مەشرەپ شېئىرلىرىدىن تاللانما
1
يارنىڭ كويىدا ئۆلگەن بارمىكىن ،
بارمىكىن بىر ئۆلۈپ ئىككى تىرىلگەن .
ۋەسلىنى ئىزلەپ جاھاندا جەرخ ئۇرۇپ ،
تەلمۈرۈپ يوللاردا قالغان بارمىكىن.
قەتلى قىلماققا يەنە كىم تەڭلەشىپ ،
يالۋۇرۇپ بوينىنى سۇنغان بارمىكىن.
شاھبازى (1) مەرىپەت سۇلتانى ئىشىق ،
تەپىل (2) ئۇرۇپ دالبايغا(3) قونغان بارمىكىن .
داد ئېتار مەشرەپ خۇدانىڭ ئالدىدە ،
ئول زامان دادىغا يەتكەن بارمىكىن .
---------------------------------------------------------
(1) شاھبازى- شاھلارنىڭ قۇش ئوينىشى
(2) تەپىل – دۇمباق ، ناغرا
(3)دالباي –قونىدىغان جاي (قوندان )
2
كۆرسەت جامالىڭ مەستانىلەرگە
ئىشقىڭدا كۆيگەن پەرۋانىلەرگە
مەندىن دۇئادۇر سەندىن ئىجابەت
جانىم تەسەددۇق جانانىلەرگە
ئەي باغرى قاتتىق رەھىم ئەيلىمەسسەن
قىلغىن نەزارە(1) بىچارىلەرگە
مەشرەپ سىنى دەپ كەچتى جاھاندىن
باشىنى قويدى ئاستانىلەرگە
ــــــــــــــــــــــــــــــــــــــــــــــــــــــــــــــــــــــ
(1) نەزارە – قارىماق - باقماق
(2)ئاستانە - بوسۇغا
3
كۆردۈم يۈزۈڭنى دىۋانە بولدۇم ،
ئەقلى ھۇشۇمدىن يىگانە بولدۇم .
تارتسام جاپالار ، ئۆلسەم كۆيۈڭدە ،
تاپماي مەن ئۇنى جۇيانە بولدۇم .
كەۋسەر شارابى يادىمغا كەلمەس ،
لەئىلى لىۋىڭدىن مەستانە بولدۇم .
كۆردۈم چۈشۈمدە شەمئى جامالىڭ ،
كۆيدۈمۇ - ياندىم پەرۋانە بولدۇم .
يۇمدۇم كۆزۈمنى سەندىن بۆلەكتىن ،
كەچتىم بارىدىن ، رىندانە (2) بولدۇم .
ئىشقىڭ مەيىغە پۇر بولدى جىسمىم ،
ھەم ساقيىۇ ھەم پەيمانە بولدۇم .
بولدۇم فەنا مەن تۇپراق ئىچىدە ،
بىر دانە ئەردىم مىڭ دانە بولدۇم .
ئول يۈز ئوتىدىن تەن بەلدى نابۇت ،
جان جانغا يەتتى ، جانانە بولدۇم .
كافىر (3) كۆزىڭدىن ھەر يانە بىر ئوق ،
تەگدى يۈرەككە ۋەيرانە بولدۇم .
قويماس دىدىلەر مەئمۇر (4) بولدۇم ،
ئاۋات ئەردىم ۋەيرانە بولدۇم .
مەشرەپكە مەي سۇن ، كىرسۇن قەدەىكە ،
مەسچىت ئىچىدە بۇتخانە بولدۇم .
ــــــــــــــــــــــــــــــــــــــــــــــــــــــــــــــــــــــ
(1) جۇيانە - ئىزىلگۈچى .
(2) رىندانە بولدۇم - ئازات بولدۇم ، قۇتۇلدۇم .
(3) كافىر - نىمەتكە شۈكۈر قىلمىغۇچى .
(4) مەئمۇر - ئاۋات .
