رەسىمسىز مۇنازىرە: [-- ھاياتىمغا تەسىر كۆرسەتكەن سىنىپ مەسئۇللىرى --]

ئەلكۈيى مۇنبىرى -> [كۆڭلۈمدىكى سۆزلەر] -> ھاياتىمغا تەسىر كۆرسەتكەن سىنىپ مەسئۇللىرى [بېسىپ چىقىرىش] كىرىش -> ئەزا بولۇش -> ئىنكاس يوللاش -> تېما يوللاش

lopnuri 2011-09-07 02:12


 

 

ھاياتىمغا تەسىر كۆرسەتكەن سىنىپ مەسئۇللىرى
 

سەمىي ئەسكەرتىش ۋە چاقىرىق:

ئوقۇتقۇچىلار بايرىمى مۇناسىۋىتى بىلەن،ئۇستازلارنىڭ بايرىمىنى قۇتلۇقلاش مەقسىتىدە ئۆزۈمچە توردىكى كەڭ دوستلارنى "ھاياتىمغا تەسىر كۆرسەتكەن سىنىپ مەسئۇللىرى" دېگەن تېمىدىكى مۇنازىرە پائالىيىتىگە تەكلىپ قىلماقچى.مېنىڭچە، بۇتېمىغا تورداشلارنىڭ ئاكتىپ ئاۋاز قوشىدىغانلىقىغا ئىشەنچىم كامىل. بۇيەردە سەمىمىي ئەسكەرتىدىغىنىم، تېمىغا ئىشتىراك قىلماقچى بولغان ھەر بىر تورداش،بۇنىڭغا چوقۇم ئەستايدىل مۇئامىلە قىلىشى، ئۆز ھېسىياتىنى چىنلىق بىلەن ئوتتۇرغا قويىشى، ھەر خىل شەكىللەر بىلەن ئۇقۇتقۇچىلارنىڭ ئىززەت ھۆرمىتىگە دەخلى- تەرۇز يەتكۈزدىغان بايانلاردىن ساقلىنىشى لازىم. ئەگەر ئۆز ئوقۇتقۇچىلىرى ھەققىدە تەپسىلىي توختىلىش ئىمكانىيىتى بولمىسا، ئۇلارغا بولغان مىننەتدارلىق ھېسىياتلىرىنى ۋە تەبرىكلىرىنى شېئىر ،نەسىر قاتارلىق شەكىللەر بىلەن ئىپادە قىلىشلىرىنى ئۈمىد قىلىمەن.

                                                                                            ھۆرمەت بىلەن: لوپنۇرى

 

كىرىش سۆز
 

ئوقۇتقۇچىلار بايرىمى يىتىپ كېلىش ھارپىسىدا تۇيۇقسىز تاكى باشلانغۇچتىن تارتىپ ئالىي مەكتەپكىچە بولغان ئوقۇش ھاياتىمدا ماڭا ئوخشىمىغان تەسىرلەرنى بەرگەن سىنىپ مەسئۇللىرىمنى ئويلاپ قالدىم. ئۇلارنىڭ ماڭا بەرگەن ئىجابىي ۋە سەلبىي تەسىرلىرىنى (ئەلۋەتتە ئىجابىي تەسىرلىرى ئاساسى ئورۇندا تۇرىدۇ) ئەسلەشكە تىرىشتىم. ئويلىغانسىرى ئۇلارنىڭ مېنىڭ بۇ ئوتتۇز نەچچە يىللىق ھاياتىمغا زور تەسىرلەرنى كۆرسەتكەنلىكىنى ھېس قىلىپ ۋە تونۇپ يەتتىم. بۇلارنىڭ بەزىلىرى ھازىرمۇ ھايات،بەزىلىرى ھەر خىل كېسەللەر تۈپەيلى بۇ ئالەم بىلەن مەڭگۈلۈك خوشلاشتى(ئاللاھ ئۇلارنىڭ ياتقان يېرىنى جەننەتتە قىلسۇن).

ئاتا-بوۋىلىرىمىز  "ئۆتكەن كۈنۈڭنى ئۇنۇتما،شىر چورۇقۇڭنى قۇرۇتما" دېگەن ھېكمەتلىك سۆزنى بىزگە مىراس قالدۇرۇپ،ئۆتمۈشىمىزنى ئەسلەپ تۇرۇشىمىز كېرەكلىكىنى تەۋسىيە قىلىدۇ. مۇشۇ تەمسىلنىڭ تەسىردىنمىكىن دائىم دېگۈدەك بالىلىق چاغلىرىمنى ئەسلەپ تۇرىدىغان بالامنىڭ ئىش-ھەركەتلىرىگە قاراپ ،ئۆزۈمنىڭ بالىلىق چاغلىرىنى ئەسلەيدىغان بولۇپ قالدىم.

ھەممىمىزگە مەلۇم بەلكىم نۇرغۇنلىرىمىز بالىلىق،ئۆسمۈرلۈك،ياشلىق چاغلىرىمىنى ئاخىرلاشتۇرۇپ مەلۇم خىزمەت ئورۇنلىرىدا ئۆز تۇرمۇشىمىزنىڭ ھەلەكچىلىكى بىلەن چېپىپ يۈرۋاتقان بولىشىمىز مومكىن. ئۇنداق بولسا،بىز ئاشۇنداق ئېسىل ئورۇنلاردا ئىشلەش ۋە بىلىم ئېلىش جەريانلىرىمىزدا قېنى قانچىلىكىمىز بىزگە بۇرۇن قان-تەرىنى سىڭدۈرگەن ئاشۇ جاپاكەش سىنىپ مەسئۇللىرىمىزنى ئېسىمىزگە ئېلىپ،ئىچىمىزدە بولسىمۇ ئۇلارغا مىننەتدارلىق بىلدۈرەلىدۇق؟ مېنىڭچە،بۇ سۇئال سورالغاندا كۆپىنچىلىرىمىز يەرگە قاراپ تىرناق تاتلىشىمىز،بېشىمىزنى قاشلىغانچە قىزىرىپ تاتىرىشىمىز مومكىن. مانا بۈگۈن مەن بۇرۇنقى بارلىق تىل قىسىنچىلىقلىرىمنى بىر تەرەپكە قايرىپ قويۇپ،سىلەر بىلەن ھاياتىمغا تەسىر كۆرسەتكەن سىنىپ مەسئۇللىرىمغا بولغان ھۆرمىتىم ۋە مىننەتدارلىقىمنى تور يۈزىدە بولسىمۇ بىلدۈرمەكچى بولىۋاتىمەن. ئالدى بىلەن گەپنى بىرىنچى سىنىپتىكى سىنىپ مەسئۇلۇم ھەققىدە باشلايمەن.

 

غۇبارسىز بالىلىقتىكى ئۆچمەس مىنۇتلار
 

بىرىنچى سىنىپقا كىرگەن كۈنلىرىم غۇۋا ئېسىمدە تۇرۇپتۇ. مەكتەپكە كىرگەن تۇنجى كۈنىدىكى ھاياجانلىق ھېسىياتىمنى ھازىر تىل بىلەن ئىپادىلەشكە ھەقىقەتەن ئاجىزلىق قىلىمەن. چۈنكى، تۆت-بەش ياش چاغلىرىمدىن تارتىپلا ئۈچ ھەدەم ۋە ئاكام مەكتەپكە ماڭدۇق دەپ ئەتىگەن چىقىپ كەتسە ئۇلارغا ھەۋەس بىلەن قاراپ قالاتتىم،ھەتتا بەزىدە ئۇلارنىڭ كەينىدىن ئەگىشىپ خېلى بىر يەرلەرگىچە مېڭىپ باقاتتىم.نەق ئالتە ياشقا كىرگەن ۋاقتىم دادام قولۇمدىن يېتىلىگەنچە كەنتىمىزدىكى بىر سىنىپلىق مەكتەپكە(كەنتىمىز سەل چەتتە بولغاچقا،ئۇنىڭ ئۈستىگە ئاھالە شالاڭ بولغاچقا،بۇ جايدا پەقەت بىرلا سىنىپ ئېچىلغان ئىدى) ئېلىپ كەلدى. ئۇچامدا ئاپام ھەر خىل رەخىت پارچىلىرىنى كىرىشتۈرۈپ تىكىپ بەرگەن قۇراق سومكا تاپىنىمغا تىگىپ تۇراتتى(ئاپام سومكىنىڭ بېغىنى سەل ئۇزۇن قىلىۋەتكەن بولسا كېرەك،ياق ئۇ چاغدا بويىمىزمۇ تايىنلىق ئىدى). سىنىپقا كىرىشىمىزگە بىزنى بوغداي ئۆڭ،خۇش چىراي بىر خانىم ئىنتايىن قىزغىن كۈتۈۋالدى. ئۇ چاغدا مەن دادامنىڭ كەينىگە ئۆتىۋىلىپ ئۇنىڭغا بىر خىل تارتىنىش ئىچىدە  قارىغانلىغىم ھازىرمۇ ئېسىمدە. بۇ سىنىپ مەسئۇلۇمنىڭ ئىسمى تۇرسىنئاي ئىدى. قاراپ باقسام مەن بۇ سىنىپتىكى ئەڭ كىچىك ئوقۇغۇچى ئىكەنمەن.بۇ سىنىپتىكى ئوقۇغۇچىلارنىڭ ياش پەرقىمۇ بەك قالايمىقان بولۇپ،كىچىكى ئالتە ياش چوڭى ئون بەش ياشقىچە بالىلار بار ئىدى.چۈنكى، ئۇ چاغلاردا ساۋاتسىزلىقنى تۈگىتىمىز دەپ جار سېلىۋاتقان چاغلار بولغاچقا،يېشى خېلى چوڭۇپ كەتكەن بالىلارمۇ بىرىنچى،ئىككىنچى سىنىپ ئوقۇغۇچىلىرى بىلەن بىرگە دەرس ئوقۇيتتى.ئۇ چاغلاردا پەقەت بىرلا سىنىپ بولغاچقا،تۇرسىنئاي مۇئەللىم ئۈچ يىللىقنىڭ ئوقۇغۇچىلىرىغا مۇشۇ بىرلا سىنىپتا دەرس ئۆتتى. ئۇ چاغدا سىنىپمىزدا قانچىلىك ئوقۇغۇچى بارلىقى تازا ئېسىمدە قالماپتۇ.ئىشقىلىپ مۇئەللىم،بىر سائەت بىرىنچى يىللىققا دەرس ئۆتسە،يەنە بىر سائەت ئىككىنچى يىللىققا دەرس ئۆتەتتى. بىر كۈنلۈك پائالىيىتىمىز مانا مۇشۇنداق نۆۋەت بىلەن دەرس ئاڭلاش بىلەن ئاخىرلىشاتتى.تۇرسىنئاي مۇئەللىم ھەم بىزگە سىنىپ مەسئۇلى ھەم بارلىق دەرسلەرنىڭ دەرس ئوقۇتقۇچىسى ئىدى. ھازىر ئويلىسام ئۇنىڭ قانچىلىك جاپا تارتقانلىقىنى ئۇ ۋاقىتتا ھەقىقەتەن ھېس قىلالماپتىكەنمەن. ئۇنىڭ ئۆيى مەكتىپىمىزگە بەش كىلومىتىر ئەتىراپىدا بولۇپ،ۋېلسىپىت بىلەن بېرىپ كېلەتتى.ھەمدە كۈندە ئەتىگەندە بىزنىڭ ئىشىكنىڭ ئالدىغا كېلىپ مېنى ۋېلسىپىتىگە مىندۈرۈپ مەكتەپ ئېلىپ بېرىشنى ئۇنتۇمايتتى.بەزىدە مېنى مىندۈرگەن ئاشۇ ۋېلسىپىتى بىلەن مەكتەپتىن قاچقان بالىلارنى تۇتۇپ كېلىش ئۈچۈن ئالدىراش چىقىپ كېتىپ، خېلى بىر ۋاقىتلاردىن كېيىن ھارغان ۋە ئاچقان ھالدا بالىلارنى ئالدىغا سېلىپ سىنىپقا كىرىپ كېلەتتى،لېكىن ھەرگىز تىللىمايتتى ياكى ئۇرمايتتى. يەنە ئاشۇ ۋېلسىپىتى بىلەن ئاغرىپ قالغان ئوقۇغۇچىلارنى مىندۈرۈپ يېزا مەركىزىدىكى كىچىك داۋالاش پونكىتلىرىغا ئېلىپ باراتتى. شۇڭىلاشقىمۇ ئۇ سىنىپ مەسئۇلى بولغان ئاشۇ مەزگىللەردە كەنتىمىزدىكى بالىلارنىڭ ھەممىسى دېگۈدەك مەكتەپتىن قالمىغان ئىدى.ھازىر ئويلاپ باقسام ئۇنىڭدىكى سەۋىرچانلىق ۋە كۈيۈمچانلىق ھەر قانداق كىشىنى قايىل قىلىپتىكەن. مەن بۇ كۆيۈمچان سىنىپ مەسئۇلۇمنىڭ قولىدا پەقەت بىر يىللا ئوقۇيالىدىم،ئىككىنچى سىنىپقا چىققاندىن كېيىن دادام ئاكام بىلەن بىللە بۇنىڭدىن چوڭراق مەكتەپكە ئاپىرىپ بەردى. بەلكىم،مەن تۆتىنچى يىللىقتا ئوقۇۋاتقان مەزگىللىرىم بولسا كېرەك،بىر كۈنى دادام تۇرسىنئاي مۇئەللىمنىڭ راك كېسىلىگە گىرىپتار بولۇپ ۋاپات بولغانلىقىنى، نەزىرىگە قاتنىشىپ كەلگەنلىكىنى ئېيتتى.بۇ خەۋەرنى ئاڭلاپ،ئۆيىمىزنىڭ كەينىدىكى بۈك يۇلغۇنلۇق ئىچىگە كىرىپ ئازاپلىنىپ يىغلىقانلىقىم ھازىرمۇ ئېسىمدە تۇرۇپتۇ. رەھمەتلىك بۇ چاغدا تېخى توي قىلىپ بىر يىلدىن ئاشقان،ئوماق قىزى ئەمدىلا تۇغۇلۇپ بىر نەچچە ئايلىق بولغان مەزگىل بولۇپ يېشى تېخى ئوتتۇزغىمۇ بارمىغان ئىدى. ئۇنىڭ ئاشۇ قىسقىغىنە بىر يىل ئىچىدە بالىلىق يۈرۈكۈمگە قالدۇرغان ئىزلىرى تا ھازىرغا كەلگۈچە ئۆچكىنى يوق،ئۇنىڭ ئىسمى چىقسىلا ھازىرمۇ بۆلەكچە ھاياجانلىنىپ كېتىمەن.ھەتتا ئوقۇغۇچىلىرىم ئارسىدا تۇرسىنئاي ئىسىملىك قىزلار بولسا،ئۆزۈممۇ بىلمەستىن ئۇلارغا ئامراق بولۇپ قالىمەن.

