مۇناجات (3)

alahidin

مۇناجات (3)

ئالاھىدىن ئابدۇرېشىت

دىلبىرىم باغرىڭنى ئاچ! بەرگى چىمەنلەردىن كېتەي،
ھۆر-پەرىلەر قايدا سەنسىز، ئەنجۈمەنلەردىن كېتەي.

قارغىسۇن گۈللەر مېنى، سانچىپ تىكەن يانتاقلىرىم،
پاش ئېرۇر رەسۋالىقىم، شىرىن سۇخەنلەردىن كېتەي.

تۆكمىگەي يامغۇرلىرىڭ ياش توزۇسا ياپراقلىرىم،
سارغىيىپ چۆللەر ئارا پەسلى لېۋەنلەردىن كېتەي.

كۆزلىرىمدىن تۆكۈلۈپ قالسۇن مېنىڭ تۇپراقلىرىم،
مەن ئۆزۈمگە توقۇغان جۇلدۇر كېپەنلەردىن كېتەي.

مەن چىقىپ كەلسەم كېچەڭدىن چاقنىغاي چاقماقلىرىم،
باش ئېلىپ مەشرەپ بىلەن قەشقەر، خوتەنلەردىن كېتەي!


2012-يىلى، 7-ئاينىڭ 4-كۈنى، يېڭىسار.

نونى

بارىكاللا ، ياخشى يېزىپسەن. مەشرەپ غەزەللىرىنى ئوقۇغاندەك بولدۇم

tarhanbag

ئالاھىدىن ئەپەندىمنىڭ شېئىرىيەت جەھەتتىكى تىل ئىشلىتىش ئالاھىدىلىكىنى كۆرۈپ، ھەقىقەتەن قايىل بولدۇم. قەلىمىڭىزگە دەرت كەلمىسۇن.

زەپەر

شېئىرلىرىڭىزدىن بىر خىل ئالاھىدىلىك چىقىپ تۇرىدۇ . يەنى سىزنىڭ شېئىرلىرىڭىز خۇددى داڭلىق كلاسسىكلىرىمىزنىڭ مىسرالىرىدەكلا جانلىق ، بىر خىل ئۆزگىچە تەم بېرىدىكەن . كۆز تەگمىسۇن !

سىرداش

ئالاھىدىن ئەپەندىمنىڭ شىئېرلىرىنى  كۆرۈپ ھەقىقەتەن قايىل بولدۇم. چاقنىغان  يۇلتۇز  دىيىشكە  ئەرزىيدىكەن.  رەمەت  قۇلىڭىز   بەركەت تاپسۇن.