2011-يىللىق ئادەتتىكى ئالىي مەكتەپلەرگە ئوقۇغۇچى قوبۇل قىلىش مەملىكەتلىك بىر تۇتاش ئىمتىھانى دەقىقىلىرى <<ئەلكۈيى ئېكرانى>>نەق مەيدان زىيارىتى
ئەسسالامۇئەلەيكوم ھۆرمەتلىك تورداشلار ئالدى بىلەن ئەلكۈيى تورى ۋە ئەلكۈيى تورىدىكى بارلىق تورداشلار نامىدىن 2011-يىللىق ئادەتتىكى ئالىي مەكتەپلەرگە مەملىكەت بويىچە بىر تۇتاش ئوقۇغۇغۇچى قوبۇل قىلىش ئىمتىھانىغا قاتنىشىۋاتقان بارلىق پەرزەنتلىرىمىزگە ئامەت تىلەيمىز ھەمدە ئالدىمىزدىكى ئىمتىھانلاردا تېخىمۇ يۇقىرى نومۇرلارغا ئېرىشىشىگە،كۆڭۈلدىكى ئالىي مەكتەپلەرگە قوبۇل قىلىنىشىغا چىن دىلىمىزدىن تىلەكداشلىق بىلدۈرىمىز! 2011-ئادەتتىكى ئالىي مەكتەپلەرگە بىر تۇتاش ئوقۇغۇچى قۇبۇل قىلىش ئىمتىھانى بۈگۈن (يەنى 2011-يىلى 6-ئاينىڭ 7-كۈنى)باشلاندى.
ئېگىلىشىمىزچە، پۈتۈن شىنجاڭدىن 147700 نەپەر ئوقۇغۇچى ئىمتىھانغا قاتناشقان بولۇپ ،شىركىتىمىزنىڭ ئورۇنلاشتۇرىشى بىلەن ئەلكۈيى تورىنىڭ مۇخبىرلىرى نەق مەيداندىن ئەڭ تېز سۈرئەتتە ئىز قوغلاپ خەۋەر قىلىش ۋە <<ئەلكۈيى ئېكرانى>>پروگرامما ئىشلەش بۆلۈمىنىڭ ئىمتىھان بەرگۈچىلەرگە تورداشلارنىڭ تىلەكلىرىنى يەتكۈزۈش،ئۇلارغا تېخىمۇ زور ئىشەنچ ۋە ئىلھام بېغىشلاش مەقسىتىدە، بۇ قېتىمقى ئىمتىھان مەزگىلىدە شىنجاڭ بويىچە ئىمتىھان بەرگۈچىلەر ئەڭ جىق بولغان ئۈرۈمچى شەھىرىنى ئاساس قىلىپ تۇرۇپ بىر قىسىم ئىمتىھان مەيدانلىرىغا بېرىپ ئىمتىھان باشلىنىشتىن بورۇن ۋە ئىمتىھان ئاخىرلاشقاندىن كىينكى دەقىقىلەردە ئىمتىھان بەرگۈچىلەر بىلەن بىرگە بولدى ۋە بۇ جەرياندا ئىمتىھان بەرگۈچى ئوقۇغۇچىلار،ئاتا-ئانىلار ۋە بىر قىسىم رەھبەرلەرنى زىيارەت قىلىپ 2011-يىللىق ئالىي مەكتەپ ئىمتىھانى <<ئەلكۈيى ئېكرانى>> نەق مەيدان زىيارىتى ئىشلەپ دەل ۋاقتىدا ھەممىڭلارنىڭ ھۇزۇرىغا سۇندى.سۆيۈملۈك پەرزەتلىرىمىزنىڭ كەلگۈسىگە كۆڭۈل بۈلىدىغان ھەر بىر ئوتلۇق يۈرەكنىڭ بۇ ھەقتىكى زىيارەت فىلىمى ۋە زىيارەت خاتىرىسىنى كۆرۈپ چىقىشىنى سورايمىز.شۇنداقلا بارلىق ئىمتىھاھان بەرگۈچىلەرگە ئامەت تىلەيمىز!
زىيارەت جەريانىدا بىز شىنجاڭ تەجرىبە ئوتتۇرا مەكتەپ،ئۈرۈمچى شەھەرلىك تولۇق ئوتتۇرا مەكتەپ،ئۈرۈمچى شەھەرلىك 14-ئوتتۇرا مەكتەپ،16-ئوتتۇرا مەكتەپ،20-ئوتتۇرا مەكتەپ،101-ئوتتۇرا مەكتەپ..قاتارلىق ئوخشاش بولمىغان ئىمتىھان نوقتىلرىىغا بېرىپ نەق مەيدان زىيارىتى ئويۇشتۇردۇق،ئىمتىھانغا كېرىشكە تەييارلىق قىلىۋاتقان ئوقۇغۇچىلارغا روھىي جەھەتتىن مەدەت بىرىپ ياخشى تىلەكلەرنى تىلەش بىلەن بىرگە ئەلكۈيى تورىدىكى كەڭ تورداشلارنىڭ سالامىنى يەتكۈزۈش،ئىمتىھانغا كىرىپ كەتكەندىن كىيىن ئاتا - ئانىلار بىلەن شۇ ۋاقىتتىكى كەيپىيات ھەمدە ئىمتىھان ۋە بالىسىغا بولغان پۇزىستىيە ھەققىدە كەڭ - كۇشادە سۆھبەت ئويۇشتۇردۇق.
