مۇناجات (2)

alahidin

مۇناجات (2)

ئالاھىدىن ئابدۇرېشىت

دىلبىرىم، باشىڭدىكى كۈلپەتلىرىڭدىن بەر ماڭا،
تولدۇرۇپ قەلبىمنى لىق ھەسرەتلىرىڭدىن بەر ماڭا.

ئونبېشى قالسۇن ساڭا ئاينىڭ يورۇپ ئاسماندا ئاي،
ئونبېشىدە قاپقارا زۇلمەتلىرىڭدىن بەر ماڭا.

مەن سېنى جۇل-جۇل يۈرەكنىڭ قېتىدا ساقلاي ھامان،  
ئوتقا زار بولغاندا سۇ، قىسمەتلىرىڭدىن بەر ماڭا.

بىلىمەن، دەريالىرىڭ بار كەلمىگەن يا كەتمىگەن،
غەرق ئېتىپ ئۇندا مېنى، ھەيرەتلىرىڭدىن بەر ماڭا.

تاش ئېرۇرمەن ئۈنلىگەن قولدا ساپايەم زارىدىن،
چۆللىرىڭگە تاشلىناي، خىلۋەتلىرىڭدىن بەر ماڭا.

بىر سىقىم تۇپراق بىلەن يۇتقاي مېنى تەھتىسارا،
بىر دۆۋە تۇپراق بولاي، ۋەھشەتلىرىڭدىن بەر ماڭا.

«ئۆز فاتىغ ھالىمغا ئۆلمەستىن بۇرۇن ماتەم تۇتاي!»،
ئۇرغىلى جانغا قىلىچ پۇرسەتلىرىڭدىن بەر ماڭا!. ..

2012-يىلى، 6-ئاينىڭ 15-كۈنى، يېڭىسار.

tarhanbag

ئالاھىدىن ئەپەندىم: «ۋەھشەت»دىگەن سۆزنىڭ مەنىسنى قانداق چۈشەنسەم بولار؟

alahidin

ئالاھىدىن ئەپەندىم: «ۋەھشەت»دىگەن سۆزنىڭ مەنىسنى قانداق چۈشەنسەم بولار؟
ۋەھشەت-قورقۇنۇچ، ئىزتىراپ.

زەپەر

يارايسىز  بىراق سىزنىڭيازغان  شىئېرلىرىڭىزنىڭ  تىل جەھەتتە ئۆزگۈچە تىللارنى ئىشلىتىدىكەنسىز . تىلغا راستىنلا بايكەنسىز . رەخمەت سىزگە

سىرداش

رەھمەت  سىزگە  قۇلىڭىزغا   دەرت  تەگمىسۇن