توۋا دەيمەن، توۋا

tursun123

                 توۋا دەيمەن، توۋا

   ئاپتورى: ئا ئۆتكۈر

توۋا دەيمەن، توۋا...
ھەددىدىن ئېشىپ،
بۇلدۇقلاپ تېشىپ،
قازاننى قويۇپ ئېغىزدا
قاينايدىغان بوپتۇ توۋا!

‹‹ساھات تىلىسەڭ ئاز يە،
ئىززەت تىلىسەڭ ئاز دە ››
دەيتتى ئاتا-بوۋىمىز،
لېكىن بىزنىڭ بەزىمىز
پۇتتا ئەمەس، ئېغىزدا،
قۇرۇق مېڭىپ ئېڭىزدا،
شەر ئالىدىغان بولدۇق،
توۋا دەيمەن ، توۋا...

كۆز ئىككى، قۇلاق ئىككى،
قول ئىككى ئاياغ ئىككى،
ئېغىز،  بۇرۇن بىر پەقەت،
  شۇنىڭ ئۆزى بىر ھىكمەت...
شۇنداق تۇرۇقلۇق ئەمدى،
ئېغىزغا يۈكلەپ يۈكنى،
ئوڭ-تەتۈر كىيىپ بۆكنى،
گەپ- سۆزدىن ‹‹سۈخەن›› توقۇپ،
سىۋەت-سىۋەتتە ساتماقنىڭ
نىمە لازىمى، توۋا!

ھەي چوكا، ھەي سەن چوكا،
( توۋا دەيمەن ، توۋا )
ئاش يەيدىغان ئەسۋاپنى
نىمە قىلىۋالدۇق ئەمدى؟
بۇنى ئېيتىشقا، دوستلار،
تىلىم بارمايدۇ زادى.
ئاتىدىن قالغان ئۇدۇممۇ
ياكى مىراس تۇلۇممۇ،
يا پەيلىمىزگە لايىق
بىر لەنىتى كۆرۈممۇ؟
توۋا دەيمەن، توۋا !

بۇندىن ئون نەچچە يىل بۇرۇن،
ھېلىقى ساراڭ قۇيۇن
ئېچىۋەتكەن ئوخشايدۇ
بەزى كونا گۆرلەرنى.
تامدىن تارىشا چۈشكەندەك،
ئەرۋاھ تىرىلىپ چىققاندەك،
بازارغا كىرىپ قاپتۇ
لەنەت تەككۈر ‹‹ لىق›› ۋە ‹‹ لىك ››،
‹‹ سەن سەھرالىق، مەن شەھەرلىك،
ئاۋۇ ئاداش قەيەرلىك؟ ››
دەيدىغان ئۆتمەس ماتا
(
بەزىلەر زورلاپ ساتا،)
توۋا دەيمەن، توۋا!

بۇ گەپلەر تېخى ئازدەك،
ئۇچىغا چىققان مازدەك،
سۈرۈشتۈرۈپ ئۇستىخان،
‹‹ مەن پالانى، سەن پالان،
مېنىڭ ئەسلىم ئېسىل زات،
ئېسىللىكتە تاپقان ئات.
پالانچى ئۆزى كىمكەن،
ئۇ مېنىڭ تېڭىممىكەن؟››
دەيدىغان لاۋزىلىقلار
ئەدەپ قاپتۇ خېلىلا،
توۋا دەيمەن، توۋا!

يەنە قاراپ نەسەبكە،
مەرتىۋە ھەم مەنسەپكە،
تۆرمۇ تالىشىدىغان بولدۇق
سۈزەڭگۈر خېنىملاردەك،
ئولتۇرىشىمىزمۇ قالتىس،
غادايغان بېگىملاردەك.
قايسىبىرىنى ئېيتاي،
توۋا دەيمەن، توۋا !

بايىز

ھازىر جەمىيىتىمىزدە بۇنداق ئىشلار ناھايىتى كۆپ. ھەم كۆپىيىۋاتىدۇ، بىز بۇنداق ئشلاردىن قول ئۈزۈپ، ساۋاپلىق ئشلارنى كۆپرەك قىلساق بولاتتى.

زەپەر

ئابدىرەھىم ئۆتكۈرنىڭ شىئېرلىرىنى مەنمۇ بەك ياقتۇراتتىم . رەخمەت سىزگە

مەرىپەت

ياخشى يېزىلغان شئېركەن.

ئۇستاز

چاشما شىئېرنىڭ نوچىسىكەن، ئوقۇغانسىرى ئوقۇغۇسى كىلىدىغان.
مەرھۇم ئابدۇرېھىم ئاكىمىز ھازىر ئارىمىشدا بولغان بولسا يەنە نورغۇنلىغان ئىشلارغا « توۋا» ئېيتىپ كىتەر بولغىيدى.

ئامان

ياخشى شېئىركەن، ئۆتكۈر ئەپەندىنىڭ ئەسەرلىرى ھەقىقەتەن ئادەمنى ئۆزىگە جەلىپ قىلىدۇ. رەخمەت سىزگە.

گۇلزار

ھەقىقەتەن ياخشى شېئىركەن . مەنمۇ مەرھۈم ئۆتكۈر ئەپەندىمنىڭ  شېئىرلىرىنى بەكمۇ ياقتۇرىمەن . ئۇنىڭ شېئىرلىرىدا كىشىلىك تۇرمۇشتىكى رەزىل قىلمىشلار پاش قىلىنىدۇ ھەم كىشىلەرنى ئىبرەت ئېلىشقا ئۈندەيدۇ .
رەھمەت سىزگە بىزگە ئېسىل شېئىرلارنى ئوقۇش پۇرسىتى بەردىڭىز .

گۇلزار

ھەقىقەتەن ياخشى شېئىركەن . مەنمۇ مەرھۈم ئالىمىمىزنىڭ شېئىرلىرىنى بەكمۇ ياقتۇرىمەن . ئۇنىڭ شېئىرلىرىدا كىشىلىك تۇرمۇشتىكى رەزىل قىلمىشلار پاش قىلىنىدۇ ھەم كىشىلەرنى ئىبرەت ئېلىشقا ئۈندەيدۇ .
رەھمەت سىزگە بىزگە ئېسىل شېئىرلارنى ئوقۇش پۇرسىتى بەردىڭىز .

bowak

توۋا