ئەمدى ئىككىنچى سىنىپ مەسئۇلۇم رازىيە مۇئەللىم ھەققىدە قىسقىچە توختىلىپ ئۆتەي. باياتتىن دەپ ئۆتكەندەك ئىككىنچى يىللىققا چىقىپلا باشقا مەكتەپكە يۆتكىلىپ كەتتىم. ئىككىنچى سىنىپقا چىققاندا مەكتەپنى يېڭىلا پۈتتۈرگەن چېچى قىسقا،ئورۇق بىر خانىم سىنىپ مەسئۇلى بولدى. ئۇنىڭ ئىسمى رازىيە ئىدى. ئۇنىڭ ئۆيى ناھىيە مەركىزىدە بولۇپ،ياتاقتا يېتىپ ئىشلەيتتى. بىزگە پەقەت ئەدەبىيات دەرسىلا بېرەتتى.دەسلەپتە ئۇنى تۇرسىنئاي مۇئەللىمگە ئوخشاش ئەستايىدىل ۋە كۆيۈمچان خانىم دەپ ئۇنىڭغا بەك ئامراق ئىدىم. ئۇمۇ ماڭا بەك ئامراق ئىدى(چۈنكى، شۇ ۋاقىتلاردا مېنىڭ ئوقۇش قىزغىنلىقىم زىيادە يۇقىرى بولغاچقا،دەرسلەردە خېلى ياخشى ئىدىم). ئۇ ۋاقىتلاردا مەكتەپلەردىكى ئوقۇتقۇچىلار تازا ياشلىشىۋاتقان مەزگىل ئىدى. ناھىيە مەركىزىدىن كېلىپ ياتاقتا يېتىپ ئىشلەيدىغان ئەر ۋە ئايال ئوقۇتقۇچىلار خېلى كۆپ ئىدى. ئاكام مېنىڭدىن ئىككى سىنىپ يۇقىرى بولۇپ،ئۇلارنىڭ سىنىپ مەسئۇلىمۇ ناھىيە بازىرىدىن كەلگەن ئالىم ئىسىملىك ياش مۇئەللىم ئىدى. بىرەر مەۋسۈمدىن كېيىن بولسا كېرەك ئاكام بىر كۈنى مەكتەپتىن كېلىۋىتىپ،ئالىم مۇئەللىمنىڭ رازىيە مۇئەللىم بىلەن مۇھەببەت ئىكەنلىكىنى ئېيتتى. مەن بۇنىڭغا قەتئىي ئىشەنمىدىم ھەمدە رازىيە مۇئەللىمنى ئاقلايمەن دەپ ئاكام بىلەن ئۇرۇشۇپ قالدىم،ھەتتا ئاكامدىن تاياقمۇ يېدىم. تاياق يېسەممۇ ئۇنىڭ بۇ سۆزىگە قەتئى ئىشەنمىدىم(ئۇ چاغلاردا قىز-ئوغۇللار مۇھەببەتلەشسە بەك ئۇچۇق ئاشكارە يۈرۈپ كەتمەيتتى،بولۇپمۇ ئوقۇتقۇچىلار شۇنداق). بەلكىم شۇ ۋاقىتتلاردا مېنىڭ مۇھەببەتكە بولغان كۆز قارىشىم توغرا بولمىغان چاغلىرىم بولسا كېرەك، ئاكام مېنى تېرىكتۈرگۈسى كەلسىلا " بىزنىڭ مۇئەللىم سېنىڭ مۇئەللىمىڭنى ئالىدۇ تازا، خوتۇن قىلىدۇ،تازا" دېگەن گەپلەرنى قىلاتتى. ئۇنىڭ بۇ گەپلىرى ھەقىقەتەن دەل ۋاقتىدا ئۆز كۈچىنى كۆرسىتەتتى. مەن ئۇنداق ئەمەس دەپ يىغلايتىم،ھەتتا ئەپسانە تىللار بىلەن ئۇنى تىللايتتىم، ئەلۋەتتە ئاخىردا يەنىلا ئۇنىڭدىن تاياق يەيتىم.شۇنداق قىلىپ بەلكىم ئىككىنچى مەۋسۈمنىڭ ئاخىرقى مەزگىللىرى بولسا كېرەك، نەق ئاكامنىڭ گېپىنىڭ ھەققى ئىسپاتلانمىسى بارلىققا كەلدى. رازىيە مۇئەللىم ئالىم مۇئەللىم بىلەن توي قىلدى. نىمىشقىكىن، ئالىم مۇئەللىمگە شۇنداق ئۆچ بولۇپ كەتتىم، ئۇ خۇددى مېنىڭ قىممەتلىك بىر نەرسەمنى تارتىۋالغاندەك تۇيغۇدا بولدۇم. ئۇلار توي قىلغاندىن كېيىن مەكتەپنىڭ ئىچىدىكى ئىككى ئېغىزلىق ئۆيدە تۇردى.دائىم دېگۈدەك ئۇلارنىڭ بەزى يېقىنچىلىق قىلىپ قىلغان قىلىقلىرى كۆزۈمگە چېلىقىپ قالاتتى.شۇنىڭ بىلەن بارا-بارا رازىيە مۇئەللىمگىمۇ ئۆچ بولۇپ قالدىم.ھەتتا بەزىدە قېيداپ دەرسلىرىنى كۆڭۈل قويۇپ ئاڭلىمايدىغان،تاپشۇرۇقلىرىنىمۇ ئىشلىمەيدىغان بولۇپ قالدىم.ئۇنىڭ ئالىم مۇئەللىم بىلەن توي قىلىشى شۇنداق بىر تەبىئىي جەريان بولسىمۇ، مۇئەللىمىمنى مۇققەددەس كىشى دەپ قاراپ كېلىۋاتقان ئاشۇ بالىلىق،ساددا خىياللىرىم بىلەن بۇ رىئاللىقنى قەتئىيلا قۇبۇل قىلالمىغان ئىدىم. ھازىر ئويلاپ باقسام بالىلىقتىكى ئاشۇ ساراڭلارچە خىياللىرىمدىن ئۇيىلىپ قالىمەن. بۇ مۇئەللىممۇ بىر يېرىم يىل تۇرۇپلا ناھىيە مەركىزىگە يۆتكىلىپ كەتتى. ئوتتۇرا مەكتەپتە ئوقۇۋاتقان چاغلىرىمدا ئۇنى پات-پات ئۇچىرتىپ قالاتتىم.ئالىي مەكتەپنى پۈتتۈرۈپ خىزمەتكە چىققاندىن كېيىن ئۇنى زادىلا ئۇچىراتمىدىم.بەلكىم،ئۇنىڭ چىرايى ئۆزگىرىپ كەتكەن بولسا،تونۇيالماي قالغان بولىشىممۇ مومكىن.

رازىيە مۇئەللىم كەتكەندىن كېيىن مەھمۇد ئىسىملىك بىر مۇئەللىم بىزگە سىنىپ مەسئۇلى بولدى. ئۇ ئاۋازى ئىنتايىن جاراڭلىق،كىيىنىشى ئالاھىدە رەتلىك،بوي تۇرقىمۇ خېلى كېلىشكەن،ۋالىبولنى قالتىس ياخشى ئوينايدىغان مۇئەللىم ئىدى.ئۇنىڭ توپ ئويناشتىكى ماھارىتىگە ھەۋەس قىلىپ،خىيالىمدا چوڭ بولغاندا ئاشۇ مۇئەللىمگە ئوخشاش ۋالىبولنى ياخشى ئوينايدىغان ئادەم بولىمەن دەپ ئىرادە قىلغان ئىدىم.بۇ مۇئەللىم توپنى ياخشى ئويناپلا قالماستىن،دەرسنىمۇ بەك ياخشى ئۆتەتتى،شۇ ۋاقىتتىكى ئاساسلىق دەرس ئەدەبىيات بىلەن ماتىماتىكىنى ئۆزى بىر قوللۇق بېرەتتى.بەزىدە تەنتەربىيە ئوقۇتقۇچىلىرىنىڭ ئىشى چىقىپ قالسا،تەنتەربىيە دەرسىنىمۇ ئۆتۈپ قوياتتى. ئىشقىلىپ سىنىپتىكى ھەممەيلەن ئۇنىڭغا ھەۋەس قىلاتتۇق ۋە قايىل ئىدۇق. ئۇ تاپشۇرغان تاپشۇرۇق ۋە ۋەزىپىلەرنى جان دىلىمىز بىلەن ئورۇنلايتتۇق. كۈز مەگىللىرى كەلگەندە ئۆز بېغىمىزدا پىشقان مىۋىلەرنى ئاز-ئازدىن بولسىمۇ ئۇنىڭغا ئەكىلىپ بېرەتتۇق.ھەر قېتىم ئەكەلگەندە ئۇ بىزگە بۇندىن كېيىن ئۇنداق قىلماسلىقنى تاپىلايتتى.شۇنداق قىلىپ بۇ مۇئەللىمنىڭ قولىدا باشلانغۇچ مەكتەپنى پۈتتۈرۈپ،ناھىيە مەركىزىدىكى ئوتتۇرا مەكتەپكە كەتتىم. بىز كېتىپ بىر ئىككى يىلدىن كېيىن بولسا كېرەك،مەھمۇد مۇئەللىم تۇيۇقسىز يوقاپ كەتتى. باشقىلاردىن سۈرۈ شتۈرۈپ ئۇنىڭ شەھەردىكى بىر مەكتەپكە يۆتكىلىپ كەتكەنلىكىنى ئۇقتۇم.خېلى مەزگىللەرگىچە ئۇنىڭ بىلەن كۆرشەلمىدىم. ئوتتۇرامەكتەپنى پۈتتۈرۈپ،ئالي مەكتەپكىمۇ باردىم. خىزمەتكە چىقىپ ئۈچ-تۆت يىلمۇ ئۆتتى. بەلكىم ئارىلىقتا 15يىل ئۆتكەن بولسا كېرەك،شۇنىڭغىچە ئۇنى بىرەر قېتىممۇ ئۇچىرتالمىدىم. خىزمەتكە چىقىپ بەشىنچى يىلى شەھەر مەركىزىدىكى ئۇيغۇرلار توپلاشقان بىر ئائىلىلىكلەر قورۇسىدىن بىر يۈرۈش ئۆي سېتىۋالدىم،ھەم شۇ يىلى توي قىلدىم.توي قىلىپ ئۇزاق ئۆتمەي،نەق بىزنىڭ قورودا مەھمۇد مۇئەللىم ئۇچىرىشىپ قالدىم. ئەسلىدە ئۇنىڭ ئۆيمۇ بىزنىڭ قورودا ئىكەن،ئۇنىڭ ئۈستىگە بىز يانمۇ-يان ئولتۇردىكەنمىز. ئۇنى كۆرۈپلا ئۇنىڭ ئالدىغا تەشەببۇسكارلىق بىلەن يۈگۈرۈپ باردىم. ئۇنىڭغا سالام قىلسام،ئۇ سالىمىمنى ئىلىك ئالغاچ،چىرايىدا بىر خىل ھەيرانلىقنى ئىپادىلىدى. بەلكىم ئۇ مېنى ئەسكە ئېلىشقا تىرىشقان بولسا كېرەك،مەنمۇ ئۇنى قىينىماستىن،كىم ئىكەنلىكىمنى ئۇنىڭغا بىلدۈردۈم.ئۆزۈمنى تونۇشتۇرشۇمغا ئۇ دەرھال ئېسىگە ئالدى.بىز بىرەر سائەتتەك قىزغىن پاراڭلىشىپ كەتتۇق.بۇ ۋاقىتتا مەن مەھەللىگە يېڭى كۆچۈپ كېرگەچكە مەھمۇد مۇئەللىمدەك بىر تونۇش ھەم سىرداشقا بەك ئېھتىياجلىق ئىدىم. ئارىدىن خېلى يىللار ئۆتكەن بولسىمۇ،ئۇ يەنىلا بۇرۇنقى سالاپىتىنى يوقاتمىغان ئىدى.قىزقارلىق يېرى شۇكى، ئارىدىن بىرەر يىل ۋاقىت ئۆتكەندىن كېيىن، بىر يازلىق تەتىللىك ئوقۇتقۇچىلارنى تەربىيەلەش كۇرسىدا مەن ئۇنىڭغا سىنىپ مەسئۇلى بولۇپ قالدىم.ھەم ئۇ سىنىپقا دەرسمۇ ئۆتتۈم. ئۇ دەرسكە بەك تولۇق قاتناشتى، ئۆتكەن دەرسىمنىمۇ بەك ئەستايىدىل ئاڭلىدى.مەنمۇ دەرسنى بەك تولۇق ۋە ئەستايىدىل تەييارلىغان ئىدىم.ئۇ  بىرەر قېتىم رۇخسەتمۇ سورىمىدى. كۇرس ئاخىرلاشقان مەزگىلدە ئۇ قولۇمنى چىڭ سىقىپ تۇرۇپ " بۇ قېتىم ھەقىقىي نەپ ئالدىم،رەھمەت سىزگە( ئەسلىدە بۇرۇن مېنى سەنلەيتى، شۇ كۇرستىن كېيىن مېنى ھۆرمەتلەپ سىزلەيدىغان بولدى)مەن سەندىن پەخىرلىنىمەن" دېگەن بىر ئېغىز گەپنى قىلىپ ئۆزىنىڭ ئىپتىخارلىق ھېسىياتىنى ئىپادىلىدى. بۇ ۋاقىتتىكى ھاياجىنىمنى،يۈرەكلىرىمنىڭ مەيدەمگە ئاۋازلىق ئۇرۇشلىرىنى پات-پات ئەسلەپ قالىمەن. شۇ تەربىيەلەش كۇرسىدىن كېيىن ئۇ مېنى مۇئەللىم دەپ چاقىردىغان بولدى. شۇنداق قىلىپ بىز ھازىرغىچە  بىر-بىرىمىزنى "پالانى مۇئەللىم" دەپ چاقىرىپ،قوشنا بولۇپ ياشاپ كېلىۋاتىمىز.