بۇ جەريانلاردا ئىمتىھان ئېلىش ۋە باشقۇرۇشقا مۇناسىۋەتلىك بىر قىسىم ئىدارە - ئورگانلار،رەھبەرلەر بىلەن 2011-يىللىق ئالىي مەكتەپكە ئوقۇغۇچى قوبۇل قىلىش ئىمتىھانى ھەققىدە زىيارەت ئېلىپ بېرىپ كەڭ تورداشلارنىڭ بۇ قېتىملىق ئىمتىھانغا بولغان چۈشەنچىسىنى تېخىمۇ چوڭقۇرلاشتۇرۇشقا تىرىشتۇق.
ئەلكۈيى تورىنىڭ شىنجاڭ ئۇيغۇر ئاپتونۇم رايونلۇق مائارىپ نازارىتىنىڭ مۇناسىۋەتلىك خادىمىدىن ئېگىلىشىچە، بۇ يىل ئاپتونوم رايونىمىزدىن جەمئىي 147700 نەپەر ئوقۇغۇچى ئالىي مەكتەپ ئىمتىھانىغا قاتناشقان بولۇپ، ئۆتكەن يىلقىدىن 13700 نەپەر ئازايغان. ئۈرۈمچى شەھىرىدىكى ئىمتىھان بەرگۈچىلەر جەمئىي 24228 نەپەر بولۇپ، ئۆتكەن يىلقىدىن 852 نەپەر ئازايغان، ئەمما ئۈرۈمچى شەھىرى يەنىلا شىنجاڭ رايونىدىكى ئىمتىھان قاتناشقۇچىلار سانى ئەڭ كۆپ رايون بولۇپ، پۈتۈن شىنجاڭدىكى ئىمتىھانغا تېزىملاتقان ئوقۇغۇچى سانىنىڭ 6 دىن 1 ىنى ئىگەللىگەن. ئۈرۈمچىدىكى ئوقۇغۇچىلار ئىچىدە، خەنزۇ تىلىدا ئىمتىھان بېرىدىغانلار 20002 نەپەر ، خەنزۇ تىل-يېزىقىدا ئىمتىھان بېرىدىغان مىللىيلار 973 نەپەر، مىللىي تىل-يېزىقىدا ئىمتىھان بېرىدىغان ئوقۇغۇچىلار 3253 نەپەر بولۇپ، بۇلارنىڭ ئىچىدە ئۇيغۇر تىلىدا ئىمتىھان بېرىدىغانلار 1748 نەپەر، قازاق تىلىدا ئىمتىھان بېرىدىغانلار 309 نەپەر، «قوش تىل» تەجىرىبە سىنىپ ئوقۇغۇچىلىرى 1196 نەپەر ئېكەن.
بۇ يىل، شىنجاڭ ئۇيغۇر ئاپتونۇم رايونىدا جەمئىي 56 ئىمتىھان رايونى تەسىس قىلىنغان بۇلۇپ،مەركىزى شەھەر ئۈرۈمچىدە جەمئىي 35 ئىمتىھان نۇقتىسى، 992 ئىمتىھان مەيدانى تەسىس قىلىنغان،ئۈرۈمچى شەھىرى يەنىلا ئىمتىھان نۇقتىسى، ئىمتىھان مەيدانى ئەڭ كۆپ رايون بولۇپ، ئەڭ چوڭ ئىمتىھان نۇقتىسى ئۈرۈمچى شەھەرلىك 101-ئوتتۇرا مەكتەپ بولغان،بىز 101-ئوتتۇرا مەكتەپكە بېرىپ زىيارەت قىلىش جەريانىدا بۇيەردە جەمئىي 62 ئىمتىھان مەيدانى تەسىس قىلىنغانلىقىنى بىلدۇق.
