بارىكاللا
(ساتېرا)
ئالاھىدىن ئابدۇرېشىت
باشلىق كەلدى، كۆرۈپ كەتتى، بارىكاللا،
تەكشۈرۈشتە بولۇپ كەتتى، بارىكاللا،
«تەتقىقات»نى قويۇپ كەتتى بارىكاللا،
شەكىلۋازلىق قۇرۇپ كەتتى، بارىكاللا،
دىللىرىمىز يورۇپ كەتتى، بارىكاللا.
بىر ئاي بۇرۇن چۈشمەي ئەجەپ يارلىق بىزگە،
كەلمەي تۇرۇپ جاھان تېخى تارلىق بىزگە-
ئىش ئورنىدا دۈم ياتقىدەك خارلىق بىزگە،
بالىلاردىن، ئۆيدىن يەتمەي زارلىق بىزگە،
باشلىق بۇنى تۇيۇپ كەتتى، بارىكاللا.
تۇيۇقسىزلا كۆردۇق ئۇنىڭ يۈزىنىمۇ،
قۇلاق بىلەن ئاڭلاپ مۇھىم سۆزىنىمۇ،
سايە ئەمەس، ئېلىپ كەپتۇ ئۆزىنىمۇ،
ئېچىپ يەنە بۈگۈن باشلىق كۆزىنىمۇ،
پۇخرانىمۇ تونۇپ كەتتى، بارىكاللا.
بىزنىڭ باشلىق كۆرۈپ ئۇنى قېتىپ قالدى،
ئۆلمىدى-يۇ، ھەيرانلىققا پېتىپ قالدى،
ئىشتىنىغا چىقارغىنى يېتىپ قالدى،
چاپارمەنلەر بۇنى ئىلغا ئېتىپ قالدى،
پاقلانلارنى سويۇپ كەتتى، بارىكاللا.
بۇيرۇق يېتىپ ئارقا سەپنىڭ باشلىقىغا،
قىز-چوكانلار ئۈلگۈرگەنتى قاشلىقىغا،
كۆكسى «مەن»دەپ گۇۋاھ ئىدى شاشلىقىغا،
باشلىق كۆرسە يانار ئىدى ياشلىقىغا،
بىراق، قاپاق تۈرۈپ كەتتى، بارىكاللا.
زىياپەتنى راسلىغانلار داغدا قالدى،
كاۋاپ زىختا، قورۇمىلار ياغدا قالدى،
سۈت كورىدا، مېۋە شاختا-باغدا قالدى،
كەكلىك، ئۇلا، بۇغىلارمۇ تاغدا قالدى،
باشلىق يېمەي يۈرۈپ كەتتى، بارىكاللا.
سېھرىگەرلەر ساختا مەيدان ياسالمىدى،
دوكلات نەخلەپ، شۇئارلارنى ئاسالمىدى،
شۇ سەۋەبلىك ئۆزلىرىنى باسالمىدى،
بىر-بىرىنى چىشلەپ يەنە قاسالمىدى،
رەسۋا بولۇپ تۇرۇپ كەتتى، بارىكاللا. بۇ يازمىنى ئاخىرىدا alahidin تەھرىرلىگەن. ۋاقتى 2012-9-6 20:47
| 
قىزغىنلىق
تىللا
تۆھپە
شۆھرەت
يوللىغان ۋاقتى 2012-9-6 20:39:44
يوللىغان ۋاقتى 2012-9-6 21:32:38
يوللىغان ۋاقتى 2012-9-6 22:04:47