 

بەڭۋاشلىق تۇلپارىنىڭ تىزگىنى تۇتالمىغان دەقىقىلەر
 

ئەمدى تولۇقسىز ئوتتۇرا مەكتەپتىكى سىنىپ مەسئۇلۇم ھەققىدىمۇ قىسقىچە توختىلاي. بۇ مۇئەللىمنىڭ ئىسمى راخمان ئىدى. راخمان مۇئەللىم ئۆزى ياش، يۈزلىرىدىن قان تېمىپ تۇرىدىغان،ئاچچىقى ئىنتايىن يامان مۇئەللىم ئىدى. ئۇ بىزگە ئەدەبىيات دەرسى بېرەتتى. تەلەپنىمۇ بەك قاتتىق قوياتتى. ئۇ دەرسنىغۇ بەك ئەستايىدىل ھەم قىزقارلىق سۆزلەيتتى. لېكىن، ئۇ ھاراققا سەل ئامراق بولغاچقىمىكىن، سىنىپقا دائىم دېگۈدەك ھاراق پۇراپ كېلەتتى. مىجەزى بەك ئىتتىك بولۇپ، ئازراق ئىش،كىچىككىنە سەھۋەنلىكلىرىمىز ئۈچۈنمۇ بەك كايىپ كېتەتتى.قىزلارنىغۇ بىر ئىككى ئېغىز سېسىق گەپ بىلەن تىللاپ قويۇپ بولدى قىلاتتى.كەلگۈلۈك ئوغۇللارغىلا كېلەتتى،ئازراق ئىشلار ئۈچۈن بىۋاستە تاياقلا يەيدىغان گەپ( بىز ئوقۇغان ۋاقىتلاردا ئوقۇتقۇچىلارنىڭ ئوقۇغۇچىلارنى ئۇرىشى تەبىئىي ئىش بولۇپ، ھازىرقىدەك مائارىپ تارماقلىرى تەرپىدىن تەن جازاسى بېرىشنى چەكلەپ تۇرىدىغان ئىشلار يوق ئىدى، ھازىرقى بالىلار ھەقىقەتەن تەلەيلىك جۇمۇ!).ئۇنىڭ ئۆزىگە خاس ئۇرۇش ئۇسۇلى بار ئىدى،قولىنى تاپانچا شەكىلگە كەلتۈرۋېلىپ بېشىمىزغا ئۇرىدىغان بولسا،پىشانىلىرىمىز كۆكرىپ كېتەتتى. شۇڭىلاشقىمىكىن ئۇنىڭدىن بەك قورقاتتۇق، ئۇنى يىراقتىن كۆرسەكمۇ قېچىپ بىر بۇلۇڭلارغا كىرىپ كېتەتتۇق. بەزىدە، يۇشۇرۇنچە ئۇنىڭ ئۇرۇش ئۇسۇلىنى دوراپ بىر-بىرىمىزنى ئۇرۇپمۇ ئوينايتتۇق. ھازىر ئويلاپ باقسام، ئۇ گەرچە دەرسنى ياخشى ئۆتسىمۇ،لىكىن ئاشۇنداق بىر قاتار قىلىقلىرى بولغانلىق تۈپەيلى بىز ئۇنى چىن دىلىمىزدىن ھۆرمەت قىلماستىن،قۇرقۇپ تۇرۇپ ھۆرمەت قىلغان ئىكەنمىز. يەنە تۇرۇپ شۇ ۋاقىتتا بىز بەك كەپسىز بولغاچقا،ئۇ ئاشۇنداق تەربىيلەش ئۇسۇللىرىنى قوللانغان بولىشى مومكىن. "ئۇستازى زالىم بولسا،شاگىرتى ئالىم بولۇر"دېگەن گەپ بار ئەمەسمۇ؟ دەپ ئۇنى خىيالىمدا ئاقلاپمۇ كېتىمەن. ئىشقىلىپ ئۇ بىزنى ئۇرسۇن ياكى تىللىسۇن بىزنىڭ خاراكتىمىز تىز ئۆزگىرۋاتقان ،ئۆزىمىزنى كونتىرول قىلالماي ياۋا ئاتتەك چاپچىپ تۇرغان، ئۇچۇشنى بىلىپ،چۈشۈشنى ئۇنتۇپ قېلىۋاتقان مەزگىللىرىمىزنىڭ گۇۋاھچىسى سۈپىتىدە يەنىلا بىزنىڭ ھۆرمەتلىشىمىزگە ئەرزىيدۇ.

ئەمدى تولۇق ئوتتۇرا مەكتەپتىكى سىنىپ مەسئۇلۇم نىيازخان مۇئەللىم ھەققىدە قىسقىچە توختىلاي. بىز تولۇقسىز ئوتتۇرا مەكتەپتە ئوقۇۋاتقاندىلا ئۇنىڭ نامىنى ئاڭلىغان، ئۇنىڭ ئاچچىقى يامان، باشقىلارغا بوزەك بولمايدىغان،خېلى-خېلى ئەر ئوقۇتقۇچىلارمۇ باشقۇرالمايدىغان كەپسىز ئوقۇغۇچىلارنى يىپتەك قىلىۋىتىدىغان مۇئەللىم ئىكەنلىكىنى بىلگەن ئىدۇق. شۇڭىلاشقا،ئۇنىڭ "نىيازخان شوركا"دېگەن لەقىمىمۇ بار ئىكەندۇق.ئۇ بىزگە سىنىپ مەسئۇلى بولۇش بىلەن بىرگە،ماتىماتىكا دەرس ئۆتەتتى. ئاۋازى ياڭراق، گەرچە سېمىزرەك بولسىمۇ ھەركىتى چاققان ئىدى. ئۇ دەرس ئۆتسە،سىنىپنى چىۋىن ئۇچسا ئاڭلانغىدەك دەرىجىدە جىمجىتلىق باساتتى. ئۇنىڭدىن ھەممىمىز بەك قورققاچقا، ماتىماتىكا دەرسىنى باشقا دەرسلەرگە قارىغاندا بەك تىرىشىپ ئۆگەنگەن ئىدۇق. ئۇنىڭ بىزگە بەكرەك يارىغان تەرىپى، سىنىپ يىغىنى ئاچسا، باشقا ئوقۇتقۇچىلاردەك دائىم دېگۈدەك "پىپەن يىغىنى"ئاچماستىن، ئۆزىنىڭ ئالىي مەكتەپتىكى ئوقۇش ھاياتىنى سۆزلەپ بەرگەچ،بىزنىمۇ تىرىشىپ ئۆگىنىپ ئالىي مەكتەپتىن ئىبارەت ئىلىم كانىغا بېرىشقا ئىلھاملاندۇراتتى. ئۇنىڭ ئاغزىدىن  چىققان بارلىق گەپلىرىنى قىزىقىش ئىچىدە تۇرۇپ ئاڭلايتتۇق،ئۆزىمىزنى مۇئەللىم ئوقۇغان ئاشۇ مەكتەپلەردە ئوقۇۋاتقان كەبى تەسەۋۇر قىلىپ،تاتلىق خىياللارنى سۈرۈشەتتۇق.مەن ئۇ ۋاقىتتا سىنىپنىڭ تۇرمۇش ھەيئىتى( ئۇ ۋاقىتلاردا تازىلىق ھەيئىتى) ئىدىم. تولۇق بىرىنچى يىللىقتا گەرچە سىنىپنىڭ ئالدى بولالمىساممۇ ھەر ھالدا دەرسلەردە يامان ئەمەس ئىدىم. تولۇق ئىككىنچى يىللىققا چىققاندا، مۇئەللىم مېنى سىنىپىمىزدىكى ئەڭ كەپسىز بىر ئوقۇغۇچى بىلەن ئولتۇرغۇزۇپ قويدى.سىنىپىمىزدىكى بارلىق ئوقۇغۇچىلار بۇ مۇئەللىمدىن چۆچىسىمۇ، بۇ ساۋاقدېشىمىز ئانچە قورقۇپ كەتمەيتتى.بەزى ۋاقىتلاردا مۇئەللىم ئۇنى تەنقىدلىسە، جاۋاپ ياندۇرۇپ،ئۆزىنى ئاز-تولا كۆرسىتىپمۇ قوياتتى. پۈتۈن مەكتەپ بويىچە ھەممە بالىلار دېگۈدەك ئۇنىڭدىن تەپ تارتاتتى. لېكىن نىمىشقىكىن، ئۇ ماڭا ئالاھىدە مۇئامىلە قىلاتتى،بىز تېزلا چىقىشىپ يېقىن دوستلاردىن بولۇپ كەتكەن ئىدۇق. ئۇ  ھەر قانداق ۋاقىتتا مېنى قوغدايتتى،باشقىلارنىڭ مېنى بوزەك قىلىشىغا يول قويمايتتى. مېنى پات-پات ئۆيىگە ئاپىرىپ مېھمانمۇ قىلاتتى. ئەلۋەتتە مەنمۇ ئۇششاق-چۈششەك ئىمتىھانلاردا ئاز-تولا ياردەم قىلىپ دوستلۇقنى يەتكۈزەتتىم. شۇ ۋاقىتتا مەنمۇ بەلكىم يولۋاسنىڭ ئارقىسىدىكى تۈلكىدەك كۆرەڭلەپ كەتكەن بولۇشۇم مومكىن. سىنىپ ۋە مەكتەپ ئىچىدىمۇ خېلى كېرىلىپ يۈرەتتىم. كىيىن ئۇ ماڭا سىنىپ مەسئۇلىمىزغا قانداق تاقابىل تۇرۇش تەدبىرلىرنىمۇ ئۆگەتكەن،ھەمدە مۇئەللىم تەنقىد قىلغاندا قورقماستىن جاۋابلىشىقا ئىلھاملاندۇرغان ئىدى. بىر كۈنى ئاخىر بىر ئىش يۈز بېرىپ مۇئەللىم مېنى تەنقىد قىلدى. ئەسلىدە سىنىپىمىزنىڭ ئەخلەت چېلىكى ئىز-دېرەكسىز يوقالغان بولۇپ،مەن تۇرمۇش ھەيئىتى بولغاچقا،ئۇنىڭغا مەسئۇل بولۇشۇم كېرەكلىكى ئوتتۇرغا قويۇلغان ئىدى. شۇ ۋاقىتتا مۇئەللىمنىڭ سۈرلۈك چىرايى ماڭا ئانچە قورقۇنۇشلۇق بىلىنمىگەن، ھەم ئىككى يىلدىن كېيىن تۇنجى بولۇپ يۈرەكلىك ھالدا كۆزىگە تىكىلىپ قارىيالىغان ھەمدە ئۇنىڭغا گەپ ياندۇرغان مەزگىلىم ئىدى.  شۇ ۋاقىتتا ئۇ ناھايىتى كەسكىن ھالدا: " چېلەكنى ئەتىگىچە نەدىن بولسا،تېپىپ كېلىسىز" دېگەن  مەنمۇ " چېلەكنى كۈندە كۆتۈرۈپ يۈرەمدىم، يۈتۈپ كەتسە مەن قانداق قىلىمەن، ئەگەر تېپىپ كېلىڭ دەپ تۇرۋالسىڭىز، بولدى مەكتەپتە ئوقۇمايمەن" دېگىنىمچە بالىلارنىڭ ئالدىدىن مەغرۇر قەدەم بىلەن چىقىپ كەتكەن ۋاقتىم ئىدى. شۇنداق قىلىپ،ھېلىقى دوستۇمنىڭ ياردىمىدە يۈرەكلىك ھالدا مۇئەللىمگە"زەربە" بېرىپ بالىلارنىڭ ئالدىدا ئۆزۈمنى كۆرسەتكەن، نوچىلىقىمنى پەش قىلالىغان بولدۇم. لېكىن ئەمدىكى گەپ ئەتىسى مەكتەپكە قانداق بېرىشتا قالغان ئىدى. ئۆزۈم نوچىلىق قىلىپ قىرىق نەچچە ئادەمنىڭ ئالدىدىن مەغرۇر چىقىپ كېتىپ ئەتىسى قانداقمۇ سىنىپقا كىرەلەي.شۇ كېچىسى بىر كېچە ئۇخلىيالمىدىم.ئۆزۈمنىڭ نادانلىق ۋە ئالدىراقسانلىق قىلىپ قويغىنىمغا بەك پۇشايمان قىلدىم. لىكىن مەن قىلىدىغاننى ئاللىقاچان قىلىپ بولغان ئىدىم. ئاخىر ئۇنداق ئويلىنپ بونداق ئويلىنىپ بىرەر چىرايلىق باھانە كۆرسىتىپ مەكتەپتە ئوقۇماسلىق قارارىغا كەلدىم. شۇنىڭ بىلەن ئەتىسى دادامغا يېلىنىپ مەكتەپتە قەتئى ئوقۇغۇم يوقلىقىنى دىھقانچىلىق ئىشلىرىغا ياردەملەشكۈم بارلىقىنى ئېيتتىم.دادام بۇنىڭغا قەتئىي قوشۇلمىدى ھەم سەۋەبىنى كوچىلاپ تۇرىۋالدى. مەنمۇ جاھىللىق قىلىپ مەكتەپتە قەتئىي ئوقۇغۇم يوقلىغىنى ئەگەر " ئوقۇيسەن " دەپ زورلىسا، باشقا بالىلار بىلەن باشقا يۇرتلارغا قېچىپ كىتىدىغانلىقىمنى ئېيتتىم. بۇ گېپىم كۈچىنى كۆرسەتتى بولغاي، دادام ناھايىتى كەسكىن ئاھاڭدا :"راستىنلا مەكتەپتە ئوقۇمامسەن؟ ئەمىسە كېيىن مەندىن يامانلىما" دېگەن گەپنى قىلدى. شۇ كۈندىن باشلاپ تولۇق ئوتتۇرا مەكتەپ ئوقۇغۇچىسىدىن ئائىلىمىزنىڭ قويچىسىغا ئايلىنىپ قالدىم. كۈندە ئەتىگەن تۇرۇپ 70-80 چە قوينى ھەيدەپ جاڭگاللىققا يالغۇز كىرىپ كېتەتتىم، ئۆزۈم قوي بېقىۋاتقان بولساممۇ، خىيالىم يەنىلا مەكتەپتە، ساۋاقداشلىرىم ھەققىدە بولاتتى. پۇشايمان ئىچىدە يىغلاپمۇ تاشلىغان ئىدىم. ئارىدىن نەق ئىككى ھەپتە بولغاندا بىر كۈنى كەچتە قويلارنى ھەدەپ قايتىپ كەلسەم، سىنىپ مەسئۇلىمىز نىيازخان مۇئەللىم ھويلىدا ئولتۇرۇپ كېتىپتۇ. ئۇنى كۆرۈپ داڭ قېتىپ تۇرۇپلا قالدىم،لىكىن ئىچىمدە ئىنتايىن خۇشال بولدۇم. ئۇ كۈنى نىيازخان مۇئەللىم بولغان ئىشلارنى دادامغا چۈشەندۈرۈپ،ئۆزىنى تەنقىد قىلدى.مېنى دادامنىڭ ئالدىدا ئىنتايىن ئىستىقباللىق ئوقۇغۇچى، بۇنداق قويچى بولۇپ كەتسە زايا كېتىدۇ، دەپ ماختاپ ئۇچۇرۇپ دۈشەنبىدىن باشلاپ مەكتەپكە بېرىشىمغا قايىل قىلدى. ئۇنىڭ يۇقارقى گەپلىرىنى ئاڭلاپ قانچىلىك خوش بولۇپ كەتكەنلىكىمنى ھازىرمۇ تەسەۋۋۇر قىلالمايمەن. ھازىر ئويلاپ باقسام، شۇ ۋاقىتلاردا ئەگەر ئۇ مېنى ئىزدەپ كەلمىگەن بولسا، بۇچاغقا، قەيەرلەردە نىمىش قىلىپ يۈرەر بولغىيتىم. بەلكىم ھازىرقىدەك يۇرۇق، ئازادە ئىشخانىلاردا ئولتۇرۇپ، ئىلىم تەشنالىرىغا بىلىم بېرىش پۇرسىتى ماڭا نېىسىپ بولماس ئىدى. شۇڭا، ئۇنى ئويلىساملا ئۇنىڭغا بولغان ھۆرمىتىم ئاشىدۇ.كېيىن مەنمۇ مۇئەللىمنىڭ ئۈمىدىنى يەردە قويمۇدۇم، تىرىشىپ ئوقۇپ ئالىي مەكتەپ ئىمتىھانىدا ئىجتىمائىي پەن بويىچە ناھىيە بويچە ئىككىنچى بولۇپ، ئاپتۇنۇم رايۇنىمىزدىكى خېلى داڭقى بار ئالىي مەكتەپتە ئوقۇدۇم. ئۇقتۇرۇش قەغىزى قولۇمغا تەككەن تۇنجى كۈنى بىرنچى بولۇپ ئۇنى ئىزدەپ باردىم، ئۇ مېنىڭدىن بەكرەك ھاياجانلىنىپ كەتتى. شۇ يىلى سىنىپىمىزدىكى بالىلارنىڭ ئالىي مەكتەپكە ئۆتۈش نىسبىتى يۈز پىرسەنت بولدى. يېرىمدىن كۆپرەك ساۋاغداشلىرىمىز تولۇق كۇرس كەسىپلىرىگە ئۆتتى.مۇئەللىم ئۆزىنىڭ ئۇچۇرما بولۇش ئالدىدا تۇرغان باچكىلىرىنى كۆرۈپ ئىنتايىن ھاياجانلاندى ۋە كۆز يېشى قىلدى. ئۇ ھازىرغىچە ناھىيىمىزدىكى ئوتتۇرا مەكتەپتە ئوقۇتۇش تەتقىقات ئىشخانىسىنىڭ مۇدىرى بولۇپ ئىشلەۋىتىپتۇ. ئەپسۇسلىنارلىقى ھەم خىجىل بولدىغىنىم ئالىي مەكتەپكە كەتكەندىن كېيىن ۋە خىزمەتكە چىققاندىن كېيىن ئۇنى جىق يوقلاپ تۇرالمىدىم. بەلكىم كۆپىنچە ئوقۇغۇچىلىرىمىز مۇشۇنداق بولسا كېرەك، ئالىي مەكتەپكە ئۆتۈۋالغاندىن كېيىنلا بۇرۇنقى سىنىپ مەسئۇللىرىنى ئېسىدىن چىقىرىپ قويىدىغان، ھەتتا بەزى سورۇنلاردا ئۇچۇق ئاشكارا غەيۋىتىنى قىلىپ تىللايدىغان ئىشلارنى خېلى كۆپ ئۇچىراتتىم. ھەمدە ئۆز- ئۆزۈمگە "ئوقۇغۇچى دېگەن بەك يۈزسىز بولىدىكەن،مەنمۇ شۇ يۈزسىزلەرنىڭ قاتارىدىن ئورۇن ئېلىپ قالدىممۇ قانداق؟" دەپ سۇئال قويىدىغان بولۇپ قالدىم.