4
ھەركىشىنىڭ دەردى بولسە يىغلاسۇن يار ئالدىدە ،
قالمىسۇن ئارمان يۈرەكتە ، ئەيىتسۇن ئىزھار ئالدىدە .
ئەندەلىبى (1) بى نەۋادەك نالەيۇ ئەفغان بىلە ،
دائىمە يىغلاپ تۇرارمەن ئەينى (2) گۈلزار ئالدىدە .
مەنسۇرى ھەللاجىدەك ئىچىپ شارابى ئەنتەھۇر (3)،
چەرخ ئۇرۇپ يىغلاپ تۇرارمەن ئۇشبۇ دەم دار ئالدىدە .
ھەر كىشى بىر جۇرئەتى (4) ئەيلىسە بۇ بادەدىن ،
ئول قىيامەتتە قىلۇر ئەرزىنى جەببار (5) ئالدىدە .
تەلبە مەشرەپ قىلمىغىل سىرىڭنى زاھىدغە ئايان ،
ئەيتىڭ - ئەيتىپ يىغلاغايسەن ئاشىقى زار ئالىدە .
ــــــــــــــــــــــــــــــــــــــــــــــــــــــــــــــــــــــ
(1) ئەندەلىپ - بۇلبۇل .
(2) ئەيىن - ھەقىقى كۆز ، بۇلاق .
(3) ئەنتەھۇر - جەننەت . شارابى ئەنتەھۇر - جەننەت شارابى .
(4) جۈرئەت - يۇتۇم .
(5) جەببار - ھۆكۈم يۈرگۈزگۈچى (خۇدانىڭ بىر ئىسمى )
5
ھەزىرتى ئادەم بىنا بولغاندە مەن بىللە ئىدىم ،
ھەق رەسۇل مىراجىغە(1) چىققاندا مەن بىللە ئىدىم .
چۈن خەلىل ئاتەشكە كىردى ، ئوتنى پەرۋا قىلمىدى ،
ئوتنى بوستان ئەيلەگەن ، گۈلشەندە مەن بىللە ئىدىم .
ھەزىرتى ياقۇپنى كور ، يۈسۈپ ئۈچۈن قان يىغلادى ،
تاجۇ - تەخىتى دەۋلەتتىن قىسقاندا مەن بىللە ئىدىم .
زىكىرىيانىڭ باشىغە ھەرە قويۇپ پارە ئەيلىدى ،
زىكرى ھەقنى دىلغا جا قىلغاندا مەن بىللە ئىدىم .
چۈن ئەنەلھەق دىدىلەر ، مەنسۇرنى دارغا ئاستىلەر،
قان بىلەن مەنسۇر يۈزىن يۇۋغاندا مەن بىللە ئىدىم .
مەشرەبا لاپ ئۇرمەغىل ، قىلغان سۆزۈڭگە تۆۋبە قىل ،
گەر خۇدا لۇتف(2) ئەيلەسە ، رۇھىمدا مەن بىللە ئىدىم .
ــــــــــــــــــــــــــــــــــــــــــــــــــــــــــــــــــــــ
6
مەرىپەتنىڭ گۈلزارى موللا بازار دېۋانە ،
ئاشىقلارنىڭ سەردارى موللا بازار دېۋانە .
يوقتۇر ئەسلا گىيىنەسى (1) ،بەھرى ئېرفان (2) سىينەسى ،
نۇرى ھەق ئايىنەسى (3) موللا بازار دىۋانە .
يول ئۈستىدە پۇل(4) بولغان ھەق نۇرىغا مۇل بولغان ،
كىمنى كۆرسە قۇل بولغان موللا بازار دىۋانە.
جايلاردۇر نەمەنگان ، ھەق يولىدا جان بەرگەن ،
مۇردلاردىن سىنالغان موللا بازار دىۋانە .
ئىچىلاردۇر تولا نۇر ، پىرلاردۇر باھادۇر ،
بۇخارادا ئول مەشھۇر موللا بازار دېۋانە .