زىيارەت جەريانىدا بايقىشىمىزچە، بۈگۈن (7-ئىيۇن) ۋە ئەتىدىكى ئىمتىھان مەزگىلىدە ئۈرۈمچى شەھىرىدە ئالىي مەكتەپ ئىمتىھانىغا قاتناشقان ئوقۇغۇچىلار ئىمتىھان كېنىشكىسى ئارقىلىق مەخسۇس بەلگە چاپلانغان كىرا ماشىنىلىرىغا ھەقسىز ئولتۇرسا، قاتناشتا قىيىنچىلىققا يولۇققان ئوقۇغۇچىلار يەنە تېلىفۇن ئارقىلىق ئالدىن كېلىشىپ قويسا بولىدىكەن. بۇ ئۈرۈمچى شەھىرىنىڭ تۇنجى قېتىم فۇنكىسىيىلىك تارماقلارنىڭ باش بولۇپ ئىمتىھان مەزگىلىدە ئىللىقلىق يەتكۈزۈش پائالىيىتى ئېلىپ بېرىشى بولۇپ، جەمئىي 1200 كىرا ماشىنىسى قاتنىشىشقا ئىلتىماس قىلغان.
ئەلكۈيى تورىنىڭ ئۈرۈمچى شەھەرلىك قاتناش ساقچى چوڭ ئەترىتى ۋە جامائات خەۋپسىزلىك ئەترىتىگە بېرىپ ئەھۋال ئېگىلىشىچىمىزچە، شەھەرلىك قاتناش ساقچى تارماقلىرى تۆت تۈرلۈك مۇلازىمەت ۋە باشقۇرۇش تەدبىرىنى يولغا قويغان بولۇپ،ئۈرۈمچىدىكى ئوقۇغۇچىلارنىڭ ئىمتىھان مەزگىلىدىكى قاتنىشىنىڭ راۋان بولىشىغا تولۇق كاپالەتلىك قىلىدىكەن.
بىرىنچىدىن، بۇ يىل مەركىزى شەھەردە جەمئىي 35 ئىمتىھان نۇقتىسى تەسىس قىلىنغان بولۇپ، ئۇلارنىڭ ئىچىدىكى يول بويىغا يېقىن ئىمتىھان نۇقتىلىرىغا قارىتا، قاتناش ساقچى تارماقلىرى ئىمتىھاندىن ئىلگىرى مەكتەپ ئالدىدا ۋاقىتلىق قاتناشنى چەكلەپ، ئوقۇغۇچىلارنىڭ تەرتىپلىك ئىمىتىھان مەيدانىغا كىرىشىگە كاپالەتلىك قىلىدىكەن.
ئىككىنچىدىن، ئوقۇغۇچىلارنى ئېلىپ كەلگەن ماشىنىلار ئىمتىھان نۇقتىسى ياكى يېقىن ئەتىراپتا تېز توختاپ، تېز ئايرىلىدۇ، ئىمتىھان نۇقتىسى ئەتىراپىدىكى 200 مېتىر دائىرىدە ۋە ۋاقىتلىق ماشىنا توختاش ئورنى سىزىلمىغان جايلاردا ماشنىلارنىڭ توختىشى چەكلىنىدۇ. ئىمتىھان مەيدانى ئەتىراپىدا قائىدىگە خىلاپلىق قىلىپ يولنى ئىگەللەپ، ئوقۇغۇچىلارنىڭ ئىمتىھانغا كېلىشىگە تەسىر قىلغان ماشىنىلار بىردەك قاتتىق تەكشۈرۈپ بىر تەرەپ قىلىنىدىكەن.
ئۈچىنچىدىن، ئەگەر قىسمەن ئوقۇغۇچىلار ئىمتىھانغا كېلىش جەريانىدا تۇيۇقسىز ئەھۋاللارغا ئۇچراپ ئىمتىھاندا كېچىكسە، قاتناش لىنىيىسىدىكى ۋەزىپە ئىجرا قىلىۋاتقان ساقچىلاردىن ياردەم تەلەپ قىلسا بولىدۇ، ساقچىلار ئوقۇغۇچىلار ئۈچۈن يول ئېچىپ بېرىدىكەن.
تۆتىنچىدىن، ھەر قايسى ئىمتىھان نۇقتىلىرىدا، مەركىزى شەھەرنىڭ ساقچى تارماقلىرى قاتناش ساقچىسى، ئالاھىدە ساقچى ۋە ياردەمچى خادىملارنى ئورۇنلاشتۇرۇپ، ئەتىراپتىكى قاتناشنىڭ راۋانلىقىغا كاپالەتلىك قىلدى. بۇنىڭدىن باشقا، ئىمتىھان مەيدانى ئەتىراپىدىكى سىگنال چېلىپ شاۋقۇن پەيدا قىلغان ماشىنىلارمۇ قانۇن بويىچە تەكشۈرۈلىدىكەن.