 

ياشلىقنىڭ غىدىقلىشى بىلەن ئاقسالىقنىڭ كوچىسىدا تەمتىرىگەن كۈنلەر
 

ئەڭ ئاخىردا ئالىي مەكتەپتىكى سىنىپ مەسئۇلىمىز ھەققىدە بەك قىسقا توختىلىپ ئۆتەي. چۈنكى، ھەممىمىز بىلىمىز ئالىي مەكتەپتىكى سىنىپ مەسئۇللىرىمىزنى ھەپتىدە بىرەر قېتىم سىياسىي ئۆگىنىش  ياكى جىددىي ئۇقتۇرۇش بولمىسا، ئانچە كۆرۈپ كېتەلمەيمىز. ئالىي مەكتەپتىكى سىنىپ مەسئۇلىمىزنىڭ ئىسمى تۇرسۇن ئىدى. ئۇ بويى ئىگىز،بەستلىك، ناھايىتى چوڭ چامداپ ماڭىدىغان، چېچىنىڭ ئالدى تەرپى چۈشۈپ كەتكەن، كۆزەينەك تاقاپ يۈرىدىغان ، ناھايىتى ئالدىراش كىشى ئىدى. كېيىن باشقىلاردىن ئاڭلىساق، ئۇ بىر قانچە مەكتەپتە دەرس ئۆتىدىغان بولغاچقا، ئاشۇنداق ئالدىراش يۈرىيدىكەن. بىز كەلگەن بىرىنچى يىلى بىزگە دەرسكە كىرگەن ئوقۇتقۇچىلارنىڭ كۆپىنچىسى شىنجاڭ بويچە خېلى داڭقى چىققان، نۇرغۇن كىتاپلىرى نەشىر قىلىنغان پىروففىسورلار بولدى.سىنىپ مەسئۇلىمىز ئىككىنچى يىلىدىن باشلاپ بىزگە بىر قانچە پەن دەرس بەردى. بىسمىللاسىغىلا سەۋىيىسى ناھايتى يۇقىرى مۇئەللىملەر دەرس ئۆتۈپ بىزنى كۆندۈرۈپ قويغاچقىمۇ،بىز ئۇنىڭ ئۆتكەن دەرسلىرىنى باشقىلار بىلەن سېلىشتۇرۇپ ئانچە ياقتۇرۇپ كەتمەيتتۇق(ئۆزەڭلار بىلىسىلەر ئالىي مەكتەپنىڭ دەسلەپكى مەزگىللىرىدىكى ئوقۇغۇچىلار بىر ئاز ئاقسا، ئوڭايلىقچە ئادەم ياراتمايدىغان خۇيلىرى بار). ئۇ چاغدا مۇئەللىم تېخى ياش ھەم بەك ئالدىراش بولغاچقىمۇ، ئۇنىڭغا تازا قايىل ئەمەس ئىدۇق،شۇڭىلاشقا،كىيىنكى مەزگىللەردە ئۇنىڭ بىلەن قارشىلىشىدىغان ئىشلارمۇ خېلى يۈز بەرگەن ئىدى(بۇ ئىشلارنى سۆزلەپ كەلسەم گەپ بەك ئۇزراپ كەتكۈدەك،ھېلىمۇ بەك ئەزۋەيلەپ كەتتىم). ئالىي مەكتەپنى پۈتتۈرۈپ خىزمەتكىمۇ چىقتۇق،كۆپىنچىلىرىمىز ئوقۇتقۇچى بولدۇق.ئوقۇتقۇچى بولغاندىن كېيىن ئۇنىڭ قەدىرىگە يەتتۇق، شۇ ۋاقىتلاردا ئۇنىڭغا قىلغان تەنتەكلىكلىرىمىزنى ئويلاپ خىجىل بولۇشتۇق. كىيىن ئۈرۈمچىگە خىزمەت مۇناسىۋىتى شۇنداقلا ساۋاقداشلارنىڭ تويى مۇناسىۋىتى بىلەن بارغاندا ئۇنىڭ بىلەن كۆرۈشۈپ تۇردۇق.بىر-ئىككى قېتىم ئاز-تولا نەرسە كېرەك ئېلىپ ئۆيىگە يوقلاپ بېرىپ،خېلى بېسەرەمجان قىلغانمۇ بولدۇق. يىغىنچاقلاپ كەلسەك، يەنىلا ئۇنىڭ بىزگە سىڭدۈرگەن ئەجىرىگە تۈزۈك جاۋاپ قايتۇرالمىدۇق.

خۇلاسە
مەيلى ئوقۇش ھاياتىمىزدا قانداق كۆڭۈلسىزلىكلەرگە ۋە قىيىنچىلىقلارغا يۇلۇقايلى، بەڭۋاشلىقىمىز تۈپەيلى ئوقۇتقۇچىلىرىمىزنىڭ كۆڭلىگە ئازار بېرەيلى،ئۇلارغا قېيداپ،ئۇلارنى غايىبانە تىللاپ،ھەييارلىق بىلەن دوراپ ئۆتكەن بولايلى. مېنىڭچە ئوقۇتقۇچىلىرىمىز بىزنىڭ ئۆتمشتىكى سەھۋەنلىكلىرىمىزنى ئاللىقاچان كۆڭلىدىن چىقىرۋەتتى. ئۇلارنىڭ قەلبىدە پەقەت "ئۇ مېنىڭ ئوقۇغۇچۇم"دەيدىغان پەخىرلىنىش ھېسىياتىلا بار.بىز ھازىر مەيلى قانداق كەسىپ بىلەن شۇغۇللىنايلى،قانداق ئېسىل ئىدارىلەردە ئىشلەيلى بىزنىڭ بۇ كۈنلەرگە ئېرىشىشىمىزدە ئۇلارنىڭ تۆھپىسى زور.شۇڭىلاشقا،بىزمۇ ئاشۇ چاپاكەش ئۇستازلىرىمىزدىن كەڭ قورساق بولۇشنى ئۆگىنەيلى. ۋىجدانىمىزغا مۇناسىپ ھالدا ئۇلاردىن مىننەتدار بولۇشنى، سىڭدۈرگەن ئەجىرىگە جاۋاپ قايتۇرۇشنى ئۇنتۇپ قالمايلى.ئەڭ ئاددىيسى يولدا ئۇچىراپ قالغاندا، بېشىمىزنى بۇراپ ئۆتۈپ كەتمەستىن، ئۇلارنىڭ ئالدىغا تەشەببۇسكارلىق بىلەن بېرىپ سالام بەرگەچ ئۇلارنىڭ سالامەتلىك ئەھۋالنى سوراپ، بىر ئىككى ئېغىز تەسەللىي سۆزلىرىمىز بىلەن بولسىمۇ،كۆڭلىنى ئاۋۇندۇرۇپ قويالايدىغان بولايلى.ھەر يىلى ئوقۇتقۇچىلار بايرىمىدا گۈل-چېچەكلەرگە ئورىيالمىساقمۇ، تون پىچىپ كىيدۈرۈپ قويالمىساقمۇ بىر تىلېفۇن ئۇرۇپ ئۇلارنىڭ بايرىمىنى تەبرىكلەپ قويايلى. چۈنكى،بىزدە "ئىلىم بەرگەن ئۇستاز ئاتاڭدىن ئۇلۇغ" دېگەن ماقالمۇ بار.ئەڭ ئاخىردا بارلىق ئۇستازلارنىڭ تېنىگە سالامەتلىك تۇرمۇشىغا خاتىرجەملىك تىلەش بىلەن بىرگە ئۇلارنىڭ ئوقۇتقۇچىلار بايرىمىنى تەبىرىكلەپ چىن دىلىمدىن سالام يوللايمەن! ئۇستازلار بايرىمىڭلارغا مۇبارەك بولسۇن!

