ئون مىنۇتلۇق ھايات

saba007

  

ئون مىنۇتلۇق ھايات

بىر دادا بالىسى بىلەن مۇنداق بىر ئويۇن ئوينىدى: ئۇلار 10 مىنۇتنى ئادەمنىڭ بىر ئۆمرىگە ۋەكىل قىلىپ، بۇ 10 مىنۇت ئىچىدە ئىككىلىسى بىردىن كىتابنى ئېلىپ، كىتاب ئىچىدىن كىم <<ئالتۇن>> دېگەن سۆزنى ئەڭ كۆپ تاپسا، شۇ يەڭگەن بولىدۇ، دەپ شەرت قويۇشتى.
ۋاقىت خاتىرىلەش باشلاندى!
دادا بالا دەرھال كىتابتىن <<ئالتۇن>> ئىزدەشكە كىرىشىپ كەتتى.
بىر مىنۇتتىن كېيىن ئوغلى:
-مەن بىرنى تاپتىم!-دېگىنىچە خۇشاللىقىدىن توۋلىۋەتتى.
- مەنمۇ بىرنى تاپتىم، -دەپ ۋارقىرىدى دادىسىمۇ.
بەش مىنۇتتىن كېيىن ئوغلى يەنە:
-ئۈچىنچىسىنى تاپتىم! - دەپ توۋلىدى. بۇ چاغدا دادىسى:
- بۇ كىتابتا <<ئالتۇن>> دېگەن سۆز نېمانچە ئازدۇ؟-دېۋىدى، ئوغلى كۆرەڭلىگىنىچە:
- تاپالمايسەن! تەپسىلىي ئىزدە! - دېدى.
- سائەت چېكىلدىغىنىچە مېڭىپ، رەقەملەر تېزلىك بىلەن ئىلگىرىلىمەكتە.
ۋاقىت 8-مىنۇتىغا بارغاندا ئوغلىنىڭ تاپقان <<ئالتۇن>>ئى 10 بولدى، دادىسىنىڭ پەقەت تۆتلا ئىدى.
-دادا، يېڭىلدىڭىز، -دېدى ئوغلى دادىسىغا قاراپ. دادىسى باش لىڭشىتقىنىچە:
- يېڭىلگەنلىكىمنى ئېتىراپ قىلىمەن، بىراق سەن ئاشۇ تاپقان ئالتۇنلىرىڭنى نېمىگە ئىشلىتىلىشنى ئويلاپ باقتىڭمۇ؟ - دەپ ئوغلىغا سوئال قويدى. ئوغلى بىر ئاز ئويلىنىپ كەتكەندىن كېيىن:
- مەن بىر چوڭ شاكىلات، ئويۇنچۇق، بىر مۇسابىقە ۋېلىسىپىتى سېتىۋالاي دەيمەن. يەنە تېخى مىسىرغا بېرىپ ئېھرامنى كۆرۈپ كەلسەم دەيمەن...
دادىسى سائەتنىڭ كۆرسەتكۈچىسىگە قاراپ ئوغلىغا ئىشارەت قىلىپ قويدى. سائەت توققۇز مىنۇت 10 سېكۇنتنى كۆرسىتىپ تۇراتتى.
- ئوغلۇم سېنىڭ ئارزۇلىرىڭ ئەمەلىيەتكە ئۇيغۇن ئەمەس. سەن ئاللىبۇرۇن <<ياشىنىپ>> قالدىڭ، شاكىلات يېيىشكە جۈرئەت قىلالمايسەن، مۇسابىقە ۋېلىسىپىتىنىمۇ قوزغىيالمايسەن، ئېھرامنىمۇ كۆرەلمەيسەن. - مانا ۋاقىتمۇ توققۇز مىنۇت 40 سېكۇنتقا بېرىپ قاپتۇ، 10 مىنۇتلۇق ھاياتىڭ ئەنە شۇنداق ناھايىتى تېزلا ئاخىرلىشىپ قالدى.
ئوغلى دادىسىنىڭ سۆزىنى ئاڭلاپ دادىسىغا تىكىلگىنىچە ھاڭۋېقىپ تۇرۇپ قالدى. دادىسى سۆزىنى داۋاملاشتۇردى:
- سەن ئالتۇن ئىزدەش ئۈچۈن ئۆمرۈڭنىڭ يېرىمىدىن كۆپرەكىنى سەرپ قىلىۋەتتىڭ، بىراق سېنىڭ ئۇنىڭدىن بەھرىمەن بولالىشىڭ ناتايىن. ئەمەلىيەتتە ئالتۇن قىممەت ئەمەس، ئەڭ قىممەت نەرسە ۋاقىت، ئۇ ھەر بىر ئادەمنىڭ ئاخىرقى بايلىقىدۇر.

مەنبە:توردۇنياسى

ئوتلۇق

بەك ياخشى .ماقالىكەن بۇ .  دەرىستە ئوقۇغۇچىلارغا سۆزلەپ بەرسەك ئەرزىيدىكەن . تەربىيىۋى ئەھمىيىتى باركەن . رەھمەت بورادەر .

◤pari◥

تەربىيىۋى ئەھمىيىتى بەكلا ياخشىكەن ،داۋاملىق مۇشۇنداق ياخشى تېمىلارنى يوللاپ تۇرغايسىز ،رەھمەت

umid0998

ھەقىقەتەن تەربىيۋى ئەھمىيتى چوڭقۇر ئەسەركەن، رەھمەت سىزگە. مەنمۇ چوڭقۇر تەربىيگە ئىگە بولدۇم