بىر يۈرۈش شېئىرلار
شېئىرلار
مەمتىمىن بارى
قانداق ئۇنتاي
تۆكۈلىدۇ لېۋىڭدىن كۈلكە ،
كۆزلىرىڭدە ئىللىق تەبەسسۇم .
خۇشال بولدۇڭ ، خۇشاللىقىمدىن ،
سەن مېنىڭكى ئەركە شوخ قۇشۇم .
گۈل پۇرايدۇ ، ئەتىر پۇرايدۇ ،
ھىدلىسام مەن تىنىقلىرىڭنى .
كېتىپ قالساڭ قانداق ئۇنۇتاي ،
سېنىڭ تاتلىق قىلىقلىرىڭنى .
تار كوچىدا يۈرمە تەمتىرەپ
ھاڭ-تاڭ قالدىڭ ئىشىكنى ئاچسام ،
مەلۇم بولدى خاتا چەككىنىڭ .
پەيدا قىلدى كۆڭلۈمدە گۇمان ،
كۈپكۈندۈزدە ئېزىپ كەتكىنىڭ .
كەلگىنىڭ يوق بىراۋنى ئىزدەپ ،
يوشۇرۇنغان غەيرىي ئوي-خىيال .
دۇچ كەلگەچكە توساتتىن ماڭا ،
بولۇپ قالدىڭ ئىنتايىن ئوسال .
خەير ، ساڭا بەرمەي تونۇشلۇق ،
خىجالەتتە قالما ئۈستىلەپ .
داغ چۈشمىسۇن نامىڭغا سېنىڭ ،
تار كوچىدا يۈرمە تەمتىرەپ .
چىشلىسە
چىشىم ئاغرىپ دوختۇرغا بارسام ،
يۇلۇۋەتتى ئۇتتۇر چىشىمنى .
پەسەيمىدى ئاغرىقى دېسەم ،
مەھكەم چىشلە ، دېدى لېۋىڭنى .
ئۇتتۇر چىشىم بولمىسا مېنىڭ ،
ئەمدى قانداق چىشلىيەلەيمەن .
سېستىرا قىز چۈشكەندە ئىشتىن ،
ئۆزى كېلىپ چىشلىسە دەيمەن .
يېرىم چېلەك سۇ
شالاقلايدۇ يېرىم چېلەك سۇ ،
(ئۆزىگە خاس خۇسۇسىيەت ئۇ ) .
تولا مكرەپ ئارام بەرمەيدۇ ،
ئارقان ئۈزۈپ سۈتسىز ئىنەكمۇ .
ئادەملەرنىڭ ئىچىدىمۇ بار ،
ھايۋاناتنى دورايدىغانلار ،
تۆت سەر ئىچسە خۇدىنى بىلمەي ،
ئىنەك ئوخشاش مۆرەيدىغانلار .
ئىككى شېئىر
ئابىلجان ھېيىت
گۈزەللىك
تەشنا ئۈچۈن بىر چىنە سۇ ئۇ ،
سۇ ئىچىدە ئۈزگەن ھىلالئاي .
ئەينەكتىكى نەۋ ، يېشىل كۈي ئۇ ،
چېقىلىشتىن بۇرۇنقى خىيال .
چۆل-دەشىت ئۇچۇم كېيىك ئىزى ئۇ ،
ئىزچىلارنىڭ قەلبىدە ئاققۇ ،
چىڭ باغلانغان بۈركۈت قارىچۇقى .
زەر قۇياشنى ئۇزىتىپ قويۇپ ،
يالغۇز تالغا يۆلىنىپ تۇرۇپ ،
گۇگۇم چەككەن تاماكا چوغى .
كۆزلىرىڭدە كۆيگەندە ئىشىق ،
يۈرىكىڭىنى قولۇڭدا تۇتۇپ ،
ئايلانغاندا يار كوچىسىنى .
مەيلى راھەت ، مەيلى ئازابتىن ،
تىنىپ قالساڭ ئەگەر بىر تىنىق ،
ئېسىپ ئالسا يار گەر بىر تىزىق ،
ئۇۋىلار ئۇ كۇكۇم ۋە كۇكۇم ،
سىلىغاندا يار ئۇچىسىنى .
ئېچىلغان سىر گۈزەل تۇيۇلماس ،
قۇرۇق شاختا نازلىق مۇئەمما .
مەيلى خانلىق ، مەيلى گادايلىق ،
يوق كۆزىدە گۈزەللىك نېمە ،
توق قەلبىدە ئۇ نۇردۇر ، زىيا !
گۈزەللىك ئۇ شۇنداق مۆجىزات ،
ئۇ قىچقارماس سېنى بىر نۆۋەت .
پۈتۈن ئۆمرۈڭ ئۇنىڭ كەينىدە ،
ساما سالار ئەبەدىلئەبەت ...