 

2011-يىلى9-ئاينىڭ6-كۈنى

begana 2011-09-07 09:02
تولۇق ئوقۇپ چىقتىم .ھەم قىزىقارلىق ھەم ئويلىنىشقا تىگىشلىك گەپلەر ...
ھاياتىمىزغا نۇرغۇن كىشلەر تەسىر كۇرسىتىدۇ ،قەلىب ۋاراقلىرىمىنى ئېچىپ بىر يىزىۋىتەي دىسەم بالامنى يەسلىگە ئاپىردىغان چاغ بولدى .يەنە پۇرسىتى كىلىپ قالار.
ئاۋۇ نىيازخان مۇئەللىمگە رەھمەت .

otyak 2011-09-07 12:14
مۇئەللىم

تۇنجى قىتىم سىنىپتا، ئۇچراشقان بىز مۇئەللىم،
ئاق-قارىنى بىزلەرگە تونۇتقانسىز مۇئەللىم.
ئوتتۇز يىڭنىڭ ئالدىدا، سىز سۇباتلىق نەۋقىران،
ھەمدە باتۇر، باھادىر، پالۋاندىڭىز مۇئەللىم.

تالاي يىللار ئۆتۈپتۇ، سەبىيلەرنى تەربىيلەپ،
شۇ سەبىينىڭ بىرىمەن، ئاپچە-مۇنچە سەن-پەنلەپ.
نادانلىقىم يوقالدى، سىزدىن ئەقىل كۆپ ئېلىپ،
ياش بوغۇنغا نوتىغا، ئەجىر قىلغان مۇئەللىم.

مېھرى ئىسسىق ئوت يۈرەك، مۇھىسىپىت قەلبى ياش،
تەپەككۇرى بەك ئۆتكۈر، پىكرى ئويغاق قەلەم شاش .
شان-شەرەپلەر قۇچۇپسىز، باغۋەنلەرگە بولۇپ باش،
ئارزۇ-ئۇمۇد كانىدا، ۋولقان بولغان مۇئەللىم.

ئوتتۇز باھار قىشى-ياز، بولدى مۇنبەر ماكانىڭ،
ۋەتەن ئۇچۇن ئەل ئۇچۇن، ئىشلەش سېنىڭ ئارمانىڭ.
ئانا يۇرتۇم قوينىدا، ئالەم شۇمۇل داستانىڭ،
كۆيۈپ شامدەك بىر ئۆمۈر، باغۋەن بولغان مۇئەللىم.

شاگىرتلىرىڭ قەلبىدىن، ئۇرغۇپ چىقتى سالام-قۇد،
ئۇستازىمنى ھۆرمەتلەپ، باشقا ئالدى ئەل ۋە يۇرت.
دىدى: ۋىجدان ئۇستازغا شېئىرىڭ بىلەن قەدەھ تۇت،
قەلىبلەرنىڭ تۆرىدىن ئورۇن ئالغان مۇئەللىم.

2008-9-9 -كۇنى يېزىلغان.

مېنىڭ بۇ سىنىپ مۇدىرىم ، بەكمۇ خۇشاۋاز، كىچىك پىل، چىقىشقاق... كىشى ئىدى. مەن ئۇنىڭ قولىدا ئوقۇپ، يەنە نۇرغۇن سىنىپ مۇدىرىنىڭ قولىدا ئوقۇپ خىزمەتكە چىققان. مېنىڭ قەلبىمدە ئاشۇ تۇنجى سىنىپ مۇدىرىمنىڭ ئوبرازى ھىلىغىچە كەتمەيدۇ... شۇڭا ئەسلەپ تۇراتتىم. ھازىر چىڭ دۇنياغا كەتتى. ياتقان يىرى جەننىتى بولغاي !

tograk001 2011-09-07 15:31
تۇلۇقسىز ئوتتۇرىدىكى  ئۇقۇتقۇچۇم   دائىم بىزگە  ئوغۇللار  ئوغۇل بالىدەك  مەرت،يۈرەكلىك بۇلۇڭلار.  قىزلار  قىزلاردەك  نۇمۇسچان  ، ئەدەپلىك بۇلۇڭلار  دەيدىغان   بۇ ئوقۇتقۇچۇمنىڭ سۆزلىرى قەتئىي ئىسىمدىن چىقمايدۇ....

mazargojam 2011-09-07 18:32
بۇ يازمىڭىزنى ئوقۇغاچ ، بارلىق سىنپ مەسئۇلى ۋە دەرىس ئوقۇتقۇچىللىرىنى بىر قۇر ئەسلەپ چىقتىم.ئەسكىلىك قىلىپ  يېگەن شاپىلاقلىرىمنىمۇ ئەسلىدىم. ھازىرقى ياخشى خىزمەت ۋە تۇرمۇشۇمنىڭ شۇ جاپاكەش مۇئەللىملىرىمنىڭ ئەجرىدىن كەلگەنلىكىنى تېخىمۇ تونۇپ يەتمەكتىمەن. تېمىڭىزغا رەھمەت.

jiuxing 2011-09-07 23:44
توردايوق ئوقۇتقۇچىنى ماختىغۇچە بىر پىيالە چاي بولسىمۇ تۇتسىڭىز شۇ ئەڭ ئالى سوۋغا.....

nursima 2011-09-08 00:40
جان ئۇستازىم ،ياشايدۇ نامىڭ سېنىڭ مۇنبەر ئارا،قەلىبلەردە،
قالمىدى ئىلىم بەرگەن ئەجىر-  مېھنىتىڭ يەردە.

جان ئۇستازىم،بۈگۈن ساڭا قۇتلۇق بايرام،
نە يازسام ئازلىق قىلۇر ساڭا نامەم.

بارلىق ئۇستازلىرىمنىڭ بايرىمىغا قۇتلۇق بولسۇن!!!!

taxbalik 2011-09-08 12:37
ئەسسالامۇ ئەلەيكۇم
مۇسۇلمانلارنىڭ ئىككىلا بايرىمى بار . ئوقۇتقۇچىلارنى ھۆرمەتلەيمىز ئەلبەتتە ھۆرمەتلىنىشكە تىگىشلىك بولغىننى ، لىكىن بايرام قىلىپ تەبركلەشنىڭ دىنىمىزدا ئورنى يوق !

gheril 2011-09-08 14:25
نەقىل
بۇ 7قەۋەتتىكىtaxbalik يوللىغان 2011-09-08 12:37 غا قارتىلغان  :
ئەسسالامۇ ئەلەيكۇم
مۇسۇلمانلارنىڭ ئىككىلا بايرىمى بار . ئوقۇتقۇچىلارنى ھۆرمەتلەيمىز ئەلبەتتە ھۆرمەتلىنىشكە تىگىشلىك بولغىننى ، لىكىن بايرام قىلىپ تەبركلەشنىڭ دىنىمىزدا ئورنى يوق !



ئوھۇ ! ئالە  شەرىڭنى !

taxbalik 2011-09-08 14:52
نەقىل
بۇ 8قەۋەتتىكىgheril يوللىغان 2011-09-08 14:25 غا قارتىلغان  :



ئوھۇ ! ئالە  شەرىڭنى !

گىپىڭىز بولسا قايىل قىىلارلىق دەلىل بىلەن ئىنكاس قايتۇرسىڭىز توغىرسى ئىقتىدارىڭىز بولسا قايتۇرۇڭ ! بولمىسا قالايمىقان مىنىڭ ئىنكاسىمنى نەقىل ئىلىپ ئۆزىڭىزگە گۇناھ يۈكلەيدىغان ئىشلارنى قىلماڭ ! سىزگە ئاخىرقى سەمىمى ئەسكەرتىشىم . قاچان مەن ئىنكاس يازسام كانىدەك چاپلىشىپ يۈرمەي . سىزمۇ ئەركەك بولغاندىكىن ئۆزىڭىزنىڭ كۆزقارشىنى سۆزلەڭ . سىز بۇ مۇنبەرگە باشقىلارنى باھالاش ئۈچۈن كىردىغان ئوخشايسىز ، باشقىلارنى باھالاشتىن ئىلگىرى ئۆزىڭىزنى باھالاپ بىقىپ ئاندىن ئىنكاس يېزىڭ . بۇندىن كيىن سىز مەن توغورلۇق ئىنكاس يازماي تىمىغا قارتا يازارسىز . قارغاندا سىزگە كافىرون سۈرسى مەنىسى بويچە ئىش كۆرسەم بولغۇدەك ...!

zilnur 2011-09-08 20:16
مەن بىر ئوقۇتقۇچى.يۇقارقى دوستلارنى گىپىنى ئاڭلاپ مەسئۇليىتىمنىڭ تېخمۇ ئېغىرلىقىنى يەنە قايتىدىن  ھىس قىلدىم.

pat5479 2011-09-08 22:31
[quote]بۇ 9قەۋەتتىكىtaxbalik يوللىغان 2011-09-08 14:52 غا قارتىلغان  :

گىپىڭىز بولسا قايىل قىىلارلىق دەلىل بىلەن ئىنكاس قايتۇرسىڭىز توغىرسى ئىقتىدارىڭىز بولسا قايتۇرۇڭ ! بولمىسا قالايمىقان مىنىڭ ئىنكاسىمنى نەقىل ئىلىپ ئۆزىڭىزگە گۇناھ يۈكلەيدىغان ئىشلارنى قىلماڭ ! سىزگە ئاخىرقى سەمىمى ئەسكەرتىشىم . قاچان مەن ئىنكاس يازسام كانىدەك چاپلىشىپ يۈرمەي . سىزمۇ ئەركەك بولغاندىكىن ئۆزىڭىزنىڭ كۆزقارشىنى سۆزلەڭ . سىز بۇ مۇنبەرگە باشقىلارنى باھالاش ئۈچۈن كىردىغان ئوخشايسىز ، باشقىلارنى باھالاشتىن ئىلگىرى ئۆزىڭىزنى باھالاپ بىقىپ ئاندىن ئىنكاس يېزىڭ . بۇندىن كيىن سىز مەن توغورلۇق ئىنكاس يازماي تىمىغا قارتا يازارسىز . قارغاندا سىزگە كافىرون سۈرسى مەنىسى بويچە ئىش كۆرسەم بولغۇدەك ...!
سىزنىڭ ئوقۇتقۇچىلارغا قارىتا پىكرىڭىز كۆپ ئوخشايدۇ،ئۇنداق قىلماڭ بالا!ئوقۇتقۇچىلارغا بايرام بولسا سىزگە نىمە زىيان چىقتى؟خېتىڭىزگەقاراپ بېقېپ ساۋادىڭىزنى كىم چىقارغىننى ئويلاپ سۆزلەڭ!بايرام كۆپ بولسا كىسىلىڭىز تۇتامدۇ-يا!بىر ئېغىز مۇبارەكلەپ قويسىڭىز ئوقۇتقۇچىلار نىمەبوپ كىتەر؟سىز نىمە بوپ كىتەرسىز؟

lopnuri 2011-09-08 22:50
نەقىل
بۇ 5قەۋەتتىكىjiuxing يوللىغان 2011-09-07 23:44 غا قارتىلغان :
توردايوق ئوقۇتقۇچىنى ماختىغۇچە بىر پىيالە چاي بولسىمۇ تۇتسىڭىز شۇ ئەڭ ئالى سوۋغا.....

