ئوقۇتقۇچىلار بايرىمىنىڭ كېلىپ چىقىشى

ياشنار

      دۇنيادىكى ھەر قايسى دۆلەتلەردە ‹‹ئوقۇتقۇچىلار بايرىمى›› ئۆتكۈزۈلىدۇ، ھەر قايسى دۆلەتلەرنىڭ بۇ خاتىرە كۈنىنى تەبرىكلەش ۋاقىتلىرى ئوخشىمايدۇ. پورتۇگالىيەدە ھەر يىلى 18 - ماي كۈنى؛ ئامېرىكىدا ھەر يىلى 5 - ئاينىڭ 1 - سەيشەنبىسى؛ تايلاندتا 16 - يانۋار، سىنگاپوردا 31 - ئاۋغۇست، لاتۋىيەدە 10 - ئاينىڭ تۇنجى يەكشەنبىسى ئۆتكۈزۈلىدۇ. 10 - سېنتەبىر ئېلىمىزنىڭ ئوقۇتقۇچىلار بايرىمى كۈنى. ئۇنداقتا، ئېلىمىزنىڭ ئوقۇتقۇچىلار بايرىمى قانداق كېلىپ چىققان؟
      يېڭى جۇڭگو قۇرۇلۇشتىن ئىلگىرىمۇ ئېلىمىزدە ‹‹ئوقۇتقۇچىلار بايرىمى›› بار ئىدى، 1931 - يىلى مائارىپچى تەي شۇاڭچيۇ، چېڭ چىباۋ قاتارلىقلار ‹‹ئوقۇتقۇچىلارنىڭ تەمىناتىنى ياخشىلاش، ئوقۇتقۇچىلارنىڭ خىزمىتىگە كاپالەتلىك قىلىش ۋە ئوقۇتقۇچىلارنىڭ ساپاسىنى ئۆستۈرۈش›› توغرىسىدا خىتابنامە ئېلان قىلغان ۋە ھەر يىلى 6 - ئىيۇننى ئوقۇتقۇچىلار بايرىمى قىلىپ بېكىتىش تەكلىپى سۇنغان. 1932 -يىلى گومىنداڭ ھۆكۈمىتى 6 - ئىيوننى ئوقۇتقۇچىلار بايرىمى قىلىپ بېكىتىشكە قوشۇلغان. كېيىن 27 - ئاۋغۇست (كۇڭزىنىڭ تۇغۇلغان كۈنى)گە ئۆزگەرتىۋەتكەن. 1951 - يىلى مائارىپ مىنىستىرلىقى ۋە مەملىكەتلىك مائارىپ ئىشچىلار ئۇيۇشمىسى 6 - ئىيوندىكى ئوقۇتقۇچىلار بايرىمىنى ئەمەلدىن قالدۇرۇپ، ‹‹1 - ماي ئەمگەكچىلەر بايرىمى››غا قوشۇپ ئۆتكۈزۈشنى ئۇقتۇرغان بولسىمۇ، لېكىن ئوقۇتقۇچىلار بايرىمىنىڭ مۇستەقىل پائالىيىتى ۋە باشقا ئالاھىدىلىكى بولمىغاچقا، ئىجرا قىلىش جەريانىدا تاشلىنىپ قالغان. مەدەنىيەت زور ئىنقىلابى مەزگىلىدە ئوقۇتقۇچىلار ‹‹سېسىق توققۇزىنچى›› دەپ چەتكە قېقىلىپ، ئىجتىمائىي ئورنى بىراقلا تۆۋەنلەپ كەتكەن. پارتىيىنىڭ 11 - نۆۋەتلىك 3 - ئومۇمىي يېغىنىدىن كېيىن مەملىكەتلىك مائارىپ ئىشچىلار ئۇيۇشمىسى ئوقۇتقۇچىلارنى ھۆرمەتلەش، مائارىپقا ئەھمىيەت بېرىش پائالىيەتلىرىنى قانات يايدۇرۇپ، ئوقۇتقۇچىلارنىڭ سىياسىي، ئىجتىمائىي ئورنىنى ئۆستۈرۈشكە تىرىشقان ۋە 1981 - يىلى 3 - ئايدا مەملىكەتلىك سىياسىي كېڭەش 5-نۆۋەتلىك كومىتېتىنىڭ 4 - يىغىنىدا ئوقۇتقۇچىلار بايرىمىنىڭ كۈنى ۋە پائالىيەت مەزمۇنىنى بېكىتىش توغرىسىدىكى تەكلىپ لايىھەسى سۇنۇلغان. تۆت يىل تىرىشىش نەتىجىسىدە، 1985 - يىلى 21 - يانۋار 6 - نۆۋەتلىك مەملىكەتلىك خەلق قۇرۇلتىيى دائىمىي كومىتېتىنىڭ 9 - قېتىملىق يىغىنىدا ھەر يىلى 10 - سېنتەبىرنى ئوقۇتقۇچىلار بايرىمى قىلىپ بېكىتىشى قارار قىلىنغان. شۇنىڭدىن ئېتىبارەن ھەر يىلى ئوقۇتقۇچىلار بايرىمى ئۆتكۈزۈلۈپ، ئوقۇتقۇچىلارنى ھۆرمەتلەش، مائارىپقا ئەھمىيەت بېرىش تەكىتلىنىپ كېلىۋاتىدۇ.



مەنبە: جۇڭگو ئۇيغۇرچە رادىيو تورى

ئامان

ناھايىتى ئەھمىيەتلىك تېما يوللاپسىز، رەھمەت سىزگە.

گۇلزار

ھەر بىر ئوقۇتقۇچى بىلىۋېلىشقا تىگىشلىك تېما يوللاپسىز .رەھمەت سىزگە .