مەشرەپ ئۆزى دېۋانە ، ئىشىق ئوتىغە پەرۋانە ،
يول يۈرەدۇر سەرسانە ، موللا بازار دېۋانە
ــــــــــــــــــــــــــــــــــــــــــــــــــــــــــــــــــ
(1) گىيىنە - ئاداۋەت .
(2) بەھرى ئېرفان - بىلىم دىڭىزى .
(3) ئايىنەسى - ئەينىكى .
(4) پۇل - كۆۋرۈك .
7
نەمەنگان شەھرىدىن كەتسەم ، مېنى يوقلار كىشىم بارمۇ؟
غېرىپلىق شەھرىدە يۈرسەم ، مېنى يوقلار كىشىم بارمۇ ؟
مۇھەببەت شەرپىدىن ئىچتىم ، قازاندەك قاينىدىم تاشتىم .
بۇفانى دۇنيادىن كەچتىم مېنى يوقلار كىشىم بارمۇ ؟
توشۇپتۇر باشىمە سەۋدا ، رۇممۇزى (1) ئىشقىدىن غەۋغا ،
ئۆزىگە ئەيلىدى شەيدا ، مېنى يوقلار كىشىم بارمۇ ؟
تۇرارغە تاقىتىم يوقتۇر ، يۈرەغە ھالىتىم يوقتۇر ،
يۈرەكتە ئىشىق ئوتى كۆپتۇر ، مېنى يوقلار كىشىم بارمۇ ؟
قارارىم يوق تۇراي دېسەم ، نەمەنگاندە يۈرەي دېسەم ،
جاھاننى سەيىر ئېتىپ كەزسەم ، مېنى يوقلار كىشىم بارمۇ ؟
بۇ مىسكىن زارى مەشرەپنىڭ كىشى ھالىنى بىلمەيدۇ ؟
بۇ يەردىن باش ئېلىپ كەتسەم ، مېنى يوقلار كىشىم بارمۇ ؟
ــــــــــــــــــــــــــــــــــــــــــــــــــــــــــــــــــ
(1) رۇمۇز - ئالامەت ، نىشان ، بەلگە .
8
يىغلاسام ۋاقتى دۇئا بولغايمۇكىن ،
كۆز ياشىم دەرتكە داۋا بولغايمۇكىن .
بادەئى ئىشقى مۇھەببەت ئىچىپ ،
شەۋكىتى دۇنيا جۇدا بولغايمۇكىن .
باش ئۇرا (1) كالدىم سېنىڭ دەرگاھىڭگە ،
بىر مەدەتكارىم خۇدا بولغايمىكىن .
يىغلاماقتىن ماڭا ئىمكان قالمادى ،
ياردىن ماڭا نىدا(2) بولغايمۇكىن .
قايسى بىر دەردىمنى ئېتاي دوستلار ،
ئۆلمەيىن دەردىم ئادا بولغايمۇكىن .
يار كۆيدۈردى مېنى ھالىم خاراپ ،
ئەرز ئېتارىغە داد ئېيتىپ بولغايمۇكىن .
تەلبە مەشرەپ يىغلايۇر يا رەببەنا ،
رەببيەل ئەلا (3) دېسەم بولغايمۇكىن .
ــــــــــــــــــــــــــــــــــــــــــــــــــــــــــــــــــ
(1) باش ئۇرا - باش ئۇرۇپ
(2) نىدا - ئاۋاز ، ئۈن .
(3) رەببيەل ئەلا - خۇدا ھەممىدىن ئالى
مەنبە: ساقلىۋالغانلىرىم... | 
قىزغىنلىق
تىللا
تۆھپە
شۆھرەت
يوللىغان ۋاقتى 2012-8-29 11:29:02
يوللىغان ۋاقتى 2012-8-29 15:16:57
يوللىغان ۋاقتى 2012-8-29 15:46:53
يوللىغان ۋاقتى 2012-8-29 18:26:15