بۇ دېگېنىڭىزنىڭمۇ خېلى ئاساسىي بار،لېكىن ئۇلارنى توردا يوق دەپلا ئازراق بولسىمۇ كۆڭلىمىزنى ئىپادىلەپ قويمىساقمۇ ياخشى بولماس،بىزدە "بۇغداي نېنىڭ بولمىسۇمۇ،بۇغداي سۆزۈڭ بولسۇن"دېگەن ھېكمەتمۇ بار ئەمەسمۇ؟ شائىر يازغۇچىلارمۇ ئۆلۈپ كەتكەن ئاتا-ئانىلار مەشھۇر شەخىسلەرنى ئەسلەپ،مەدىيلەپ شېئىر-داستانلارنى رومانلارنى يازىكەنغۇ؟مېنىڭچە ئۇستازلىرىمىزمۇ بىزنىڭ مەدىھلىشىمىز ياكى تېخىمۇ ھۆرمەتلىشىمىزگە ئەرزىيدۇ،بۇ يەردىكى مەسىلە ھەرگىز يېمەك-ئىچمەك مەسىلىسى ئەمەس،ئۇلار ماددىي نەرسىلەرگە قارىغاندا مەنىۋى تەسەللىگە تېخخمۇ ئېھتىياجلىق.مەن بۇ ئۆزۈمنىڭ ئوقۇتقۇچىلىرىنى ئەسلەش بىلەن بىرگە مائارىپ سېپىدە جاپالىق ئىشلەۋاتقان بارلىق ئۇستازلىرىمىزنىڭ بايرىمىنى تەبرىكلىمەكچى بولدۇم.بۇ يەردىكى مەقسىتىم ھەرگىز ماڭا يېتەكچىلىك قىلغان بىر نەچچە ئوقۇتقۇچىلارنىلا ئەسلەش ۋە ئۇلاردىن مىننەتدار بولۇش ئەمەس.مەن ئەسلەش ئارقىلىق باشقىلارنىڭمۇ ئۆز ئوقۇتقۇچىلىرىنى ئەسلەشكە دەۋەت قىلىش.

turditohti 2011-09-09 00:25
بارلىق جاپاكەش ئۇقۇتقۇچىلارنىڭ بايرىمىنى چىن دىلىمدىن مۇبارەكلەيمەن.
تىمىڭىزغا رەھمەت.

mahbus 2011-09-09 11:19
نەقىل
بۇ 7قەۋەتتىكىtaxbalik يوللىغان 2011-09-08 12:37 غا قارتىلغان :
ئەسسالامۇ ئەلەيكۇم
مۇسۇلمانلارنىڭ ئىككىلا بايرىمى بار . ئوقۇتقۇچىلارنى ھۆرمەتلەيمىز ئەلبەتتە ھۆرمەتلىنىشكە تىگىشلىك بولغىننى ، لىكىن بايرام قىلىپ تەبركلەشنىڭ دىنىمىزدا ئورنى يوق !

موللام، بۇنداق ۋەزخانلىقنى توردا قىلغۇچە، بېرىپ مەسچىتلەردە ، مەھەللىلەردە ، ئادەم كۆپرەك توپلاشقان ئادەملەر توپىغا بېرىپ قىلسىڭىز بولمامدۇ؟  
      بۇ يەردە ھېچكىم بۇنى مۇسۇلمانلارنىڭ بايرىمى دەۋالغىنى يوق . پەقەت ئوقۇتقۇچىلارنىڭ مىننەتسىز ئەجرىگە تەشەككۈر ئېيتىش ، ئۇلارنى ئۇلۇغلاش يۈزىسىدىن مۇشۇ كۇننى ئوقۇتقۇچىلار بايرىمى قىلىپ بېكىتكەن . ئىسلام دىنى ھەر بىر مۇسۇلماننىڭ بارلىق تۇرمۇشىغا چوڭقۇر سىڭىپ كېرىشى كېرەكلىكى مۇقەررەر بولسىمۇ بىراق ئەدەپ - ئەخلاق يۈزىسىدىن ئېلىپ بېرىلىدىغان نورمال تەبرىكلەش پائالىيەتلىرىنى چەتكە قېقىش تولىمۇ نادانلىقتۇر. بۇنىمۇ چەتكە قاقسىلا بېرىپ ئاستا ئۇيۇنلىرىنى ئوينىسىلا .

    بارلىق ئىشلارنى دىن تەرەپكىلا چېتىۋالىدىغان ئاپپاق خوجا مورىتلىرىدىن ھەجەپمۇ زىرىكتىغۇ كىشى.

taxbalik 2011-09-09 11:26
[quote]بۇ 11قەۋەتتىكىpat5479 يوللىغان 2011-09-08 22:31 غا قارتىلغان  :
[quote]بۇ 9قەۋەتتىكىtaxbalik يوللىغان 2011-09-08 14:52 غا قارتىلغان  :

سىزنىڭ ئوقۇتقۇچىلارغا قارىتا پىكرىڭىز كۆپ ئوخشايدۇ،ئۇنداق قىلماڭ بالا!ئوقۇتقۇچىلارغا بايرام بولسا سىزگە نىمە زىيان چىقتى؟خېتىڭىزگەقاراپ بېقېپ ساۋادىڭىزنى كىم چىقارغىننى ئويلاپ سۆزلەڭ!بايرام كۆپ بولسا كىسىلىڭىز تۇتامدۇ-يا!بىر ئېغىز مۇبارەكلەپ قويسىڭىز ئوقۇتقۇچىلار نىمەبوپ كىتەر؟سىز نىمە بوپ كىتەرسىز؟
[/quote
ئەسسالامۇ ئەلەيكۇم
تورداش مىنى بالا كۆرۈپ قالغان ئوخشىمامسىز ، مەن ئۆزۈمنىڭ ھىسياتىنى سۆزلىمىدىم . مۇسۇلماننىڭ ئىككىلا بايرىمى بار دىگەن مىنىڭ سۆزۈم ئەمەس سۆيۈملۈك رەسۇلىمىزنىڭ (مۇھەممەد ئەلەيھى سالامنىڭ ) سۆزى . مىنىڭ ئوقۇتقۇچىلارغا پىكرىم بار يوقلىقىنى سىز مۇئەييەنلەشتۈرمىسىڭىز . مەن ئوقوتقۇچى توغورلۇق باشقا سۆز قىلمىغاندىن كىيىن ھەم پىكرىم بار مەخسەتتە گەپ قىلمىغاندىن كىيىن . تەبرىكلىسىڭىز ئۆزىڭىزنىڭ ئىشى مەن مۇبارەكلەيدىغان پەقەت ۋە پەقەت ئىككى بايرام بار .
شۇڭا ماڭا قالپاق تەييارلىمىسىڭىز ، مەن ئۇنداق قالپاقلارغا ماس كەلمەيمەن . مەن پەقەت مۇسۇلمانلارنىڭ ئىككىلا بايرىمى بارلىقىنى ئىزاھلاپ قويدۇم . ھەرگىز ئوقوتقۇچىلار بايرىمىنى يوق دىمىدىم ،ھەم ئۆتكەزمەڭلارمۇ دىمىدىم .

taxbalik 2011-09-09 11:34
نەقىل
بۇ 14قەۋەتتىكىmahbus يوللىغان 2011-09-09 11:19 غا قارتىلغان  :

موللام، بۇنداق ۋەزخانلىقنى توردا قىلغۇچە، بېرىپ مەسچىتلەردە ، مەھەللىلەردە ، ئادەم كۆپرەك توپلاشقان ئادەملەر توپىغا بېرىپ قىلسىڭىز بولمامدۇ؟  
      بۇ يەردە ھېچكىم بۇنى مۇسۇلمانلارنىڭ بايرىمى دەۋالغىنى يوق . url=/job.php?action=topost&tid=11549&pid=96918][/url]

كەچۈرۈڭ ! مەن بۇ سۆزنى مۇسۇلمان ئوقۇتقۇچىلارغا دىگەن ئىدىم . سىز ئۆزىڭىزگە ئىلىپ كەتمىسىڭىزمۇ بولىدۇ . سىز بايرىمىڭىزنى خاتىرجەم ئۆتكۈزىۋىرىڭ . سىزگە مىنىڭ  پىكرىم يوق !

mahbus 2011-09-09 12:21
نەقىل
بۇ 16قەۋەتتىكىtaxbalik يوللىغان 2011-09-09 11:34 غا قارتىلغان :

كەچۈرۈڭ ! مەن بۇ سۆزنى مۇسۇلمان ئوقۇتقۇچىلارغا دىگەن ئىدىم . سىز ئۆزىڭىزگە ئىلىپ كەتمىسىڭىزمۇ بولىدۇ . سىز بايرىمىڭىزنى خاتىرجەم ئۆتكۈزىۋىرىڭ . سىزگە مىنىڭ  پىكرىم يوق !

     تېما ماۋزوسىنى ۋە مەزمۇنىنى كۆرىدىغان چاغدا كۆزىڭىزگە بىرەرسىنىڭ تاشلىۋەتكەن ئەسكى ئىشتىنىنى كىيىپ كىرمىگەن بولغىيتىڭىز؟
ئېسىڭىزدە بولسۇن: ئىشتانغا بەرىبىر نىجاسەت پۇراقلىرى سىڭگەن بولىدۇ . ئۇ سىزنىڭ كۆزىڭىزنىلا تۇسۇپ قويماستىن بەلكى ئەقلىڭىزنىمۇ بۇلغىۋېتىدۇ .

       تېمىدا دىنىي مەسىلىلەر توغرۇلۇق مۇنازىرە ئېلىپ بېرىلغان بولسا قارىشىڭىزنى يۈزدە - يۈز قوللىغان بولاتتىم . ئەمما تېما مەزمۇنىنى بۇراشتىكى مەقسىدىڭىزدىن، شۇنداقلا  بۇ ئىنكاسىڭىزدىكى مېنىڭ دىنىي ئېتىقادىمغا ھاقارەت قىلغان جۈملىلەر( ئىنكاسىمدىكى گەپنى چۈشەنمەيدۇ دەپ ئويلاپ قالماڭ! سىزدەك نادانلار ئۆزىنى ئەقىللىق چاغلاپ يازغان قىسقا، ئەمما ھاقارەتلىك جۈملىلەرنى چۈشەنمەيدىغان يەردە ئەمەسمەن) دىن سىزنىڭ نادانلاردىنمۇ ئېشىپ چۈشكىدەك كالۋا ئىكەنلىكىڭىزنى تېخىمۇ تۇنۇپ يەتتىم. باشقىلارنى قىلچە چۈشەنمەي، تۇرمۇش ئادەتلىرىنى بىلمەي تۇرۇپلا مۇسۇلمان ئەمەس دەپلا ھۆكۈم چىقىرىشىڭىز سىزنىڭ بەزىلەر دەۋاتقان ساختا دىنىي تونغا ئورۇنۇپ ، باشقىلارنىڭ ھېسسىداشلىقىغا ئېرىشىشنى ئويلايدىغان بىچارە ئىنسان ئىكەنلىكىڭىزگە قاراپ تولىمۇ ئېچىنىۋاتىمەن .

     قايسى كۈنى تېخى بىر داڭلىق دىنىي ئولىما << مەن سىلەرگە قۇرئان كەرىمدىن ئاللاھنىڭ سۆزىنى يەتكۈزىۋاتقان چېغىمدا كىمدۇر بىرى ئىشىك يۇچۇقىدىن ماراپ گەپ تىڭشاۋاتىدۇ. قاتتىق ئېھتىيات قىلىڭلار ، ئاشۇ ماراقچى چالا - پۇلا ئاڭلىۋالغان نەسىھەتلىرىمنى بورمىلاپ بازارغا سېلىشى ، سىلەرنى خاتا يولغا باشلىشى مۇمكىن >> دىگەن ئىدى. ئىنكاسىڭىزدىن بۇ ماراقچىنىڭ كىملىكىنى بىلگەندەك بولۇۋاتىمەن .
شۇڭا ماڭا ئۇنداق دىنسىز قالپىقىنى كىيدۈرىمەن دەپ ئاۋارە بولماڭ . سىزدەك ساختا موللام بىلەن مۇنازىرىلەشكۈدەك ئىقتىدارىم بولمىغان بولسا سىزگە ئىنكاس يېزىپ ئاۋارە بولمايتىم . سىز ئاۋال قۇرئان كەرىمنى ئاندىن ئىسلام تور بەتلىرىگە كىرىپ دىنىي ئالىملارنىڭ ماقالىلىرىنى تەپسىلى كۈرۈپ چىقىڭ . بەلكىم گەجگىڭىزگە ئۆتۈپ قالغان ئەقلىڭىز جايىغا كېلىپ قالار . راست ، ئالىملارنىڭ ماقالىلىرىنى كۆرگەندە كۆزىڭىزدىكى ئىشتاننى ئېلىۋېتىپ ، ئەقىل كۆزىڭىز بىلەن ئوقۇپ، تەھلىل قىلىپ ئىنكاس يېزىشىڭىزنى تەۋىسىيە قىلىمەن .

سەمىمىي ئەسكەرتىش: باشقا تورداشلارنىڭ ئىنكاسىمغا جاۋاپ قايتۇرۇشتىن ئىلگىرى ھەر ئىككىمىزنىڭ ئىنكاسىنى تەپسىلى ئوقۇپ كۆرۈشىنى ، ئىنكاستىكى مەزمۇننىڭ قايسى مەنىدە يېزىلغانلىقىنى چۈشەنگەندىن كېيىن ئىنكاس يېزىشىنى، خاتا چۈشەنمەسلىكىنى ئۈمىد قىلىمەن .

gheril 2011-09-09 12:25
نەقىل
بۇ 9قەۋەتتىكىtaxbalik يوللىغان 2011-09-08 14:52 غا قارتىلغان  :

گىپىڭىز بولسا قايىل قىىلارلىق دەلىل بىلەن ئىنكاس قايتۇرسىڭىز توغىرسى ئىقتىدارىڭىز بولسا قايتۇرۇڭ ! بولمىسا قالايمىقان مىنىڭ ئىنكاسىمنى نەقىل ئىلىپ ئۆزىڭىزگە گۇناھ يۈكلەيدىغان ئىشلارنى قىلماڭ ! سىزگە ئاخىرقى سەمىمى ئەسكەرتىشىم . قاچان مەن ئىنكاس يازسام كانىدەك چاپلىشىپ يۈرمەي . سىزمۇ ئەركەك بولغاندىكىن ئۆزىڭىزنىڭ كۆزقارشىنى سۆزلەڭ . سىز بۇ مۇنبەرگە باشقىلارنى باھالاش ئۈچۈن كىردىغان ئوخشايسىز ، باشقىلارنى باھالاشتىن ئىلگىرى ئۆزىڭىزنى باھالاپ بىقىپ ئاندىن ئىنكاس يېزىڭ . بۇندىن كيىن سىز مەن توغورلۇق ئىنكاس يازماي تىمىغا قارتا يازارسىز . قارغاندا سىزگە كافىرون سۈرسى مەنىسى بويچە ئىش كۆرسەم بولغۇدەك ...!



