاتا قارغىشى ئوق ،
ئانا قارغىشى دوق .

ئانىلىق ئۆينىڭ ئارى بار ،
ئاتىلىق ئۆينىڭ زارى بار .

ئاتا بالىسىغا يامان مەسلىھەت بەرمەس ،
ئانا بالىغا يامانلىق ئويلىماس .

ئاتا كۆرگەن يول پىچار ،
ئانا كۆرگەن تون پىچار .

ئاتىدەك غەمگۈزار قايدا ،
ئانىدەك مېھرىبان قايدا .

بالا ئانىسىنى يامان دېمەس ،
ئىت ئىگىسىنى گاداي دېمەس .

بالىغا ئاتا قورغان ،
ئانا قۇربان .

ئورغاق تۇتۇپ ئاتاڭ قالغۇچە ،
ئويماق تۇتۇپ ئاناڭ قالسۇن .

ياشلىق تەلۋىلىكىنى تاشلا بېشىڭدىن ،
ئانا خىزمىتىدە بولغىن يېشىڭدىن .

ئاناڭدىن باش تارتما ،ئاشمىسۇن مۇڭى ،
شەرەپنىڭ تاجىدۇر پۇتتىكى چېڭى .

يوق بىزدە ئانىدەك مېھرىبان ،
كۆكرەككە قالقان ، باشقا سايىۋەن .

ئانا مېھرى تاشنىمۇ ئېرىتىدۇ .

ئانا مۇھەببىتى ئەڭ يۈكسەك مۇھەببەت .

ئانا سەۋرى چەكسىز .

ئانا ئۆزى نەم يەردە ياتسىمۇ ،بالىلىرىنى قۇرۇق يەردە ياتقۇزىدۇ .

ئاناڭنى سۆيسەڭ ،باشقىلارنىڭ ئانىسىنى سۆكمە .

ئاناڭنى بېشىڭدا كۆتۈرۈپ ھەرەمگە ئاپارساڭمۇ ، ئانا ئەجرىنى ياندۇرالمايسەن .

ئانا مېھرى ھېچقاچان قېرىمايدۇ .

ئانىنىڭ مېھرىمۇ زور ،قەھرىمۇ زور .

ئانىسى ئۇرسىمۇ ، بالا << ئانا >> دەپ يىغلايدۇ .

ئاناڭغا تۇخۇمنى ئالقىنىڭدا پىشۇرۇپ بەرسەڭمۇ ،ئۇنىڭ ھەققىنى ئادا قىلالمايسەن .

ئاتا-ئانا شەپقىتى سۇدا ئۆلمەس ،ئوتتا كۆيمەس .

بىر بالىلىق ئانىنىڭمۇ ،ئون بالىلىق ئانىنىڭمۇ قايغۇسى بىر خىل .

يول ئۈچ خىل كىشىلەرگە بوشىتىلىپ بېرىلىدۇ : ياشانغانلارغا ،بالىلارغا ۋە ئانىلارغا .

ئاتا كۈچلۈك تەربىيىچى ، ئانا قانۇنىي رىزىق بەرگۈچى .

ئەگەر سەن پەرزەنتىڭدىن ھۆرمەت ئۈمىد قىلساڭ ، ئالدى بىلەن ئۆزۈڭ ئاتا-ئاناڭغا ھۆرمەت قىلىشىڭ لازىم .

ئانا بالا ئۈچۈن بىرىنچى مەكتەپ .

ياخشى ئادەملەر كۆپەيسۇن دېسىڭىز ،ياخشى ئانىلارنى كۆپەيتىڭ .

ئايال __ ئىنتايىن ئۇلۇغ سۆز ، ئۇنىڭدا قىزلىق لاتاپىتى ،پىدائىيلىقى ۋە ئانا جاسارىتى بار .

ئاتا- ئانىغا بولغان مېھىر ، بارلىق ياخشىلىقلارنىڭ بېشى .

"ئانا " سۆزى بالىلارنىڭ ئاغزىدا ياڭرايدىغان ، قەلبىدە جاراڭلايدىغان ئىلاھىي نامدۇر .

يىللار ئانىغا قايغۇ - ھەسرەتلەرنى ئەكەلسىمۇ ،ئۇنىڭ مېھرى كەملىمەيدۇ .

مۇۋەپپەقىيەت قازانغاندا ھەممە كىشى دوست ، پەقەت ئانىلا مەغلۇپ بولغان چاغدىكى ھەمرا .

ئانىسىنى يىغلاتقان كىشى مەرتىۋىسى قانچىلىك يۇقىرى ۋە قانچىلىك داڭدار شەخس بولسۇن ، ئۇ قەبىھ شەرمەندىدۇر .

ئانىنىڭ يۈرىكىدە مەڭگۈ بىر تەبەسسۇم ساقلىنىپ تۇرىدۇ . بۇ ، تەڭرى ئانىلارغا ئاتا قىلغان مەڭگۈلۈك مېھرى- مۇھەببەتتۇر .

ئانىنىڭ بالىنى سۆيۈش ھېسسىياتى كۈچلۈك بولىدۇ . ئانا پەرزەنتىنى باغرىغا باسقاندا پۈتۈن غەم- ئەندىشىنى ئۇنتۇيدۇ .

بىر ئايال ھۆرمەتلىك بولاي دېسە ،ئالدى بىلەن ئانا بولسۇن .

ساغلام ، بەختىيار ئىنسانلارنىڭ بولۇشى ئۈچۈن ساغلام ،بەختىيار ئانىلار بولۇشى كېرەك .

دۇنيادا ئۆز ئاناڭدەك سەمىمىي دوستۇڭ يوق .

ئانا __ بالىنىڭ بىرىنچى تەربىيىچىسى ۋە مۇئەللىمى .

مېھرىبان ئانىدىن ئايرىلغان بالا گۈلدانغا قىستۇرۇپ قويغان گۈلگە ئوخشايدۇ . رەڭگى ،پۇرىقى بولسىمۇ ، يىلتىزى يوق .

مەنبە : توختى ھاجى تىللا تۈزگەن << ئاياللار ھەققىدە ھېكمەتلەر>> دىن .