ياشايمەن شۇنداق
كۆپ بولسىمۇ ساڭا كۆيگەنلەر ،
سەن پەقەتلا ماڭا جان ئىدىڭ .
مەن ھەر كۈنلۈك جاھان بولساممۇ ،
ماڭا پەقەت سەن جاھان ئىدىڭ .
جىمى جاھان مەن تەرەپ بولسا ،
مەن سەن تەرەپ بولىمەن شۇئان .
ئەگىپ كەلسە كېچە بېشىڭغا ،
چېچىلىمەن تاڭ بولۇپ شۇئان .
سېنىڭ رەڭگىڭ تالاشتا قالسا ،
مەن بۇياندا تالىشىمەن جان .
سۆيەلمىسەم لېۋىڭ كۈيىنى ،
زارلاپ چىقار بۇجان ، بۇ جاھان .
جان ئىچىدە جاھاندا بىر سەن ،
جانان ماڭا ، جاھان سەن ماڭا .
ياشا دېسەڭ ، شۇنداق ياشايمەن ،
تەنە قەسىتنى كۆرسەڭمۇ ناۋا .
خەۋەر يوق
ماخمۇتجان خوجا ئۈمىدۋار
سېنى ئىزدەپ مەن كەزمىگەن شەھەر يوق ،
كۆككە بېقىپ ياش تۆكمىگەن سەھەر يوق .
كەلدى شۇنچە يىراق كەتكەن تۇرنىلار ،
بىراق سەندىن ھازىرغىچە خەۋەر يوق .
يېشىل ياپراق خازانلارغا ئايلاندى ،
ئېگىز تاغلار توزانلارغا ئايلاندى .
دەردلىك ئاھىم گۈلخانلارغا ئايلاندى ،
بىراق سەندى ھازىرغىچە خەۋەر يوق .
دەريالارنىڭ مەنزىلى بار يىراقتا ،
سېنى كۈتۈپ خىيالدىمەن قىرغاقتا .
گۈل ياشلىقىم ئوخشاپ قالدى توزغاققا ،
بىراق سەندىن ھازىرغىچە خەۋەر يوق .
مەنبە-« شىنجاڭ ياشلىرى »2010/5
ئىككى شېئىر
ئايسىمە ئىدرىس
قىزىل رەڭنى ياخشى كۆرىسەن
« قىزىل رەڭگە پۈركەنگىن دەيسەن » ،
قىزىل ئالما ماڭا سوۋغىتىڭ .
قىزارغىنىم ئېسىمدە ، دائىم –
پىچىرلىسا بىر تاتلىق لېۋىڭ .
قىزىل كۆڭلەك كىيگەن ئاخشامدا ،
تولدى قەلبىم بەخىتكىلا لىق .
يوللىرىمدا قىزىل پايانداز ،
بوسۇغاڭدىن ئاتلىدىم ئىللىق .
قىزىل گۈللۈك ئوماق پىيالە ،
ئۆمرىمىزگە تۇز بىلەن گۇۋا .
قىزىل گىلەم ، قىزىل كۆرپىدە ،
قىزىل يۈرەك بەردى كۆپ دۇئا .
بەرگلىرى توق-توق ئېچىلغان ،
قىزىل غۇنچە تۇتتۇم مەنمۇ ھەم .
مۇھەببەتنىڭ ئېتىزلىقىدا ،
پەرۋىشلىگىن ئۇنى پەم بىلەن .
بۇغداي باش تارتتى
سەن كېتەردە بۇغدايزارلىقتا ،
قىروۋ قونغان ئاپپاق ، يېقىملىق ،
قىش قوللىرى بولسىمۇ سوغۇق ،
ھىجرانلىرىڭ تۇيۇلغان ئىللىق .
« قارىمىدىم » دېسەم يالغاندۇر ،
ئۇپراپ كەتتى بوسۇغا بۈگۈن .
چېچەكلەردە مۇھەببەت ھىدى ،
مارت ئايلىرى ئەجەپمۇ گۈلگۈن .
دەردلىرىمنى تالاشتى يامغۇر ،
مامكاپلارغا ئالەم ھۆسنى جەم .
باغلار بىلەن باغاشلىنىمەن ،
يۈرىكىمدە سەن قالدۇرغان تەم .
باش تارتىپتۇ بۇغدايلار بىلگىن ،
ئورمىلىققا بارغۇم يوق تەنھا .
ئاھۇ بولۇپ ئىزدېسەم سېنى ،
ئورغاق تۇتۇپ كېلەمسەن قايتا ؟!
مەنبە-« شىنجاڭ ياشلىرى »2010/5 | 
قىزغىنلىق
تىللا
تۆھپە
شۆھرەت
يوللىغان ۋاقتى 2012-9-2 16:44:18
يوللىغان ۋاقتى 2012-9-2 18:15:05