  سىلەردەك  ئادەملەرگە بىر نەرسە چۈشەندۈرۈپ  بولغىلى بولمايدۇ،چۈشەندۈرگەن بىلەنمۇ بىكار، مۇشۇ مۇنبەردە " تەسەۋۋۇپ ۋە سوفىمىزىم " دەيدىغان بىر ماقالە بار، شۇنى ئۇنى ھەزىم قىلىپ ئوقۇۋالارسىز، سىزدە شۇنى ھەزىم قىلالىغۇدەك سەۋىيە بارمۇ ؟

didar0996 2011-09-10 11:41
                                       ئۇستازىمغا  يېزىلغان مەكتۇب

  (   مەن بۇ مەكتۇبۇمنى ئوقۇتقۇچىلار بايرىمى مۇناسىۋىتى بىلەن شىنجاڭ ئۇنۋىرستېتى قانۇن فاكولتىتىدا بىللە ئوقىغان  40نەپەر سۆيۈملۈك ساۋاقداشلىرىمغا ۋاكالىتەن ،بىزگە 5 يىل ئىلىم بەرگەن ،بىزنى ئۆز بالىسىدەك ئاسرىغان . كۆيۈنگەن قەدىردان ئۇستازىم ئەخمەت مامۇت مۇئەللىمگە بېغىشلايمەن . )

ياخشىمۇسىز قەدىردان ئۇستازىم ئەخمەت مۇئەللىم :

       سىزنىڭ بۈگۈنكىدەك قۇتلۇق كۈنلىرىڭىزدە دىيارىمىزنىڭ ھەرقايسى جايلىرىدا خىزمەت قىلىۋاتقان ئوقۇغۇچىلىرىڭىزدىن سىزگە ئالى ئېھتىرام !بايرىمىڭىزغا مۇبارەك !

      شۇ تاپتا مەن ساۋاقداشلىرىمغا  ۋاكالىتەن مۇشۇ ئاددى يازمام ئارقىلىق سىزگە كۆڭۈل سوغىسى تەييارلاپ ئولتۇرۇپتىمەن . گەرچە بۇ ماددىي سوغا بولمىسىمۇ ئەمما بۇ سوغامدىن سىزنىڭ چەكسىز خۇش بولىدىغىنىڭىزغا ئىشىنىمەن .قايسى بىر ئۇستاز ئۆزى يېتىشتۇرگەن كۆچەتنىڭ مىۋىسىدىن ھوزۇرلانمىسۇن ؟ تېخى تۈنۈگۈنلا ئوقۇش پۈتتۈرگەندەك قىلىۋىدۇق ،ئارىدىن ھەش-پەش دېگۈچە شۇنچە يىللار ئۆتۈپتۇ . مانا ئەمدى بىزمۇ جەمىيەتنىڭ ھەرقايسى قاتلاملىرىدا تېگىشلىك رولىمىزنى جارى قىلدۇرۇپ ، يۇرتىمىز ئۈچۈن تېگىشلىك تۆھپە قوشۇپ كېلىۋاتىمىز . ئارىمىزدىن  سىز سۆيۈنگىدەك قابىل رەھبەرلەر ، سىياسى قانۇن سېپىدە پىداكارلىق كۆرسەتكەن ، شەرەپ ئوردىنلىرىغا ئېرىشكەن ساقچى –ئوفىتسىرلار ، ئادۋۇكاتلار ، تەتقىقاتچىلار يېتىشىپ چىقتى . بىز ئېرىشكەن شان –شەرەپلەر ئالدى بىلەن بىزنى تەربىيىلەپ قاتارغا قوشقان ، ياراملىق ئادەم قىلىپ جەمىيەتكە چىقارغان ئاشۇ بىباھا ئەجرىڭىز ئۈچۈن سىزگە تەئەللۇق بولغۇسى   ... مۇئەللىم ئاللاھ ئەجرىڭىزگە رەھمەتلەر ئاتا قىلسۇن  !!!

       ئالى مەكتەپ ھاياتىمنى ئەسلىگىنىمدە،قەلبىمگە چوڭقۇر سىڭىپ كەتكەن ئاشۇ ئۆچمەس ئىزنالار ھېلىمۇ مېنى ھاياجانغا سالىدۇ .  بىز  ھەر يەر ھەر يەرلەردىن كېلىپ ، ئوخشىمىغان چىرايلار ، ئوخشىمىغان مىجەزلەر ، ئوخشىمىغان يەرلىك شىۋىلىرىمىز بىلەن چۇلدۇرلىشىپ ، سىزنىڭ مەسئۇللىقىڭىزدىكى ئاشۇ مېھرى ئىللىق سىنىپقا يىغىلىپ 40 تال غۇنچە ،بىر دەستە گۈل بولۇپ ئەتراپىڭىزدا ئېچىلغان ئىدۇق ....

       بىز 40 ئوقۇغۇچى سىزنىڭ بىر قوللۇق تەربىيىلىشىڭىز ، غەمخورلىقىڭىز ھەم بىزگە ئاتا قىلغان چەكسىز ئەجرىڭىز بىلەن ئاشۇ 5 يىل جەريانىدا ئىلگىركى نوتا ھالىتىمىزدىن ھەقىقى مىۋىلىك كۆچەت بولۇپ يېتىشىپ چىقتۇق. بۇ 5 يىل جەريانىدا سىز ئۆزگىچە خارەكتىرىڭىز ، مول بىلىم قۇرۇلمىڭىز ۋە كۇچلۇك ئەقلى ئېنىرگىيىرىڭىز بىلەن بىزگە ھەممىنى ئۈگەتتىڭىز. بىز سىزدىن ئادەم بولۇشنى ئۈگەندۇق ، ياشاشتىن ئۆرنەك ئالدۇق . شۇڭا بىزنىڭ ئىرادىمىزدە جەسۇرلۇق ، ئېتىقادىمىزدا بۈيۈكلۈك ، ۋۇجۇدىمىزدا كۇچلۇك ئادىمىيلىك غۇرۇرى شەكىللىنىپ باردى. بىز بۇ 5 يىل جەريانىدا سىز بىلەن قولداش  ، قەلىبداش ، سىرداش بولۇپ تەڭ كۈلۈپ ، بەزىدە سىزنى قاخشىتىپ، چېچىلدۇرۇپ ئەنە ئاشۇ گۈزەل ياشلىق چاغلىرىمىزنى سىزنىڭ كۆز ئالدىڭىزدا ئۆتكۈزدۇق. ئاتا -ئانىمىزنى، ئۆيىمىزنى  سېغىنساق ، سىزگە ئەركىلىدۇق ، بىز ئەركىلىمىگەن ، ئاۋارە قىلمىغان سىزنىڭ پانىي ئالەملىك خانىمىڭىز قەمبەرنىسا ھەدىمىزمۇ قالمىدى ...

        بىز سىزنىڭ ئۆيىڭىزگە كىرىپ ئائىلە خوشاللىقىدىنمۇ تەڭ بەھرى ئالاتتۇق تېخى...خۇددى ئۆز ئۆيۈمىزدەك شاتلانغان چاغلىرىمىزنىغۇ ساناپ بېرەلمەيمىز سىزگە مۇئەللىم.  بىز ئاشۇ 5 يىل جەريانىدا ئەسلىدىكى گۆدەك ، ساددا ،بالىلارچە بەڭۋاش ھالىتىمىزدىن كىيىنچە ياشلىق باھارىمىز ئۇرغۇپ، جۇلالىنىپ تۇرىدىغان  بىر توپ نەۋقىران يىگىتلەرگە، جەزبىدار قىزلارغا ئايلاندۇق.

       سىزنىڭ قولىڭىزدا ئوقىغان  ئاشۇ ئوقۇغۇچىلىق چاغلىرىمىز قانداق ياخشى چاغلار ئىدى ھە ...؟ بىز ئاشۇ سەبى چاغلىرىمىزنى سېغىنىمىز ... سىنىپىڭىزدا ئوقىغان ئاشۇ ياشلىق چاغلىرىمىزنى ، ساۋاقداشلىق مېھرىمىزنى ھەرقانداق نەرسىگە تىگىشكىمىز كەلمەيدۇ.سىزنىڭ ئاشۇ مېھرى ئىللىق سىنىپىڭىزدا داۋاملىق ئوقۇپ قېلىشنى ، سىزنىڭ ئىللىق سىمايىڭىزنى دائىم كۆرۈپ تۇرۇشنى شۇنداق ئارزۇ قىلىپ قالىمىز تېخى مۇئەللىم.بىز ھەممىمىز ئاشۇ مېھرى ئىللىق سىنىپىمىزنى ، غەم -غۇسسىسىز  ئۆتكەن ئوقۇغۇچىلىق ھاياتىمىزنى ، بىزنى بىر قوللۇق تەربىيىلىگەن ئوقۇتقۇچىلىرىمىزنى ، بىزگە بەكرەك ئەجىر سىڭدۈرگەن سىز (سۆيۈملۈك ئۇستازىمىز) نى  چوڭقۇر ھۆرمەت ئېھتىرام بىلەن سېغىنىش ئىچىدە تىلغا ئالىمىز ھەم مەڭگۈ ئەسلەيمىز .

       سىزنىڭ تەسىرىڭىزدە بىز ئۆز ئارا ئىناق -ئىتتىپاق ياشاۋاتقان بەخىتلىك بىر ئائىلىنىڭ باللىرىدەك ئۆتكەن بولغاچقا ساۋاقداشلىق مېھرىمىزمۇ شۇنچە چوڭقۇرلىشىپ كەتكەنىكەن ... بىز شۇڭا نەدىلا بولساق ئۆزئارا ئالاقىلىشىپ ، ئەھۋال سورىشىپ ، تاشلاشماي ئىزدىشىپ ئۆتۈپ كېلىۋاتىمىز .بۇمۇ بەلكى سىزنىڭ ئەجرىڭىزنىڭ نەتىجىسى بولسا كېرەك.

     بىز گەرچە سىزنى پات -پات  بېرىپ يوقلاپ بولالمىساقمۇ ئۈرۈمچىدىكى ساۋاقداشلىرىمىزدىن سىزنىڭ خەۋىرىڭىزنى ، باللىرىڭىزنى سوراپ ، ئەھۋالىڭىزنى ئىگەللەپ تۇرىۋاتىمىز ...

      سىز بىز 40 ئوقۇغۇچىنىڭ  قەلىب تۆرىمىزدىكى ئەڭ ئالىجاناپ ئۇستازىمىزدۇرسىز ، شۇڭا ۋاقتىڭىز يەتسە ئائىلىڭىزدىكىلەر بىلەن بىللە ئۆزىڭىز پەرۋىشلەپ يېتىشتۈرگەن غۇنچىلارنىڭ تۇتقان ئۆيى ، ياشاۋاتقان سۆيۈملۈك دىيارىنى پەتىلەپ كېتىشنى ئۇنتۇمىغايسىز ، سىز ئۇچۇن قولىمىز ھەر قاچان كۆكسىمىزدە ...

      ئاخىرىدا ئۆمرىڭىزگە بەرىكەت ،ئۆزىڭىزگە ئامەت، ئىشلىرىڭىزغا سائادەت ھەم ئاسايىشلىق تىلەپ خېتىمنى ئاخىرلاشتۇراي مۇئەللىم ... ئۆمىرىڭىزگە بەركەت ھەم تۈگىمەس نەپەسلەر قونغۇسى  ...

