ئۈرۈمچىنىڭ سورۇنى

alahidin

ئۈرۈمچىنىڭ سورۇنى

ئالاھىدىن ئابدۇرېشىت

تارتتىم سېنى سۈرەتكە ئۈرۈمچىنىڭ سورۇنى،
تولۇپ قەلبىم ھەيرەتكە ئۈرۈمچىنىڭ سورۇنى،
جەننەت دېسە راست دەپتىم كۆرمەي تۇرۇپ بىر چاغلار،
ئوخشىماسكەن جەننەتكە ئۈرۈمچىنىڭ سورۇنى.

چىقار ئىكەن ئالدىڭغا باغلىغاندەك بويۇندىن،
خەۋەرسىزكەن سەن بىلەن يېگەن-ئىچكەن ئويۇندىن،
سۆزلەر ئىكەن ھېكايەت ئۆيدە چىققان قۇيۇندىن،
نامرات ئىكەن ھۆرمەتكە ئۈرۈمچىنىڭ سورۇنى.

كۆرىنەركەن دەسلىپى تەلمۈرگەندەك يولۇڭغا،
ئۈلگىرەركەن شۇئانلا كۆز يۈگۈرتۈپ قولۇڭغا،
پىچاق، بادام، گۈلە-قاق، ھەمياندىكى پۇلۇڭغا،
تەشنا ئىكەن«ھىممەت»كە ئۈرۈمچىنىڭ سورۇنى.

سالسا ئەگەر داستىخان ساڭا بەشى-ئالتىسى،
پۇلنى تۆلەپ قايتاركەن ئەقلى كۇتا-كالتىسى،
بىلىۋالدىم، شۇنداقكەن ساھىبخاننىڭ قالتىسى!
بېخىل ئىكەن ئۈلپەتكە ئۈرۈمچىنىڭ سورۇنى.

ئاغزىڭ تېخى تەگمەستە بىر پىيالە چېيىغا،
«توشمىدى» دەپ قاخشاركەن بۇ خۇدانىڭ ئېيىغا،
يادا ئىكەن مۇشۇ گەپ كەمبىغىلى-بېيىغا،
كەلسىمۇ كۆپ غەيرەتكە ئۈرۈمچىنىڭ سورۇنى.

«بىرى كەپتۇ قەشقەردىن ئاران يولغا سالدۇق» دەپ،
«بىرى كەپتۇ غۇلجىدىن ئىككى كېچە چالدۇق» دەپ،
«بىرى كەپتۇ خوتەندىن جاننى چەتكە ئالدۇق»دەپ،
لىقكەن دەرتكە-ھەسرەتكە ئۈرۈمچىنىڭ سورۇنى.

ئۆي ھەققىدە بىرلىرى باشلىۋالسا پاراڭنى،
ئەسلىتەركەن بىرلىرى كاپىلداشتا ساراڭنى،
سېنى ئويلاپ قويماسكەن كۆرمىگەندەك قاراڭنى،
باب كەلمەسكەن سۆھبەتكە ئۈرۈمچىنىڭ سورۇنى.

گەپنى شائىر، ئالىمدىن باشلار ئىكەن بىرلىرى،
تۆكۈلەركەن كۆڭۈلنىڭ نىجاسىتى-كىرلىرى،
ئېچىلاركەن دۇنيانىڭ«تىلسىملىرى-سىرلىرى»،
پەۋەس ئىكەن غەيۋەتكە ئۈرۈمچىنىڭ سورۇنى.

«شائىر ئەمەس ئوسمانجان، تاھىر تالىپ قوشاقچى،
باغراش دېگەن ھېچنېمە، ئابدۇقادىر بوياقچى،
‹ئا›دېگىنىڭ يالاقچى،‹ب›دېگىنىڭ پوداقچى..»
سېزىك ئىكەن شۆھرەتكە ئۈرۈمچىنىڭ سورۇنى.

ئولتۇراركەن چوكانلار بۇرغا تارتىپ يېنىڭدا،
شەيتانلارنى قۇترىتىپ«يۇمۇر» بىلەن قېنىڭدا،
سەنمۇ كۆرۈپ قالارسەن بۇ ئۆلمىگەن جېنىڭدا،
سورۇن ئىكەن شەھۋەتكە ئۈرۈمچىنىڭ سورۇنى
.
قېرىغاننى بىلمەسكەن يا سورۇندا قېرىسى،
ئاجايىپكەن ھاراققا تېخى ھەۋەس-ھېرىسى،
تاڭ سەھەردە بېرىسى، مەسكەن كەچتە نېرىسى،
ئاھانەتكەن مىللەتكە ئۈرۈمچىنىڭ سورۇنى.

سورۇن دېگەن ئەركەكنى چاندۇرالماس ئەسلىدە،
مېھمان دېگەن ئۇيغۇرنى ياندۇرالماس ئەسلىدە،
پۇل دېگەن ئۇ، دوستلارنى تاندۇرالماس ئەسلىدە،
لايىق ئىكەن لەنەتكە ئۈرۈمچىنىڭ سورۇنى!

كەپسىز0

ئالاھىدىن ئەپەندى،بۇشىېرلىرىڭىز بىزنىڭ مىللىتىمىز ئارسىدىكى بىرقىسىم ناكەسلەرگە ،ياخشى بولغان تەنقىت بوپتۇ.رەھمەت سىزگە.

saba007

شۇڭا  ئۈرۈمچىگە بارمايدىكەنمىز دە بىرادەر.
ھۆرمەتلىك ئالاھىدىن ئەپەندىم  يالقۇنلۇق شىئېرلىرىڭىز بىلەن بايقاشنى نۇرلاندۇرغان ئىدىڭىز.... بۇ نۆۋەت جاپاكەش ئوقۇتقۇچىلار ئۈچۈن مۇھىم بولغان ماتىرياللارنى يوللاپ تولىمۇ ياخشى قىپسىز .سىزنىڭ ئەجىرىڭىزگە كۆپتىن-كۆپ رەخمەت....

ئوتلۇق

مۇنبىرىمىزدىكى «قامچا » بۇلۇشقا مۇناسىپكەنسىز. شىئېرلىرىڭىز بەك ئۆتكۇر پىكىرلىك ،كىشىنى قايىل قىلارلىق بوپتۇ .

tursun123

بۇرادەر، سىز ئۈرۈمچىدىكى بىر قىسىم يولداشلىرىمىزنىڭ مېھمان كۈتۈش جەريانلىرىنى خېلى ئوبدان تەتقىق قىپسىز، راست سىز دىگەندەك مېھمان كۈتىدىغانلار ئۈرۈمچىدە ئاز ئەمەس،ئەمما ئۇلار يۇرتلىرىغا،باشقا شەھەر،ناھىيە يېزىلارغا كەلگەندە مېھمان بولۇشقانلىرىنى ئۇنتۇپ قالىدىغان ئوخشايدۇ.........، شۇ چاغدىكى تەكلىپ قېلىشلىرىنى ئاڭلىساققۇ بېرىپ قالساق ئايرۇپىلاندا ئۇچۇرۇدىغاندەك گەپ قىلىشىدۇ.....، بولدىلا بۇرادەر، كۆرگىنىڭدىن كۆپ كۆ رمىگىنىڭ،كۆرمىگەننى كۆرىسەن ئۆلمىگىنڭ.

شۇلار كېپ قالسا يەنە قوي سويۇپ مېھمان قىلامدۇق؟؟؟