ئەلكۈيى تورىمىز كەڭ ئىمتىھان بەرگۈچى ئوقۇغۇچىلار ۋە ئاتا-ئانىلارغا، ئەڭ ياخشىسى ئىمتىھانغا بېرىپ-كېلىشى يولىنى ئالدىن پىلانلاپ، ئالدىن يولغا چىقىشىنى، قىستاڭچىلىق سەۋەبىدىن كېچىكىپ قېلىشتىن ساقلىنىشنى، شەخسىي ماشىنىلاردا ئوقۇغۇچىلارنى ئەكىلىپ قويماقچى بولغانلارنىڭ ئەڭ ياخشىسى ئاسان قىستاڭچىلىق بولىدىغان يول بۆلەكلىرىدىن ماڭماسلىقىنى ئەسكەرتىدۇ.
ئاممىۋى قاتناش ئاپتۇبۇسلىرىغا ئولتۇرىدىغان ئوقۇغۇچىلارغا قارىتا، ساقچى تەرەپ شارائىت يار بەرگەن شەرت ئاستىدا، ئىمتىھان مەيدانىغا ماڭغان ئاممىۋى ئاپتۇبۇسلار، كىرا ماشىنىلىرىنىڭ ئالدىن مېڭىۋىلىشىغا يول ئېچىپ بېرىدۇ.
ئىمتىھان مەيدانلىرىغا بېرىپ زىيارەت جەريانىدا ھىس قىلىشىمىزچە،بۇ قېتىمقى ئىمتىھانغا قاتناشقان ئوقۇغۇچىلارنىڭ كەيپىياتى ياخشى بولغان،ئاتا - ئانىلارمۇ بالىلارغا ئىمتىھاننىڭ بېسىم بوپ قالماسلىقى ئۈچۈن ھەرخىل ئۇسۇللار بىلەن بالىلىرىغا مەدەت بىرىپ ئىمتىھاننى ياخشى بىرىشىگە ئوبدان مۇھىت ھازىرلاشقا تىرىشقان،ئوقۇغۇچىلارمۇ روھلۇق ھالدا ئىمتىھانغا كىرىپ روھلۇق چىققان،قىيىنچىلىق،سىناق ئالدىدا دادىل قەدەم تاشلاپ ئۆزىنىڭ كەلگۈسى يولىنى يەنىمۇ پارلاق ئېچىشقا تىرىشقان.بو خىل مۇھىت ھەم روھ ئادەمنى تولىمۇ خوش قىلىدۇ،مۇشۇ مۇناسىۋەت بىلەن بىز شىركىتىمىز ۋە ئەلكۈيى تورى شۇنداقلا ئەلكۈيى تورىدىكى بارلىق تورداشلار نامىدىن بۇ قېتىملىق ئىمتىھانغا قاتناشقان بارلىق ئىمتىھان بەرگۈچىلەرنىڭ كەلگۈسىدىكى گۈزەل ئالىي مەكتەپ قوينىغا باشلايدىغان بۇ قېتىملىق <<داۋان>>دىن غەلبىلىك ھالدا ئۆتۈپ كىتىشىگە چىن دىلىمىزدىن تىلەكداشلىق بىلدۈرىمىز ھەمدە ئۇلارغا تېنىمسىز ھالدا مەدەت تىلەيمىز،ئالىي مەكتەپ ئىمتىھانىغا مۇناسىۋەتلىك ئەڭ يېڭى ئۇچۇر ۋە خەۋەرلەرنى ئەلكۈيى تورى ئارقىلىق داۋاملىق تەمىنلەپ تورداشلارغا ئېلان قىلىپ تۇرىدىغانلىمىز توغرىسىدا ۋەدە بىرىمىز شۇنداقلا تورىمىز نامىدىن كەڭ ئەلكۈيى تورىدىكى تورداشلارنىڭ ئالىي مەكتەپ ئىمتىھانى مەزگىلىدىكى ئارزۇ تولدۇرۇش،مەكتەپ تاللاش ۋە ئوزۇقلىنىش،ئالىي مەكتەپتە ئوقۇشقا بولغان كۆز قاراش قاتارلىق مەسىلىلەردە ئەركىن ھالدا مۇنازىرە ئېلىپ بېرىپ،ئۆزىنىڭ سەمىمىي مەسلىھەت،تېلەك ،تەلەپ-پىكىرلىرىنى كەلگۈسىنىڭ ئۈمىدى بولغان بالىلارغا كۆپرەك ئوتتۇرىغا قويىشىنى چىن دىلىمىزدىن ئۈمىد قىلىمىز
غەلبە تېرىشقانلارغا مەنسۇپ!
كامالىي ئېھتىرام بىلەن: ئەلكۈيى تور تېخنىكا چەكلىك شىركىتى ئەلكۈيى تورى <<ئەلكۈيى ئېكرانى>>پروگرامما ئىشلەش بۆلۈمى ئەلكۈيى مۇنازىرە مۇنبىرى كوللىگىيەسى 2011-يىلى 6-ئاينىڭ 7-كۈنى |