                                                                              ھۆرمەت بىلەن :



                                                                                 ئوقۇغۇچىڭىز   دىدار

                                                                        2011-يىلى 9-ئاينىڭ 10-كۈنى

kalgen 2011-09-10 17:46
سۆيۇملۇك ئۇستازلىرىم جاپا تارتىۋاتىسىلەر. ھەرگىز ھارمىغايسىلەر.
                              بايرىمىڭلارغا مۇبارەك بولسۇن.
تۇلۇقسىزدىكى سىنىپ مۇدىرىم رۇشەنگۈل مۇئەللىمگە ۋە مەرھۇم يولدىشى نۇرمەمەت
مۇئەللىمگە ئۇلۇغ ئاللادىن مۇبارەكلەر تىلەيمەن.
يەنە ئىرپان ئىلىكتىرون شىركىتىدىكى ئىلھام مۇئەللىمگە  ئۇلۇغ ئاللادىن مۇبارەكلەر تىلەيمەن.
سىز بىزگە ھەقىقى مىھرىڭىز بىلەن بىلىم بەرگەن ئىدىڭىز  گەرچە ئۇ تەربىيلەش مەركىزى بولسىمۇ.
سىز ۋە بىر نەچچە ساۋاقدىشىم  بىللە چۇشكەن ئاشۇ سۇرەتنى  يېنىمدىن ئايرىماي كىلىۋاتىمەن .
ئۆيۇڭىزنى ئۆز ئۆيۇمىزدەكلا  سىزنى ئۆز ئاكىمىزدەكلا كۆرەتتۇق. ئاللاھ بىزنى يەنە جەم بولۇشقا
نىسىپ قىلسۇن.
ئۇستازلىرىم سىلەرنى مەڭگۈ ئەستىن چىقىرالمايمەن .
                                      
                                
                                                    كۇنەستىكى ئۇقۇغۇچىڭىز دىن

armanlirim 2011-09-10 19:56
سالام ئەنۋەر (شاڭخەي) مۇئەللىم (خوتەن ۋىلايەتلىك 1-ئوتتۇرا مەكتەپنىڭ تارىخ ئوقۇتقۇچىسى):
ئالدى بىلەن بۈگۈنكى قوتلۇق بايرىمىڭىزنى مۇبارەكلەيمەن،رۇزى  ھېيىت مۇناسىۋىتى بىلەن سىزنى يوقلاپ ئەينى ۋاقىتتا بىرگە ئوقىغان،سىزنىڭ دەرسلىرىڭىزنى ئاڭلىغان 10دەك ئوقۇغۇچىڭىز يىغىلىپ سىزنى يوقلاپ مەكتەپكە بارغىنىمىزدا سىزنىڭ نىيە ناھىيەسىدە ئاغرىق ھالدا ئۆز يۇرتىڭىزغا قايتقانلىقىڭىزنى ئاڭلاپ كۆڭلىمىز يېرىم قايتىپ كەلدۇق،ئەينى چاغدا سىزنىڭ لۈكچەكلەردەك تۇرقىڭىز،دەرس ئۈتۈشتىكى بىلىم بىرىشتىكى مىتودىڭىز ھەم مەغرۇرانە تۇرقىڭىز مەيلى سىنىپىمىزدىكى قىزلار بولسۇن مەيلى ئوغۇللار بولسۇن چوڭقۇر تەسىر قالدۇرغان ئىدى،ئاچچىقى يامان ئەمما كۆڭلىڭىز تۈز ئىدى،غۇرۇرىڭىز كۈچلۈك مىجەزىڭىز چۇس ئىدى،سىزنى ياقتۇراتتۇق،قورقۇپ تۇرۇپ ياخشى كۆرەتتۇق،ھالا بۈگۈنكى كۈنگە كەلگەندە ئاڭلىساق دەرس مۇنبىرىدىن مەھرۇم قاپسىز،سىزنى ئەسلەيمىز سىزنى سېغىنىمىز ،سىزگە چوڭقۇر سالاملارنى يوللايمىز،سىزدىن پەخىرلىنىمىز.بايرىمىڭىزغا مۇبارەك بولسۇن!

gulvm 2011-09-10 21:40
بۈگۈن ئوقۇتقۇچىلار  بايرىمى  ،مەنمۇ  بۇ يازمىنى  ئوقۇپ ئوقۇتقۇچى ئۇستازلىرىمنى  بىر  قۇر  ئەسلىدىم  ،  بايرىمىڭلارغا  مۇبارەك  بولسۇن  !

delnar 2011-09-11 17:52
بۇ تېمىغا سەل كېچىكىپ كىرىپ قاپتىمەن ،شۇنداقتىمۇ بىزگە تىنمسىز ئەجىر سىڭدۈرگەن ،ئاق -قارىنى تۇنۇتقان جاپاكەش <مېھرىگىياھ>لارنىڭ تۆنۈگۈنكى  ئوقۇتقۇچىلار بايرىمىنى تەبرىكلەيمەن.
  مېنىڭ باشلانغۇچتىكى سىنىپ مەسئۇلۇم ئەر ئوقۇتقۇچى ئىدى ،ئەمما ئۇ ناھايتتى ئىنچىكە ،ئەستايىدىل ھەم كۆيۈمچان بولۇپ،قەلبىمگە تۇنجى بىلىم دۇردانىلىرىنى چاچقان تۇنجى ئۇستازىم .ئوتتۇرا مەكتەپتىكى سىنىپ مەسئۇلىمىز گۈلنۇر مۇئەللىم ،بىزگە ماتېماتىكا دەرىىسى بېرەتتى ،ئۇ ئىنتايىن تەلەپچان ھەم ئىنتايىن زىل ئوقۇتقۇچى ئىدى.ئۇنىڭ شۇ تەلەپچانلىقى ھەم ئەستايىدىللىقى مېنىڭ ماتېماتىكا قاتارلىق تەبىئىي پەنلەرگە قىزىقىشمغا ھەم بۈگۈنكى كۈندە مېنىڭمۇ بىر ماتېماتىكا ئوقۇتقۇچىسى بولۇشۇمغا زور تۈرتكە بولغان .رەھمەت سىزگە ئۇستاز..........اللا تېنىڭىزنى سالامەت قىلسۇن......
   ئوقۇتقۇچىلار بايرىمىنى بىكار ئۆتكۈزۋەتمەسلىك ئۈچۈن 9-چىسلا <مۇئەللىم ئۆكۈنمەيدۇ>دېگەن كىتابنى ،تۆنۈگۈن ئابدۇقادىر جالالىدىننىڭ <مېھرىگىياھ >كىتابىنى ئوقۇپ تۈگەتتىم ،ھەقىقەتەن ئېسىل يېزىلغان كىتابلاركەن.ھازىرقى ئوقۇتقۇچىلار مەدىنيەت زور ئىنقىلابىدەك بورانلارغا دۇچ كەلمىگەن بولسىمۇ ،مەسئۇلىيتى بارغانسېرى ئېشىۋاتىدۇ ،كەلگۈسى ئەۋلاتلار ئۈچۈن يۈرەك -قېنىنى تۆكىۋاتىدۇ(ئەلۋەتتە بىر قىسىم پۇرسەتپەرەزلارمۇ بار)،شۇڭا ئۇلارمۇ ھازىرقى دەۋردىكى مېھرىگىياھلار................

uystidunt 2011-09-12 06:59
ئالىي مەكتەپ قوينىدىن ئەشۇ سەبىي چاغلارغا نەزەر سالساملا تولۇقسىزدىكى مىھنەتكەش باغۋەنلىرىمنى ئەسلەيمەن، ئىھ ئەڭ سۆيۈملۈك كىشىلەر جاپا چەكتىڭلار......  

zulpehar 2011-09-13 21:12
شۇ دەقىقىلەرنى  ئويلىسام  مەكتەپتە  قايتا  بىر  ئوقۇۋالسام دەيمەن

tayanqimbar 2011-09-20 01:15
        بۇ ناھايىتىمۇ ياخشى تېما ئىكەن،مەنمۇ مۇشۇ پۇرسەتتە ئوقۇتقۇچىلىرىمغا سالام يوللايمەن.

azam 2011-09-22 16:10
    ئوقۇتقۇچىلارنىڭ كىشىنىڭ بىر ئۆمرىگە كۆرسەتكەن تەسىرى ئىنتايىن چوڭ ... باشقىلار مەكتەپتە ئوقۇغاننىڭ پايدىسى چوڭ دەيدۇ... نېمىشكە پايدىسى چوڭ دەيدۇ؟ دەل شۇ بىلىملىك ئوقۇتقۇچىلار بىلەن ئۇچرىشىپ بىلىم ئالغاچقا شۇنداق دەيدۇ.

kalbidax 2011-09-22 19:06
مەنمۇ تىمىغا بەك كىچىكىپ كىرىپ قاپتىمەن،شۇنداق بولسىمۇ جاپاكەش ئۇستازلىرىمنىڭ قۇتلۇق بايرىمىنى قىزغىن تەبىرىكلەيمەن،ئۆمرۈڭلار ئۇزۇن،تۇرمۇشۇڭلار خاتىرجەم،ئىشلىرىڭلار ئۇتۇق بولسۇن

uyghur05 2011-09-25 22:21
ئوقۇتقۇچىلار ھەقىقەتەن ئۇلۇغ ئىنسان رەھمەت سىزگە جاپا چىكىپسىز

yelan 2011-09-25 23:29
ماڭا ھاياتىمدا ئىككىلا ئۇقۇتقۇچى تەسىر قىلغان بىرى باشلانغۇچ6-يىللىقتكى يەنە بىرى تۇلۇق ئۇتتۇردا ماڭا 3يىل سىنىپ مۇدىرىمىز بۇلغان ئادەم.

korshad 2011-10-04 12:37
ئوقۇتقۇچىلىق ھەققىقەتەن ئۇلۇغ كەسىپ .مەڭگۈ مەدەھىلەشكە ئەرزىيدۇ.  تېمىنى كۆرۈپ تولۇقسىزدا ئوقۇۋاتقان (ئازاپلىق ئەسلىمىلرىم )ئېسىمگە كېلىپ قالدى. 89-يىلى يېزىمىز ئىككىگە بۆلۈنۈپ ئىدارە قىلىندى.ئۆيىمىز (پارچىلانمىغان ۋاقىتتىكى يېزا مەركىزىگە 600مېتىر كېلەتتى،بىر ئېقىن پاسىل قىلىنىپ بىز يېڭى قۇرۇلغان يېزىغا تەئەللۇق بولۇپ قالدۇق ،بۇ يېڭى يېزا مەكىزى بىلەن ئۆيىمىز 4كىلومېتىردىن ئارتۇق كېلەتتى .95-يىلى باشلانغۇچنى پۈتتۈرۈپ تولۇقسىزغا ئمتھان بەردۇق . مەن (قائىدە بويىچە بۆلۈنۈپ چىققان يېڭى يېزىدىكى تولۇقسىزدا ئوقۇشۇم كېرەك ئىدى، يېڭى ساۋاقداشلىرىمنىمۇ تونۇمايتىم،ئۇنىڭ ئۈستىگە 3كىلومېتىردىن ئارتۇق يولنى دۆلەت تاشيولى بىلەن مېڭىشقا توغىرا كېلەتتى .بۇ مىنىڭ بېخەتەرلىكىمگىمۇ خەۋىپ ئېپ كېلەتتى. شۇنىڭ بىلەن تونۇشتۇرۇش ئېلىپ   سالا -سۈلھى بىلەن مەن بۇرۇنقى يېزا مەركىزىدە ئېلىپ قېلىندىم.شۇ ۋاقىتلاردا ئوقۇتقۇچى كەمچىل بولسا كېرەك ، مۇزىكا كەسپىدە ئوقۇغان بىرى بىز گە سىنىپ مەسئۇلى قىلىنىپ مۇزىكا،تارىخ،رەسىم دەرىسلىرىنى  بەردى. ئۆيىمىز يېزا مەركىزىگە يېققىن ،ھەم بازاردا تىجارەت قىلغاچقىمۇ  مەن  سەل كەپسىز ئىدىم. رەسىم سىزىش،ھۆسىنخەت يېزىشتا  ئانچە-مۇنچە تالانتىم بار ئىدى. مەكتەپنىڭ قارا دوسكىلىرىنى مەن بېزەيتىم.ئۇنى ئاز دىگەندەك يېزىلىق ھۆكىمەتنىڭ خىلمۇ خىل تەشۋېقاتلىرىنى (دەرس ۋاقتىدىن ئايرىلىپ چىقىپ خوشاللىق بىلەن يازاتتىم) كەپسىزلىق قىلىپ قويغان ۋاقىتلىرىمدا (كەلگۈندى،دىگەندەك ئىبارىلەر بىلەن ساۋاقداشلىرىم ئالدىدا ھاقارەتلىنەتتىم)97-يىلى ناھىيىمىز ئىككى ئاساسەننى ئۆتكۈزۈپ بەرمەك بولۇپ تەييارلىق قىلدى ھەم قىلدۇق،سىنىپ مەسئۇلىمىزنىڭ ئىشخانىسى (گۈزەل-سەنئەت ئىشخانىسى )بولغاچقا گۈزەل سەنئەت ئەسەرلىرى بولۇش كېرەك ئىكەن .   سىنىپ مەسئۇلىمىز  مۇزىكا چالىدۇ، رەسىم -ھۆسىنخەتنى مەنچىلىك يازالمايتى،سىزالمايتى.   گۈزەل -سەنئەت ئشخانىسىنى بېزەش مىنىڭ زىممەمگە يۈكلەندى.مەن خوشاللىق بىلەن قوبۇل قىلدىم.ۋەزىپە تامام بولدى. سىنىپتا ئولتۇراتتىم ، سىنىپ مەسئۇلىمىز كىرىپ ساۋاقداشلىرىم ئالدىدا مىنى ئۇرۇشقا باشلىدى.كېيىن ئىشىخانىسىغا ئېپچىقىپ ئۇردى .ساناپ تۇرۇپ 17شاپلاق ئۇردى.سەۋەبى مەن ئوقۇتقۇچۇمنىڭ ئىشخانىسىغا يېزىپ بەرگەن ھۆسىنخەتلىرىمنىڭ ئاستىغا ئۆز ئمزايىمنى قويۇپ قويغان ئىدىم،ئەسلىدە ئوقۇتقۇچۇمنىڭ ئمزاسىنى قويۇپ قويۇشۇم كېرەك ئىكەنتۇق. بۇ ئشلارنى ئۆيدىكىلەرگە ئېيتمىدىم.ئەسلىدە بولغان ئەھۋاللارنى ئېيتىپ باشقا سىنىپقا كۆچۈپ كېتىشىم كېرەك ئىدى.ئۇنداق قىلالمىدىم ،ئوقۇتقۇچىمىزنىڭ ئۆچ ئېلىشىدىن قورققان بولسام كېرەك.  مانا بۇ مىنىڭ تولۇقسىز تولۇقسىز ئوتتۇرا مەكتەپ ھاياتىمدىكى (سىنىپ مەسئۇلۇم)...........


رەسىمسىز مۇنازىرە: [-- ھاياتىمغا تەسىر كۆرسەتكەن سىنىپ مەسئۇللىرى --] [-- top --]



Powered by PHPWind v7.3.5 Code © 2003-08 Guldiyar
Time 0.041812 second(s),query:3 Gzip disabled

You can contact us